Azáya 11 - Bokyi Bible

Butu ḿbú Bunyîn-Dyityém

¹ Kyikû-butu ḿbú Otu Dívit nkyi wǎ kyichí ńkyí baa/twom, nké wǎ eringe nyí byicat byidatím ké kyikû-kyichí, éné to nké otu mú ofyîfî o/chi o-byí ké burwám-bwǎn-Otu Dívit.

² Busun ḿbú Óburúkpâbí bu/chi bu-kye ǎ byinyídíng chwóó ne busa ḿbú odatún banet emen. O/chi o-nyît okabe mú Óburúkpâbí o-kye ǎ ofê,

³ ne o/chi o-kûchi ńkyí Óburúkpâbí oda ǎ esét ne bunyîn-dyityém. Oo*ri onet ké achi o-jwo ojwo ójwo o-pan onet ámu mpan*.

⁴ O/chi o-pan banet-byikpu mpan mú onong, o-kye banet ḿbé ba*fí ne busa* ńkyí kyi/já kámbé. Ké busa ḿbú o/chi o-kye, ba/chi ba-kye banet busông, ne byibî-banet byi/chi byi-kpú.

⁵ O/chi o-tún banet emen ké bukwóp ḿbú ntûntû, oo*ryí acît*.

⁶ Ekpang ne ebû e/chi e-kyú kyikit kyibónge ké bunyîn-dyityém, ne ekpang e/chi e-rí kyikit kyibónge ne bwǎn-ebû. Bwǎn-bampong ne bwǎn-ekpang ba/chi ba-kûryí baryî kyikit kyibónge, ne bwǎsíng ba/chi ba-kûtún kámbyí.

⁷ Bampong ne banjúkpang ba/chi ba-kûryí byiryíng kyikit kyibónge, ne bwǎn ebe ba/chi ba-kûrí kyikit kyibónge ké bunyîn-dyityém. Ekpang e/chi e-kûryí biǐbyâa wǎ eringe nyí bampong mbe ba-ryí i.

⁸ Nang wǎn-ojújwô o-chi acáá ne efyi, ee*ba/chi e-jwóm ǎ*.

⁹ Kyibî-chwǒm kii*ba/chi kyi-kyú ké kaku ńké Záyon* ńké nke kaku-ociring ńké Osówo*. Esí e/chi e-sú ne Óburúkpâbí enyît wǎ eringe nyí omu odasú ké baya.

Banet ḿbé ba/kám Kámbé ba-dim ne Mbé ba/chi ba-fyi

¹⁰ Dyicí ndyi dyi-bâ ńdyí otu mú ofyîfî mú o/fím ké kyikû-butu ńkyí Otu Dívit o/chi o-kyú ekap nyí banet. Ba/chi ba-cibi ké oshê-butu emen ba-kye ǎ ofê.

¹¹ Ké nkéré mú dyicí ándyi dii/fyi, Óburúkpâbí o/chi o-chîkúng busa emen o-bwa esim dyijê ne banet emen ḿbé ba/mîng kámbé ké Asyírya ne Éjip, ké esí nyí Pátoros ne Sudân ne Élam ne Bábyílon ne Hámat ne ké bakô-baya ḿbé baryên ne ké esí nyí baya ba/wáp kányí ba-fé ké kafâ.

¹² Óburúkpâbí o/chi o-tông eshê ekap o/fu, nyǐ mu o-chî ng ekpaa banet emen o-tî kyikit kyibónge, banet ḿbé Ézerel ne Júda ḿbé baa/pwó kámbé byiryibyiryi, o-bwa ne mbé esim ba-fím ké bakô-ejíí bamúmú.

¹³ Orêm oo*chi to banet ḿbé Ézerel ne banet ḿbé Júda* ne Júda oo*kyú to onet-bushwôn mú Ézerel*.

¹⁴ Mbé ba/chi ba-cibi kyikit kyibónge ba-kye banet ḿbé Fyilíta bunwa ké kyicê ńkyí esû nyi e-ríbî ng, ba-kpógê banet ḿbé mbe ba-kyú u ké kyicê ńkyí esû nyi e-byí i. Ba/chi ba-kpógê banet ḿbé Édom ne Mówep, ne banet ḿbé Ámon ba/chi ba-chi ńkyí mbé ba/chi ba-sét kámbé.

¹⁵ Óburúkpâbí o/chi o-chi dyiga-baya ńdyí Suwêz dyi-núng, ne o/chi o-bâ ne bufú ḿbú budasóng ḿbú bu/chi bu-chi kace ńké Yuférétyis ka-núng, o-mîng boǒbwán-booce káchâtkányi nké nke, eringe nyí nang yeě nang yeě o/chi o-man enyáng.

¹⁶ Banet emen ḿbé Ézerel ḿbé baa/fem bukyû ké Asyírya ba/chi ba-kyú ne bukwóp ḿbú o/chi o-tông kámbé ba-byí ké Asyírya, wǎ eringe nyí banchí ebe ḿbé kpákpá ba/mû ne bukwóp ńdyí ba/byí ba-mîng Éjip.