Azáya 30 - Bokyi Bible

Ocím eryí ne Éjip mú o*da/byí Chwǒm*

¹ Óburúkpâbí o/raa o/fu, banet ḿbé mbe batu ké Júda ba/firi ké busông, ké ebóng, ba/bwom bunwa ne nyǐ. Mbé mbe ba-chi i byěm ḿbyí nyǐ o*da/kabe* ne mbe ba-ryí i ocím ne banet mú dyityém emen dyi*da/bángê* ba-chi i byibî byi-jê ng byi-câ kashú.

² Mbe ba-dim m ba-kâm m Éjip ba/fu, bachwáp kámbé, bacê ḿbé emen ba*da/bí*. Mbe ba-ryuu ng ba/fu, Éjip eku kámbé, ne ké bubwô ámbu, baa/yip dyityém ebe ba-fé ne otu mú Éjip.

³ Nké otu ámu oo*ba/chi o-já busa ḿbú odachwáp kámbé* ne dyiku ńdyí Éjip nyi e-ku ng kámbé dyi/chi dyi-nyere ké afaníkong.

⁴ Nang ké banet ḿbé ba/bwom ké dyishí-oshê ebe baa/ribi ké eshê nyí Éjip nyí Zôn ne Hánes,

⁵ banet ḿbé Júda ba/chi ba-chi ájângmé nyí mbé ba/fé dyityém ne oshê mú oo*sét ntûntû* oshê mú mu o-né ng kámbé ké nkéré mbe ba-ryuu ng ochwâp.

⁶ Nyín ńkyí Osówo o/sét kyi-kim ne enyam nyí ké kyikim-dyikán ńkyí nkyi ké kyicê ńkyí busyísen, o/fu, banet ḿbé mbe ba-wâa ng edakyú kyíjí ké dyishí ńdyí Júda mbe ba-cen n ké kyibî-kyikit ńkyí ekpang nyi e-kyú u ne ńkyí efyi ne byibî-enyam mbyi. Baa/yip biǐtí-eyáré ba-tû boonyam-atû ebe ba/fu, mbé ba-da ng ekye oshê mú oo*ba/chi o-man echwáp kámbé*.

⁷ Ochwâp mú Éjip nyi e-kyâ kámbé o*da/byí chwǒm* ké bubwô ámbu, me nn/fé Éjip dyizîn ńdyí badakó, kyibî-enyam ńkyí kii*man echi chwǒm*.

Banet ḿbé ba*fí ba-chi i ńkyí Osówo o/sét*

⁸ Osówo o/sét mě o/fu, me nsáng kyísí ké nwet eringe nyí banet ḿbén mbe, eringe nyí nwet ámu odakûtông kángkáng nkéré eringe nyí mbé ba/bên.

⁹ Kángkáng nkéré mbe ba-bwom m bunwa ne Osówo, ba-sét ng byisédéng, ba-né ng echi ńkyí Óburúkpâbí mu o-tángê e kámbé.

¹⁰ Mbe ba-sét ng bamkpábé ḿbé mbe ba-sét ng byiraa-Osówo ba/fu, bacíbî pyêp. Ba-raa ng ba/fu, *da n̂g bě echîsét kyi-kim ne ńkyí nkyi kanong*. Sét n̂g bě ńkyí byimu byi-ryuu ng byi/fu, byi-jwo ng. Mîng n̂g byi-tî barê eten ḿbé byimu byi-ri ng.

¹¹ Dim m̂ bě ányi ké bukwóp, ba*dachi ba-chî bě eku kiǐfáng*. Byi*fí byi-ryuu ng byi/fu, byi-jwo ng kyi-kim ne Osówo enen mú onong* mú Ézerel*.

¹² Nké ńkyín nké Osówo mú onong mú Ézerel mu o-raa ng. O/fu, ben bamu ba-né ng ńkyí nyǐ mu o-sét ng běn, ba-jêem esim ké bakân ne kaǎnínǐm.

¹³ Mpan o/bên běn. Ben bamu wǎ ekpe nyí e/nyâam, nyí nyi ne okyû tete o-ribi kyísí. Ba/chi ba-bûu ba-myii baa*tî ekpu*.

¹⁴ Ba/chi ba-sêe rugirugi wǎ katí. Dyisê ándyi dyi/chi dyi-bên dyi-shwôm ńdyí kaǎcíncáng ńké karyên kaa*kyú nang kabónge* ńké badaman eyip ba-bwóp nang okwâ* ba-kpé nang omu ké dyijwáng*.

¹⁵ Óburúkpâbí mú mu Otu Kyítá mú onong mú Ézerel mu o-sét ng banet ámbe o/fu, bwa n̂g esim degere ba-fé dyityém ne me. Ne ben ba/chi ba-kyú shwanshwan, chwǒm kii*ta běn*. Nké ben bamu ba-né ng echi éné.

¹⁶ Nké bamu ba-kabe ng ba/fu, â ben ba/yú ké bubyî-orá enen ḿbú budakwáng ochéé ben ba/chi ba-fem ké abwô nyí banet-bushwôn enen. Okabe enen mu kanong. Dyichêe nké ben ba/chi ba-chêe. Ben bamu ba-kabe ng ba/fu, bubyî-orá enen mbu bu-kwáng ng, nké banet ḿbé mbe ba-nwa ng ne ben ba-bâ ba/chi ba-kwáng ba-shwôm běn.

¹⁷ Égot-banet enen etánge e/chi e-chêe ké nkéré baa/ri onet-súja mú onet-bushwôn enen obónge, ne basúja batánge ba/chi ba-chi běn ben ashí amúmú ba-chêe. Onet-súja enen nang obónge oo*ba/chi o-waa* kyi-cibi ne onet mú mu o-níbî ng ekap-oshê kǎnchí* kyíbóng-kaku*.

¹⁸ Nang ké nkyi éné, Óburúkpâbí mu o-bwom m o/fu, nyǐ o-ri ng běn bafip. Nyǐ o/kpá byiko o/fu, nyǐ o-ri ng běn bafip, ké nǎ, kángkáng nkéré nyǐ o-chi i ńkyí nkyi ké bukwóp ḿbú bunong. Bunyîn-dyityém mbu ne banet ḿbé ba/fé dyityém ne Óburúkpâbí.

Osówo o/chi o-jware Banet Emen

¹⁹ Ben banet ḿbé bamu ba-kyú u ké Jerúsélem baa*ba/chi ba-chîtii*. Óburúkpâbí o-ri ng banet bafip, ne â ben ba/tii ba-kó ǎ ké ochwâp, nyǐ o/chi o-faa běn ojá.

²⁰ Óburúkpâbí o/chi o-chi běn ba-nung ké kyibî-nkéré, nké nyǐ oyén o/chi o-kyú ne ben o-tángê běn byěm, ne ben baa*ba/chi ba-chî ǎ ekyé*.

²¹ Â ben ba/zóp ké bukwóp ba-jâ bubwô-etyebéng nang bubwô-eku, ben ba/chi ba-jwo ejá emen ké esim enen, e-sét běn e/fu, dǐi bukwóp i, cen n̂ ké mbú.

²² Ben ba/chi ba-yip erím-bakye enen nyí ba/cít kányí syílyíba ne nyí ba/cít kányí gûl ba-pwó kú wǎ banunut-byěm ba-raa ba/fu, *da n̂g bě echîbwom ké bushú*.

²³ Nang nkéré orá nké ba/kwón byíkwôn, Óburúkpâbí o/chi o-twóm omu o-chi kámbyí byi-kán ne o/chi o-chi kámbyí byi-bát, ne bampong enen ba/chi ba-já biǐbyâa chwóó ḿbyí badaryí.

²⁴ Bampong ne boonyam-atû enen ḿbyí mbyi byi-kpang ng běn byifát byi/chi byi-já byiryíng ḿbyí byidanwa byi-shwôm ḿbyí byidaryí.

²⁵ Ké dyicí ńdyí ba/chi ba-koo byikit ḿbyí banet-bushwôn enen mbe ba-bwom m ba-nwa ng byití, ba-ju banet ebe, buce bu/chi bu-sen ké kángkáng eku nyí nyáám ne nyí kyísí kyísí.

²⁶ Otukáku o/chi o-kûsan jangjang wǎ óbyísû, ne óbyísû o/chi o-kûsan kampén bujam o-shwôm eringe nyí o/mû o-san n, wǎ kiinwángé ńkyí ací bujam kyidasan ké dyicí dyibónge. Ńkyín kyi/chi kyi-chi ké nkéré mú Óburúkpâbí oo/bwá byinêm ḿbyí o/kye banet emen byi-kpú.

Osówo o/chi o-kye Asyírya Busông

²⁷ A-man n ebwom a-ri busa ḿbú Óburúkpâbí ne busan emen ḿbú ragerage tíbítíbí. Okwâ ne arúkwâ mbyi byi-tông ng kafâ esa emen. Nyǐ o-raa ng, ne ejá emen e-mang ng wǎ okwâ.

²⁸ Nyǐ mu o-twóm m afú a-bwóp ǎ kashú wǎ kace ńké kadasú, ńké kadawuri kángkáng byěm. Afú ányi nyi a-tugi ng eshê a-da-ju, a-man ne byibî-okabe ebe.

²⁹ Nké ben, banet ḿbé Osówo, ba/chi ba-kyú ké bunyîn-dyityém ne ba-kwán ekwan wǎ eringe nyí bamu ba-kwán n ké buchú ḿbú dyijî-kyifen. Ben ba/chi ba-kyú ké bunyîn-dyityém wǎ banet ḿbé mbe ba-jwo ng ane nyí boontán, ḿbé mbe ba-wâa ng ké kiǐtí-kyise-kyifen echi ńkyí Óburúkpâbí, mú mu o-nyii ng Ézerel.

³⁰ Óburúkpâbí o/chi o-chi nang yeě nang yeě o-jwo ejá emen nyí nyi ne busa, o-jwo to busa ḿbú kafâ esa emen ké bumang-okwâ ne afú nyí aryên ne abíp ne omu mú oryên.

³¹ Banet ḿbé Asyírya ba/chi ba-shî ké nkéré baa/jwo ejá nyí Óburúkpâbí, ba-jwo bubân-busông ḿbú mu o-kyâ kámbé.

³² Ké nkéré Óburúkpâbí o-kú o-díp ng kámbé o-bírî ng, banet emen ba/chi ba-kim ane ké ekam ne ácîng. Osówo oyén o/chi o-nwa ne banet ḿbé Asyírya.

³³ Ké nkéré mú o/shwôm ké esim chwóó, ba/tî kyikit ńkyí badawóngê kiǐkâp-okwâ ńkyí badashí [otu mú Asyírya.] Kyikit ánkyi kyi/ríbî kyi-rêe ne kiǐzú-ekwón nyáám. Óburúkpâbí nké odatuu bufú-okwâ ké nkyí ne kyi-koo bumang.