Azáya 13 - Bokyi Bible

Osówo o/chi o-kye Bábyílon Busông

¹ Nyín kyitwóm kyi-kim ne Bábyílon ńkyí Azáya mú wǎn-Émoz o/koo ne Osówo.

² O/fu, tî n̂g ekap-byití ké kaku ńké ka*fí ne byichí*. Wonge ê ba-kó basúja, ba-yip abwô kyíbóng ba-tông kámbé ekap nyí badakye oshê mú mu o-tông ng byiko bunwa.

³ Óburúkpâbí oo/kó bantông byiko-bamkpóge byití-basúja emen o/fu, banwa byití emen, ba-kye banet ḿbé nyǐ mu o-sa ng kafâ ne mbé busông.

⁴ Fwôo n̂g atông ba-jwo kyicoge ńkyí nkyi kyíbóng-eku, kyicoge ńkyí bujê-banet. Kyicoge ńkyí eshê nyi e-cibi ng kyikit kyibónge. Óburúkpâbí mú o/rêe o-shwôm mu o-kpá ng basúja emen byiko ḿbyí byití.

⁵ Basúja ámbe mbe ba-fím m ké eshê nyí tíbítíbí ké ejíí emúmú ba-bâ. Ké busa-dyityém emen, Óburúkpâbí mu o-bâ ebabên oshê ámu omúmú.

⁶ Wonge ê ké bubân. Dyicí ńdyí Óburúkpâbí dii/fárâng, dyicí ńdyí nyǐ mú o/rêe o-shwôm mu o-bâ ne bukyû.

⁷ Abwô nyí nang yeě nang yeě a/chi a-róng, ne asa a/chi a-jwâa nang yeě nang yeě.

⁸ Mbé kángkáng ba/chi ba-firi ne bushî, bubân bu-nung kámbé ké byiko wǎ onyinyi mú bufwon mbu bu-nwa ng ǎ. Ba/chi ba-kûtún barî ne bushî ne bashú-éshwân.

⁹ Dyicí ńdyí Óburúkpâbí ndyi dyi-bâ, kyibî-dyicí ándyi, ńdyí kiǐtí-busa-dyityém emen. O/chi o-chi ejíí e-bírî kyikim-dyikán, ne o/chi o-ju kángkáng banchi byibî.

¹⁰ Ókpére nang orá o/chi o-mîng esan. Óbyísû o/chi o-bírî kyifip ké nkéré oo/byí, ne otukáku oo*ba/chi o-san*.

¹¹ Óburúkpâbí o/raa o/fu, n/chi m-bâ ne busông ké ejíí, n-kye banet ḿbé ba/bên atyém busông ké bubwô-byibî ebe. Me n/chi m-bwa ne nang yeě kyísí mú mu o-tông ng byiko, n-kye nang yeě mú o/bên dyityém ne mu o-tông ng byiko busông.

¹² Banet ḿbé ba/chi ba-fem ba/chi ba-kûkaa ba-shwôm gûl.

¹³ Me n/chi n-chi bubóng bu-tím banê, ne ejíí e/chi e-náng e-dim ké kyikit emen, ké dyicí ándyi ńdyí me Óburúkpâbí mú o/rêe o-shwôm n/chi n-tông busa-dyityém ejí.

¹⁴ Bacinbánet ḿbé mbe ba-kyú u ké Bábyílon ba/chi ba-chêe ba-jâ ké eshê ebe, ba-pwôo ng byiryibyiryi ba-câ wǎ enyam nyí nyi e-chêe ng banryuu akán, ne wǎ etám-ebû nyí e*fí ne onet mú mu o-bám m kányí*.

¹⁵ Nang yeě nké ba/kám ǎ ba/chi ba-kpet ǎ ba-ju.

¹⁶ Mbé ba/chi ba-kúng achi ebe ba-ri, baa*nyît ńkyí badachi* ké nkéré ba-kú ba-díp ng bwǎn-bajújwô ebe ba-ju ng, ba-wuri ng kámbé byěm ké byise, ba-rí i ne banyi ebe ké busa.

¹⁷ Óburúkpâbí o/raa o/fu, me mu n-fâ banet ḿbé Médya kyitíring ba-ba-kye Bábyílon bunwa. Mbé ba*fí ba-kérê ng nang kaǎnyín kyi-kim ne akpuga* ne nyǐ a*fí a-nîm m kámbé*.

¹⁸ Mbé ba/chi ba-kúng abán ebe ne báre ebe ba-ju byisat. Ḿbé boǒbwásíng ḿbé kyísí kyísí ne ḿbé mbe ké abwô, baa*ba/chi ba-ri kámbé bafip*.

¹⁹ Bábyílon nké mu o-nwa ng o-shwôm eshê nyí áku kángkáng. Mǔ nké banet emen mbe ba-tông ng byiko ké mǔ. Nké me Óburúkpâbí n/chi m-bên kámú wǎ eringe nyí m/bên Sódom ne Gomóra.

²⁰ Onet oo*ba/chi o-chîkyú ké mǔ ne banyá*. Banet-Arébya ḿbé mbe ba-yêe ng ké byikit baa*ba/chi ba-chîman ebi boompyep ebe ḿbú badabi ké byídí ányi ne banyá* ne mbâm ebû o*fí mú o/chi o-chînen ebû emen ányi ne banyá*.

²¹ O/chi o-firi kyikit ńkyí enyam-dyikán edakyú, ne ńkyí biikong byidatím aju. Bunurung-dyikán bu/chi bu-kûkyú ányi, ne ebû e/chi e-kûcen ké biǐbwô-byise.

²² Enyam-dyikán e/chi e-kûwonge ké [biǐnyáám-byise] ne ké byibám-butu. Nkéré mú Bábyílon oo/fyi. Ací emen aa/waa kaǎnyín a-man.