Azáya 41 - Bokyi Bible

Osówo o/ryí Ézerel Ocím

¹ Osówo o/raa o/fu, ben eshê nyí nyi tíbítíbí, cíbî n̂g pyêp, ba-fwôo atông ba-jwo mě. Kpá n̂g byiko ḿbyí badapan mpan enen ké esuk. Ba/chi ba-kye běn nkéré mú badasét. Bâ n̂g byi-kyú kyikit kyibónge byi-ri onet mú mpan oda ǎ enwa.

² Yeě o/mû o/bê ne onet mú o/kpógê byití ké kyicê ńkyí esû nyi e-byí i, ne o-chi ǎ o-kûkpógê nang nyá nang nyá nké o/ce. Yeě o/chi ǎ o-kpógê eshê. Kashwám emen nke ka-cere ng kámbé ka-pwó ng kyísí wǎ ba-chi i édúkǎndú. Abán emen nyi a-pwó ng kámbé byiryibyiryi wǎ biǐbyâa ḿbyí afú nyi a-kúng ng kámbyí.

³ O-nwa ng o-câ ne mbé ké kyikû nang chwǒm kii*chi ǎ*. O-zóngê e o-câ ochéé óchee a/fu, o*fí o-ta ng byiká kyísí*.

⁴ Yeě o/cen ne ńkyín kyi-chi. Yeě o/tî bukwóp ḿbú byěm ḿbyín mbyi byi-chi i. Me Óburúkpâbí m/mû ányi ké kiimkpet kyikû, ne me Óburúkpâbí n/chi n-kyú ányi to ké nkuli kyikû.

⁵ Banet ḿbé mbe ba-kyú u ké eshê nyí tíbítíbí baa/ri ńkyí me n/chi. Ba-kú ba-shî ng ba-tím m banê. Ké bubwô ámbu, mbé ashí amúmú ba/cibi ba-bâ.

⁶ Banchi bampwô ba-chwáp ng barî, ba-fâ barî busa.

⁷ Kápyínta o-kó ng nree bure agafwó. Onet mú mu o-chi i orím-bukye o-firi gogégogé o-fâ onet mú mu o-yip ng byipang emen o-cibi ng kyikit kyibónge busa. Ba-raa ng ba/fu, bǎmkpóngé ba/nwa, ne ba-yip orím-bukye ámu ba-mán ké émúrúsún eringe nyí oo*nwa eyip*.

⁸ Nké ben banet-Ézerel bamu bǎmgbán ejí, ben nké bamu banet ḿbé me nn/cá kámbé, ḿbé bwǎn ḿbé Ébarahâm mú ocín ejí.

⁹ Me n/kúng běn ké bukô-ejíí m-bâ ne ben. Me n/kó běn ké bakô emen ḿbé ba/jang etíbî ne n-sét běn n/fu, ben ba-chi i ḿgbán ejí. Me n*da běn ené* nké n/cá běn.

¹⁰ *Da n̂g echi ba-shî* me mu ne ben. Me n-chi i Osówo enen. *Da n̂g echi ba-shî nang chwǒm kyibónge*. Me n/chi n-chi běn ba-shwane, n-nyángê běn. Me n/chi n-ku běn ké afaníkong, n-nyii běn.

¹¹ Banet ḿbé kafâ nke ka-sa ng kámbé ne ben ba/chi ba-nyît éshwân nyí dyikpóge. Banet ḿbé mbe ba-nwa ng bunwa ne ben ba/chi ba-kpú,

¹² ne ba/chi ba-rím ké ejíí.

¹³ Me n-chi i Osówo Óburúkpâbí enen. Me mu n-fâ běn busa, n-sét ng běn n/fu, *da n̂g eshî*. Me n/chi n-chwáp běn.

¹⁴ Óburúkpâbí o/raa o/fu, Ézerel, nang ké ba*da/jê* ne bamu kyeekyee, *da n̂g echi ba-shî*. Me n/chi n-chwáp běn. Me Osówo mú onong mú Ézerel nké mu n-nyii ng běn.

¹⁵ Me n/chi n-chi běn wǎ kiimbuu byěm ne asháng nyí afyîfî, nyí adanen. Ba/chi ba-bú eku ba-bên kányí. Eku e/chi e-sêe rugirugi, e-bírî édúkǎndú.

¹⁶ Ba/chi ba-yip kányí ba-twóp kyíbóng, ne bufú bu/chi bu-kúng kányí bu-dim ne nyǐ bu-pwó kányí byiryibyiryi. Ne ben kâng ba/chi ba-kyú ké bunyîn-dyityém, ké nǎ, me n-chi i Osówo enen. Ben ba/chi ba-kpee mě me Osówo mú onong mú Ézerel.

¹⁷ Me Óburúkpâbí kâng n/chi n-jwo nshwam mú banet ejí ké nkéré ba/firi ké bukaa ḿbú omu, ké nkéré mú omu oo/jê kámbé, emiríng ebe e-jwóm. Me Osówo mú Ézerel mm*ba/chi m-mîng kámbé ne banyá*.

¹⁸ Me n/chi n-chi buce bu-sen ké biǐjínjwóm-eku, ne ké ewo. N/chi m-bírî kiǐyíyé-kyikim-dyikán kyi-firi baya, ne esí nyí ee/jwóm e-firi ne buce ḿbú budasen.

¹⁹ Me n/chi n-chi byichí ké azong ké azong byi-byí ké kyikit ńkyí byichí byi/mû byi*fí*. Kyizinge-byichí byiryên kyi/chi kyi-firi ké kyikit ńkyí byichí byi/mû byi*fí*.

²⁰ Banet ba/chi ba-ri ńkyín ba-nyît ba/fu, me Óburúkpâbí nké n/chi kánkyí. Ba/chi ba-nyît ba/fu, Osówo mú onong mú Ézerel nké o/cen ne nkyí ne kyi-chi.

Óburúkpâbí o/kó Esówo nyí e*fí ké Kafâ* o/fu, ekan Busa Ebe

²¹ Óburúkpâbí mú mu Otu mú Ézerel o/raa ńkyín o/fu, ben esówo nyí ké ejíí, bâ n̂g ne mpan enen. Bâ n̂g ne byiraa ḿbyí ben ba/kabe ba/fu, â ba/sét kyi/chi kyi-nwa kyi-kye běn.

²² Bâ n̂g nyín ba-ba-sét ńkyí kyi/chi kyi-chi ké nkéré mú ké kashú, eringe nyí byi/chi byi-nyît kánkyí ké nkéré mú kii/chi. Sét n̂g esuk byěm ḿbyí bii/chi ké esim, ne ba-sét bě to eringe nyí kyikû ebe kyi/byí.

²³ Sét n̂g bě ńkyí kyi/chi kyi-chi ké nkéré mú mu o-bâ ké kashú, ne byi/chi byi-nyît kâng byi/fu, ben ba-chi i esówo ké ntûntû. Chi n̂g chwǒm ńkyí kyinong nang ńkyí kyibî. Chi n̂g bě byi-firi ne bushî, byi-waa ocím ké dyishí fúú.

²⁴ Ben ne kángkáng byěm ḿbyí bamu ba-chi i ba*da/byí chwǒm*. Banet ḿbé mbe ba-fâ běn mbe ba-nut ng.

²⁵ Me nn/cá onet mú mu o-kyú u ké kyicê ńkyí esû nyi e-byí i. N/chi m-bâ ne nyǐ o-kpet ne bunwa ké kyicê ńkyí bushûyû. Mu o-cím m batu wǎ mu o-cím m biǐntóng, wǎ eringe nyí nchi butí odanwat bumee.

²⁶ Yeě ké burwám enen mú o/sét o/fu, ńkyín kyi/chi kyi-chi, eringe nyí byidaman esét byi/fu, wo a/sét ntûntû. Onet o*fí ké burwám enen mú o/faa nang ojá kyi-kim ne nkyí*. Onet o*fí mú o/jwo běn ba-raa nang kaǎchwóm*. [

²⁷ Me Óburúkpâbí nké m/bwóp kashú n-sét Záyon bǎmpém ḿbén. Me n/twóm onet-kyitwóm ké Jerúsélem n/fu, osét o/fu, banet enen mbe ba-bâ. Ba-kú ba-bâ dyijê.]

²⁸ Ké nkéré m/bírî achi n-tún esówo ányi, osówo o*fí mú o/mû ne chwǒm ńkyí odasét*. Nang obónge o*da/man efaa bǎmbím ḿbé m/bí*.

²⁹ Kángkáng esówo ńnyín e*da/byí chwǒm*. Ee*man echi nang kaǎchwóm*. Erím-bakye ńnyín nyi kyeekyee, busa bu*fí kányí*.