Azáya 10 - Bokyi Bible

¹ Ben ba/firi ké busông. Ben bamu ba-chi i byibî-byije ḿbyí mbyi byi-cít ng banet ejí.

² Éné nké bamu ba-ku ng banet-byikpu ba/fu, ba*dakoo ńkyí kyi/já kámbé* ba-két ng mpan-acît eryí o-bên n kámbé. Éné nké bamu ba-koo ng byěm ḿbyí byi/já banyǐnkú ne bwǎn-byibén.

³ Ben ba-chi i nǎ, ké nkéré mú Osówo o-kú o-kyâ běn busông. Ben ba-chi i nǎ, ké nkéré mú o/bê běn ne afaníkong nyí a/fím oshê mú tíbítíbí. Ben ba-zóngê e ba-jâ nyá ne ba-da-koo ochwâp. Ben ba-rôo ng esang enen nyá.

⁴ Â ba*da běn eju ké byití* ba/chi ba-tut běn ba-dim ne ben wǎ bamgbokobá. Nké nang ké nkyi éné, kafâ ńké Óburúkpâbí mu o-sa ng kaa*ba/chi ka-man* mu o-chî ng etan bubwô emen ḿbú oda běn ekye busông.

Otu mú Asyírya mu wǎ Kyiyám-Byití ńkyí Osówo

⁵ Óburúkpâbí o/raa o/fu, Asyírya, me n/kúng běn wǎ ochí n-kye banet ḿbé kafâ nke ka-sa ng mě ne mbé busông.

⁶ Me n/twóm běn n/fu, bada-kye oshê mú oo*nyît mě* bunwa, banet ḿbé mbe ba-chi i kafâ ka-sa mě. N/twóm běn n/fu, bada-wuri byěm, ba-jii kajii, ba-cím banet ba-fé kyísí wǎ biǐntóng ḿbyí mbyi ké byiká-oshê.

⁷ Nké otu mú Asyírya mu ne kyibî-okabe ńkyí emen ké dyityém. Mu ne okabe mú o/chi o-bên eshê chwóó.

⁸ Mu o-tông ng byiko o/fu, onet-dyishí-basúja emen nang orá o-chi i otu.

⁹ Me m/kpógê eshê nyí Káno ne Kákémis, eshê nyí Hámat ne Ápat. Me m/kpógê Samérya ne Damásákus.

¹⁰ Me n/tan bubwô ejí n-kye eshê nyí nyi e-fâ erím-bakye busông, erím-bakye nyí e/jê e-shwôm nyí Jerúsélem ne Samérya.

¹¹ Me mm/bên Samérya ne erím-bakye emen, ne n/chi n-chi eringe ebónge to ne Jerúsélem ne erím-bakye nyí mbe ba-fâ kányí ké oshê ámu.

¹² Nké Óburúkpâbí o/raa o/fu, â m/man ńkyí mu n-chi i ké kaku ńké Záyon ne ké Jerúsélem, n/chi n-kye otu mú Asyírya busông ké kángkáng byiko emen ḿbyí mu o-tông ng.

¹³ Otu mú Asyírya mu o-tông ng byiko o/fu, me nn/chi kánkyí me oyén. Me mu ne busa ne bubong ne byinyídíng. Me m/bên bati ḿbé eshê n-koo byěm ḿbyí ba/rôo. Me nn/cím banet ḿbé mbe ba-kyú u ké eshê ányi n-fé kyísí wǎ otyép-mpong.

¹⁴ Eshê nyí ké ejíí e/mû wǎ dyiju-kanurung, ne kyi*da mě esóng ne n-wuri esang ebe* wǎ eringe nyí badawuri ácě-ekwa. Bubyibabang bu*fí ḿbú bu/kim bu-ró mě*. Ocím-kanurung o*fí mú o/wonge mě*.

¹⁵ Nké Óburúkpâbí o/bí o/fu, dyikye dyi-fu ng dyi/fu, ndyí dyi/rêe dyi-shwôm onet mú mu o-kúng ng kándyí o-chi i bǎmkpóngé dí. Kashwám-asháng nke kiǐtí ka-shwôm onet mú mu o-kúng ng kánké o-ját ng byichí? Kyikim-kyichí kii*man eyip onet kyíbóng* onet nké odayip kyichí kyíbóng.

¹⁶ Óburúkpâbí mú o/rêe o-shwôm o/chi o-twóm orwôm o-kye banet ḿbé mbe ba-nen n kámbé kanong busông. Okwâ o/chi o-mang kámbé ké byiko kángkáng nkéré.

¹⁷ Osówo mú mu kiinwángé ńkyí Ézerel o/chi o-bírî okwâ. Osówo mú Ézerel mú mu onong o/chi o-bírî bumang-okwâ mú odakúng dyicí dyibónge o-shí kángkáng byěm wǎ byiwong.

¹⁸ Byizinge ne byifát ḿbyí mbyi ne aryî chwóó byi/chi byi-shí kángkáng wǎ eringe nyí kyibî-orwôm kyidaju onet.

¹⁹ Byichí ḿbyí byidawaa bii*jê to* ḿbyí nang wǎsíng o-man n epan kámbyí.

Boǒnyín-Banet bu/chi bu-bwa Esim

²⁰ Nkéré mu o-bâ mú banet ḿbé Ézerel ḿbé baa/fem bukyû baa*ba/chi ba-chîjêem esim ne banet ḿbé ba/nángê ba-ju kámbé*. Mbé ba/chi ba-fé dyityém ebe ké ntûntû ne Óburúkpâbí mú mu Osówo mú mu onong mú Ézerel.

²¹ Boǒnyín-banet ḿbé Ézerel ba/chi ba-bwa esim ba-kâm kiǐtí-Osówo ebe.

²² Nang ké banet ḿbé Ézerel baa/jê kántîk wǎ éshíshě nyí ké bukô-baya, boǒnyín nké bu/chi bu-bwa esim. Baa/tî banet ḿbé Ézerel bukyû, ne bu/kwárê ne mbé.

²³ Ké ntûntû, Óburúkpâbí mú mu Otu Kyítá mú o/rêe o-shwôm o/chi o-bâ ne bukyû ké esí emúmú wǎ eringe nyí nyǐ o/sét o/fu, nyǐ o-bâ ne mbú.

Óburúkpâbí o/chi o-kye Asyírya Busông

²⁴ Óburúkpâbí mú mu Otu Kyítá mú o/rêe o-shwôm o/sét banet emen ḿbé mbe ba-kyú u ké Záyon o/fu, *da n̂g echi ba-shî banet ḿbé Asyírya* nang ké mbé mbe ba-cít ng běn wǎ eringe nyí banet ḿbé Éjip ba/mû ba-cít ng běn*.

²⁵ Ké kaǎnyín-nkéré, me n/chi n-kye běn busông bu-man, ne n/chi n-ju banet ḿbé Asyírya.

²⁶ Me Óburúkpâbí mú o/rêe o-shwôm n/chi m-mín kámbé ké ákpá ejí wǎ eringe nyí m/mín banet ḿbé Médyan ké buká ḿbú Órep. N/chi n-kye Asyírya busông wǎ eringe nyí n/kye Éjip.

²⁷ Ké nkéré mú nkéré ámu oo/fyi, n/chi n-chi běn ba-fem ké busa ḿbú Asyírya ne dyitû ebe dii*ró běn to*.

Banet-Bushwôn ḿbé Ézerel ba/kye Bunwa

²⁸ Basúja ḿbé banet-bushwôn eten baa/koo oshê mú Âyi. Baa/shwôm ké Myísoron. Ba/mîng byěm ebe ké Mékyímashi.

²⁹ Baa/nyáng kaǎsídi-owo, ne ba/rí ké Géba. Bushî boo/róng banet ḿbé mbe ké oshê mú Ríma, ne banet ḿbé ké oshê mú Otu Sôl, mú Gyíbya baa/chêe.

³⁰ Banet ḿbé Gálim, wonge ê, banet ḿbé Lyísha, fwôo n̂g atông, banet ḿbé Anátot, faa n̂g ejá.

³¹ Banet ḿbé Mádáména ne Gébim ba-kú ba-chêe ng ba/fu, ba*daju kámbé*.

³² Kurún, banet-bushwôn eten mbe ké oshê mú Nôp, ne mbe ba-fâ banet bushî ké kaku ńké Záyon, ké oshê mú Jerúsélem.

³³ Óburúkpâbí mú mu Otu Kyítá mú o/rêe o-shwôm o/chi o-su kámbé ba-byíryî ng ba-bâ kyísí wǎ byire-byichí ḿbyí badakét byi-róng kyísí. O/chi o-két njang etông byiko ne mú mu kiǐtí o-shwôm kángkáng o-twóp kyísí, o-bwa ne nyǐ kyísí.

³⁴ Óburúkpâbí o/chi o-twom kámbé o-twóp kyísí wǎ eringe nyí badatwom byichí ḿbyí ké kafâ-kyizinge ké dyikye, ne wǎ eringe nyí byichí ḿbyí Lebánon ḿbyí byidajang enwa mbyi byi-myii ng.