Azáya 16 - Bokyi Bible

Kyi/bên Kanong Kanong ne Mówep

¹ Banet ḿbé Mówep ba/kyú ké oshê mú Séla ké kyikim-dyikán ba-twóm wǎn-etám-ebû wǎ eyáré ba-kye otu mú Jerúsélem.

² Mbé mbe ba-kyú u ké bakô-kace ńké badakó Ánon, ne mbe ba-yêe ng, okabe o*fí to kámbé* wǎ bunurung ḿbú ba/ró kámbú ké aju ebe.

³ Mbe ba-sét ng banet ḿbé Júda ba/fu, sét n̂g bě ńkyí byidachi. Ku n̂g bě wǎ kyichí ńkyí kyidakye busi ḿbú budachee byiko ké nkéré esû ee/kán, ba-mîng bě byi-jáng ké busi enen. Be byimu banet ḿbé ba/chêe ké byití. Rôo n̂g bě ké kyikit ńkyí onet oo*ri bě*.

⁴ Mîng n̂g bě byi-kyú ké esí enen. Ku n̂g bě ké busa ḿbú banet ḿbé mbe ba-ryuu ng ba/fu, mbé ba-ju ng bě. Banet ecít ne banet eju byi/chi byi-man, ne banet ḿbé mbe ba-bên n oshê ba/chi ba-man.

⁵ Ne onet obónge kâng ké kyikû-banet ńkyí Otu Dívit o/chi o-kyú otu, ne o/chi o-tún banet ne kyijé, o-fé dyityém ne mbé. Nyǐ o/chi o-chi ńkyí nkyi kanong babap, ne oo*ba/chi o-bángê ne acît eryí*.

⁶ Banet ḿbé Júda ba/raa ba/fu, be bii/jwo eringe nyí banet ḿbé Mówep mbe ba-tông ng byiko. Be byimu byi-nyît ng byi/fu, mbé ba-chi i bantông byiko, nké byiko ebe etông mbyi dyikáá.

⁷ Banet ḿbé Mówep ba/chi ba-tii ké bubwô ḿbú afaníkong nyí mbe ba-ri ng. Mbé kángkáng ba/chi ba-tii ké nkéré baa/zîim byiryíng ḿbyí byinong ḿbyí mbé ba/mû ba-ryí i ké oshê mú Kî-Héres. Asa a/chi a-man kámbé.

⁸ Byifát ḿbyí mbyi fáráng ne Héshibon ne byifát-byirim-byichí ḿbyí ké Síma baa/bên kángkáng, byifát-byirim-byichí ámbyi, ḿbyí byichí emen byi/mû mbyi byi-chi i batu ba-kûbwóm bato. Ké nkéré obónge, byichí ámbyi byi/káng tata byi-ribi oshê mú Jáze, byi-káng ké kyicê ńkyí esû edabyí byi-ribi ké kyikim-dyikán, byi-káng ké kyicê ńkyí esû edaríbî byi-shwôm baya ḿbé badakó Bukyû.

⁹ Kántîk, n-kú n-tii ng byichí ḿbyí Síma wǎ eringe nyí mu n-tii ng Jáze. Mu n-suri ng batíí ké dyishí ńdyí Héshibon ne Élyâle, ké nǎ, byiryíng efuu byi*fí ḿbyí byi/chi byi-chi banet ámbe ba-kûjêe*.

¹⁰ Onet o*fí mú mu o-jêe ng kántîk* ké esí nyí edabát byiryíng*. Onet o*fí mú mu o-chi i bǎmkpóngé ké byifát-byirim-byichí o-wonge e* o-kwán n ane*. Onet o*fí mú mu o-nwárê ng byirim-byichí o-chi i bato*. [Awonge nyí bunyîn-dyityém aa/man.]

¹¹ Me mu m-byâ ké bafip ké dyishí ńdyí Mówep ne Kî-Héres.

¹² Banet ḿbé Mówep mbe ba-kyâ byiko ebe busông ké oce mú mbe ba-câ ké biinchéng-bakye ḿbyí mbyi ké eku, ne ké banshwam efé ké byise-byifen ebe echi, nké kii*ba/chi kyi-chwáp kámbé*.

¹³ Ányi kyitwóm ńkyí Óburúkpâbí o/mû oo/twóm mě kyi-kim ne Mówep.

¹⁴ Nké kántîk, Óburúkpâbí mu o-raa ng o/fu, ké aje achât kerededet, biǐtí-esang ḿbyí Mówep byi/chi byi-rím. Ké bujê-banet emen, boǒnyín nké nke bu/chi bu-fem, ne ba/chi ba-kyú kyeekyee.