Azáya 19 - Bokyi Bible

Osówo o/chi o-kye Éjip Busông

¹ Nyín kyitwóm ńkyí Osówo o/twóm mě kyi-kim ne Éjip. Óburúkpâbí mu o-bâ ké Éjip ochéé óchee ké ófíbí. Erím-bakye nyí Éjip e-kú e-tím m banê ké bushú emen, ne busa boo/man banet ḿbé Éjip.

² Óburúkpâbí o/raa o/fu, n/chi n-chi banet ḿbé Éjip ba-nwa byití ne barî, n-chi wǎn-boné o-nwa ne wǎn-boné, orî-onet o-nwa ne orî-onet. Eshê nyí ee*kwárê ne barî* e/chi e-nwa ne barî ne batu ḿbé baa*kwárê ne barî* ba/chi ba-kûnyii kakyúng-butu.

³ Me n/chi m-bên okabe mú banet ḿbé Éjip, n-jwâa kámbé asa. Mbé ba/chi ba-bí erím-bakye ebe ba/fu, echwáp kámbé, ne ba/chi ba-ca ba-kâm bansô epé, ba-bí bakúsí ba/fu, bakye kámbé bacê.

⁴ N/chi n-kúng banet ḿbé Éjip n-kye mbên dyityém-onet-dyishí, n-kyâ kámbé otu mú o/bên dyityém o-tún kámbé. Me Óburúkpâbí mú o/rêe o-shwôm nké n/raa.

⁵ Omu mú mu ké kace ńké Nâl o/chi o-sáng, ne kace ánke ka-núng.

⁶ Ewo nyí nyi ké bakô-kace e/chi e-kpet enung ké nkéré e-kú e-núng ng e-câ. Biǐbyâa ḿbyí ké bukô-kace byi/chi byi-jwóm,

⁷ ne kángkáng byíkwôn ḿbyí ba/kwón ké bakô-kace ńké Nâl byi/chi byi-jwóm, afú a-tugi kámbyí a-pwó.

⁸ Nang yeě nké mu o-kpen n ké ekworê ekám ké kace ńké Nâl o/chi o-kûbyé o-tii ng. Byílôp ne bantûfúk ebe byi/chi byi-waa kyísí dyikáá.

⁹ Banet ḿbé mbe ba-chi i byídí ḿbyí legelege asa a/chi a-jwâa kámbé.

¹⁰ Busa bu/chi bu-man, asa a-jwâa banet ḿbé mbe ba-kim m byídí ne ḿbé mbe ba-yámê e kámbé ké bǎmkpóngé.

¹¹ Banet-ashí ḿbé oshê mú Zôn mbe enyam. Banet ḿbé Éjip ḿbé mbe ne bubong ba-shwôm mbe ba-kyâ enyam-bacê. Mbé ba-cen n nǎ ne ba-kûsét Otu ba/fu, mbé nké ba/kúng kyikit ńkyí Batu ne banet ḿbé mbe ne bubong ḿbé kpákpá.

¹² Otu mú Éjip, bankye bacê eyên ḿbé mbe ne bubong mbe nyá. Katô mbé ba-man n ǒ esét ńkyí Óburúkpâbí mú o/rêe o-shwôm mu o-kabe ng kyi-kim ne Éjip.

¹³ Banet-ashí ḿbé Zôn ne Mémfyis mbe enyam. Mbé ba/mû ba/chi ba-níbî oshê kanong, nké ba*da/man eníbî kámú*.

¹⁴ Óburúkpâbí oo/chi kámbé ba-kye bacê ḿbé ba*fí ne dyishí*. Ké bubwô ámbu, Éjip e*fí to e-chi i byěm dángdáng* ne e-kú e-cíng ng wǎ mbwôm bato mú mu o-tyep ng ké éfâm emen.

¹⁵ Onet o*fí ké Éjip* nang onet-esang nang onet-kyikpu* nang mú kiǐtí nang mú baa*nyît ǎ* mú odaman ekye ochwâp*.

Éjip e/chi e-fé Óburúkpâbí

¹⁶ Nkéré mu o-bâ mú banet ḿbé Éjip ba/chi ba-kûshî wǎ onyinyi. Ba/chi ba-kûtím banê ké bushî ké nkéré baa/ri ba/fu, Óburúkpâbí mú o/rêe o-shwôm oo/tan bubwô emen ḿbú odakye kámbé busông.

¹⁷ Banet ḿbé Éjip ba/chi ba-shî Júda, nang nkéré orá nké ba/zîim kámbé ńkyí Óburúkpâbí mú o/rêe o-shwôm o/fu, nyǐ o-chi i kámbé.

¹⁸ Ké nkéré mú nkéré ámu oo/fyi, eshê nyí Éjip etánge e/chi e-kûraa ejá nyí Hyíburu. Banet ḿbé ké eshê ányi ba/chi ba-kûryí ocím ké dyizîn ńdyí Óburúkpâbí mú o/rêe o-shwôm. Ba/chi ba-kûkó oshê obónge Oshê mú Óbyísû.

¹⁹ Ké nkéré mú nkéré ámu oo/fyi, kyikit ńkyí badachi kyifen ba-kye Óburúkpâbí kyi/chi kyi-kyú ké esí nyí Éjip, ne buká-ociring ḿbú bu/chi bu-já ǎ bu/chi bu-kyú ké buti ḿbú Éjip.

²⁰ Mbyí nké byi/chi byi-kyú ekap nyí e/chi e-tông e/fu, Óburúkpâbí mú o/rêe o-shwôm mu ké Éjip. Â ba-kú ba-cít ng banet ámbe, nké ba/tii ba-kó Óburúkpâbí ba/fu, ochwáp kámbé, nyǐ o/chi o-twóm onet mú o/chi o-nyii kámbé.

²¹ Óburúkpâbí o/chi o-chi banet ḿbé Éjip ba-nyît ǎ, ne mbé ba/chi ba-nyît ǎ, ba-fé ǎ, ba-chi byifen ba-kye ǎ. Mbé ba/chi ba-ryí ǎ ocím mú shwaneshwane ne ba/chi ba-chi ńkyí ba/ryí ocím.

²² Óburúkpâbí o/chi o-kye banet ḿbé Éjip busông, nké nyǐ o/chi o-chi kámbé ba-nyange. Mbé ba/chi ba-bírî ba-kâm ǎ, ne nyǐ o/chi o-jwo banshwam ebe o-chi kámbé ba-nyange.

²³ Ké nkéré mú nkéré ámu oo/fyi, ndûm o/chi o-fím Éjip o-ribi Asyírya. Banet ḿbé eshê ányi ba/chi ba-kûcen ba-câ kashú ba-bwa ng esim, ba-kâm m barî, ne [eshê ányi efee e/chi e-kûkye Óburúkpâbí ofê kyikit kyibónge.]

²⁴ Ké nkéré mú nkéré ámu oo/fyi, Ézerel e/chi e-firi jangjang ne Éjip ne Asyírya, ne eshê ńnyín echât e/chi e-firi ojware mú ejíí emúmú.

²⁵ Óburúkpâbí mú o/rêe o-shwôm o/chi o-jware kányí o-raa o/fu, me n/chi n-jware ǒ, ǎ Éjip nyí nyi banet ejí, ne wo, ǎ Asyírya nyí me n/chi, ne wo, ǎ Ézerel, banet ejí ḿbé n/cá kámbé.