Azáya 29 - Bokyi Bible

Ńkyí kyi/chi kyi-chi Jerúsélem

¹ Jerúsélem oyén, mú mu kyikit-kyifen echi ńkyí Osówo, o/firi ké busông. Oshê mú Otu Dívit o/kyú ké mǔ o/firi ké busông. Mîng dyije dyibónge nang afee a-shwôm ne ajî-byifen ebe,

² ne Osówo kâng o/chi o-bâ ne busông ké oshê mú mbe ba-kó ng kámú kyikit-kyifen echi ńkyí Osówo. Banet ba/chi ba-kûtii ba-wonge e, ne oshê omúmú o/chi o-firi wǎ kyikit-kyifen echi ńkyí baróng baa/cít kánkyí.

³ Osówo o/chi o-kye Jerúsélem bunwa, o-wâng kámú o-bi byikit ḿbyí odayú ké ekpe nyí e/wáp kámú e-fé ké kafâ.

⁴ Jerúsélem o/chi o-firi wǎ okúsí mú mu o-nwa ng ne kyiraa eraa ké kafâ-dyikun, wǎ kiikpikpok-ejá ńkyí nkyi kyi-fím m ké édúkǎndú.

⁵ Kángkáng bacinbánet ḿbé mbe ba-kyâ ǒ bunwa, ǎ Jerúsélem, ba/chi ba-tugi kámbé ba-pwó wǎ édúkǎndú, ne basúja ebe ḿbé badachi bushî ba/chi ba-rím wǎ biǐbyâa ḿbyí bufú budatugi bu-dim ne mbyí. Nang ekpu aa*tî*.

⁶ Óburúkpâbí o/chi o-kúng etare ne esí enáng o-nyii ǒ. O/chi o-twóm omu ne okwâ

⁷ ne kángkáng basúja ḿbé mbe ba-kyâ kyikit-kyifen echi ńkyí Osówo bunwa ne kángkáng byiyám-byití ebe, kángkáng byěm byi/chi byi-rím kâng wǎ burê ḿbú badari, ne wǎ chwǒm ńkyí onet odakabe ne buchú.

⁸ Kángkáng eshê nyí nyi e-cibi ng e/fu, nyǐ e-kyâ Jerúsélem bunwa e/chi e-kyú wǎ onet mú esong nyi e-nwa ng ǎ, mú mu o-ri ng burê o/fu, nyǐ o-kú o-ryí i byiryíng, o-jwóbê ne esong ké dyifít, ne wǎ onet mú mu o-kpú u kyijé-omu, mú mu o-ri ng burê o/fu, nyǐ o-kú o-jwáp ng omu, o-jwóbê ne omiríng jwómjwóm.

Ekó ekuri nyí ba/né

⁹ Ca n̂g kashú ba-róng ng enyam ba-câ. Ca n̂g kashú ba-sêe ng achi ba-câ. Bwóm m̂, nang ba*da/jwáp bato*. Cíng n̂g, nang ba*da/jwáp bato*.

¹⁰ Óburúkpâbí oo/chi běn achi a-kú a-wuri ng běn nyí badaróng ké kiǐtí-burê. Bamkpábé ḿbé badasét byiraa-Osówo nké ba/mû ba/chi ba-tông banet kiǐfáng, nké Osówo oo/cít kámbé achi.

¹¹ Baa*ba/chi ba-nyît kyikû kyi-kim ne akat nyí bamkpábé ḿbé badasét byiraa-Osówo*. Kyi/chi kyi-kyú wǎ nwet mú ba/cít kámú eringe nyí oo*bâa*. Â ba/kúng kámú ba-da-kye onet mú odaman ekó nwet ba/fu, okó o-sét běn, nyǐ o/chi o-sét běn o/fu, nyǐ oo*man ekó kámú* ké nǎ, ba/cít kámú.

¹² Â ba/kúng kámú ba-kye onet mú oo*man ekó nwet* ba-sét ǎ ba/fu, okó o-sét běn, nyǐ o/chi o-faa běn o/fu, nyǐ oo*man ekó nwet*.

¹³ Óburúkpâbí o/raa o/fu, banet ḿbén mbe ba-sét ng ba/fu, mbé ba-fâ mě, nké ejá ebe e*da/byí chwǒm* ne atyém ebe nyi byikit byikíri. Bukwóp ḿbú bada mě ekye ofê bu*da/shwôm byije ḿbyí banet* ne édúú nyí bakínkán* ḿbyí mbé baa/kwâa ba-fé ké dyishí*.

¹⁴ Ké bubwô ámbu, n/chi n-kédê kámbé ofong ké dyikwâ ńdyí baa*tî ekpu* n-nye n-chîdíp. Banet ḿbé mbe ne bubong ba/chi ba-bírî ba-firi enyam, ne byinyídíng ebe byi/chi byi-waa kyísí dyikáá.

Achi etî ké Nkéré mú ké Kashú

¹⁵ Banet ḿbé mbe ba-kan n ba/fu, mbé ba-rôo ng Óburúkpâbí okabe ebe mbe ké busông. Mbé mbe ba-chi i byibî-byěm ebe ké kajii, ba-kabe ng ba/fu, onet o*fí mú mu o-ri ng kámbé* o-nyît nang onyît ńkyí mbé mbe ba-chi i*.

¹⁶ Mbé mbe ba-tíngê e kángkáng byěm dyishí kyísí. Yeě mu kiǐtí o-shwôm, nchi butí aa bumee. Chwǒm ńkyí onet o/chi kyi-man n esét onet ámu kyi/fu, *chí wo nké a/chi mě*? Kyi-man n esét nang onet ámu kyi/fu, wo a*fí a-nyît ng ńkyí amu a-chi i*?

¹⁷ Ba/tím dyitím-ekan ba/fu, ké kaǎnyín-nkéré, kyizinge kyi/chi kyi-bírî ebin, ne ebin e/chi e-bwa esim e-bírî kyizinge.

¹⁸ Â dyicí ándyi dyi/fyi, banet ḿbé baa*jwo atông* ba/chi ba-jwo ké nkéré ba-kú ba-kó ng nwet, ne bansêe achi ḿbé ba/mû ba-kyú u ké kyifip ba/chi ba-bâa achi ebe ba-kûrángê.

¹⁹ Banet-kyikpu ne banet ḿbé mbe ba-tî ng byiko ebe kyísí ba/chi ba-chîjá bunyîn-dyityém ḿbú Óburúkpâbí, Osówo mú mu onong mú Ézerel, mu o-kyâ.

²⁰ Kyi/chi kyi-kyú nkuli kyikû mú banet ḿbé mbe ba-cít ng banet bakíri, ba-kyâ Osówo edángé. Osówo o/chi o-ju kángkáng banchi byibî.

²¹ O-ju to banet ḿbé mbe ba-shú u banet bakíri, banet ḿbé ba*fí ba-bángê e ba-kye banchi byibî busông* ne banet ḿbé mbe ba-sét ng byisédéng ba-chi mpan o-bên banet ḿbé mbe ba-sét ng ntûntû.

²² Ké bubwô ámbu, Óburúkpâbí mú mu Osówo mú Ézerel, mú o/nyii Ébarahâm ké afaníkong, o/raa o/fu, baa*wuri běn to éshwân* ǎ banet ejí*. Bashú enen baa*kpú běn to ké éshwân*.

²³ Ké nkéré ben baa/ri bwǎn ḿbé me n/chi n-kye běn, ben ba/chi ba-bángê kâng ba/fu, me n-chi i Osówo mú mu onong mú Ézerel. Ben ba/chi ba-kye mě ofê, ba-kû mě eshî.

²⁴ Enyam-banet e/chi e-kwâa eringe nyí edanyît byěm, ne banet ḿbé mbe ba-bírî ng bunwa ne Osówo kángkáng nkéré ba/chi ba-kyú ké bunyîn-dyityém ḿbú banet badatángê kámbé byěm.