Azáya 14 - Bokyi Bible

Banet ḿbé Ézerel ba/chi ba-fyi

¹ Óburúkpâbí o/chi o-chîri banet emen ḿbé Ézerel bafip o-cá kámbé ba-firi banet emen. O/chi o-mîng kámbé ba-chîkyú ké esí ebe, ne bacinbánet ba/chi ba-bâ ba-ba-kyú ne mbé.

² Eshê chwóó e/chi e-chwáp banet ḿbé Ézerel ba-bwa esim ké esí nyí Óburúkpâbí o/kye kámbé, ne ányi nké eshê e/chi e-kyú básóng ḿbé Ézerel. Ézerel e/chi e-bírî e-kám banet ḿbé ba/mû ba/kám kámbé, ne banet ḿbé ba/mû ba-cít ng Ézerel ba/chi ba-firi ké bubwô ḿbú Ézerel.

Otu mú Bábyílon o/jé ké Oshê-Bakúsí

³ Óburúkpâbí o/chi o-chi banet ḿbé Ézerel ba-jáng ké busông ne afaníkong ebe ne ké biǐsyísóng-bǎmkpóngé ḿbyí ba/tírîng kámbé ké busa ba-chi.

⁴ Ké nkéré oo/chi kánkyí, mbé ba-kû ng efát otu mú Bábyílon kiikuku ba/fu, otu mú o/bên dyityém oo/róng. Oo*ba/chi o-chîcít onet nang obónge*.

⁵ Óburúkpâbí oo/koo busa ḿbú batu ḿbé ba/bên atyém,

⁶ ḿbé ba/kúng busa-dyityém ba-cít banet, ne ba*da/mîng eshê nyí mbé ba/kpógê kányí busông ekye*.

⁷ Kántîk kâng, ejíí emúmú ee/jáng, e/firi ké bunyîn-dyityém, ne nang yeě o-kú o-kwán n ekwan ké bunyîn-dyityém.

⁸ Byichí ḿbyí byinong, ḿbyí Lebánon byi-kú byi-jêe ng ké bubwô ḿbú otu mú oo/róng, ké nǎ, onet o*fí to mú o/chi o-chîtwom kámbyí* kántîk mú nyǐ oo/dim*.

⁹ Oshê-bakúsí o-kú o-kpá ng byiko ḿbyí odakoo otu mú Bábyílon. Bakúsí ḿbé banet ḿbé ba/mû ne busa ké ejíí to ba-kú ba-kpá ng byiko. Bakúsí-batu ba-kú ba-bûu ng ké bukyúng-batu ebe.

¹⁰ Mbé kángkáng ba-kú ba-kó ng ǎ ba/fu, kántîk, wo a/firi to kyeekyee wǎ be. Wo a/firi ké burwám eten.

¹¹ Wo ba/mû ba-kim m ácîng ba-kyâ ǒ ofê, nké kántîk, wo a/firi ké oshê-bakúsí. Wo a-kú a-rí i ké ekpim ne ba-kú ba-cít ng ǒ kiǐmbim-banyabang.

¹² Otu mú Bábyílon, ókpére-dyicófóróng mú odasan ragerage, wo aa/fím kyíbóng a-róng kyísí. Ké nkéré mú o/shwôm ké esim, wo a/kpógê eshê, nké kántîk, baa/yip ǒ ba-twóp kyísí.

¹³ Wo a/mû a/tî okabe mú adayú a-ribi kyíbóng, a-yip kakyúng-butu eyên a-tî ké kyikit ńkyí kyi/nyâam kyi-shwôm ékpére nyí e/nyâam e-shwôm. Wo a/mû a/kabe a/fu, wo a/chi a-kyú wǎ otu ké kaku ánke ńké ka/nyâam, ńké kyicê ńkyí bushûyû, ńké esówo nyi e-cibi ng.

¹⁴ Wo a/raa a/fu, wo a/chi a-yú a-ribi kyíbóng-éfíbí a-firi wǎ nyǐ mú o/rêe o-shwôm.

¹⁵ Nké baa/bwa ne wo ké kyikit ńkyí kyi/ríbî kyi-shwôm, ké oshê-bakúsí.

¹⁶ Bakúsí ba/chi ba-bwom ne ocím ké dyishí fúú ba-kû ǒ etún. Ba/chi ba-bí ba/fu, nyín onet mú o/náng ejíí? o-chi batu ba-tím banê?

¹⁷ Onet mún nké o/bên eshê o-chi ejíí e-bírî kyikim-dyikán? Onet mún nké o*da/fîm bamgbokobá emen o-mîng kámbé ba-jâ*?

¹⁸ Kángkáng batu ḿbé ké ejíí, ba/ryii kámbé ké akun nyí anong anong,

¹⁹ nké wo a*fí ne dyikun* ne baa/yip kyikwóm-enyam-byiko eyên ba-twóp kyíjí ba/fu, kyifwoo. Byikwóm-basúja ḿbé ba/ju ké byití nké byi/cít kánkyí, ḿbyí ba/yip kámbyí ne nkyí ba-twóp ké dyibíng-aká, ba-cím ba-fé kyísí.

²⁰ Ké nǎ, wo a/bên oshê eyên, a-ju banet ḿbé eyên wo oyén, wo baa*ba/chi ba-ryii ǒ wǎ batu ḿbé áku*. Onet o*fí ké kyibî-kyikû-banet eyên mú o/chi o-fem*.

²¹ Bakpet banet eju. Bwǎn ḿbé otu mún ba/chi ba-kpú ké bubwô-byibî ḿbyí banchí ebe ḿbé kpákpá. Onet o*fí ké burwám ebe mú o/chi o-kyú otu mú ejíí* o-bi nang eshê ké nyǐ.

Osówo o/chi o-ju Banet ḿbé Bábyílon

²² Óburúkpâbí mú o/rêe o-shwôm o/raa o/fu, n/chi n-kye Bábyílon bunwa n-shú kámú. Mm*ba/chi m-mîng nang chwǒm* nang bwǎsíng* onet nang obónge oo*ba/chi o-waa*. Me Óburúkpâbí nké n/raa.

²³ N/chi n-chi Bábyílon o-bírî dyibet-biǐntóng, ne biikong byi/chi byi-kûkyú ányi. N/chi n-jwoo Bábyílon ké éjújwó nyí e/chi e-jwoo kángkáng byěm. Me Óburúkpâbí mú o/rêe o-shwôm nké n/raa.

Osówo o/chi o-ju Banet ḿbé Asyírya

²⁴ Óburúkpâbí mú o/rêe o-shwôm oo/ryí ocím o-sem byiko emen o/fu, ńkyí me nn/kabe kyi/chi kyi-chi. Ńkyí n/fu n-chi i, m-man n-chi kánkyí.

²⁵ N/chi n-ju banet ḿbé Asyírya ké esí ejí nyí Ézerel, n-cím kámbé n-fé kyísí ké eku ejí nyí e/nyâam. N/chi n-chi banet ejí ba-fem ké busông ḿbú Asyírya ne ké atû ebe nyí mbe ba-tû ng.

²⁶ Nyín okabe mú n/tî n/fu, n/chi n-chi ejíí kángkáng, ne nn/tan bubwô ejí ḿbú n/chi n-kye eshê busông.

²⁷ Óburúkpâbí mú o/rêe o-shwôm o/fu, nyǐ o-man o-chi ńkyín. Nyǐ oo/tan bubwô emen ḿbú odakye busông, ne onet o*fí mú o/chi o-chi ǎ ne o-mîng*.

Osówo o/chi o-ju Banet ḿbé Fyilíta

²⁸ Nyín kyitwóm ńkyí Osówo o/twóm mě ké dyije ńdyí Otu Éhaz o/kpú.

²⁹ Banet ḿbé Fyilíta, kiǐré ńkyí kyi/mín běn kii/byíryî, nké bukwóp bu*fí ḿbú ben badakûjêe*. Â efyi ebónge e/kpú, ekíri nyí e/bên e-shwôm e-kúng ng kyikit emen. Dyícě-efyi dyi-cép ng kyibî-enyam.

³⁰ Óburúkpâbí o/chi o-kyú mbâm ebû mú banet-kyikpu ḿbé banet emen, ne o/chi o-mîng kámbé ba-kyú ké kyikit ńkyí chwǒm kii*ta kámbé*. Nké o/chi o-twóm běn ben banet ḿbé Fyilíta kiǐtí-esong, ne kii*ba/chi kyi-mîng nang onet obónge ké burwám enen o-waa okpó*.

³¹ Ben kángkáng eshê nyí Fyilíta, wonge ê ba-tii ba-kó ochwâp. Ben ashí amúmú, kyú n̂g ne bushî. Basúja ḿbé onet-bushî o*fí ké burwám ebe* nké mbe ba-fím m ké kyicê ńkyí bushûyû ba-bâ, ba-chi i édúkǎndú e-byí i kyíbóng wǎ ófíbí.

³² Ebóng ejá nyí be byi/chi byi-faa byi-sét banet-kyitwóm ḿbé mbe ba-fím m Fyilíta ba-bâ ba-kâm m bě. Be byi/chi byi-sét kámbé byi/fu, Óburúkpâbí oo/tî Záyon, ne banet emen ḿbé mbe ba-ri ng busông ba/chi ba-kyú ányi ké kyikit ńkyí chwǒm kii*ta kámbé*.