Azáya 18 - Bokyi Bible

Osówo o/chi o-kye Sudân Busông

¹ Ké esí nyí nyi esim-buce ḿbú Sudân nyí áku, kyicoge ńkyí ecincing nkyi kyi-chi i.

² Banet-kyitwóm mbe ba-fím m ké esí ányi ba-cen ké kace ńké badakó Nâl, ké ékpǐ nyí ba/chi ké biǐbyâa ba-bâ. Bwa n̂g esim dyijê, ben banet-kyitwóm ḿbé badajang ekwáng. Koo n̂g kyitwóm ba-bwa ne nkyí esim ké esí enen nyí buce bu/kyii kányí, ké oshê enen mú mu ne busa, ba-da-sét banet enen ḿbé ba/kwóp butang ne enyam-byiko gogégogé, ḿbé ejíí emúmú nyi e-shî ng kámbé.

³ Nang yeě mú mu o-kyú u ké ejíí, ofwôo atông o-jwo. Kû n̂g etî achi ké ekap-byití nyí ba/chi ba-tông kyíbóng-eku. Fwôo n̂g atông ba-jwo ntán mú ba/chi ba-jwá.

⁴ Óburúkpâbí o/raa ne me o/fu, me n/chi m-bwom kyíbóng n-tún achi kyísí degere wǎ eringe nyí kyibû kyidabyí ké bachú ḿbé badachi nsísóngé ké nkéré mú badafuu byiryíng, n-tún achi to kyísí degere wǎ esû nyí edasóng ne busun mánmán.

⁵ Ne ba-kûbóng byirim-byichí, ké nkéré ashí-byichí aa/kpú, byirim-byichí byi-kú byi-kán n, banet-bushwôn ba/chi ba-ju banet ḿbé Sudân, kii*sóng kámbé* wǎ eringe nyí kashwám kadakét bamgbang-kyichí.

⁶ Bunurung ne enyam byi/chi byi-ryí byikwóm-enyam-byiko-basúja ebe. Bunurung bu-ryí i kámbyí ne kyifang, enyam e-ryí kámbyí ne burwom.

⁷ Nkéré mu o-bâ mú Óburúkpâbí mú o/rêe o-shwôm o/chi o-koo eyáré nyí ba/chi ba-kye ké esí ńnyín, nyí buce bu/kyii kányí, oshê mún mú mu ne busa, mú banet emen ba/kwóp ne enyam-byiko gogégogé, ḿbé ejíí emúmú nyi e-shî ng kámbé. Mbé ba/chi ba-bâ ké kaku ńké Záyon, ké kyikit ńkyí mbe ba-fâ Óburúkpâbí mú o/rêe o-shwôm.