Azáya 3 - Bokyi Bible

Afaníkong nyí nyi ké Jerúsélem

¹ Kántîk Óburúkpâbí mú mu Otu Kyítá mú o/rêe o-shwôm o-kú o-bâ ekúng kángkáng byěm ḿbyí banet ḿbé Jerúsélem ne Júda mbe ba-jêem m esim ké mbyí. O/chi o-kúng byiryíng ebe ne omu ebe

² ne bakân-banet ebe ne basúja ebe ne bampan esuk ebe ne bamkpábé ebe ḿbé badasét byiraa-Osówo ne bansô epé ebe ne bakínkán-banet ebe

³ ne banet-ashí-oshê ebe ne banet-ashí-basúja ebe ne bankye bacê ebe ne nang yeě mú mu o-kúng ng bambirirím o-chi i byěm.

⁴ Óburúkpâbí o/chi o-chi banet ḿbé Jerúsélem ba-firi ké busa ḿbú bwǎn ḿbé ba*da/kán ne*.

⁵ Nang yeě o/chi o-kûcít orî-onet. Byisat bii*fé to bakínkán ebe* ne enyam-banet baa*fé to biǐtí-banet ebe*.

⁶ Nkéré o/chi o-bâ mú byikû-banet byi/chi byi-fîm onet obónge ké burwám ebe ba/fu, wo amu ne nang chwǒm ńkyí adafé ké byiko, ké bubwô ámbu, kyú bě onet-dyishí ké nkéré mún mú afaníkong.

⁷ Nké onet ámu o/chi o-faa o/fu, *chí mě*. Me mm*man běn echwáp*. Me n*fí ne byiryíng* nang byídí to byi*fí mě*. *Da n̂g mě echi onet-dyishí enen*.

⁸ Ké nǎ, Jerúsélem o/firi ké busông. Júda o-kú o-bú ng. Kángkáng byěm ḿbyí mbe ba-raa ng, ba-chi i byi*fí byi-kwárê ng ne Óburúkpâbí*. Mbé mbe ba-bwom m wááng ba-kyâ Osówo oyén edángé.

⁹ Ecábé ebe nyí mbe ba-cábê ng banet e/chi e-bwom ntûesé e-bât kámbé. Mbé ba-chi i byibî wááng wǎ eringe nyí banet ḿbé Sódom ba/chi. Ba/firi ké busông, ne mbé bayén nké ba/kó busông ámbu. [

¹⁰ Banet ḿbé banong ba/chi ba-kyú ké bunyîn-dyityém,] ne byěm byi/chi byi-ca kanong ne mbé. Ba/chi ba-ryí abwô-bǎmkpóngé ebe.

¹¹ Nké byibî-banet byi-kyú u ké busông. Ńkyí mbé ba/chi banet, kyi/chi kyi-chi kámbé to.

¹² Bampwoo banet akpuga mbe ba-cít ng banet ejí, ne banet ḿbé ba/pwoo kámbé akpuga mbe ba-ryí i kámbé bampún. Banet ejí, banet-ashí enen mbe ba-nîm m běn, ne ké bubwô ámbu, ba*fí to ba-nyît ng kyicê ńkyí badabírî*.

Óburúkpâbí mu o-pan n Banet Emen Mpan

¹³ Óburúkpâbí oo/kpá byiko ḿbyí odasét mpan emen, oo/kpá byiko ḿbyí odapan [banet emen] mpan.

¹⁴ Óburúkpâbí mu o-bâ ne ḿbé bakínkán ne banet-ashí-banet emen o-ba-pan kámbé mpan. Mu o-sét ng kámbé o/fu, ben baa/bam byifát ba-koo, ne byise enen bii/sú ne byěm ḿbyí baa/koo ne banet-byikpu.

¹⁵ Ben ba*fí ne bukwóp ḿbú badaju banet ejí ba-cít banet-byikpu*. Me Óburúkpâbí mú mu Otu Kyítá mú o/rêe o-shwôm nn/raa.

Óburúkpâbí o/kuri Banyinyi ḿbé Jerúsélem ekó

¹⁶ Óburúkpâbí o/raa o/fu, kûri eringe nyí banyinyi ḿbé Jerúsélem mbe ba-tông ng byiko. Ba-byí i kyíjí ba-nyîim m esim. Ba-cen n ba-yip ng achi-kyijé ne banet. Ba-cen n bucen ḿbú baa*tan byikpa* byibwáng ḿbyí ba/fé ké byitông-byiká byi-kûninge wǎ égbáng.

¹⁷ Nké n/chi n-kye kámbé busông. N/chi m-pwát kámbé ashí a-waa kpóróm.

¹⁸ Dyicí ndyi dyi-bâ ńdyí Óburúkpâbí o/chi o-koo banyinyi ḿbé Jerúsélem kángkáng byěm ḿbyí mbe ba-tông ng byiko ké mbyí. O/chi o-koo kámbé byibwáng ḿbyí mbe ba-fâ ké batông-byiká ne ké ashí ne ké byitông

¹⁹ ne ké byitông-abwô. O/chi o-koo kámbé boǒsém ḿbú mbe ba-cít ng ké bashú

²⁰ ne etam ebe ne biǐré-bakye ḿbyí mbe ba-fâ ké basín

²¹ ne ékpâl nyí mbe ba-fâ ké efwa ne ké ezóng

²² ne kángkáng ewuryi ebe ne byídí ebe ne boombam-bubwô ebe

²³ ne bamkpín ebe ne afáré ebe nyí legelege ne bambúket ebe ne boǒsém ḿbú butangbutang ḿbú mbe ba-cít ng ké ashí.

²⁴ Ba-mîng ng ńkyí ba/mû ba-sabe ng ba-kûnung kyibî-kyinung. Ba-mîng ng ńkyí ba/mû ba-sît ng ba-kûsît erí. Ńkyí ba/mû ba/chi ba-kyú ne eji nyí enong enong ba/chi ba-firi ne biǐkpóróm-ashí. Ba-mîng ng byídí ḿbyí byinong ḿbyí ba/mû ba-bwá ng ba-kûbwá ekâa-byídí. Bunong ebe bu/chi bu-bírî éshwân.

²⁵ Ba/chi ba-ju banyinchéng enen, nang ḿbé mbe ba-jang ng ekán, ké byití.

²⁶ Banet-oshê ba/chi ba-ta dyikán, ba-tii, ne oshê oyén o/chi o-firi wǎ onyinyi mú o/byak ké ecing osíndyíbang.