Azáya 25 - Bokyi Bible

Okwan-Akpee ekye

¹ Óburúkpâbí, wo a-chi i Osówo ejí. Me n/chi n-kye ǒ ofê, m-kpee dyizîn eyên. Wo aa/chi biǐtí-byěm. Wo aa/tî dyityém a-chi byěm ḿbyí wo a/mû a/sét ké nkéré mú oo/shwôm ké esim chwóó a/fu, a/chi a-chi.

² Wo aa/bírî eshê e-firi biǐbwô-byise, a-bên ekpe nyí ba/mû ba/bi ba-wáp kányí ba-fé ké kafâ. Byibám-butu ḿbyí banet-bushwôn eten ba/bi bii*kyú to ne banyá*.

³ Banet ḿbé eshê nyí nyi ne busa ba/chi ba-kpee ǒ. Ba/chi ba-shî ǒ ké eshê nyí banet ba/bên atyém.

⁴ Banet-kyikpu ne ḿbé ba*fí ne ochwâp* baa/chêe ba-bâ ba-kâm ǒ, ne baa/kyú kanong ké bankéré ḿbé afaníkong. Wo amu a-ku ng kámbé ké afú nyí aryên ne amu a-kyâ kámbé busi ké nkéré esû edajang esóng. Bambên atyém-banet mbe ba-kyâ bunwa wǎ [afú nyí aryên]

⁵ ne wǎ nsísóngé mú ké nkéré-burwom. Nké wo, ǎ Óburúkpâbí, aa/cít banet-bushwôn eten abwô ké ocím. Wo amu a-cít ng awonge nyí bambên atyém wǎ eringe nyí ófíbí odachee dyicí ńdyí esû edasóng.

Osówo o/chi o-chi Dyijî

⁶ Nyín ké kaku nké Záyon, Óburúkpâbí mú o/rêe o-shwôm o/chi o-chi dyijî o-kye eshê nyí ké ejíí emúmú, dyijî ńdyí byiryíng ne bato ḿbyí byidanyîn byi-shwôm.

⁷ Nyín nké o/chi o-waa ké abe ányi o-fîm ófíbí mú o/mû oo/cít ejíí emúmú.

⁸ Óburúkpâbí mú o/rêe o-shwôm o/chi o-man ne bukyû ne banyá ne banyá. O/chi o-shî nang yeě nang yeě batíí ké achi o-fîm éshwân nyí ba/fé banet emen ké ejíí emúmú. Óburúkpâbí oyén nké oo/raa.

⁹ Ké nkéré mú kii/chi, nang yeě nang yeě o/chi o-raa o/fu, nyǐ nké mu Osówo eten. Be bii/fé dyityém ne nyǐ, ne nyǐ oo/nyii bě. Nyǐ nké mu Óburúkpâbí. Be bii/fé dyityém eten ne nyǐ, ne kántîk be byi/firi ké bunyîn-dyityém, byi-kú byi-jêe ng, ké nǎ, nyǐ oo/nyii bě.

Osówo o/chi o-kye Mówep Busông

¹⁰ Óburúkpâbí o/chi o-ku kaku ńké Záyon, nké o/chi o-cím banet ḿbé Mówep o-fé kyísí wǎ eringe nyí badacím biǐbyâa ba-fé ké kiǐbímbíng-abîng-mpong.

¹¹ Mbé ba/chi ba-tan abwô ebe wǎ mbe ba-kan n kace ewá, nké Osówo o/chi o-bwa ne mbé kyísí kyísí, ne abwô ebe a/chi a-róng kámbé bogop.

¹² O/chi o-bên byikit ḿbyí Mówep ḿbyí mbe ba-bwom m ba-nwa byití ne biǐnyáám-ekpe ebe, o-twóp kámbé ba-bírî ng ba-bâ kyísí ba-ba-nung ké édúkǎndú.