Azáya 17 - Bokyi Bible

Osówo o/chi o-kye Syírya ne Ézerel Busông

¹ Óburúkpâbí o/raa o/fu, Damásákus oo*ba/chi o-chîkyú oshê*. O/chi o-firi dyizu-biǐbwô-byise nké nke. [

² Banet baa*ba/chi ba-chîkyú ké eshê nyí Syírya ne banyá*.] E/chi e-firi byikit ḿbyí ebû ne bampong byidakûryí baryî, ne onet o*fí mú o/chi o-ró kámbyí*.

³ Banet ḿbé badabwom bunwa ba-bám Ézerel baa*ba/chi ba-chîchi* ne Damásákus oo*ba/chi o-chîkyú ké byiko emen*. Banet ḿbé Syírya ḿbé ba/chi ba-fem, ba/chi ba-kyú ne éshwân ké byiko wǎ banet ḿbé Ézerel. Me Óburúkpâbí mú o/rêe o-shwôm nké n/raa.

⁴ Óburúkpâbí o/raa o/fu, dyicí ndyi dyi-bâ ńdyí Ézerel ee*kyú to kiǐtí-oshê* ne kyikpu kyi/chi kyi-kúng kyikit ńkyí efang emen.

⁵ Ézerel e/chi e-kyú wǎ kyifát-nkurung ńkyí baa/bún nkurung ké nkyí kángkáng, e-waa kafâ dyikáá wǎ kyifát ńkyí nkyi ké owo mú Réfyam, ké nkéré mú baa/fuu byiryíng ké nkyí.

⁶ Boǒnyín-banet ḿbé Ézerel nké nke nké budafem, ne Ézerel e/chi e-kyú wǎ dyisín-kyichí ńdyí baa/bóng kángkáng byirim ba-mîng boorim bufee nang buchât nké nke ḿbú ké ashí, ne wǎ boǒnyín-byirim ḿbú badamîng ké byire ḿbyí kyísí kyísí. Me Osówo Óburúkpâbí mú Ézerel nké n/raa.

⁷ Nkéré mú dyicí ándyi dii/fyi, banet ba/chi ba-bírî ba-kâm Osówo mú onong mú Ézerel, mú o/chi kámbé ba/fu, ochwáp kámbé.

⁸ Baa*ba/chi ba-chîjêem esim ne byikit-byifen-bakye echi ḿbyí mbé ba/kúng abwô ebe ba-chi* nang dyityém efé ké byěm ḿbyí mbé ba/chi, baa*fé to* byěm wǎ erím-bakye-osówo-onyinyi mú badakó Ashéra ne biinchéng-bakye ḿbyí mbe ba-shí i burwan ké mbyí.

⁹ Nkéré mú dyicí ándyi dii/fyi, eshê nyí mbe ba-bám m kányí kanong kanong, ba/chi ba-chêe ba-mîng kányí, ba-shí kányí wǎ eshê nyí [banet ḿbé Hyíbit ne ḿbé Ámórit] ba/jaa ké nyǐ, ké nkéré mú ba/chêe banet ḿbé Ézerel.

¹⁰ Ézerel, ben baa/ráp Osówo mú mu o-nyii ng běn ne mú mu o-ku ng běn wǎ kiǐtí-buká. Nké ben bamu ba-kpang ng byifát-ociring eringe ben badafé osówo mú bacinbánet.

¹¹ Nké nang byi-bwa byi-byí byi-byet ké dyicófóróng ándyi ńdyí badakwón kámbyí, baa*ba/chi ba-fuu chwǒm ké mbyí*. Afaníkong ne bubân ḿbú boo*man* nké nke byidakyú.

Ba/kpógê Banet-Bushwôn ḿbé Ézerel

¹² Eshê nyí nyi ne busa e-kú e-chi i kyicoge wǎ bunâng-baya ḿbé baryên.

¹³ Eshê ányi nyi e-bâ wǎ bunâng-baya, nké Osówo mu o-nyán n kányí e-bwa ng esim ochéé óchee wǎ édúkǎndú nyí nyi ké bukô-kaku, ne wǎ biǐbyâa ḿbyí afú nyi a-kúng ng kámbyí.

¹⁴ Mbe ba-chi i bushî bu-róng ké dyikurúku, nké ké dyicófóróng ba-chêe. Ńkyín nké kyi/chi kyi-chi nang yeě mú o/bê esí eten ebên.