Azáya 15 - Bokyi Bible

Osówo o/chi o-ju Banet ḿbé Mówep

¹ Nyín kyitwóm ńkyí Osówo o/twóm mě kyi-kim ne Mówep. Ba/bên eshê nyí Âa ne Kî ké buchú bubónge, ne kyicoge kyi*fí to ké esí nyí Mówep*. [

² Banet ḿbé Dyíbon] mbe ba-yú u ké kaku ba-tii ng ké kiinchéng-bukye. Banet ḿbé Mówep ba-kú ba-tii ng eshê nyí Nébo ne Médéba ké bafip. Baa/pwát ashí ebe, ba-kwárê byiti ebe ké bafip.

³ Banet ḿbé mbe ké byiká-oshê ba/bwá byídí-dyikán eta. Banet mbe ké ótíbingé ne kyíbóng-byise ba-ta ng dyikán ba-tii ng.

⁴ Banet ḿbé Héshibon ne Élyâle mbe ba-tii ng, ne banet mbe ba-jwo ng bukyû ebe tete kyi-ribi Jáhaz. Nang basúja ba/firi ké bushî, busa boo/man kámbé.

⁵ Dyityém ejí ndyi dyi-tii ng Mówep. Banet baa/chêe ba-jâ ké oshê mú Zówa ne Égalat-Shelyíshyâ. Kyicê-banet mbe ba-yú u kaku ba-ribi ng Lúhit, ba-tii ng ba-câ. Bakíri ba/chêe ba-jâ Horónyam ba-tii ng ba-câ kakânkakân.

⁶ Kace ńké Nyímirim kaa/núng, biǐbyâa ḿbyí mbyi ké bakô emen bii/jwóm, chwǒm kyi*fí to ńkyí nkyi kyikpó*.

⁷ Banet ba-kú ba-nyáng ng owo mú Byílos ba-kan n ba/fu, mbé ba-chêe ng ne kángkáng byěm ebe.

⁸ Bukyû mbu bu-róng ng ké kángkáng bati-esí ḿbé Mówep. Eshê nyí Egalyâm ne Berelím nyi e-jwo ng kámbú.

⁹ Kace ńké nke ké oshê mú Dyíbon kaa/bwam baróng, ne ńkyí Osówo o/tî banet ḿbé mbe ké oshê ámu kyi/bên kyi-shwôm éné. Ba/chi ba-ju nang yeě nang yeě mú o/waa ké Mówep.