Azáya 36 - Bokyi Bible

Banet ḿbé Asyírya ba/fu, mbé ba-kyâ Jerúsélem Bunwa

¹ Ké aje diǐkpú ne anyii nyí Otu Hezekyâ o/ryí butu ké Júda, Otu Senakaríp mú otu mú Asyírya o/kye eshê nyí Júda bunwa, nyí ba/bi ekpe ba-wâng kányí, o-koo kányí.

² Ne o-kye onet-dyishí-basúja emen busa o/fu, odim ké Lákyishi o-ca Jerúsélem ne basúja chwóó o-da-sét Otu Hezekyâ o/fu, ozú abwô ké bunwa. Onet-dyishí-basúja ámu o/bwom ké bukwóp ḿbú banet ḿbé mbe ba-chi i byídí mbe ba-chi i bǎmkpóngé, ké owo mú kiǐdé ńkyí bushûyû nkyi kyi-sen n ké mǔ.

³ Banet ḿbé Júda ashí achât ba/bê ba-kâm ǎ, Elyǎkim mú wǎn-Hyíkya mú mu onet-dyishí mú kyibám-butu, ne Shébana mú nsâng banwet-otu, ne Jówa mú wǎn-Ásap mú mu o-tî ng banwet-oshê.

⁴ Onet-dyishí-basúja mú Asyírya o-sét kámbé o/fu, otu mú Asyírya mu o-ryuu ng o/fu, nyǐ o-nyît ng ńkyí nkyi kyi-jang ng erêe Otu Hezekyâ dyityém.

⁵ O-bí kámbé o/fu, ben bamu ba-kabe ng ba/fu, ejá e-man n ekúng kyikit ńkyí busa ne byinyídíng ḿbyí byití enwa? Yeě mú ben ba/kabe ba/fu, o/chi o-chwáp běn ba-bwom bunwa ne Asyírya.

⁶ Ben bamu ba-kabe ng ba/fu, Éjip e/chi e-chwáp běn, nké ńkyí ánkyi kyi/chi kyi-kyú wǎ kiǐbyâa eyip a-chi ochí-bucen, kyi/chi kyi-byíryî kyi-tím ǒ ké bubwô. Éné nké otu mú Éjip mu â nang yeě o/jêem esim ne nyǐ.

⁷ Onet-dyishí-basúja mú Asyírya ámu o-chîraa o-ca kashú o/fu, ba-man n mě esét to ba/fu, ben bamu ba-jêem m esim ne Óburúkpâbí mú mu Osówo enen? Byikit-ociring ḿbyí Óburúkpâbí ne byikit-kyifen emen echi nké Otu Hezekyâ o/bên ké nkéré mú o/sét banet ḿbé Júda ne Jerúsélem o/fu, bakûkye ofê ké kyikit-kyifen echi kyibónge nké nke.

⁸ Me n/chi n-ryí ocím ne ben ké dyishí ńdyí otu mú Asyírya. Me n/chi n-kye běn égot-bubyî-orá diǐkpú â ben ba/chi ba-já bujê-banyinchéng ḿbé ba/jê éné ḿbé badayú kámbú.

⁹ Ben ba*da/fyi jangjang nang ne nkuli kyikû-onet-dyishí-basúja ḿbé Asyírya* nké bamu ba-tî ng achi ba/fu, banet ḿbé Éjip batwóm běn basúja ne bamútu ḿbé bubyî-orá budatut.

¹⁰ Ben ba/kabe ba/fu, Óburúkpâbí o*da mě echwáp ne n-kye oshê enen bunwa* m-bên kámú*? Óburúkpâbí oyén nké o/sét mě o/fu, me nkye kámú bunwa, m-bên kámú.

¹¹ Ne Elyǎkim ne Shébana ne Jówa ba-sét onet-dyishí-basúja ámu ba/fu, raa ne be ké ejá nyí Aramîk. Be byi-jwo ng Aramîk. *Daraa Hyíburu*. Kángkáng banet ḿbé ba/kyú ké ekpe nyí oshê mbe ba-fwôo ng atông.

¹² Nyǐ o-faa kámbé o/fu, ben bamu ba-kabe ng ba/fu, ben ne otu nké nke nké otu mú Asyírya o/fu, me nsét běn byěm ḿbyín? Aa*wááng* me n-sét ng to banet ḿbé ba/kyú me ké ekpe, ḿbé ba/chi ba-ryí abîng ebe ba-jwáp basa ebe wǎ eringe nyí ben to ba/chi ba-chi.

¹³ Ne onet-dyishí-basúja ámu o-bûu nensang o-raa ké Hyíburu ne ejá kyíbóng kyíbóng o/fu, fwôo n̂g atông ba-jwo ńkyí otu mú Asyírya mu o-sét ng běn.

¹⁴ Mu o-kuri ng běn ekó o/fu, ben ba*dachi ba-mîng Otu Hezekyâ o-nîm běn*. Otu Hezekyâ oo*man běn enyii*.

¹⁵ Ne *da n̂g echi ba-mîng ǎ o-sét běn ba-bángê ne nyǐ* ba/fu, ben ba-jêem m esim ne Óburúkpâbí*. *Da n̂g echi ba-kabe ba/fu, Óburúkpâbí o/chi o-nyii běn* ne o/chi o-chi basúja eten ḿbé Asyírya baa*koo to oshê enen*.

¹⁶ *Da n̂g ejwo Otu Hezekyâ*. Otu mú Asyírya mu o-sét ng běn o/fu, ben babyí ké kafâ-oshê ba-zú abwô ké bunwa. O/chi o-mîng běn ashí kángkáng ba-ryí byirim-byichí ḿbyí ba/kwón, ba-jwáp omu ké abíng-omu nyí ba/sím,

¹⁷ tete nyǐ o-yángê běn oshê ké kyikit ńkyí nkyi wǎ oshê enen, ńkyí ne byifát-byirim-byichí ḿbyí byida běn ekye bato, ne esang-byichí nyí badachi berêt.

¹⁸ *Da n̂g ebángê Otu Hezekyâ o-nîm běn ba-kûkabe ba/fu, Óburúkpâbí o/chi o-nyii běn*. Esówo nyí eshê nyí áku e/man enyii eshê ebe ké abwô nyí otu mú Asyírya?

¹⁹ Esówo nyí Hámat ne Ápat nyi nyá kántîk. Osówo mú Sefabyâm mu nyá. Mu kô nang obónge mú o/nyii Samérya?

²⁰ Nkéré orá mú esówo ńnyín ee/man enyii eshê ebe ké abwô nyí otu eten mú Asyírya. Ebóng kâng ńkyí nkyi kyi-chi i běn ba-kabe ba/fu, Óburúkpâbí o/chi o-man enyii Jerúsélem.

²¹ Banet ḿbé Jerúsélem ba-cíbî pyêp wǎ eringe nyí Otu Hezekyâ o/sét kámbé. Ba*da/faa nang ojá*.

²² Ne Elyǎkim ne Shébana ne Jówa ba-ját byídí ebe ké bafip, ne ba-dim ba-da-sét otu ńkyí onet-dyishí-basúja ḿbé Asyírya o/sét.