Azáya 12 - Bokyi Bible

Okwan mú Asǎma ekó

¹ Banet ba/chi ba-kwán ké dyicí ándyi ba/fu, me n/chi n-kó ǒ asǎma, ǎ Óburúkpâbí. Wo a/mû a-sa ng kafâ ne me, nké kafâ esa eyên ánke kaa/man, ne a-kú a-fâ mě dyityém.

² Osówo nké mu o-nyii ng mě. Me n/chi n-fé dyityém ne nyǐ, mm*ba/chi n-shî*. Óburúkpâbí mu o-kyâ mě busa ejí ne okwan ejí. Nyǐ nké mu o-nyii ng mě.

³ Wǎ eringe nyí omu odakye onet mú omu mu o-jê ng ǎ bunyîn-dyityém, éné to nké banet ḿbé Osówo badajêe ké nkéré o-kú o-nyii ng kámbé.

⁴ Ben ba/chi ba-kwán ké dyicí ándyi ba/fu, kó n̂g Óburúkpâbí asǎma. Kó n̂g dyizîn emen ba/fu, onyángê běn. Chi n̂g eshê e-nyît byěm ḿbyí nyǐ oo/chi. Sét n̂g ba/fu, dyizîn emen ndyi kiǐtí.

⁵ Kwán n̂ ekwan-akpee ba-kye Óburúkpâbí ké bubwô ḿbú biǐtí-byěm ḿbyí nyǐ oo/chi. Ejíí emúmú ejwo kyi-kim ne nkyí.

⁶ Nang yeě mú mu ké Záyon, okwán ne ejá kyíbóng kyíbóng ké bunyîn-dyityém o/fu, Osówo mú Ézerel mú mu onong mu kiǐtí, ne mu o-kyú u ké burwám-banet emen.