Azáya 2 - Bokyi Bible

Bunyîn-Dyityém ḿbú ne Banyá

¹ Nyín kyitwóm ńkyí Osówo o/kye Azáya mú wǎn-Émoz kyi-kim ne Júda ne Jerúsélem.

² Osówo o/fu, ké ací nyí nyi a-bâ, kaku ńké kiǐtí-kyise-kyifen emen echi kyi/bwom ké nké ka/chi ka-nyâam ka-shwôm eku kángkáng. Kángkáng eshê e/chi e-kûbê ké nké,

³ ne banet ebe ba/chi ba-raa ba/fu, bâ n̂g byi-yú kaku ńké Óburúkpâbí byi-wâa ké kiǐtí-kyise-kyifen echi ńkyí Osówo mú Ézerel. Nyǐ o/chi o-tángê bě ńkyí mu o-ryuu ng o/fu, byichi. Byi/chi byi-cen ké kiǐfáng ńkyí nyǐ oo/cá, ké nǎ, ńkyí Óburúkpâbí mu o-tángê e nkyi kyi-fím m ké Jerúsélem. Mu o-bwom m ké Záyon o-pem m ne banet emen.

⁴ O/chi o-tóbê byiraa ḿbyí mbyi byi-róng ng ejíí emúmú. Ba/chi ba-pín bushwám ebe ne byíbye ḿbyí mbe ba-nwa ng byití byi-firi byěm-bǎmkpóngé-kyifát. Eshê ee*ba/chi e-chînwa byití ne barî* e-kpá nang byiko ké byití*.

⁵ Kántîk kâng, ǎ bwǎn-Jekôp, bâ n̂g byi-cen ké kiinwángé ńkyí Óburúkpâbí mu o-kyâ bě.

Óburúkpâbí o/chi o-fîm Byiko etông

⁶ Ô Osówo, wo aa/né banet eyên ḿbé kyikû-banet ńkyí Jekôp. [Esí ebe ee/sú ne bansô epé ḿbé ba/fím ké kyicê ńkyí esû nyi e-byí i ne banet ḿbé ba/fím Fyilíta.] Banet ba-kú ba-chi i édúú nyí bacinbánet.

⁷ Esí ebe ee/sú ne akpuga, ne aa/jê a-shwôm. Esí ebe ee/sú ne bubyî-orá, ne bamútu ebe ḿbé bubyî-orá budatut baa/jê to ba-shwôm.

⁸ Esí ebe ee/sú ne erím-bakye, ne mbe ba-kyâ byěm ḿbyí mbé ba/chi ké abwô ebe ofê.

⁹ Óburúkpâbí o/chi o-bwa ne nang yeě nang yeě kyísí ba-fé ǎ éshwân. Óburúkpâbí, *dachi a-pwoo kámbé*.

¹⁰ Â ba*da/rem ké bacim* ké eku nyí aká áka* ba/chi ba-sím bǎmbwó ké ecing ba-rem eringe nyí badafem ké busa-dyityém ḿbú Óburúkpâbí, ba-kan ba/fu, mbé ba-chêe ng busa emen ne busan emen ḿbú ragerage.

¹¹ Dyicí ndyi dyi-bâ ńdyí byiko etông ḿbyí banet byi/chi byi-man, ba-ju kámbyí. Ké nkéré ámu, Óburúkpâbí kǎnchí nké ba/chi ba-kye ǎ ofê.

¹² Ké dyicí ándyi, Óburúkpâbí mú o/rêe o-shwôm o/chi o-bwa ne nang yeě mú mu ne busa kyísí, ne nang yeě to mú mu o-tông ng byiko.

¹³ O/chi o-ju byichí ḿbyí byi/jang ekwóp ké Lebánon ne ḿbyí byi/jang erêe ké esí nyí Báshan.

¹⁴ O/chi o-tare eku nyí nyáám ne nyí kyísí kyísí.

¹⁵ O/chi o-tare to kiǐnyáám-kyise-mbâm nang kyirá ne ekpe nang erá nyí e/nyâam, nyí ba/bi ba-wáp oshê.

¹⁶ Nang bǎnsukyíkang ḿbé ba/jang erêe ba-jang enwa, o/chi o-chi kámbé ba-sémê.

^17-18 O/chi o-man ne byiko etông ḿbyí banet, o-ju kámbyí. Erím-bakye e/chi e-rím debédebé, ne Óburúkpâbí kǎnchí nké ba/chi ba-kye ǎ ofê ké dyicí ándyi.

¹⁹ Â banet ba*da/rem ké bacim* ké eku nyí aká áka* ba/chi ba-sím bǎmbwó ké ecing ba-rem eringe nyí badafem ké busa-dyityém ḿbú Óburúkpâbí, ba-rem busa emen ne busan emen ḿbú ragerage, ké nkéré mú oo/bê ejíí ebaninge.

²⁰ Ké nkéré mú dyicí ándyi dii/fyi, ba/chi ba-pwó erím-bakye nyí mbé ba/chi ké gûl ne syílyíba, ba-mîng kányí ne enyam nyí edakyú ké bacim ne ké biǐbwô-byise.

²¹ Ké nkéré Óburúkpâbí o/chi o-bâ ejíí ebaninge, banet ba/chi ba-rem ké bacim ne ké bǎmbwó ké eku nyí aká áka, ba-kan ba/fu, mbé ba-fem m busa-dyityém ḿbú Óburúkpâbí, ba-rem busa emen ne busan emen ḿbú ragerage.

²² *Da n̂g echîfé dyityém ne banet ḿbé badakpú* mbé ba/byí ebóng.