ÂAK BǍMKPÓNGÉ ḾBÉ BANET-KYITWÓM-JISOS BA/CHI, ḾBÉ BADAKÓ ÂAK 8 - Bokyi Bible

¹ Kyi/nyîn Sôl eringe nyí ba/ju Sityífin. Kyi-fím ké ochíchí-dyicí ándyi, banet-ékwâbashi nyí Karâs ḿbé ba/mû ké Jerúsélem ba/kpet afaníkong eri, ké ebóng, banet ba/mû ba-chi i kámbé byibî-byěm. Kángkáng banet ḿbé ba/bángê ké Jisos ne atyém ebe ba-pwôo byiryibyiryi ba-jâ Judyâ ne Samérya. Kyi*da/shwôm banet-kyitwóm-Jisos nké nke ba/waa*.

Sôl o/kye Banet-Ékwâbashi nyí Karâs ḿbé ba/mû ké Jerúsélem Busông

² Kyicê-banet ḿbé mbe ba-fâ Osówo ba-kúng Sityífin ba-ryii, ba-tii ǎ kanong kanong.

³ Nké Sôl o/kan o/fu, nyǐ o-bên n ncibi mú ékwâbashi nyí Karâs. O-nung ng ké kyise ké kyise, o-tut ng banyinchéng ne banyinyi ḿbé ba/bángê ké Jisos ne atyém ebe o-fâ ké mgbokobá.

Fyílip o/sét Bǎmpém ḿbé Banong ké Samérya

⁴ Banet ḿbé ba/bángê ké Jisos ne atyém ebe ḿbé ba/pwôo byiryibyiryi ba/ce kángkáng byikit ba-sét ng banet Bǎmpém ḿbé Banong ba-câ.

⁵ Fyílip o/ce ké oshê mú Samérya o-da-pem banet-oshê ámu kyi-kim ne onet mú Osówo o/kúng ǎ butu.

⁶ Bujê-banet ḿbé ba/mû ányi ba/fwôo atông ba-jwo ńkyí Fyílip o/sét. Mbé kángkáng ba/tî atông ba-jwo ǎ, ne ba/ri to biǐtí-akat ḿbyí o/chi.

⁷ Byibî-bací byi/wonge kakânkakân, byi-byí banet chwóó ké byiko. O-chi banet chwóó ḿbé ba/mû ba-rwôm m kyibok ne bankwa to chwóó ba-nyange.

⁸ Banet ḿbé Samérya kâng ba-firi ké bunyîn-dyityém.

⁹ Onyinchéng obónge mú odabángê Sámon o/mû ké oshê ámu, mú ké kyikim-nkéré chwóó o/gaa banet ḿbé Samérya byiko ké bambirirím ḿbé mu o-chi i o-tông ng kámbé. Nyǐ o/mû mu o-kúng ng byiko emen wǎ kiǐtí-onet.

¹⁰ Kángkáng banet ḿbé ké oshê ámu, bakínkán ne bwǎsíng, ba/tî atông ba-jwo onyinchéng ámu. Ba-raa ng kyi-kim ne nyǐ ba/fu, mú mǔ o-chi i osówo mú odabángê kiǐtí-busa.

¹¹ Ké ntûntû, onyinchéng ámu oo/chi byěm ḿbyí bii/kaa banet-oshê ámu byiko ké kyikim-nkéré chwóó ḿbyí byi/chi kámbé mbe ba-tî ng atông ba-jwo ng ǎ.

¹² Nké ké nkéré banet ámbe ba/bángê ne atyém ebe ké kyitwóm ńkyí Fyílip o/sét kámbé kyi-kim ne Bǎmpém ḿbé Banong ḿbé Butu ḿbú Osówo ne dyizîn ńdyí Jisos Karâs, mbé ba/koo osoo mú Osówo, banyinchéng ne banyinyi.

¹³ Sámon oyén to o-bángê ké Jisos Karâs, ne ké nkéré mú o/koo osoo mú Osówo, o-kpet ecen ne Fyílip ké kyikû. Byiko byi-kaa ǎ ké nkéré o/ri biǐtí-akat ne biǐtí-byěm ḿbyí byidakaa banet byiko ḿbyí Fyílip o/mû o-chi i.

¹⁴ Banet-kyitwóm-Jisos ḿbé ba/mû ké Jerúsélem ba/jwo ba/fu, banet ḿbé oshê mú Samérya baa/bángê ké byiraa ḿbyí Osówo, ne ba-twóm kámbé Pyíta ne Jǒn.

¹⁵ Ké nkéré mú Pyíta ne Jǒn ba/ribi áku, ba/fé nshwam ba-kye Osówo ké bubwô ḿbú banet ḿbé ba/bángê ké Jisos ne atyém ebe ba/fu, kyi/bát Osówo okye kámbé Busun-Osówo.

¹⁶ Ké ebóng, Busun-Osówo bu/mû bu*da/bê ne bu-kâm onet nang obónge ké burwám ebe*. Ba/mû baa/kye kámbé osoo mú Osówo nké nke ké dyizîn ńdyí Jisos, Otu Kyítá.

¹⁷ Pyíta ne Jǒn ba-twôom kámbé kâng abwô ké byiko ne ba-koo Busun-Osówo.

¹⁸ Sámon o/ri o/fu, Osówo o/kye kámbé Busun-Osówo ké abwô nyí banet-kyitwóm-Jisos ba/twôom kámbé ké byiko. O-yip akpuga kâng o/fu, nyǐ o-kyâ Pyíta ne Jǒn,

¹⁹ o-sét kámbé o/fu, kye n̂g mě to busa ḿbún, eringe nyí nang yeě nké n/twôom ǎ abwô ké byiko o/chi o-koo Busun-Osówo.

²⁰ Nké Pyíta o/faa ǎ o/fu, kpú ne akpuga eyên áku ké okabe mú amu a-kabe ng a/fu, wo a-yip ng akpuga a-ré eyáré nyí Osówo.

²¹ Wo a*fí ne bubwô nang kyipang-chwǒm ké bǎmkpóngé eten*. Ké ebóng, dyityém eyên dyi*fí kanong ké bushú ḿbú Osówo*.

²² Byiko byikpú ǒ ké dyizong-kyibî-okabe eyên ńkyín, a-fé nshwam a-kye Otu Kyítá a/fu, opwoo ǒ ké okabe mú a/kabe dyizong-chwǒm ńdyín.

²³ Ké ebóng, me nn/ri n/fu, kyibî-orêm nkyi kyi-chi i ǒ ké dyityém, ne ké bubwô-byibî eyên, wo a/firi wǎ onet-mgbokobá.

²⁴ Sámon o-raa ne Pyíta ne Jǒn o/fu, fé n̂g nshwam ba-tîm Osówo arông ba-kye mě, eringe nyí byěm ḿbyí a/raa ne me něen bii*ba/chi byi-chi mě*.

²⁵ Ké nkéré mú Pyíta ne Jǒn baa/sét banet ńkyí mbé mbe ba-nyît ng kyi-kim ne Jisos ne Bǎmpém ḿbé Banong ḿbé Otu Kyítá, ba/bwa esim dyijê Jerúsélem. Ké nkéré mbe ba-bwa ng esim ba-câ, ba/pem banet Bǎmpém ḿbé Banong ké eshê chwóó ké Samérya.

Fyílip ne Onet-Dyishí mú Etyǒpya

²⁶ Orím mú onong mú Otu Kyítá o-raa ne Fyílip o/fu, kpá byiko a-bírî busyísen, a-ca ké bukwóp ḿbú bu/fím Jerúsélem mbu bu-jâ Gáza. Banet ba*fí to ba-cen n ké bukwóp ámbu*.

^27-28 Fyílip kâng o-kpá byiko o-dim. Onyinchéng obónge mú o/fím Etyǒpya o/mû o-kú o-bwa ng esim dyijê. Onyinchéng mún o/mû kiǐtí-onet-dyishí-bǎmkpóngé mú o/mû o-tî ng kángkáng akpuga nyí onyinyi mú o/mû otu ké Etyǒpya. Nyǐ o/mû o/ce Jerúsélem o-da-fé Osówo, ne o-kú o-bwa ng esim ké mútu mú bubyî-orá budatut. Ké nkéré mu o-cen n o-câ ké mútu ámu, nyǐ o/mû o-kó ng nwet mú mkpábé mú odasét byiraa-Osówo, mú odabángê Azáya o/sáng.

²⁹ Busun-Osówo bu-raa ne Fyílip bu/fu, dim a-kûcen a-câ fáráng ne mútu ámu.

³⁰ Fyílip o-zóngê o-kâm mútu ámu, o-jwo ké onyinchéng ámu mu o-kó ng kyikit-nwet ńkyí mkpábé mú odasét byiraa-Osówo, mú odabángê Azáya o/sáng. Fyílip o-bí ǎ kâng o/fu, wo amu a-nyît ng kyikû kyi-kim ne ńkyí amu a-kó ng dí.

³¹ Otu-onyinchéng ámu o-faa ǎ o/fu, me n-cen n nǎ ne n-nyît tete onet o-sét mě eringe nyí kyi/byí. Ne o-sét Fyílip o/fu, oyú o-kyú ké mútu ne nyǐ.

³² Kyikit-ejá-Osówo nyí ba/sáng kyísí ńkyí o/mû o-kó ng kyi/fu něen. Nyǐ o/mû wǎ etám-ebû nyí ba/kám ba-wâa edaju. Nyǐ o/mû wǎ wǎn-etám-ebû mú oo*wonge* ké nkéré ba-kú ba-pwát ng kámú eríp ké byiko*. Nyǐ o*da/faa nang ojá*.

³³ Banet ba/kúng ǎ wǎ enyam-onet, ba-két mpan-kyisédéng o-bên ǎ. Onet o*fí nang obónge mú o/chi o-man esét kyi-kim ne kyikû-banet emen* ké ebóng, dyikpen emen ńdyí ké ejíí dyi*fí to*.

³⁴ Otu-onyinchéng ámu o-raa ne Fyílip o/fu, sét mě, yeě mú mkpábé mún mú odasét byiraa-Osówo mu o-raa ng kyi-kim ne nyǐ. Kyi-kim ne byiko emen aa, aa ne onet okíri.

³⁵ Fyílip o-kpet ǎ epem. O/kpet ké ochíchí-kyikit-ejá-Osówo ńkyín ńkyí ba/sáng kyísí, o-sét ǎ Bǎmpém ḿbé Banong kyi-kim ne Jisos.

³⁶ Ké nkéré mú mbe ba-cen n ba-câ ké bukwóp, ba/ribi ké kyikit ńkyí kyi/mû ne kiǐdé-omu. Ne otu-onyinchéng ámu o-sét Fyílip o/fu, di kyikit ńkyí nkyi ne omu i. Chwǒm nkyi kô ńkyí kyi/chi kyi-kpong mě osoo mú Osówo ekoo? [

³⁷ Fyílip o-sét ǎ o/fu, a-man n ekoo osoo mú Osówo, â a/bángê ké Jisos Karâs ne dyityém eyên kángkáng. Onyinchéng ámu o-faa o/fu, me m/bángê. Me m/bángê ne dyityém ejí n/fu, Jisos Karâs o-chi i Wǎn-Osówo.]

³⁸ Otu-onyinchéng ámu o-kye busa o/fu, mútu obwom. Ne mbé ashí afee, Fyílip ne mú otu-onyinchéng ámu ba-shû ba-nung ké kiǐdé-omu ánkyi, ne Fyílip o-kye ǎ osoo mú Osówo.

³⁹ Ké nkéré mú mbé ashí amúmú ba/byí ké kafâ-kiǐdé-omu ánkyi, Busun ḿbú Otu Kyítá bu-yip Fyílip bu-dim ne nyǐ. Mú otu-onyinchéng ámu o*da ǎ echîri* nké o/dim dyijê kiǐfáng ńkyí emen ne bunyîn-dyityém.

⁴⁰ Fyílip o-ri o/fu, nyǐ oo/ribi ké Áshídot. Ne o-cen ké eshê nyí nyi ányi kángkáng o-sét ng banet Bǎmpém ḿbé Banong o-câ tete o-ribi ké Sizaryâ.