ÂAK BǍMKPÓNGÉ ḾBÉ BANET-KYITWÓM-JISOS BA/CHI, ḾBÉ BADAKÓ ÂAK 7 - Bokyi Bible

Mpan mú Sityífin o/pan ké Esuk nyí Eryên nyí Banet-Jûs

¹ Otu-nchi kyifen-Osówo o-bí Sityífin o/fu, nkyi éné ké ntûntû dí.

² Sityífin o-faa o/fu, bwǎn-bané ejí ne banchí ejí, fwôo n̂g atông ba-jwo mě. Osówo mú bada ǎ ekpee o/byí o-kâm bonchí eten mú kpákpá, mú odabángê Ébarahâm ké nkéré o/mû o/tôong o-kyú u ké Mesopotémya, ne o-kûdim o-da-kyú ké Háran.

³ O-raa ne nyǐ o/fu, mîng kyikû-banet eyên ne oshê eyên a-dim a-jâ ké oshê mú me n/chi n-tông ǒ.

⁴ Ne Ébarahâm o-dim kâng ké esí emen o-da-kpet ekyú ké Háran. Ké nkéré mú bonchí-Ébarahâm o/kpú, Osówo o/chi ǎ o-dim o-ba-jâ ké oshê mún, mú bamu ba-kyú u něen kántîk.

⁵ Osówo kâng o*da/kye Ébarahâm kyicê-esí ńkyín nang kyibónge o/fu, kyifiri ńkyí emen*. Nang kaǎcê-kyikit-esí wǎ otyém-dyikwâ o*da ǎ ekye*. Nké Osówo o/ryí ocím o/fu, nyǐ o/chi o-kye ǎ kányí. O/fu, e/chi e-já ǎ ne kyikû-banet emen. Ké nkéré mú Osówo o/ryí ocím mún, Ébarahâm o/mû o*fí ne wǎn nang obónge*.

⁶ Osówo o/raa ne nyǐ něen o/fu, kyikû-banet eyên ba/chi ba-kyú ké oshê mú o*fí mú ebe* ké kyikit ńkyí ba/chi ba-kyú básóng, ba-tî kámbé ké bukwóp ḿbú boo*nwa* ké égot-aje efee.

⁷ Nké Osówo o/fu, me n/chi m-pan banet ḿbé mbé ba/chi ba-chi kámbé bǎmkpóngé wǎ básóng mpan. Ne ké nkéré mú kaa/bwon, ba/chi ba-byí ba-mîng oshê ámu, ba-kyú ké kyikit ńkyín ba-kû mě efé.

⁸ Osówo kâng ne Ébarahâm ba-ryí barî ocím ba-sem, ne Osówo o-sét Ébarahâm o/fu, â banet eyên ba/cên dyicên, kyi/chi kyi-tông kyi/fu, mbé ba/bángê ké ocím mú byi/ryí. Ne Ébarahâm o-cên kâng Ázik ké nkéré mú o/fwon ǎ o-rí kyipyán kyibónge. Ázik o-cên Jekôp, ne Jekôp o-cên biǐtí-banchí eten ḿbé kpákpá ashí diǐkpú ne afee.

⁹ Orêm o/mû o-chi i biǐtí-banchí eten ámbe ne Josêf, ne ba-yip ǎ ba-shee banet ḿbé ba/yip ǎ ba-jâ ne nyǐ ké Éjip wǎ ósóng. Nké Osówo o/mû ne nyǐ,

¹⁰ ne o/fîm ǎ ké kángkáng afaníkong emen. Ké nkéré Josêf o/bwom ké bushú ḿbú otu mú Éjip, Osówo o/kye ǎ édúú nyí enong ne byinyídíng. Otu o/kúng Josêf o-tî ǎ wǎ otu-dyishí mú oshê omúmú ne mú kyise emen.

¹¹ Esong e-ba-róng kâng ké oshê omúmú mú Éjip ne Kínan nyí e/chi banet ba-ri afaníkong chwóó. Banchí eten ḿbé kpákpá ámbe ba*da/chîman ejá byiryíng*.

¹² Ké nkéré Jekôp o/jwo o/fu, byiryíng mbyi ké Éjip, o-twóm bwǎn emen ḿbé banyinchéng, ḿbé ba/mû banchí eten ḿbé kpákpá ba-ca Éjip ké mbwôp kashú.

¹³ Ké nnyinyěng-nkéré mú ba/chîce Éjip, Josêf o-tông bwǎn-bané emen byiko, ne kyi-fím ányi, otu o-nyît kyi-kim ne kyikû-banet ńkyí Josêf.

¹⁴ Ne Josêf o-twóm kâng ejá e-kâm Jekôp mú bonchí emen o-sét ǎ o/fu, odim ne kyikû-banet emen kángkáng o-jâ Éjip. Bajam-banet ba/mû bachât esim onyiryiká.

¹⁵ Ne Jekôp kâng o-dim o-jâ Éjip. O-waa áku, nyǐ ne banchí eten ḿbé kpákpá ámbe, ba-kpú.

¹⁶ Ba/kúng byikwóm-enyam-byiko ebe ba-da-ryii ké Shékem, ké dyikun ńdyí Ébarahâm o/yip akpuga o-ré ne kyikû-banet ńkyí Hámo.

¹⁷ Ńdyí nkéré o/fárâng mú Osówo odachi ńkyí nyǐ o/mû o/ryí Ébarahâm ocím, ocím-banet eten ḿbé ba/mû ké Éjip o/mû oo/jê kanong kanong o-shwôm eringe nyí o/mû.

¹⁸ Ké nkuli kyikû kâng, otu okíri mú o/mû o*fí o-kabe ng kyi-kim ne ńkyí Josêf o/chi o-kye oshê emen* o-kpet etún Éjip.

¹⁹ Otu ámu o-nîm banet eten, o-bên dyityém ne banchí eten ḿbé kpákpá, o-chi kámbé ké busa o/fu, batwóp bwǎn ebe ḿbé bajújwô kyíjí, eringe nyí badakpú.

²⁰ Kyi/mû ké ochíchí-nkéré ámu nké ba/fwon Músis mú o/mû o-nwa ng! ne bubwásíng. Boné emen o/rôo ǎ ké kyise, o-nen ǎ ké etukáku echât.

²¹ Ké nkéré boné emen o/kúng ǎ o-tî kyíjí, wǎn-otu mú onyinyi o-yip ǎ, o-nen ǎ, o-kû ǎ ekó wǎn emen.

²² Ba/tángê ǎ kángkáng byinyídíng ḿbyí banet-Éjip, ne o-firi kiǐtí-onet ké byiraa emen ḿbyí o/raa ne byěm emen ḿbyí o/chi.

²³ Ké nkéré mú Músis oo/rí bajam-aje bafee, o-kabe ké dyityém o/fu, nyǐ o-da ng eri bwǎn-bané emen ḿbé banet-Ézerel.

²⁴ O-ri onet-Éjip ké o-kú o-mín n onet-Ézerel, o-koo batáng o-ju onet-Éjip ámu.

²⁵ Músis o/mû o/kabe o/fu, banet emen ba/chi ba-nyît ba/fu, Osówo o/chi o-yip ǎ nyǐ o-chi kámbé ba-fem. Nké ba*da/nyît*.

²⁶ Ké orî-dyicí, o-ri banet-Ézerel ashí afee ké mbe ba-nwa ng ne barî, ne o-kan o/fu, nyǐ o-chi i kámbé ba-firi ké bunyîn-dyityém ne barî, o-raa ne mbé o/fu, fwôo n̂g atông ba-jwo. Ben ba/fím ne barî. Ebóng bamu ba-nwa ng ne barî.

²⁷ Nké mú o/mû o-mín n óbe o-jê Músis kiǐsâ-abwô, o-bí ǎ o/fu, yeě o/tî ǒ o/fu, wo akû bě ebám a-pan n bě bampan.

²⁸ Amu a-ryuu ng a/fu, a-ju ng mě wǎ eringe nyí a/ju onet-Éjip kyísóng?

²⁹ Ké nkéré Músis o/jwo ńkyín, o-chêe o-mîng Éjip, o-da-kpet ekyú ké Médyan. Ányi nké o/fwon bwǎn-banyinchéng bafee.

³⁰ Ké nkéré mú bajam-aje baa/shwôm bafee, orím mú onong o/byí o-kâm Músis ké okwâ mú mu o-mang ng ké kyichí, ké kyikim-dyikán kyi-kim fáráng ne kaku ńké badakó Sána.

³¹ Ńkyí Músis o/ri kyi/chi ǎ ké dyityém yógeyóge, ne o-tín o-fárâng kyichí ánkyi o/fu, nyǐ o-da ng eri kánkyí kanong kanong. Nké nyǐ o/jwo ejá nyí Otu Kyítá nyí e/raa e/fu,

³² me n-chi i Osówo mú banchí enen ḿbé kpákpá ne mú Ébarahâm ne Ázik ne Jekôp. Músis o-kpet etím banê ne bushî. O*da/chîjá busa ḿbú odatún achi*.

³³ Otu Kyítá o-raa ne nyǐ o/fu, pii abe ké byiká, ké ebóng, esí nyí a/bwom ké nyǐ e/já mě.

³⁴ Me mm/bírî achi n-ri kyibî-afaníkong ńkyí banet ejí mbe ba-ri ng ké Éjip. Me nn/jwo dyibyê ebe ńdyí mbe ba-byâ, ne mm/bê kámbé ebanyii. King a-bâ a-fwôo atông, me n/chi n-twóm ǒ a-bwa esim ké Éjip.

³⁵ Músis nké mu onet mú banet-Ézerel ba/né ǎ, ba-bí ǎ ba/fu, yeě o/tî ǒ o/fu, wo akû bě ebám, a-pan n bě bampan. Nyǐ nké mu onet mú Osówo o/twóm ǎ wǎ onet-dyishí ne onet-onyii ké ochwâp mú o/koo ké abwô nyí orím mú onong mú o/byí o-kâm ǎ ké kyichí ńkyí kyi/mû kyi-mang ng okwâ.

³⁶ Músis o/kpî kámbé ba-mîng Éjip, o-chi biǐtí-akat ne byěm ḿbyí byidakaa banet byiko ké Éjip ne ké baya ḿbé badakó Rêt ne ké kyikim-dyikán ké bajam-aje bafee.

³⁷ Músis nké mu onet mú o/raa ne banet ḿbé Ézerel o/fu, Osówo o/chi o-twóm běn mkpábé mú odasét byiraa emen, mú o/chi o-fím ké oshê enen, wǎ eringe nyí o/twóm mě.

³⁸ Músis nké o/mû onet mú o/mû ne banet-Ézerel ké nkéré ba/cibi kyikit kyibónge ké kyikim-dyikán. Nyǐ ne orím mú onong mú o/pem ne nyǐ ké kaku ńké badakó Sána ba/mû ányi ne banchí eten ḿbé kpákpá. Nyǐ o/koo byitwóm ḿbyí byidawaa ne banyá o-kye bě.

³⁹ Nké banchí eten ámbe ba*da ǎ ejwo*. Ba/tín ǎ ba-tî ké bukô, ba-tî atyém ebe ba/fu, kyi/mû kyi/chi kyi-nyîn kámbé, â mbé ba/mû ba-man n ebwa esim ké Éjip.

⁴⁰ Ne ba-raa kâng ne Éron ba/fu, chi bě erím-bakye nyí e/chi e-bwom wǎ Osówo eten, nyí ba/chi ba-kûyip kányí ba-câ bě ne nyǐ ké kashú. Be byi*fí byi-nyît ng ńkyí kii/chi ne onyinchéng ámu mú odabángê Músis* mú o/kpî bě byi-byí byi-mîng Éjip*.

⁴¹ Kyi-fím ányi kâng mbé ba-chi orím-bukye mú o/mû wǎ wǎn-mpong, ba-chi kyifen ba-kye kámú, ne ba-chi dyijî kyi-kim ne orím-bukye ámu mú mbé bayén ba/kúng abwô ebe ba-chi.

⁴² Nké Osówo o/pín kámbé esim, o-tî kámbé o/fu, bakûfé ékpére nyí kyíbóng, wǎ eringe nyí ba/sáng ké nwet mú bamkpábé ḿbé badasét byiraa-Osówo ba/fu, Osówo o/fu, banet-Ézerel, *chí me nké ba/ju byirim-byitú ba-chi kyifen ba-kye mě* ké kyikim-dyikán* ké bajam-aje bafee*.

⁴³ Mpyep mú badabi ké kyídí mú osówo mú o*fí ké kafâ* mú badakó Mólok nké ben ba/tû. Ne orím-bukye mú ókpére mú osówo enen mú o*fí ké kafâ* mú badakó Réfan. Mbyí nké byi/mû erím-bakye nyí ben ba/chi, ba/fu, ba-kû ng efé kányí. Ké bubwô ámbu kâng, me n/chi n-chi ba-kúng běn ba-shwôm Bábyílon.

⁴⁴ Banchí eten ḿbé kpákpá ba/mû ne mpyep-kyídí ké kyikim-dyikán mú o/tông o/fu, Osówo mu ányi. Ba/mû ba/chi kámú wǎ eringe nyí Osówo o/sét Músis o/fu, ochi kámú, kerededet wǎ eringe nyí Osówo o/tông Músis o/fu, okan kámú ne o-bi.

⁴⁵ Ké nkéré mú kii/rí ńdyí ba/chi kámú, banchí eten ḿbé kpákpá ḿbé ba/koo mpyep ámu ne banchí ebe ba/yip kámú ba-dim ne mǔ ké nkéré mú ba/cen ne Jóshwa ba-nung ké esí nyí eshê nyí Osówo o/ró banet ké nyǐ, o-kye kámbé. Mpyep ámu o/waa ányi tete kyi-ribi ké nkéré mú Otu Dívit.

⁴⁶ Otu Dívit o/chi ńkyí Osówo o/cángê dyityém ne nyǐ, ne o-bí Osówo o/fu, omîng ǎ nyǐ o-bi kyise o-fé Osówo mú Jekôp o/mû o-fâ.

⁴⁷ Nké Otu Sólómon nké o/bwa o-bi Osówo kyise.

⁴⁸ Nké Osówo mú mu kyíbóng kyíbóng o*fí o-kyú u ké byise ḿbyí banet ba/bi* wǎ eringe nyí mkpábé obónge mú odasét byiraa-Osówo o/fu,

⁴⁹ Otu Kyítá o/fu, bubóng nké mbu kakyúng-butu ejí, ne esí nyi kiincincîm-byiká ejí. Ebóng dyizong-kyise ńkyí wo adabi a-fé mě. Kyikit ńkyí me ndakyú n-jáng nkyi nyá.

⁵⁰ *Chí me oyén nké n/chi kángkáng byěm ḿbyín dí*.

⁵¹ Ne Sityífin o-chîkpet eraa o-ca kashú o/fu, ben ba-chi i banshwane ashí. Atyém enen nyi wǎ banet ḿbé ba*fí ba-nyît ng kyi-kim ne Osówo*. Ben baa/né kyitwóm-Osówo ejwo. Ben bamu wǎ banchí enen ḿbé kpákpá. Ben to baa/né echi ńkyí Busun-Osówo bu/sét.

⁵² Mkpábé mú odasét byiraa-Osówo o/mû kô nang obónge mú banchí enen ḿbé kpákpá ba*da ǎ eju*? Mbé ba/ju banet-kyitwóm-Osówo ḿbé ké nkéré mú o/shwôm ké esim chwóó, ba/sét kyi-kim ne obê mú ḿgbán-Osówo mú o/chi ńkyí kyi/mû kanong ké bushú ḿbú Osówo. Kántîk kâng, ben baa/chi ba-kám ǎ ba-ju.

⁵³ Ben nké bamu banet ḿbé ba/koo byije-Osówo ḿbyí o/kye barím ḿbé banong ba-kye Músis o-kye běn, nké baa/né kámbyí etî.

Ba/tím Sityífin Aká ba-ju

⁵⁴ Ké nkéré banet-esuk ányi ba/jwo ńkyí Sityífin mu o-sét ng, kafâ ka-bírî kámbé ne nyǐ.

⁵⁵ Nké busa ḿbú Busun-Osówo bu/nung Sityífin ké byiko, o-bírî achi kyíbóng, o-ri busan-Osówo ḿbú ragerage, ne Jisos ké oo/bwom ké kyicê-bubwô-etyebéng-Osówo.

⁵⁶ Ne o-raa ne mbé o/fu, kan n̂ achi ba-ri. Me mu n-ri ng bubóng bâabâa ne Wǎn mú Onet ké oo/bwom ké kyicê-bubwô-etyebéng-Osówo.

⁵⁷ Banet-esuk ámbe ba-wonge kakânkakân, ba-yip abwô ebe ba-ku ké atông. Ne ba-bûu ashí amúmú ba-da-cít ǎ.

⁵⁸ Ba-níbî ǎ ba-byí ne nyǐ ké bukô-oshê ba-kpet ǎ aká etím. Banet ḿbé ba/mû ba-tím m ǎ aká éné ba-pii bankyû ebe ba-kye wǎn-kyisat obónge mú odabángê Sôl.

⁵⁹ Ké nkéré mbe ba-tím m Sityífin aká éné ba-fâ, o-raa o-kó Otu Kyítá o/fu, Jisos, Otu Kyítá, koo busun ejí.

⁶⁰ O-tím arông kyísí o-wonge kakânkakân o/fu, Otu Kyítá, pwoo kámbé ké kyibî ebe ńkyín. Nyǐ o/raa ńkyín, o-kpú.