Azáya 26 - Bokyi Bible

Osówo o/chi o-chi Banet Emen ba-kpógê

¹ Dyicí ndyi dyi-bâ ńdyí banet ba/chi ba-kwán okwan mún ké esí nyí Júda ba/fu, oshê eten mu ne busa. Osówo oyén nké mu o-ku ng kámú.

² Bâa n̂g afyi nyí oshê, ba-mîng oshê mú o/fé dyityém ne nyǐ o-nung, oshê mú mu o-chi i ńkyí nkyi kanong.

³ Wo, ǎ Óburúkpâbí, amu a-kyâ banet ḿbé mbe ba-tî ng okabe ebe kíngkíng kiǐtí-bunyîn, ké nǎ, mbé ba/fé dyityém ne wo.

⁴ Fé n̂g dyityém ne Óburúkpâbí kángkáng nkéré. Nyǐ mu o-ku ng bě kángkáng nkéré.

⁵ Nyǐ oo/bwa ne banet kyísí ḿbé ba/mû ba-tông ng byiko, o-bên oshê-busa mú ba/mû ba-kyú u ké mǔ, o-bú ekpe ebe e-ba-nung ké édúkǎndú.

⁶ Banet ḿbé mbé ba/mû ba-cít ng kámbé ba-kú ba-cen n kyíbóng-ekpe ányi kántîk, ba-cím m kányí ké byiká.

⁷ Óburúkpâbí, wo amu a-chi i kiǐfáng ńkyí gogégogé a-tî banet ḿbé banong. Bukwóp ḿbú mbé mbe ba-cen n mbu taretare.

⁸ Be byimu byi-câ ké kiǐfáng ńkyí okabe eyên, ne byimu byi-fâ atyém eten ké wo. Wo nké amu kángkáng ńkyí byimu byi-ryuu ng.

⁹ Me mu n-ryuu ng ǒ ne dyityém ejí kángkáng ne buchú. Ké nkéré mú wo a/chi a-pan banet-ejíí mpan, mbé kángkáng ba/chi ba-nyît eringe nyí mpan mú baa*ryí acît* mu.

¹⁰ Nang ké wo a/cángê dyityém ne bambên atyém, mbé ba*fí ba-kan n ba/fu, mbé ba-chi i ńkyí nkyi kanong*. Nang nyín ké esí nyí banet ḿbé mbe ba-chi i kanong, mbé ba/tôong ba-chi i byibî. Ba*fí ba-kúng ng ǒ ba/fu, wo amu kiǐtí*.

¹¹ Banet-bushwôn eyên ba*fí ba-nyît ng ba/fu, wo a-kyâ kámbé busông*. Óburúkpâbí, fé kámbé éshwân a-mîng kámbé ba-ri busông. Mîng kámbé ba-ri busông ḿbú aa/tî kámbé. Tông kámbé eringe nyí banet eyên mbe ba-jê ng ǒ.

¹² Óburúkpâbí, wo a/chi a-kye bě kanong. [Kángkáng byěm ḿbyí byimu byi-já ng mbyi byi-fím m ké abwô eyên.]

¹³ Óburúkpâbí mú mu Osówo eten, be bii/kyú ké abwô nyí banet bakíri, nké wo kǎnchí nké amu Óburúkpâbí eten.

¹⁴ Kántîk, mbé baa/kpú ne baa*ba/chi ba-chîkpen*. Mbé baa*byí wǎ bakúsí* ké nǎ, wo aa/kye kámbé busông, a-ju kámbé. Onet o*fí mú o/tôong o-zîim m kámbé*.

¹⁵ Óburúkpâbí, wo aa/chi oshê eten o-kán, a-chi kámú o-nere byicê byimúmú, ne ńkyín kii/bê ǒ ne ofê. [

¹⁶ Óburúkpâbí, wo a/kye banet eyên busông, ne ké bafip, mbé ba/fé nshwam ba-kye ǒ.]

¹⁷ Wo, ǎ Óburúkpâbí, aa/chi bě byi-tii, wǎ eringe nyí onyinyi mú bufwon buda ǎ enwa odatii bubân.

¹⁸ Be byi/mû ké bubân ne bafip, nké byi*da/fwon wǎn*. [Be byi*da/kpógê ne byití ké esí eten*. Be byi*da/chi ne chwǒm ńkyí kyinong nang kyibónge*.]

¹⁹ Banet eten ḿbé baa/kpú ba/chi ba-chîkpen. Byikwóm-enyam-byiko ebe byi/chi byi-chîbwa ké dyikpen. Kángkáng banet ḿbé mbe ba-rê ng ké akun ebe ba/chi ba-jwóbê ba-kwán ekwan ké bunyîn-dyityém. Eringe nyí kyibû nkyi kyi-chi i esí e-chee, éné to nké Óburúkpâbí o/chi o-chi banet ḿbé baa/kpú ka-bwon ba-bwa ké dyikpen.

Mpan epan ne Byěm enap

²⁰ Banet ejí, nung n̂g ké byise enen, ba-fín afyi ba-círing byiko. Rem m̂ ké kaǎnyín-nkéré, tete kafâ ńké nke ka-sa ng Osówo ka-man.

²¹ Óburúkpâbí mu o-fím m ké kyikit emen ńkyí mu o-kyú u kyíbóng o-ba-kye banet ḿbé ké ejíí busông ké bubwô-byibî ebe. Banet eju ḿbé ba/ju ké ejíí ké kadip, kyi/chi kyi-byí kyíjí, ne esí ee*ba/chi e-chîcít banet ḿbé ba/ju kámbé*.