Azáya 34 - Bokyi Bible

Osówo o/chi o-kye Banet-Bushwôn Emen Busông

¹ Banet ḿbé ké ejíí emúmú, bâ n̂g. Bwom m̂ kyikit kyibónge ba-fwôo atông. Ejíí emúmú ne kángkáng byěm ḿbyí mbyi ké nyǐ ebâ nyín e-ba-fwôo atông e-jwo.

² Óburúkpâbí mu o-sa ng kafâ ne eshê emúmú ne basúja ebe. Oo/két mpan mú ba/chi ba-ju kámbé.

³ Baa*ba/chi ba-ryii byikwóm-enyam-byiko ebe*. Byi/chi byi-waa kyíjí byi-fwoo, byi-kûnung. Eku e/chi e-bwam baróng.

⁴ Óbyísû ne otukáku ne ékpére byi/chi byi-sêe rugirugi, byi-bírî édúkǎndú. Bubóng bu/chi bu-rím wǎ kiǐbáá-nwet ńkyí mbe ba-fút ng kánkyí, ne ékpére e/chi e-róng wǎ eshǎan nyí edafím ké kyichí e-róng kyísí.

⁵ Óburúkpâbí oo/jee kashwám emen kyíbóng, ne kántîk ka/chi ka-kpet Édom, banet ámbe ḿbé nyǐ oo/két mpan o/fu, baju kámbé.

⁶ Baróng ne bafwám ebe ba/chi ba-cít kashwám emen, wǎ baróng ne bafwám-ebû nyí baa/ju ba-chi kyifen. Óburúkpâbí o/chi o-chi kyifen ńkyín ké oshê mú Búzara. O/chi o-ju banet chwóó ké esí nyí Édom.

⁷ Banet ba/chi ba-róng wǎ biinyinyǎm ne bwǎn-bampong, ne esí e/chi e-bwam shéét ne baróng, bafwám ba-cít kányí.

⁸ Nyín nkéré mú Óburúkpâbí o/chi o-nyii Záyon, o-só banet-bushwôn emen ewa.

⁹ Buce ḿbú Édom bu/chi bu-bírî aká nyí pyampyam nyí badanyange ba-pwó ké ndûm-bukwóp, ne esí e/chi e-bírî aká nyí adasóng okwâ a-bwam shéét. Esí emúmú e/chi e-mang wǎ aká nyí pyampyam nyí adamang okwâ.

¹⁰ E/chi e-mang buchú ne esû, ne arúkwâ nyí aa*man ne banyá* a/chi a-kûbyí ké nyǐ. Esí e/chi e-waa kafâ dyikáá ké égot-aje e-bírî ng, ne onet oo*ba/chi o-chîcen ké nyǐ ne banyá*.

¹¹ Biikong ne byibî-bunurung byi/chi byi-koo esí ányi. Óburúkpâbí o/chi o-chi kányí e-chîbírî kyikim-dyikán wǎ eringe nyí e/mû ne o-kûchi ejíí.

¹² Otu oo*kyú to ké esí ányi* ne banet-ashí emen kángkáng ba/chi ba-dim.

¹³ Byiwong byi/chi byi-byí ké kángkáng byibám-butu ne ké eshê nyí ba/bi ekpe ba-wáp kányí, ne byibî-enyam ne biikong byi/chi byi-kûkyú ké mbyí.

¹⁴ Byibî-enyam byi/chi byi-kûyêe ké mbyí, ne byibî-barím byi/chi byi-kûkó barî ányi. Kyibî-bucí-buchú kyi/chi kyi-bâ ányi, kyi-kûkyé kyikit ńkyí kyidakyú kyi-jáng.

¹⁵ Biikong byi/chi byi-kím aju ebe, byi-mîng ácě, byi-cép bwǎn, byi-nen kámbé ányi. Biinfuu akun byi/chi byi-kûbê ké kyibónge ké kyibónge byi-ba-cibi ne barî ányi.

¹⁶ Kyé ké nwet mú Óburúkpâbí mú o/kim ne byěm ḿbyí mbyi byikpó, a-kó eringe nyí nwet ámu o/fu, enyam e*fí ké burwám-enyam ányi nyí ee*ba/chi e-kyú* ne nang ebónge e*fí* nyí ee*ba/chi e-kyú ne óbe*. Óburúkpâbí oo/kye busa o/fu, kyikyú éné. Nyǐ oyén nké o/chi o-bâ ne nyǐ kyikit kyibónge.

¹⁷ Óburúkpâbí nké o/chi o-kyii esí ányi o-kye kányí, o-kye nang erá nang erá kyicê ńkyí emen. E/chi e-kyú ké esí ányi égot-aje e-bírî ng, ne e/chi e-firi nyí ebe ne banyá.