Azáya 51 - Bokyi Bible

Byiraa ḿbyí byidafé Jerúsélem Dyityém

¹ Óburúkpâbí o/fu, fwôo n̂g atông ba-jwo mě, ben mú bamu ba-ryuu ng ba/fu, me nnyii běn, ben mú bamu ba-bâ ba-kâm m mě ba/fu, me nchwáp běn. Kabe n̂g kyi-kim ne buká ḿbú ben ba/fím ké mbú, kyi-kim ne kyikit-aká ńkyí ba/sím běn ba-fîm.

² Kabe n̂g kyi-kim ne Ébarahâm mú bonchí enen mú kpákpá ne kyi-kim ne Sirá mú o/fwon běn kángkáng. Ké nkéré mú me n/kó Ébarahâm, nyǐ o/mû o*fí ne wǎn* nké me n/jware ǎ, n-kye ǎ bwǎn. Me n/chi kyikû-banet enen kyi-jê.

³ Me n/chi n-ri Jerúsélem ne kángkáng banet ḿbé mbe ba-kyú u ké biǐbwô-byise emen bafip. Nang ké esí nyí Jerúsélem nyi kyikim-dyikán, me n/chi n-chi kányí e-firi kyifát, wǎ kyifát ńkyí n/chi ké Édin. Bunyîn-dyityém bu/chi bu-kyú ányi, ne banet ba/chi ba-kwán ekwan-akpee ne asǎma ekó ba-kye mě.

⁴ Banet ejí, fwôo n̂g atông ba-jwo mě. Fwôo n̂g atông ba-jwo ńkyí me mu n-sét ng. Me n-tángê e banet byiraa ejí. Byije ejí byi/chi byi-bâ kámbé ne kiinwángé.

⁵ Me n/chi m-bâ babap m-ba-nyii kámbé. Nkéré mú me n/chi m-kpógê oo/fárâng. Me oyén n/chi n-kyú Otu mú ejíí emúmú. Eshê nyí tíbítíbí nyi e-bám m mě e/fu, me mbâ. Nyi e-bám m ne okabe e/fu, me mba-nyii kámbé.

⁶ Tún n̂ achi kyíbóng, ba-tún to kyísí. Bubóng bu/chi bu-rím wǎ arúkwâ. Ejíí e/chi e-kâa wǎ okâa-kyídí, ne kángkáng banet emen ba/chi ba-kpú wǎ ecincing. Nké onyii-banet mú me n/chi m-bâ ne mǔ o/chi o-waa ne banyá. Dyikpóge ńdyí me n/chi m-kpógê dyi/chi dyi-kyú nkuli kyikû.

⁷ Ben mú bamu ba-nyît ng ńkyí nkyi kanong, fwôo n̂g atông ba-jwo mě, mú baa/kúng byiraa ejí ḿbyí n/tángê běn ba-fé ké atyém. *Da n̂g echi ba-shî* â banet ba-kú ba-jwó ng běn* ba-kyâ běn edángé*.

⁸ Mbé ba/chi ba-rím wǎ byídí ḿbyí ebá edaryí. Nké onyii-banet mú me n/chi m-bâ ne mǔ o-waa ng ne banyá. Dyikpóge ejí ńdyí me n/chi m-kpógê dyi/chi dyi-waa kángkáng nkéré.

⁹ Óburúkpâbí, bûu a-chwáp bě. Yip busa eyên a-nyii bě. Yip kámbú a-chi byěm wǎ eringe nyí a/chi ké bankéré ḿbé ba/shwôm ké esim chwóó. Wo nké a/két kiǐnyám-baya ńkyí badakó Ráhap boǒkím boǒkím.

¹⁰ Wo to nké a/chi baya ḿbé baryên ba-núng, a-chi kiǐfáng kyi-nyáng baya ámbe, eringe nyí banet ḿbé wo amu a-nyii ng kámbé badaman enyáng.

¹¹ Banet ḿbé wo aa/nyii kámbé ba/chi ba-ribi Jerúsélem ne bunyîn-dyityém, ba-kûjêe ba-wonge e ba-kwán n ekwan. Ba/chi ba-kyú ké bunyîn-dyityém ne banyá, ba-fem to ké bafip ne afaníkong ne banyá.

¹² Óburúkpâbí o/raa o/fu, me nké mu n-fâ běn busa. Ebóng ben bamu ba-shî ng onet mú odakpú, mú o*fí o-rí i o-shwôm biǐbyâa*.

¹³ Ben baa/ráp Óburúkpâbí mú o/chi běn? Mú o/paam bubóng, o-sím byikwap ḿbyí byidaníbî ejíí o-fé kyísí? Ebóng bamu ba-kyú u kángkáng nkéré ké bushî ḿbú busa-dyityém ḿbú banet ḿbé mbe ba-cít ng běn, ne ḿbú banet ḿbé baa/kpá byiko ba/fu, mbé ba-ju ng běn. Busa-dyityém ebe boo*ta běn to*.

¹⁴ Kaa*rí to ne ba-fîm banet ḿbé mbe ké mgbokobá*. Mbé ba/chi ba-kpen ba-tíbî, ne ba/chi ba-já kángkáng byiryíng ḿbyí mbe ba-ryuu ng.

¹⁵ Me n-chi i Óburúkpâbí mú mu Osówo enen. Me nké mu m-buu ng baya ḿbé baryên, n-chi kámbé ba-kûrime. Me m-bángê e Óburúkpâbí mú o/rêe o-shwôm.

¹⁶ Me nké [m/paam] bubóng, n-sím byikwap ḿbyí byidaníbî ejíí n-fé kyísí. Me mu n-sét ng Jerúsélem n/fu, ben ba-chi i banet ejí. Me nn/tángê běn byiraa ejí, ne mu n-yip ng bubwô ejí n-ku ng běn ké afaníkong.

Busông eri ḿbú Jerúsélem bu/man.

¹⁷ Jerúsélem, bûu nensang. Ninge byiko eyên a-bûu nensang. Wo aa/jwáp mmîk-busông mú Óburúkpâbí o/kúng ké kafâ esa emen o-kye ǒ a-jwáp. Wo a/jwáp kámú, ne o/chi ǒ a-kpet ecíng.

¹⁸ Onet o*fí mú oda ǒ etông bukwóp*. Onet o*fí ké burwám-banet eyên mú oda ǒ eníbî ké bubwô*.

¹⁹ Afaníkong afee aa/róng ǒ. Byití bii/bên esí eyên, ne banet eyên baa/waa esong. Onet o*fí mú oda ǒ eri bafip*.

²⁰ Ké akam-kyiká-oshê nang ará, banet eyên ba-kú ba-myii ng kyeekyee. Mbé ba/firi wǎ enyam nyí kaǎtám kaa/kám kányí. Mbé baa/jwo busa ḿbú kafâ esa ńké Osówo.

²¹ Ben banet ḿbé Jerúsélem ḿbé bamu ba-ri ng afaníkong, ben mú bamu ba-cíng ng wǎ bamu ba-bwóm m bato,

²² Óburúkpâbí mú mu Osówo enen mu o-ku ng běn ké afaníkong, o/fu, n-kú n-kúng ng mmîk mú n/kye běn ké nkéré mú kafâ nke ka-sa ng mě. Ben baa*jwáp to bato ḿbé mbe ba-chi i běn ba-cíng*.

²³ Me n/chi n-yip kámbé n-kye banet ḿbé ba/cít běn, n-kye banet ḿbé ba/chi běn ba-rí ké byiká-oshê, ba-cím běn wǎ ben ba-chi i ecing.