Azáya 44 - Bokyi Bible

Óburúkpâbí nké nke mu Osówo

¹ Óburúkpâbí o/raa o/fu, banet-Ézerel ḿbé mbe ḿgbán ejí, ḿbé mbe banet ejí ḿbé n/cá, ne ḿbé mbe bwǎn-Jekôp, fwôo n̂g atông kántîk ba-jwo.

² Me Óburúkpâbí mú o/chi běn, kyi-fím ké nkéré mú ba/fwon běn, me nn/chwáp běn. *Da n̂g echi ba-shî*. Ben ba-chi i ḿgbán ejí, ne banet ejí ḿbé n/cá, ḿbé mbe ba-jê ng mě.

³ Esí nyí nyi e-ryuu ng omu n/chi n-kye kányí omu, n-chi buce bu-sen ké esí nyí ee/jwóm. N/chi n-kye bwǎn enen busa ejí, n-jware kyikû-banet enen.

⁴ Mbé ba/chi ba-kpen wǎ biǐbyâa ḿbyí mbe ba-pwó ng omu ké mbyí kángkáng nkéré, ne wǎ byichí ḿbyí ké bukô-kace.

⁵ Banet ba/chi ba-raa ké onet ké onet ba/fu, Óburúkpâbí nké o/já mě. Banet ámbe ba/chi ba-bâ ba-kâm Ézerel. Nang yeě o/chi o-sáng dyizîn ńdyí Óburúkpâbí ké bubwô emen, o-kó byiko emen o/fu, nyǐ o-chi i onet mú mu ké burwám-banet-Osówo.

⁶ Óburúkpâbí mú mu o-tún n banet ḿbé Ézerel o-ku ng kámbé ké afaníkong, ne Óburúkpâbí mú o/rêe o-shwôm o/raa ńkyín o/fu, nyǐ o-chi i mbwôp kashú ne nryî esim, ne nyǐ kǎnchí nké mu Osówo. Osówo okíri o*fí to kyi-cibi ne nyǐ*. [

⁷ Osówo okíri mu kô mú odaman echi ńkyí nyǐ oo/chi dí. Yeě o/mû o/chi o-man esét kángkáng byěm ḿbyí byi/chi byi-chi, kyi-fím ké kiimkpet kyikû-ejíí tete kyi-ribi ne banyá ne banyá.]

⁸ Banet ejí, *da n̂g echi ba-shî*. Ben bamu ba-nyît ng ba/fu, kyi-fím ké nkéré mú kpákpá tete kyi-ribi kántîk, me n/sét kángkáng byěm ḿbyí byi/chi byi-chi, ne ben ba-chi i bantûesé ejí. Osówo okíri mu kô dí. Osówo okíri mú mu ne busa mu kô mú me n*da/jwo ne*?

Osówo o/shú Banshâng Bakye

⁹ Kángkáng banet ḿbé mbe ba-chi i erím-bakye ba*da/byí chwǒm* ne esówo nyí nyi kámbé róró ké dyityém e*da/byí chwǒm*. Banet ḿbé mbe ba-fâ esówo ńnyín ba/sêe achi ne ba*fí ba-nyît ng chwǒm* ne ba/chi ba-wuri kámbé éshwân.

¹⁰ Kyi*da/byí chwǒm* ńkyí onet odasím orím-bukye o-kûfé kámú wǎ Osówo*.

¹¹ Nang yeě nké o/fé kámú ba/chi ba-bwa ne nyǐ kyísí. Banet ḿbé mbe ba-sím m erím-bakye ba*fí chwǒm kyikíri kyi-cibi ne banet*. Banet ámbe babâ ba-ba-fé kámbé ké esuk. Ba/chi ba-shî, ba-wuri kámbé éshwân.

¹² Nree bure o-yip ng kyikim-kiǐré o-fé ké okwâ o-chi kyi-bírî chwǒm. O-yip ng kyitông-bubwô emen ńkyí kyidashwane o-kám áma o-díp kiǐré ánkyi o-chi ńkyí mu o-ryuu ng. Eringe nyí mu o-chi i bǎmkpóngé o-câ kashú, esong e-nwa ng ǎ, omu o-jê ǎ, o-kyee.

¹³ Kápyínta o-kan n kyichí, o-sáng basáng ké nkyí, o-kpêe kánkyí ne o-chi onet ké nkyí, onet mú odanwa mú odatî ké kyise emen.

¹⁴ O-man n ekét kyichí nang kyirá ké kyizinge o-chi orím-bukye ámu. Kakíri o-kwón n kyichí o-mîng kánkyí kyi-kán.

¹⁵ Onet o-kúng ng kyichí kyibónge o-chi ekwón o-kúng kánkyí to o-chi orím-bakye. O-kúng ng kyicê kyibónge o-wóngê okwâ mú odajwaa, o-rám byiryíng, o-kúng kyicê o-chi osówo o-kûfé kámú.

¹⁶ O-yip ng ekwón ekíri o-wóngê okwâ, o-fwá enyam o-ryí o-zût. O-jwaa okwâ ámu o-raa o/fu, okwâ mún mu kanong, mu o-nyange e mě byiko.

¹⁷ O-kúng kyikim-kyichí kyikíri o-chi orím-bukye, o-kpet etíngê kyísí o-fâ kámú. O-fâ nshwam o-kyâ kámú o-raa ng o/fu, wo a-chi i osówo ejí, nyii mě.

¹⁸ Azong-banet ányi a/róng enyam ba-shwôm nyí baa*nyît ńkyí mbe ba-chi i*. Ba-ri ng ntûntû ba-cít achi ne atyém ebe.

¹⁹ Nchi erím-bakye o*fí ne bubong* nang dyishí* ńdyí odaraa o/fu, byichí byikíri mu n-chi i ekwón* n-rám m byiryíng* n-fwá ng enyam ké mbyí n-ryí i*. N-kúng kyicê kyikíri n-chi orím-bukye. Me m/bwa n-waa nyín n-kú n-tíngê e kyísí n-fâ kyikim-kyichí. [

²⁰ Nkyi eringe ebónge] wǎ o/yip atông o-ryí. Enyam-okabe emen ee/nîm ǎ ké bukwóp ḿbú oo*nwa to echwáp*. Oo*ba/chi o-bángê ké byiko emen nang kaǎnyín o/fu, orím-bukye mú nyǐ mu o-níbî ng ké bubwô oo*chi Osówo*.

Óburúkpâbí nké o/chi Bě ne mu o-nyii ng Bě

²¹ Óburúkpâbí o/raa o/fu, Ézerel, zîim m̂ ńkyín. Zîim m̂ ba/fu, ben ba-chi i ḿgbán ejí. N/chi běn n/fu, kyú n̂g ḿgbán ejí, ne me mm*ba/chi n-ráp běn*.

²² Mm/kpaa byibî enen m-pwó wǎ ófíbí. Bwa n̂g esim ba-kâm mě. Me nké mu n-nyii ng běn.

²³ Bubóng, wonge ê ké bunyîn-dyityém. Ben byikit ḿbyí mbyi ké kafâ-esí, wonge ê. Eku ne kángkáng byichí ḿbyí mbyi ké kyizinge, wonge ê ké bunyîn-dyityém. Óburúkpâbí oo/tông busa emen ké onyii mú o/nyii banet emen ḿbé Ézerel.

²⁴ Me n-chi i Óburúkpâbí mú mu o-nyii ng běn. Me nké n/chi běn. Me Óburúkpâbí mú o/chi kángkáng byěm. Me kǎnchí nké n/chi bubóng, m-paam kámbú, ne ké nkéré mú n/chi ejíí, onet o*da mě echwáp*.

²⁵ Me mu n-chi i bansô epé ba-róng enyam, m-bên byěm ḿbyí banet ḿbé mbe ba-sô ng epé ké ékpére mbe ba-sét ng ba/fu, byi/chi byi-chi. Mu n-twóp ng byiraa ḿbyí banet-bubong, n-tông n/fu, bubong ebe mbu ḿbú enyam.

²⁶ Nké â ḿgbán ejí o/sét chwǒm ńkyí kyi/chi kyi-chi, ké nkéré nn/twóm onet-kyitwóm n/fu, osét okabe ejí, n-chi i ekabe ányi ne byiraa ámbyi byi-chi wǎ eringe nyí o/sét. Mu n-sét ng Jerúsélem n/fu, banet ba/chi ba-chîkyú ké mǔ, n-sét ng to eshê nyí Júda n/fu, ba/chi ba-chîbwât kányí ba-bi. Ba/chi ba-bwât byise ba-bi ké biǐbwô-byise ámbyi.

²⁷ M-man n efaa ojá obónge baya ḿbé baryên ba-núng.

²⁸ M-man n esét Otu Sárus n/fu, wo nké a/chi a-kyú otu ké bubwô ejí. Wo a/chi a-chi ńkyí mu n-ryuu ng ǒ n/fu, chi. A/chi a-kye busa ba-bwât Jerúsélem ba-bi, ba-chîkpet kiimkpet kyikû-ekpe ebi ńkyí kiǐtí-kyise-kyifen ejí echi.