ÂAK BǍMKPÓNGÉ ḾBÉ BANET-KYITWÓM-JISOS BA/CHI, ḾBÉ BADAKÓ ÂAK 9 - Bokyi Bible

Sôl o/bírî o-firi Onet mú o/bángê ké Jisos

¹ Nké Sôl o/mû o/tôong o-câ kashú ne okabe mú odaju bǎmgbán ḿbé Otu Kyítá. O-dim o-kâm otu-nchi kyifen-Osówo,

² ne o-bí ǎ o/fu, okye ǎ baléta ḿbé nyǐ odatông ké byise-ékwâbashi ḿbyí banet-Jûs ké Damásákus ba-ri dyizong-onet ńdyí nyǐ mu, ne dyizong-busa ḿbú ba/kye ǎ. Eringe nyí â nyǐ o/ri banet áku ḿbé mbe ba-kyú u Bukwóp-Dyikpen ḿbú Otu Kyítá o/tông o/fu, bakyú, nyǐ o-man n ekám kámbé, nang onyinchéng nang onyinyi, nyǐ o-bâ ne mbé ké Jerúsélem.

³ Ké nkéré mú Sôl mu o-wâa ng Damásákus, ńdyí oo/fárâng ké mǔ, kasabang ka/waa ányi ka-fím kyíbóng ka-kédê ǎ ké byiko.

⁴ Sôl o-myii kyísí, o-jwo ejá nyí e/raa ne nyǐ e/fu, Sôl, ebóng amu a-kyâ mě busông.

⁵ Sôl o-bí o/fu, wo yeě, ǎ Otu Kyítá. Ejá ányi e-faa e/fu, me n-chi i Jisos mú amu a-kyâ ǎ busông.

⁶ Nké bûu nensang a-jâ ké oshê. Áku nké ba/chi ba-sét ǒ ńkyí a/chi a-chi.

⁷ Banet ḿbé Sôl o/mû o/cen ne mbé ba/mû ba/bwom, nang ojá ba*dachîman efaa*. Mbé ba/jwo ejá éja, nké ba*da/ri onet mú o/raa kányí*.

⁸ Sôl o-bûu nensang o-bâa achi, nké o*fí to o-rángê e*. Ne ba-níbî ǎ kâng ké bubwô, ba-sí ǎ tete o-nung Damásákus.

⁹ Ké ací jangjang achât Sôl o/waa wǎ nsêe achi, ne ké byirim-ací ámbyi o*da/ryí byiryíng* o-jwáp nang chwǒm*.

¹⁰ Ḿgbán-Jisos obónge o/mû ké Damásákus mú o/mû o-bángê e Ananyâs. Onyinchéng ámu o/ri chwǒm-akat ńkyí Otu Kyítá o/kó ǎ ké dyizîn o/fu, Ananyâs. Ananyâs o-bángê o/fu, me mu nyín, ǎ Otu Kyítá.

¹¹ Otu Kyítá o-raa ne nyǐ o/fu, kpá byiko a-ca ké kyiká-oshê ńkyí badakó Dángdáng. Â a/byí ké kyise ńkyí Júdas, bí kyi-kim ne onyinchéng obónge mú o/fím Tásus, mú odabángê Sôl. Mu o-fâ nshwam.

¹² Nyǐ oo/ri chwǒm-akat ńkyí onyinchéng mú odabángê Ananyâs o/banung o-ta ǎ abwô ké byiko, eringe nyí odachîkpet erángê.

¹³ Ananyâs o-faa o/fu, Otu Kyítá, banet chwóó baa/sét mě byěm kyi-kim ne onyinchéng mún, kyi-kim ne byibî-byěm ḿbyí oo/chi banet eyên ké Jerúsélem.

¹⁴ Ne oo/bê nyín ké Damásákus ne busa ḿbú batu-banchi kyifen-Osówo ba/kye ǎ ba/fu, oba-kám nang yeě mú mu o-fâ ǒ.

¹⁵ Otu Kyítá o-raa ne Ananyâs o/fu, ca, ké ebóng, me nn/cá ǎ n/fu, ochi mě bǎmkpóngé ḿbé odachi banet ḿbé ba*fí banet-Jûs* ne batu ne banet-Ézerel ba-nyît dyizîn ejí.

¹⁶ Me oyén n/chi n-tông ǎ kángkáng afaníkong nyí o/chi o-man o-ri ké dyishí ejí.

¹⁷ Ananyâs o-dim kâng, o-da-nung ké kyise ánkyi, o-yip abwô emen o-twôom Sôl ké byiko. O-raa ne nyǐ o/fu, Sôl mú wǎn-boné ejí ké bubwô ḿbú Karâs, Otu Kyítá oo/twóm mě oshê eyên. Jisos oyén mú wo a/ri ǎ ké bukwóp, ké nkéré mú wo amu a-bâ nyín nké o/twóm mě, eringe nyí wo a/chi a-chîkpet erángê, ne eringe nyí wo a/chi a-firi ne busa ḿbú Busun-Osówo ké byiko.

¹⁸ Ké abe ányi, boontaa-boǒbyém éné wǎ biǐfágé-kakworê byi-byí Sôl ké achi, byi-róng kyísí, ne o-chîkpet erángê. O-bûu nensang, Ananyâs o-kye ǎ osoo mú Osówo.

¹⁹ Ne ké nkéré oo/ryí byiryíng, byiko emen byi-bwa esim byi-chî ǎ eshwane. Sôl o/rí boǒnyín-ací ne bǎmgbán-Jisos ké Damásákus.

Sôl o/sét Banet kyi-kim ne Jisos ké Damásákus

²⁰ O-dim odǐm ké byise-ékwâbashi ḿbyí banet-Jûs, o-da-kpet esét banet kyi-kim ne Jisos o/fu, Jisos o-chi i Wǎn-Osówo.

²¹ Kángkáng banet ḿbé ba/jwo ǎ kyi/chi kámbé wǎ chwǒm-akat, ba-kpet ebí barî ba/fu, *chí onyinchéng mún nké o/mû o-ju ng banet ḿbé ba/mû ba-kyâ dyizîn ńdyí Jisos ofê ké Jerúsélem*? *Chí ké bubwô ámbu bubónge nké nyǐ o/bê nyín ne okabe mú odakám kámbé o-da-kye batu-banchi kyifen-Osówo*?

²² Nké bǎmpém ḿbé Sôl o/pem ba/mû mbe ba-yángê e banet dyityém ba-câ kashú, ne o-tông ké ntûntû o/fu, Jisos o/mû onet mú Osówo o/kúng ǎ butu ké bukwóp ḿbú banet-Jûs ḿbé ba/mû ké Damásákus ba*da ǎ eman efaa ojá*.

²³ Ké nkéré mú ací aa/shwôm chwóó, banet-Jûs ba/kyú kyikit kyibónge ba-cibi ba/fu, mbé ba-ju ng Sôl.

²⁴ Nké ba/sét Sôl kyi-kim ne okabe ebe. Buchú ne esû banet-Jûs ámbe ba/bám afyi nyí kyibám ńkyí ba/wáp oshê ámu ba-fé ké kafâ, eringe nyí bada ǎ eju.

²⁵ Nké ké buchú bubónge, banet ḿbé ba/mû ba-cen n ne Sôl ké kyikû ba/yip ǎ ba-yú ne nyǐ kyíbóng-ekpe, ba-fé ǎ ké kaakye, ba-shû ǎ tete o-ribi kyísí.

Sôl o/bwa Esim ké Jerúsélem

²⁶ Sôl o-bwa esim ké Jerúsélem, o-kan o/fu, nyǐ o-nung ng ké burwám ḿbú bǎmgbán-Jisos. Mbé ba*da/bángê kâng ba/fu, mú mǔ o-chi i ḿgbán-Jisos* ne mbé ashí kángkáng ba/mû mbe ba-shî ng ǎ.

²⁷ Ne Bánábas o-ba-chwáp ǎ kâng, o-yip ǎ o-ca ne nyǐ ké kyikit ńkyí banet-kyitwóm-Jisos. O-sét kámbé eringe nyí Sôl o/ri Otu Kyítá ké bukwóp, ne eringe nyí Otu Kyítá oo/raa ne nyǐ. Bánábas o-sét to kámbé eringe nyí Sôl oo/pem banet bǎmpém ké Damásákus, ké bubwô ḿbú Jisos, nang achi-banet o*da/shî*.

²⁸ Ne Sôl o-waa ányi kâng ne banet-kyitwóm-Jisos, o-cen ké Jerúsélem omúmú o-sét ng banet Bǎmpém ḿbé Banong o-câ ké bubwô ḿbú Otu Kyítá, nang achi-banet o*da/shî*.

²⁹ O/pem to, o-kyú to ké okân ké dyishí ne banet-Jûs ḿbé badaman eraa Girîk, nké ba/kan ba/fu, mbé ba-ju ng ǎ.

³⁰ Ké nkéré barî-banet ḿbé ba/bángê ké Jisos ba/jwo kánkyí, ba-kpî Sôl tete ba-ribi ne nyǐ ké Sizaryâ, ne ba-twóm ǎ o-jâ Tásus.

³¹ Kyi-fím ké nkéré ámu kâng, kángkáng banet-ékwâbashi nyí Karâs ḿbé mbe ké Judyâ ne Gályílyi ne Samérya ba-firi ké kyikim-nkéré ńkyí bunyîn-dyityém. Ba-firi ne busa, ba-jê ké burwám ké bubwô ḿbú ochwâp mú Busun-Osówo, ne dyikpen ekyú ké ofê mú Otu Kyítá.

Pyíta o/ce Lyída ne Jópa

³² Pyíta o/cen kángkáng byikit. Nkéré obónge o/ce o/fu, nyǐ o-da ng eri banet-Osówo ḿbé mbe ba-kyú u ké Lyída.

³³ Ké oshê ámu, Pyíta o/ri onyinchéng obónge mú o/mû o-bángê e Ényis, mú o/mû oo/bok, o-waa ké karíng ké aje nyíryinyi.

³⁴ Pyíta o-raa ne nyǐ o/fu, Ényis, Jisos Karâs nké mu o-chi i ǒ a-nyange. Bûu nensang a-fút karíng eyên. Ké abe ányi, Ényis o-bûu nensang.

³⁵ Kángkáng banet ḿbé mbe ba-kyú u ké Lyída ne Sháron ba/ri ǎ, ba-bírî ba-firi banet ḿbé ba/bángê ké byiraa ḿbyí Otu Kyítá.

³⁶ Ké Jópa, onyinyi obónge o/mû ányi mú o/mû o-bángê e Tábyíta, mú o/mû onet mú o/bángê ké Jisos ne dyityém emen. Ké ejá-Girîk, dyizîn emen byi-bángê e Dókas. Tábyíta o/kúng kángkáng dyikpen emen o-tî ké kanong echi ne banet-byikpu echwáp.

³⁷ Ké nkéré ámu, onyinyi ámu o/róng kyirwóm o-kpú. Ba-kôo ǎ omu, ba-yip ǎ ba-ren ké nfût mú kyíbóng-enyóng.

³⁸ Fím Jópa a-ribi ké Lyída kyi/mû kyi*da/jang etíbî*. Ne ké nkéré bǎmgbán-Jisos ḿbé mbe ké Jópa ba/jwo ba/fu, Pyíta mu ké Lyída, mbé ba/twóm banet ashí afee ba-kâm Pyíta ne kyitwóm ńkyín ba/fu, kamgbe, bâ ochéé óchee a-kâm bě.

³⁹ Pyíta o-kpá byiko kâng o-dim ne mbé. Ké nkéré mú o/ribi áku, ba-yip ǎ ba-ca ne nyǐ ké nfût mú kyíbóng-enyóng. Kángkáng banyǐnkú ba-wáp Pyíta ba-fé ké kafâ, ba-tii ng, ba-tông ng ǎ byídí ḿbyí Dókas o/zim o-kye kámbé ké nkéré o/mû o/tôong okpó.

⁴⁰ Pyíta o-fîm kámbé kángkáng ba-byí ké nfût, ne o-tím arông kyísí o-fé nshwam. Ne o-bírî kâng o-tún kyikwóm-okúsí o-raa o/fu, Tábyíta, bûu nensang. Tábyíta o-bâa achi, ne ké nkéré o/ri Pyíta, o-bûu o-kyú me.

⁴¹ Pyíta o-chwáp ǎ o-bûu nensang. Ne o-kó kâng banet ḿbé ba/bángê ké Jisos ne ḿbé banyǐnkú, o-yip Tábyíta ne dyikpen emen ńdyí oo/bwa ké ndyí o-kye kámbé.

⁴² Bǎmpém kyi-kim ne chwǒm ńkyín ba-káng ké oshê omúmú mú Jópa, ne bujê-banet chwóó ba-bángê ké Otu Kyítá.

⁴³ Pyíta o-rí ací chwóó ké Jópa ne onyinchéng obónge mú o/mû o-chi i ekwop-enyam e-kûnwa, mú o/mû o-bángê e Sámon.