Azáya 32 - Bokyi Bible

Otu mú oo*ryí Acît*

¹ Otu o/chi o-kyú dyicí dyibónge mú o/chi o-kûtún banet oo*ryí acît* ne banet-ashí-oshê ba/chi ba-kyú to ḿbé ba/chi ba-kûtún banet ké bukwóp ḿbú baa*ryí acît*.

² Nang yeě ké burwám ebe o/chi o-kyú wǎ kyikit ńkyí banet badarem afú ne omu mú oryên. Mbé ba/chi ba-kyú wǎ buce ḿbú mbu ké kyikit ńkyí omu o*fí* wǎ kiǐríribí ńkyí kiimbâng-buká ńkyí nkyi ké kyikit ńkyí byichí byi*fí*.

³ Ba/chi ba-kúng achi ebe ne atông ebe ba-tî ké byěm ḿbyí banet ebe mbe ba-ryuu ng.

⁴ Baa*ba/chi ba-chîryí ofit* nké ba/chi ba-kûchi byěm ba-nyît ng kyikû, ne ba/chi ba-kûtông atyém ebe gbúúl.

⁵ Onet o*fí mú o/chi o-kabe o/fu, enyam-onet nyi ne ofê* nang mú o/chi o-sét o/fu, nkakafem o-sét ng ntûntû*.

⁶ Enyam-onet e-raa ng enyam ényam, ne e-kabe ng byibî-byěm ḿbyí edachi. Ńkyí edachi ne ńkyí edaraa byi-kyú u edángé ké bushú ḿbú Óburúkpâbí, ne ee*kye banet-esong byiryíng* nang banet ḿbé omu mu o-jê ng kámbé omu ba-jwáp*.

⁷ Enyam-onet ee*nwa* ne e-chi i byibî-byěm. E-cibi ng eringe nyí edanîm banet-byikpu ne byisédéng e-ku kámbé ké bukwóp ḿbú badakoo ńkyí kyi/já kámbé.

⁸ Nké onet mú mu ne ofê o-chi i byěm ne ntûntû ké kafâ, ne o-bwom m kíngkíng ké ńkyí nkyi ké bukwóp ḿbú bunong.

Mpan ne Byěm enap

⁹ Ben banyinyi ḿbé bamu ba-kyú u dyikpen ńdyí baa*kabe okabe* ńdyí dyi*fí ne afaníkong* fwôo n̂g atông ba-jwo ńkyí mu n-sét ng.

¹⁰ Kyi-man n běn ekyú kanong kántîk, nké ké nkéré mún, ké dyije ńdyí ndyi dyi-bâ ké kashú, baa*ba/chi ba-chînyît ńkyí badachi* ké nǎ, byirim-byichí bii*ba/chi byi-chîchi ḿbyí badabóng*.

¹¹ Ben bamu ba-kyú u dyikpen ńdyí baa*kabe okabe* ńdyí dyi*fí ne afaníkong*. Nké kántîk, kû n̂g etím banê ne bushî. Pii n̂g byídí enen ba-tî kú, ba-sît ekâa-byídí ké osín.

¹² Kû n̂g edíp abwô ké kakim enen ké bafip, ké nǎ, baa/bên byifát ḿbyí mbyi ne byiryíng ne byifát ḿbyí byinong,

¹³ ne esí nyí banet ejí e-kú e-kán n biǐbyâa ne nnyamefám. Tii n̂g bukyû ba-fé kángkáng byise ḿbyí banet ba/mû ba-kyú u ké bunyîn-dyityém ne oshê mú o/mû oo/sú ne dyikpen ńdyí dyinong.

¹⁴ Nang kyibám-butu ba/chi ba-mîng kánkyí ne ba/chi ba-dim kángkáng ba-mîng dyityém-oshê. Byise ne byikit ḿbyí byi/mû byi/ku kámbyí byi/chi byi-firi biǐbwô-byise ne banyá. Byi/chi byi-firi byikit ḿbyí enyam edayêe ne ḿbyí ebû edaryí baryî.

¹⁵ Nké Osówo o/chi o-chî bě etwóm Busun emen. Esí nyí e/mû ee/waa dyikáá e/chi e-chîkpet ebát byiryíng, ne byifát byi/chi byi-bát byíkwôn ḿbyí byinong.

¹⁶ Ntûntû ne kanong echi byi/chi byi-firi ké kángkáng esí ńnyín.

¹⁷ Ké nǎ, nang yeě o/chi o-chi ńkyí nkyi kanong, bunyîn-dyityém ne byěm ekyú kerededet byi/chi byi-waa ne banyá.

¹⁸ Banet-Osówo ba/chi ba-fem ké byěm ḿbyí mbyi byi-kyâ kámbé afaníkong, ne byise ebe byi/chi byi-kyú kerededet ké bunyîn-dyityém. [

¹⁹ Nké abíp a/chi a-róng ké byizinge ne oshê o/chi o-bûu.]

²⁰ Nang yeě nang yeě o/chi o-kyú ké bunyîn-dyityém, ké nǎ, omu o/chi o-firi chwóó mú byíkwôn byidakán ne byikit-biǐbyâa ḿbyí byinong byinong ké kángkáng byikit ḿbyí boonyam-atû ne bampong byidaryí.