Azáya 43 - Bokyi Bible

Osówo o/ryí Ocím o/fu, Nyǐ o-nyii ng Banet Emen

¹ Óburúkpâbí mú o/chi běn, ǎ Ézerel, mu o-sét ng běn o/fu, *da n̂g eshî* me n/chi n-nyii běn. Me nn/kó běn ké dyizîn ńdyí n/kye běn, ben ba/já mě.

² Â ba/shwôm ké buce ḿbú bu/ríbî, me n/chi n-kyú ne ben. Afaníkong enen aa*ba/chi a-shwôm běn busa*. Â ba/shwôm ké okwâ, oo*ba/chi o-shí běn*. Biimbâng-okan ḿbyí byi/chi byi-bâ bii*ba/chi byi-chi běn chwǒm*.

³ Ké nǎ, me n-chi i Osówo Óburúkpâbí enen, Osówo mú onong mú Ézerel, mú mu o-nyii ng běn. N/chi n-kye Éjip eringe nyí nda běn eré dyifwá. N/chi n-kye to Sudân ne Séba.

⁴ N/chi n-kye nang byirim-eshê n-nyii běn, ké nǎ, ben bamu mě ké dyityém, ne ké nǎ, ben bamu ba-jê ng mě, ne mu n-kyâ běn ofê.

⁵ *Da n̂g echi ba-shî* me mu ne ben. N/chi n-fyi ne banet enen kyi-fím ké byikit ḿbyí tíbítíbí ḿbyí esû nyi e-byí i ne ḿbyí nyi e-ríbî ng.

⁶ N/chi n-sét banet ḿbé bushûyû n/fu, bazú kámbé abwô, n-sét ḿbé busyísen n/fu, ba*dachi ba-tím kámbé byizim*. Mîng n̂g banet ejí ba-fím ké byicê-ejíí byimúmú ba-fyi.

⁷ Mbé ba-chi i banet ḿbé ejí me oyén, ne n/chi kámbé n/fu, babâ mě ne akpee.

Banet ḿbé Ézerel mbe Bantûesé ḿbé Óburúkpâbí

⁸ Osówo o/raa o/fu, fé banet ejí ké esuk. Mbe ne achi, nké baa*rángê*. Mbe ne atông, nké baa*jwo byěm*.

⁹ Kó kángkáng eshê e-bâ mpan ámu. Osówo ebe orá mú odaman esét ńkyí kyi/chi kyi-chi ké nkéré mú ké kashú. Osówo orá ké burwám ebe o/mû o/sét ńkyí nkyi kyi-chi i kántîk. Esówo ńnyín ebâ ne bantûesé ebe ba-ba-tông ba/fu, mbé mbe ba-chi i ńkyí nkyi ké bukwóp, ba-ba-sét kyi-kim ne ntûntû mú byiraa ebe.

¹⁰ Banet ḿbé Ézerel, ben bamu bantûesé ejí. Me n/cá běn n/fu, bakyú ḿgbán ejí eringe nyí ben ba/chi ba-nyît mě, ba-fé dyityém ne me, ne ba-nyît to ba/fu, me kǎnchí nké mu Osówo. Osówo okíri o*fí to kyi-cibi ne me*. O*fí* ne oo*ba/chi o-kyú*.

¹¹ Me kǎnchí nké mu Óburúkpâbí. Me kǎnchí nké nda běn eman enyii.

¹² Me n/sét kyikû ké esim ńkyí kyi/chi kyi-chi ne n-dim kâng m-bâ běn ebachwáp. Osówo mú oshê okíri o*fí nang obónge mú oo/chi ńkyín*. Ben bamu bantûesé ejí.

¹³ Me n-chi i Osówo, ne n-waa ng Osówo ne banyá. Onet o*fí mú odaman efem ké busa ḿbú ejí* ne onet o*fí mú odaman eyángê ńkyí ndachi*.

Chêe n̂g ba-dim ba-mîng Bábyílon

¹⁴ Osówo Óburúkpâbí mú onong mú Ézerel, mú mu o-nyii ng běn o/raa o/fu, n/chi n-twóm basúja ba-da-nwa ne Bábyílon eringe nyí n/chi n-nyii běn. N/chi n-sé afyi-oshê ebe, ne dyiwonge ńdyí banet-oshê ámu mbe ba-wonge e dyi/chi dyi-bírî bukyû etii.

¹⁵ Me Osówo Óburúkpâbí enen mú onong. Me nké n/chi běn, ǎ Ézerel, ne n-chi i Otu enen.

¹⁶ Ké nkéré mú o/shwôm ké esim, Óburúkpâbí o/chi bukwóp bu-shwôm ké baya ḿbé baryên. Kiǐfáng ńkyí kyi/shwôm ké kace ńké nke ka-náng ng.

¹⁷ O/tông bujê-basúja kiǐfáng ńkyí badakpú, basúja ḿbé ba/yú ké bamútu ḿbé bubyî-orá budatut. Ba/myii dyimyii ńdyí baa*man to ebûu ne banyá* ba-ríbî wǎ okwâ mú badatuu bufú ba-rîp.

¹⁸ Nké Óburúkpâbí o/raa o/fu, *da n̂g echi ba-zîim byěm ḿbyí bii/shwôm ké esim* ba-kabe nang kyi-kim ne byěm ḿbyí kpákpá*.

¹⁹ Bám m̂ chwǒm ńkyí kyifyîfî ńkyí mu m-bâ ebachi. Kii/kpet echi, ne ba-man n eri kánkyí kántîk. N/chi n-rim kiǐfáng ké kyikim-dyikán n-fé běn buce ké nkyí.

²⁰ Nang enyam-dyikán e/chi e-kye mě ofê. Boǒnyám ne bunurung ḿbú budakyú ké kyikit ńkyí omu odakaa bu/chi bu-kpee mě, ké nn/chi omu o-byí ké kyikit ńkyí omu o*fí* n-tî banet ejí ḿbé n/cá kámbé.

²¹ Mbé nké mbe banet ḿbé n/chi n-kye byiko ejí, ne ba/chi ba-kwán akpee ejí.

Byibî ḿbyí Ézerel

²² Óburúkpâbí o/raa o/fu, nké Ézerel, ben ba/mû baa/kyee ne me. Ba*da mě efé*.

²³ Ba*da/yip ebû ba-shí ba-chi byifen ba-kye mě*. Ba*da mě ekye ofê ké byifen enen ḿbyí bamu ba-chi i*. Me n*da běn ekye afaníkong nyí ndafu, chi n̂g byifen ba-kye mě* n-kye běn nang afaníkong n/fu, shí n̂g burwan ba-kye mě*.

²⁴ Ben ba*da mě eré burwan* ba-chi nang ochi kyi-nyîn mě ne bafwám-enyam enen*. Nké ba/bwa ba-kye mě busông ké byibî enen. Ba-chi mě n-kyee ké byiko.

²⁵ Nké me to nké mu Osówo mú mu o-pwoo ng běn byibî enen, ne mu n-chi i ńkyín ké bubwô ḿbú dyizong ńdyí me mu. Mm*ba/chi n-kye běn busông ké bubwô-byibî enen*.

²⁶ Byidim m̂ ké esuk. Bâ n̂g ne chwǒm ńkyí ba/fu, me n/chi běn. Sét n̂g mpan enen ba-tông ba/fu, ben ba*da/róng*.

²⁷ Mbwôp kashú-bonchí enen o/chi kyibî. Banet-ashí enen ba-chi kyibî ba-bât mě, [

²⁸ batu enen ba-bên] kyikit-ociring ejí. Ké bubwô ámbu, m/bê ne bukyû ké Ézerel. M/mîng banet ejí n/fu, bakye kámbé edángé.