Azáya 22 - Bokyi Bible

Kyitwóm kyi-kim ne Jerúsélem

¹ Nyín kyitwóm ńkyí Óburúkpâbí o/twóm mě kyi-kim ne owo mú byěm-akat eri. Ebóng nkyi kyi-chi i. Ebóng kángkáng banet ḿbé ké oshê mbe ba-chi i byirwam kyíbóng-byise.

² Oshê omúmú o/firi yógeyóge, kyicoge ne bunyîn-dyityém bii/sú ké mǔ. Banyinchéng enen ḿbé ba/kpú ké byití ḿbyín ba*da/kpú ké bunwa enwa*.

³ Kángkáng banet-ashí enen ba/chêe, ba-kám kámbé ne ba-kûché dyibán něen dyibónge.

⁴ Mîng n̂g mě kǎnchí n-tii, ka-sa mě ké dyishí ńdyí kángkáng banet ejí ḿbé baa/kpú. *Da n̂g ekan ba/fu, ba-fâ mě dyityém*.

⁵ Nyín nkéré mú bushî ne dyikpóge ne byěm ekyú byiryibyiryi ké owo mú byěm-akat eri, ne Óburúkpâbí mú mu Otu Kyítá mú o/rêe o-shwôm nké oo/twóm bě kámú. Baa/bú ekpe nyí e/wáp oshê eten e-fé ké kafâ, ne bukyû ḿbú banet mbe ba-tii ng ba/fu, bachwáp kámbé boo/ribi ké eku.

⁶ Basúja ba/fím ké esí nyí Élam ba-bâ ké bubyî-orá ne báre ne abán. Basúja ḿbé ba/fím ké esí nyí Kî ba/mû ne édem ebe ké abwô.

⁷ Bamútu ḿbé bubyî-orá budatut baa/sú ké biibet ḿbyí Júda ḿbyí byidabát byiryíng. Basúja ḿbé ba/yú ké bubyî-orá ba/bwom ké afyi nyí Jerúsélem.

⁸ Baa/bên byěm-byití ḿbyí Júda kángkáng. Ké nkéré ńkyí ánkyi kyi/chi, ben ba/fîm byěm-byití ké kyise ńkyí mbe ba-rôo ng kámbyí.

^9-10 Ben ba/ri byikit ḿbyí ba/chi ba-bwât ekpe nyí Jerúsélem. Ben ba/jebe kángkáng byise ké Jerúsélem, ba-bú byikíri ba-fîm aká nyí badabwât ekpe nyí e/wáp oshê e-fé ké kafâ. Ben ba/bi kiimbâng-kyikit

¹¹ ńkyí kyidaníbî omu ké kafâ-oshê eringe nyí kyidaníbî omu mú odasen ké okúri-kyikit ńkyí kyidaníbî omu o-nung ké nkyí. Nké ben ba*da/tî dyityém ké Osówo mú o/kabe kyi-kim ne kángkáng byěm ḿbyín* ké nkéré mú o/shwôm ké esim* mú o/chi kánkyí ne kyi-chi*.

¹² Óburúkpâbí mú mu Otu Kyítá mú o/rêe o-shwôm o/mû mu o-kó ng běn ké nkéré ámu kâng o/fu, ben batii ba-ta dyikán, ba-pwát ashí, ba-fé byídí-dyikán eta.

¹³ Nké ben ba/jwó ojwǒng ba-chi ajî. Ben ba/ju ebû ne bampong ba-ryí, ba-jwáp bato. Ba-raa ba/fu, byi-man n eryí byiryíng byi-jwáp bato, nencí bii/kpú.

¹⁴ Óburúkpâbí mú o/rêe o-shwôm nyǐ oyén o/raa ne me o/fu, mm*ba/chi m-pwoo kámbé ké kyibî ńkyín tete ba-kpú*. Me Óburúkpâbí mú mu Otu Kyítá mú o/rêe o-shwôm nké n/raa.

Óburúkpâbí o/kuri Shébana Ekó

¹⁵ Óburúkpâbí mú mu Otu Kyítá mú o/rêe o-shwôm o/sét mě o/fu, me nca n-kâm Shébana mú mu onet-dyishí mú kyise-butu n-da-bí ǎ n/fu,

¹⁶ wo a/kabe a/fu, wo a-chi i ebóng dyizong-onet. Ebóng busa ḿbú wo amu ne mbú, ḿbú wo adasím dyikun ké kaku-buká.

¹⁷ Wo a-man n ekyú kiǐtí-onet, nké Óburúkpâbí o/chi o-yip ǒ o-twóp kú.

¹⁸ O/chi o-yip ǒ wǎ kyirim-bôl o-twóp ǒ ké oshê mú o/rêe o-shwôm mún. Wo a/chi a-kpú áku ké kyikit kyibónge ne bamútu ḿbé bubyî-orá budatut, ḿbé a/mû a-jang ng etông byiko ké mbé. Wo amu chwǒm-éshwân ké kyise ńkyí bonchí eyên.

¹⁹ Óburúkpâbí o/chi o-fîm ǒ ké kyikit-bǎmkpóngé.

²⁰ Óburúkpâbí o/sét Shébana o/fu, nkéré mú ńkyí ánkyi kii/chi, n/chi n-twóm ḿgbán ejí Elyǎkim, mú wǎn-Hyíkya o-bâ.

²¹ N/chi n-fé ǎ byídí-butu eyên n-sît ǎ emâp eyên, n-kúng kángkáng busa ḿbú wo a/mû ne mbú ké bǎmkpóngé n-kye ǎ. Nyǐ o/chi o-kyú wǎ bonchí mú banet ḿbé Jerúsélem ne Júda.

²² N/chi n-kye ǎ kángkáng busa ḿbú odakyú ké bubwô ḿbú otu mú o/fím ké kyikû-banet ńkyí Otu Dívit. Nyǐ nké o/chi o-kyú ne egbókóró nyí Otu Dívit. Ńkyí nyǐ odabâa, onet o*fí mú odacít* ne ńkyí odacít, onet o*fí mú odabâa*.

²³ N/chi n-fé ǎ o-nung kanong kanong ké kyikit ánkyi wǎ ómúrúsún mú badamán ké ekpe, ne ba/chi ba-kye kyikû-banet emen kyimúmú ofê ké dyishí emen.

²⁴ Nké kángkáng bwǎn-bané emen ne bwǎn emen kángkáng ba/chi ba-kû ǎ ekye afaníkong. Ba/chi ba-kpong ǎ ké byiko wǎ butí ne abâng nyí badakpong ké ómúrúsún.

²⁵ Â kyi/chi éné, ómúrúsún mú ba/mû ba/mán kámú kanong kanong o/chi o-zûu o-róng kyísí. Ne ńkyí ánkyi kyi/chi kyi-kyú nkuli kyikû mú kángkáng byěm ḿbyí byi/mû byi/kpong ké ómúrúsún ámu. Óburúkpâbí oo/raa.