Azáya 5 - Bokyi Bible

Ézerel nyi wǎ Kyifát

¹ Fwôo n̂g atông ba-jwo n-kwán běn okwan mún, mú ocín ejí ne kyifát emen. Ocín ejí o/mû ne kyifát ké kaku ńké esí edabát byiryíng.

² Ocín ejí ámu o/sím esí o-fîm aká o-pwó, o-kwón asín-byichí nyí a/jang enwa, nyí adazím byirim wǎ kaǎtí-esangésang. O-bi kiǐnyáám-kyikit-mbâm ńkyí odakûkyú o-bám m kányí, o-sím dyibíng ńdyí odakûnwárê babî-byirim-byichí ámbyi o-chi bato. O-kpet ebám o/fu, byirim emen byikán, nké kyirim nang kyirá kyi/fwoo.

³ Ké bubwô ámbu, ocín ejí mu o-raa ng kántîk o/fu, ben banet ḿbé bamu ba-kyú u ké Jerúsélem ne ké Júda, kabe n̂g kyi-kim ne kyifát ejí ne me.

⁴ Chwǒm nkyi kô ńkyí n*da/chi ké nkyí dí*. Ebóng nkyi kyi-zím m biifwoofwoo-byirim, kyi-mîng ezím ḿbyí byinong ḿbyí mu n-kyé ng.

⁵ Ńkyí n/chi n-chi kyifát ejí nkyi něen. N/chi n-zú nkám mú n/ro kánkyí, m-bú ekpe nyí e/ku kánkyí, m-mîng enyam e-ryí kánkyí, e-cím kánkyí e-fé kyísí.

⁶ N/chi m-mîng biǐbyâa byi-kán ké nkyí. Nn*tóbê byire emen* nang ecing emen mm*bwât kányí m-kpang*. Nké n/chi m-mîng nnyamefám o-cít kánkyí. Nang omu mm*ba/chi m-bángê kámú o-na ké nkyí*.

⁷ Ézerel nké nyi kyifát ńkyí Óburúkpâbí mú o/rêe o-shwôm. Banet ḿbé Júda ányi asín-byichí nyí o/kwón. Nyǐ o/mû o/ryuu o/fu, bachi ńkyí nkyi kanong, nké ba/bwa ba-ju banet. Nyǐ o/mû o/ryuu kámbé o/fu, bachi ńkyí nkyi kanong, nké banet ḿbé mbé baa/ju mbe ba-tii ng ba/fu, bapan banet ḿbé ba/ju kámbé mpan.

Byibî ḿbyí Banet ḿbé Ézerel mbe ba-chi i

⁸ Ben ba/firi ké busông. Bamu ba-chî ng eré byise ne byifát ba-cibi ne ḿbyí bamu ne mbyí kpákpá. Ké kaǎnyín-nkéré, kyikit kii*chi to ńkyí onet okíri odakyú* ne ben nké nke ba/chi ba-kyú ké esí.

⁹ Me nn/jwo ké Óburúkpâbí mú o/rêe o-shwôm o/raa o/fu, kángkáng biǐnyínǒng-biimbâng-byise ḿbyín byi/chi byi-firi biǐbwô-byise.

¹⁰ Byichí ḿbyí mbyi byi-zím m ké kiimbâng-kyifát byi/chi byi-kye běn balyíta-bato nyíryinyi nké nke. Bujê-esang-byichí nyí badakwón e/chi e-kye běn kaǎnyín-esang-byichí nké nke.

¹¹ Ben ba/firi ké busông. Ben bamu ba-bûu ng ké dyicófóróng pirípirí ba-kpet bato ejwáp, ba-waa tete kyirê kyi-kán bamu ba-bwóm m bato.

¹² Bamu ba-chi i ajî enen ne ácîng ne boǒkám ne boontán ne bato. Nké ba*fí ba-nyît ng ńkyí Óburúkpâbí mu o-chi i*

¹³ ne ké bubwô ámbu, ba/chi ba-kúng běn ba-dim ne ben wǎ bamgbokobá. Banet-ashí enen ba/chi ba-kpú esong, ne banet ḿbé kwán ba/chi ba-kpú kyijé-omu.

¹⁴ Ba-kú ba-jee ng oshê-bakúsí, ne oo/bâa ocím emen o-tî fúú. O-kú o-myii ng biǐtí-banet ḿbyí Jerúsélem, cibicibi ne banet ḿbé kwán.

¹⁵ Ba/chi ba-fé nang yeě nang yeě éshwân, ne ba/chi ba-bwa esim kyísí ne bantông byiko.

¹⁶ Nké Óburúkpâbí mú o/rêe o-shwôm mu o-tông ng eringe nyí nyǐ mu kiǐtí ké byěm ḿbyí mbyi dángdáng echi, ne mu o-tông ng eringe nyí nyǐ mu onong ké mpan mú mu o-pan n banet emen. [

¹⁷ Ké biǐbwô-byise ámbyi, bwǎn-etám-ebû ba/chi ba-ryí biǐbyâa, ne bwǎn-ebûbǔu ba/chi ba-ri aro nyí badaryí.]

¹⁸ Ben ba/firi ké busông. Ben baa*man efem ké byibî enen*.

¹⁹ Ben bamu ba-raa ng ba/fu, Óburúkpâbí ochi ochǐng ńkyí mu o-ryuu ng o/fu, nyǐ o-chi i, eringe nyí be byidari kánkyí. Osówo mú mu onong mú Ézerel ochi ńkyí o/fu, nyǐ o-chi i, byi-ri ńkyí nkyi ǎ ké dyityém.

²⁰ Ben ba/firi ké busông. Ben bamu ba-kó ng kyibî ba/fu, kanong, ba-kó kanong ba/fu, kyibî. Bamu ba-bírî ng kyifip kyi-firi kiinwángé, ba-bírî kiinwángé kyi-firi kyifip. Bamu ba-chi i ńkyí nkyi kyi-ruu ng kyi-kûgbele, ba-chi i ńkyí nkyi kyi-gbele ng kyi-kûruu.

²¹ Ben ba/firi ké busông. Ben bamu ba-kabe ng ba/fu, ben bamu ba-nyît ng byinyídíng chwóó.

²² Ben ba/firi ké busông. Ba-chi i bakân-banet ḿbé bato ejwáp. Ba-chi i to banet-busa ḿbé baa*shî* ké nkéré kyi/firi mú badachwáp bato.

²³ Nké bamu ba-zú ng byibî-banet abwô ké ngu ekoo, baa*két mpan o-nwa banet ḿbé ba*da/chi chwǒm*.

²⁴ Ké bubwô ámbu kâng, wǎ eringe nyí aro ne biǐbyâa mbyi byi-nyîim m byi-shí ké okwâ, éné to nké eriri enen e/chi e-fwoo, ekong enen e/chi e-jwóm, afú a-tugi kányí a-pwó, ké nǎ, ben baa/né ńkyí Óburúkpâbí mú o/rêe o-shwôm, mú mu Osówo mú onong mú Ézerel o/tángê bě.

²⁵ Kafâ nke ka-sa ng Óburúkpâbí ne banet emen, ne oo/tan bubwô emen ḿbú odakye kámbé busông. Eku e/chi e-náng, ne byikwóm-enyam-byiko-banet ḿbé ba/chi ba-kpú byi/chi byi-waa ké byiká-oshê wǎ abîng. Nang ńkyín kyi-chi, kafâ esa ńké Óburúkpâbí kaa*ba/chi ka-man* ne o-chî ng etan bubwô emen o-kye kámbé busông.

²⁶ Óburúkpâbí mu o-tông ng ekap nyí o/chi o-kó [oshê] mú tíbítíbí. Mu o-jwá ng o-kó ng kámbé o/fu, bafím ké bakô-ejíí bamúmú ba-bâ. Ne ba-kú ba-bâ ochéé óchee.

²⁷ Onet o*fí nang obónge ké burwám ebe mú odakyee*. Onet o*fí mú odakpán dyícíring*. Achi aa*wuri kámbé* baa*rê*. Emâp e*fí nyí edafiri* kyiká-dyibe kyi*fí ńkyí kyidakédê*.

²⁸ Abán ebe a-nen n, ne baa/kpá byiko ḿbyí badaché báre ebe. Abe nyí bubyî-orá ebe nyi a-shwane e wǎ aká, ne bandam-bamútu ebe ḿbé bubyî-orá budatut mbe ba-bírî ng wǎ bufú ḿbú budatugi bu-wáp ng kerékeré.

²⁹ Basúja ebe mbe ba-fém m wǎ ekpang nyí ee/ju enyam ne e-kú e-kúng ng kányí e-dim ne nyǐ ké kyikit ńkyí onet oo*man to ekoo kányí*.

³⁰ Nkéré mú dyicí ándyi dii/fyi, basúja ámbe ba/chi ba-fém ké Ézerel kakânkakân wǎ baya ḿbé baryên. Tún n̂ oshê mún ba-ri. O/firi kyifip ne bafip. Kyifip kii/cít kiinwángé.