Azáya 1 - Bokyi Bible

¹ Nwet mún mu ne byitwóm ḿbyí Osówo o/twóm Azáya mú wǎn-Émoz o/fu, osét banet ḿbé Júda ne Jerúsélem ké nkéré mú Otu Ozáya ne Otu Jótam ne Otu Éhaz ne Otu Hezekyâ ba/mû batu ḿbé Júda.

Osówo o/bîn Banet Emen

² Óburúkpâbí o/raa o/fu, bubóng ne esí, fwôo n̂g atông ba-jwo ńkyí mu m-bâ ebasét. Bwǎn ḿbé me n/nen kámbé baa/bírî bunwa ne me.

³ Bampong mbe ba-nyît ng onet mú o/já kámbé, ne boonyam-atû mbu bu-nyît ng kyikit ńkyí bonchí ebe mu o-kyâ kámbú byiryíng. Nké ńkyí ánkyi kyi/jê kyi-shwôm ńkyí banet ejí ḿbé Ézerel mbe ba-nyît ng. Mbé ba*fí ba-nyît ng dyishí nang kaǎnyín*.

⁴ Ben ba/firi ké busông, ben oshê mú banchi byibî, mú byibî bii/ju běn ne mú bwǎn enen ba/bên ba-shwôm. Byibî enen bii/bam běn byi-fé kyísí. Ben baa/né Osówo Óburúkpâbí mú onong, mú Ézerel, ne baa/bírî ǎ esim.

⁵ Ebóng bamu ba-câ kashú ne bunwa. Ben bamu ba-ryuu ng ba/fu, bakye běn busông bu-ca kashú dí. Byiko enen kángkáng ne atyém enen byi-kú byi-rwôm m.

⁶ Fím ké dyishí a-tîm ké byiká, kyikit-enyam-byiko enen kyi*fí nang kyibónge ńkyí nkyi kanong*. Byiko enen byimúmú byi/firi ne biiwiwaré ne byibáp ne byinêm. Onet o*fí mú oo/soo běn byinêm ámbyi* o-bwá běn nang kámbyí* o-ta běn nang bakút ké mbyí*.

⁷ Oshê enen oo/waa kyísí dyikáá, ne baa/shí eshê enen e-bírî ecing. Ben bayén bamu ányi ba-ri ng kyikit bacinbánet mbe ba-koo ng oshê enen ba-shí i kángkáng byěm.

⁸ Jerúsélem nké nke o/waa. Oshê mú baa/wâng kámú, mú banet ba*fí ḿbé badanyii kámú* wǎ kaase-onet-mbâm ne kaampyep ńké nke ké dyikán.

⁹ Â Óburúkpâbí mú o/rêe o-shwôm o/mû o*da/nyii kyicê-banet* něen ba/mû ba/bên Jerúsélem kángkáng wǎ eringe nyí ba/bên Sódom ne Gomóra.

¹⁰ Jerúsélem, batu eyên ne banet eyên mbe wǎ ḿbé Sódom ne Gomóra. Fwôo atông a-jwo ńkyí Óburúkpâbí mu o-sét ng ǒ. Tî atông a-jwo ńkyí mu o-tángê e ǒ.

¹¹ Nyǐ mu o-sét ng o/fu, wo amu a-kabe ng a/fu, me mu n-ryuu ng kángkáng byifen ḿbyí wo amu a-chi i a-kyâ mě? Me nn/kyee ne etyítǎm nyí amu a-shí i a-chi i byifen, ne bafwám-enyam eyên to nyí enong. Me nn/kyee ne baróng-bampong ne ḿbé ebû.

¹² Yeě o/sét běn o/fu, ben babâ mě ne kángkáng byěm ḿbyín ké nkéré mú ba-kú ba-bâ mě ebafé. Yeě o/sét běn o/fu, ben bakûyêe oyêe óyee ba-coge ng ké kafâ-kiǐtí-kyise-kyifen ejí echi.

¹³ Bamu ba-chi i byifen enen dyikáá. Kyinung-burwan ḿbú bamu ba-shí i kii/tyú mě. N*fí to n-ryuu ng ba-chîchi byifen enen ḿbyí ajî-byifen ḿbyí otukáku odabyí* ne ḿbyí ací-ékwâbashi enen* ne ḿbyí bancibi-ékwâbashi enen*. Baa/bên kámbyí kángkáng ké byibî enen.

¹⁴ Ajî-byifen ḿbyí otukáku odabyí ne ací-bujwom enen a-kú a-sa ng mě kafâ. Byi/firi mě dyitû ńdyí nn/kyee etû.

¹⁵ Nang ba-yip abwô enen kyíbóng ké nshwam efé, nn*tún běn achi*. Nang ba-bwa ba-fé nshwam nǎ, nn*fwôo atông* ké nǎ, abwô enen a/firi baróng bárong.

¹⁶ Soo n̂g byiko enen ba-cé. Mîng n̂g byibî ḿbyín ḿbyí mu n-ri ng běn ba-chi i. Mîng n̂g byibî echi

¹⁷ ba-chi ńkyí nkyi kanong. Kû n̂g ekét mpan mú baa*ryí acît*. Chwáp n̂g banet ḿbé banet mbe ba-cít ng kámbé. Kye n̂g bwǎn-byibén ńkyí kyi/já kámbé, ba-bwom banyǐnkú ké esim.

¹⁸ Óburúkpâbí o/raa o/fu, mîng n̂g byi-tóbê chwǒm ńkyín kántîk. Byibî bii/jîi běn, [nké me n/chi n-soo běn ba-cé wǎ asháng. Nang ké babat enen ba/jang ejê, ben ba/chi ba-kûcé wǎ okpówo.]

¹⁹ Â ben ba/bángê echi ńkyí me n/sét, ba/chi ba-ryí byěm ḿbyí byinong ḿbyí esí nyi e-kyâ.

²⁰ Nké â ben ba/cábê mě, ba-man ba-kpú. Me Óburúkpâbí nké n/raa.

Oshê mú o/bên

²¹ Oshê mú ké nkéré obónge o/mû o/fé dyityém ne me o-kú o-chi i édúú nyí onet-akpara. Ké nkéré obónge, banet ḿbé banong nké ba/mû ké mǔ, nké kántîk banju banet nké nke ba/waa.

²² Jerúsélem, wo a/mû ké nkéré obónge wǎ syílyíba, nké kántîk a*da/chîbyí chwǒm*. Wo a/mû wǎ bato ḿbé banong, nké kántîk a/firi omu ómu.

²³ Banet-ashí eyên ba-chi i bancen ne bunwa ne bacín-banet-bujii. Ba-koo ng eyáré ne bangu kángkáng nkéré. Baa*bwom bwǎn-byibén ké esim ké esuk* nang atông baa*fwôo ké nkéré banyǐnkú ba-kú ba-sét ng mpan ebe*.

²⁴ Kántîk, ké bubwô ḿbún, fwôo atông a-jwo ńkyí Óburúkpâbí mú o/rêe o-shwôm, mú mu Osówo mú Ézerel, mú mu ne busa, mu o-sét ng, o/fu, nyǐ o/chi o-só běn ewa, ben mú bamu banet-bushwôn emen ne baa*ba/chi ba-chî ǎ ekye afaníkong*.

²⁵ O/chi o-bírî achi o-tún běn. O/chi o-chi běn ba-cé wǎ eringe nyí nree bure odabwât kiǐré, ne o/chi o-soo běn kángkáng babat enen.

²⁶ O/chi o-kye běn batu ne bankye bacê wǎ ḿbé ben ba/mû ne mbé ké nkéré mú o/shwôm ké esim. Ne ba/chi ba-chîkó Jerúsélem oshê mú onong mú o/fé dyityém ne Osówo.

²⁷ Ké bubwô ḿbú Óburúkpâbí oo*ryí acît* nyǐ o/chi o-nyii Jerúsélem ne nang yeě mú o/saa byiko o-mîng byibî echi.

²⁸ Nké o/chi o-ju nang yeě mú mu o-chi i byibî, o-bwom m bunwa ne nyǐ. O/chi o-ju nang yeě mú mu o-né ng ǎ.

²⁹ Byiko byi/chi byi-kpú běn ké ofê mú ba/kye biinchéng-bakye ne byifát-ociring ḿbyí ba/kpang.

³⁰ Ben ba/chi ba-firi dábe wǎ kyichí ńkyí kyi-kú kyi-kpú u, wǎ byíkwôn ḿbyí ba*fí ba-pwó ng omu ké mbyí*.

³¹ Wǎ eringe nyí kaamkpát-okwâ kadakoo ké biǐbyâa, éné nké byibî ḿbyí banet ḿbé mbe ne busa mbé bayén byi/chi byi-ju kámbé, ne onet o*fí mú o/chi o-man eku bukyû ámbu*.