Azáya 49 - Bokyi Bible

Ézerel nyi Kiinwángé ńkyí Eshê

¹ Ben eshê nyí tíbítíbí ne banet ḿbé mbe ba-kyú u ké nyǐ, fwôo n̂g atông ba-jwo mě. Ne ba-kû mě efwon, Óburúkpâbí o/cá mě, o-chi mě o/fu, me nkyú ḿgbán emen.

² O/chi byiraa ejí byi-kûnen wǎ kashwám. [O/yip bubwô ḿbú emen nyǐ oyén o-ku mě ké afaníkong.] O/chi mě n-kûnen wǎ dyibán ńdyí ba-kú ba-bâ eché kándyí.

³ O/raa ne me o/fu, banet ḿbé Ézerel ba-chi i ḿgbán emen, ne ké bubwô ebe, banet ba/chi ba-kpee mě.

⁴ Me n/raa n/fu, me nn/chi bǎmkpóngé ḿbé ba*da/byí chwǒm*. Mm/bên busa ejí kángkáng, nké n*da/man echi chwǒm*. Nké m-man n efé dyityém ne Óburúkpâbí o-bwom mě ké esim. O/chi o-yárê mě ké ńkyí nn/chi.

⁵ Ne ba-kû mě efwon, Óburúkpâbí o/cá mě. O/chi mě o/fu, me nkyú ḿgbán emen m-kpî banet ba-bwa esim, m-kpî banet ḿbé Ézerel ḿbé baa/pwôo byiryibyiryi m-bwa ne mbé esim. Óburúkpâbí mu o-kyâ mě ofê. Nyǐ nké mu o-kyâ mě busa.

⁶ Óburúkpâbí o/raa ne me o/fu, ḿgbán ejí, me mu ǒ ne bǎmkpóngé ḿbé mbe kiǐtí ba-shwôm. *Chí banet-Ézerel ḿbé ba/fem bukyû nké nke nké a/chi a-chîchi kámbé ba-firi kiǐtí* nké n/chi n-chi ǒ to a-kyú kiinwángé ńkyí eshê ekíri eringe nyí n/chi n-nyii ejíí emúmú.

⁷ Osówo Óburúkpâbí mú onong mú Ézerel, mú odanyii kámbé, mu o-sét ng onet mú mbe ba-jang ng ǎ ené, mú mu o-sa ng eshê ányi kafâ ne mú mu ḿgbán mú batu o/fu, batu ba/chi ba-ri ǒ ké nkéré mú baa/zú ǒ abwô, ne ba/chi ba-bûu nensang ba-kye ǒ ofê. Banet-ashí to ba/chi ba-ri kánkyí ne ba/chi ba-tíngê kyísí ba-kye ǒ ofê. Ńkyín kyi/chi kyi-chi, ké nǎ, Óburúkpâbí oo/cá ḿgbán emen. Osówo Óburúkpâbí mú onong mú Ézerel o-tî ng ocím emen mú o/ryí.

Osówo o/bwa ne Jerúsélem eringe nyí o/mû

⁸ Óburúkpâbí o/raa ne banet emen o/fu, ké nkéré mú nkéré oo/fyi mú nda běn enyii, n/chi n-cángê dyityém ne ben, n-faa ojá ké bukyû enen ḿbú bamu ba-tii ng ba/fu, me nchwáp běn. Me n/chi m-bám běn, n-ku běn ké afaníkong, ne n/chi n-cen ké abwô enen n-ryí ocím ne kángkáng banet. N/chi n-chî běn emîng ba-kyú ké esí enen nyí ee/waa kántîk dyikáá.

⁹ N/chi n-sét banet ḿbé mbe ké mgbokobá n/fu, ca n̂g dyijê, n-sét ḿbé mbe ké kyifip n/fu, byí n̂g ba-bâ ké kiinwángé. Mbé ba/chi ba-kyú wǎ ebû nyí nyi e-ryí i baryî kyíbóng-eku.

¹⁰ Esong ee*nwa to kámbé* nang omu to oo*jê to kámbé*. Esû ne kiinsóngé bii*chi to kámbé chwǒm* ké nǎ, mú mbé mbe ba-jê ng ǎ nké o/chi o-tông kámbé kiǐfáng. O/chi o-kpî kámbé ba-ribi ké ajwáng.

¹¹ N/chi n-rim bukwóp bu-nyáng eku, n-chi bukwóp ḿbú banet ejí badacen.

¹² Banet ejí ba/chi ba-fím tíbítíbí, ké kyicê ńkyí bushûyû ne ńkyí esû edaríbî ne ké Áshwan nyí nyi ké kyicê ńkyí busyísen.

¹³ Bubóng, kwán ekwan, esí, wonge ké bunyîn-dyityém. Eku ekpet okwan ekwán. Óburúkpâbí o/chi o-fé banet emen dyityém. O/chi o-ri banet emen ḿbé mbe ba-ri ng busông bafip.

¹⁴ Nké banet ḿbé Jerúsélem ba/raa ba/fu, Óburúkpâbí oo/dim o-mîng bě. Oo/ráp bě.

¹⁵ Ne Óburúkpâbí kâng o-faa o/fu, onyinyi o-man n eráp wǎn mú emen nyǐ oyén dí, oo*kyú to ne kyijé ne wǎn mú o/fwon*? Â nang onyinyi o-man n eráp wǎn emen, me mm*man běn eráp ne banyá*.

¹⁶ Jerúsélem, me mm*man ǒ eráp ne banyá*. Nn/sáng dyizîn eyên ké etyém-akwâ ejí.

¹⁷ Banet ḿbé ba/chi ba-bwât ǒ ba-bi mbe ba-bâ abeabe, ne banet ḿbé ba/bên ǒ ba/chi ba-dim.

¹⁸ Tún achi a-ri ńkyí nkyi kyi-chi i. Banet eyên ba-kú ba-cibi ng kyikit kyibónge. Ba-kú ba-bâ dyijê. Eringe me mu Osówo mú mu okpó, wo a/chi a-tông byiko kyi-kim ne banet eyên, wǎ eringe nyí onyinyi-dyibé odatông byiko kyi-kim ne byibwáng ne biǐré-abwô emen.

¹⁹ Ba/shí oshê enen o-waa kafâ dyikáá, nké kántîk, o/chi o-sîi o-shwôm banet ḿbé mbe ba-bâ ebakyú ké mǔ. Ne banet ḿbé ba/shí kámú baa*ba/chi ba-kyú ba-fárâng běn*.

²⁰ Dyicí dyibónge, banet enen ḿbé ba/fwon kámbé kyíjí ba/chi ba-sét běn ba/fu, esí ńnyín e/sîi e-shwôm. Byimu byi-ryuu ng kyikit chwóó ńkyí byidakyú.

²¹ Ne ben kâng ba/chi ba-raa ne byiko enen ba/fu, yeě o/fwon kángkáng bwǎn ḿbén o-kye mě. Bwǎn ejí ba-kpú, ne me nn/firi bukwom. Ba/fîm mě ké oshê ejí ba-ró mě n-dim. Yeě o/nen bwǎn ḿbén. Me m/mû n/waa kǎnchí. Bwǎn ḿbén ba/fím nyá.

²² Óburúkpâbí mú mu Otu Kyítá mu o-sét ng banet emen o/fu, n/chi n-sét eshê ekíri ba-bwa ne bwǎn enen esim dyijê.

²³ Batu ba/chi ba-firi běn wǎ banchí. Banyi-batu ba-firi běn wǎ bané. Mbé ba/chi ba-tíngê kyísí kyísí ké bushú enen ba-kye běn ofê. Ba-kúng byiko ebe kyísí kyísí ba-kye běn ofê. Ányi nké ba/chi ba-nyît ba/fu, me n-chi i Óburúkpâbí. Onet o*fí mú mu o-bám m ochwâp ejí* mú oo*ba/chi o-ri kámú*.

²⁴ Ben ba-man n ekoo chwǒm ńkyí onet-súja o/yip ké byití? Ben ba-man n efîm onet-mgbokobá mú otu mú o/bên dyityém oda ǎ efé?

²⁵ Óburúkpâbí mu o-faa ng o/fu, éné nké kyi/chi kyi-chi. Ba/chi ba-yip onet-mgbokobá mú onet-súja ba-dim ne nyǐ, ne ba/chi ba-bam byěm ḿbyí mbên dyityém-otu odayip ké byití. Me n/chi n-nwa ne nang yeě mú o/nwa ne ben, ne n/chi n-nyii bwǎn enen n-koo.

²⁶ N/chi n-chi banet ḿbé mbe ba-cít ng běn ba-ju barî. Ba/chi ba-kûbwóm banet eju ne kafâ esa. Nkéré ámu nké kángkáng banet ba/chi ba-nyît ba/fu, me n-chi i Óburúkpâbí mú mu o-nyii ng běn, o-chi běn ba-firi ké byiko enen. Ba/chi ba-nyît ba/fu, me n-chi i Osówo mú Ézerel mú mu ne busa.