Azáya 23 - Bokyi Bible

Kyitwóm kyi-kim ne Fonésha

¹ Nyín kyitwóm kyi-kim ne oshê mú Táya. Tii n̂g ké bafip, ben banet-bǎmkpóngé-ńsukyíkang ḿbé mbe ké otyém-baya ḿbé Medeterényan. Baa/bên dyiga enen ńdyí Táya, ńdyí ké byise enen. Byise enen ne byikit ḿbyí bǎnsukyíkang badabwom bii/shí. Ba/chi ba-jwo kyi-kim ne nkyí â ńsukyíkang enen o/fím Sápurus o-kú o-bâ.

² Tii n̂g, ben bancen kasî ḿbé Sádon. Ben ba/twóm banet

³ ba-nyáng baya ba/fu, bada-ré esang-byichí nyí mbe ba-kwón n ké Éjip ba-shee, ba-cen kasî ne ejíí emúmú.

⁴ Oshê mú Sádon, baa/wuri ǒ éshwân. Baya ne buríbi-baya ḿbé baryên mbyi byi-né ng ǒ byi/fu, mbyí byi*da/fwon wǎn nang obónge*. Mbyí byi*da/nen bwǎn*.

⁵ Nang banet ḿbé Éjip kyi/chi kyi-chi kámbé wǎ chwǒm-akat ba-waa ocím ké dyishí fúú â ba/jwo ba/fu, baa/bên Táya.

⁶ Tii n̂g ké bafip, ben banet ḿbé Fonésha. Kan n̂ eringe nyí badachêe ba-jâ Syipîn.

⁷ Oshê mún o-man n ekyú oshê mú bunyîn-dyityém mú Táya, mú ba/bi kámú ké bujê-aje ḿbú bu/shwôm ké esim dí. Nyín oshê mú o/twóm banet o/fu, bada-kyú ba-bi eshê ekíri?

⁸ Yeě kâng mú o/cen ne nkyí ne ńkyín kyi-chi Táya, oshê-butu mú bancen kasî-bwǎn-otu ba/mû ba-kyâ kámbé ofê ba-shwôm ké ejíí emúmú.

⁹ Óburúkpâbí mú o/rêe o-shwôm nké o/cen ne ńkyín. Nyǐ nké o/chi kánkyí eringe nyí odaman ne byiko ebe etông ké byěm ḿbyí baa/chi, ne eringe nyí odabwa ne biǐtí-banet ebe kyísí. [

¹⁰ Ca n̂g ba-da-kpang byifát ké esí ányi, ben bacinbánet ḿbé ba/bi eshê ké Syipîn. Onet o*fí to mú oda běn echîku ké afaníkong*.]

¹¹ Óburúkpâbí oo/tan bubwô emen bu-shwôm baya ḿbé baryên o-kpógê batu. Oo/kye busa o/fu, babên byikit-kasî ecen ḿbyí banet ḿbé Fonésha.

¹² Oshê mú Sádon, bunyîn-dyityém enen boo/man, ne ba-kú ba-cít ng banet enen. Nang ba-bwa ba-chêe ba-jâ Sápurus, baa*ba/chi ba-kyú ne dyijâng*. [

¹³ Banet ḿbé Bábyílon, *chí ḿbé Asyírya* nké ba/mîng byibî-enyam byi-kpógê Táya. Banet ḿbé Bábyílon nké ba/bi byikit-byití enwa ḿbyí nyáám, ba-bú byise ḿbyí badabwom ba-nwa byití ba-bên oshê kángkáng.]

¹⁴ Tii n̂g ké bafip, ben banet-bǎmkpóngé-ńsukyíkang ḿbé mbe ké baya ḿbé baryên. Baa/bên oshê mú ben ba/fé dyityém ké mǔ.

¹⁵ Nkéré mu o-bâ mú ba/chi ba-ráp Táya ké bajam-aje bachât esim diǐkpú, kyikim-nkéré ńkyí Otu odakpen o-ribi ne o-kpú. Ké nkéré aje ányi aa/man, Táya o/chi o-firi wǎ onyinyi-akpara mú ba/fé ǎ ké okwan ba/fu,

¹⁶ kúng dyícîng eyên a-cen ké oshê omúmú, wo onet-bafip-onyinyi-akpara mú baa/ráp ǒ. Kim dyícîng a-chîkwán ekwan eyên eringe nyí banyinchéng badachîbwa esim ba-kâm ǒ.

¹⁷ Ké nkéré aje ányi bajam bachât esim diǐkpú aa/shwôm, Óburúkpâbí o/chi o-mîng Táya o-bwa esim ké kasî ecen emen ńké kpákpá, ne o/chi o-ryí akpara ne kángkáng batu ḿbé ké ejíí.

¹⁸ Ba/chi ba-kúng akpuga nyí o/chi o-já ké kasî ecen ba-kye Óburúkpâbí. Oo*ba/chi o-rôo kányí* nké banet ḿbé mbe ba-fâ Óburúkpâbí ba/chi ba-kúng akpuga emen ba-ré byiryíng ne byídí ḿbyí mbe ba-ryuu ng.