ÂAK BǍMKPÓNGÉ ḾBÉ BANET-KYITWÓM-JISOS BA/CHI, ḾBÉ BADAKÓ ÂAK 6 - Bokyi Bible

Banet ḿbé ba/bángê ké Jisos ba/fîm Banet-Ochwâp Ashí Káchâtkányi

¹ Kyi/chîrí kaǎnyín, ké nkéré banet ḿbé ba/bángê ké Jisos ne atyém ebe mbe ba-jê ng ba-câ, bushwôn bu-ba-róng banet-Jûs ḿbé mbe ké burwám ebe, ḿbé badaman eraa Girîk ne ḿbé baa*man eraa*. Banet-Jûs ḿbé badaman eraa Girîk ba/raa ba/fu, banyǐnkú ebe ba*fí ba-koo ng akpuga nyí mbe ba-kyâ banyǐnkú kángkáng dyicí*.

² Ne banet-kyitwóm-Jisos ḿbé ashí diǐkpú ne afee ba-kó kâng kángkáng burwám-banet ḿbé ba/bángê ké Jisos ne atyém ebe kyikit kyibónge, ba-raa ne mbé ba/fu, kyi*da/nwa ńkyí byidamîng banet esét kyitwóm-Osówo* byi-bwa esim byi-kûtún kyi-kim ne akpuga nyí mbe ba-kyâ banyǐnkú*.

³ Kántîk kâng, ǎ bwǎn-bané eten, fîm m̂ banyinchéng ashí káchâtkányi ké burwám enen ḿbé bamu ba-nyît ng ba/fu, mbe ne bubong ne busa ḿbú Busun-Osówo, ne byi/chi byi-yip kámbé byi-tî ba-kûtún kyi-kim ne chwǒm ńkyín.

⁴ Be bayén kâng byi/chi byi-kúng nkéré eten kángkáng byi-kûchi bǎmkpóngé ḿbé nshwam efé ne banet esét kyi-kim ne Bǎmpém ḿbé Banong.

⁵ Kyi/nyîn kángkáng burwám-banet ámbe kyi-kim ne okabe mú banet-kyitwóm-Jisos ba/kye. Ne mbé ba-fîm kâng Sityífin mú o/mû o/tî dyityém emen chwóó ne Osówo, ne busa ḿbú Busun-Osówo bu/mû ǎ to chwóó ké byiko, ne Fyílip ne Porókoros ne Nyikáno ne Tyímon ne Pamyínus ne Nyíkólus mú o*fí onet-Jûs* mú o/fím Ántyok, mú oo/nung ké ékwâbashi nyí banet-Jûs.

⁶ Ne ba-yip banet ámbe ba-ca ne mbé ké bushú-banet-kyitwóm-Jisos ḿbé ba/fé nshwam, ba-twôom kámbé abwô ké byiko.

⁷ Banet ba-jê ng ba-câ ḿbé mbe ba-jwo ng bǎmpém-Osówo, ba-bángê e ké mbé. Burwám-banet ḿbé ba/bángê ké Jisos ba-jê ng ba-câ ké Jerúsélem. Bujê-banchi kyifen-Osówo chwóó ba-bángê ké Bǎmpém ḿbé Banong.

Banet-Ashí-Banet-Jûs ba/kám Sityífin

⁸ Sityífin mú Osówo o/mû o/jware ǎ kanong kanong ne o/mû ne busa ḿbú biǐtí-akat echi o/chi biimbâng-biǐtí-akat ne byěm ḿbyí byidakaa banet byiko ké byiko-banet.

⁹ Nké banyinchéng bakíri ba/mû ba-kán n ǎ ké dyishí. Banet ámbe ba/mû banet-ncibi-kyise-ékwâbashi ńkyí banet-Jûs ḿbé ba/mû básóng kpákpá wǎ eringe nyí ba/mû ba-kó ng kánkyí. Kyise-ékwâbashi ánkyi kyi/mû ne banet-Jûs ḿbé ba/fím Saryínyi ne Alyikyizándara. Mbé ne banet-Jûs bakíri ḿbé ba/fím Silyísha ne Ésha ba-kpet okân ké dyishí ekán ne Sityífin.

¹⁰ Nké Busun-Osówo bu/kye Sityífin byinyídíng ḿbyí ké nkéré o/raa, mbé ba*da ǎ eman ekpógê*.

¹¹ Ne banet-Jûs ámbe kâng ba-kye kyicê-banet ngu ba/fu, basét ba/fu, mbé ba/jwo Sityífin ké mu o-raa ng byibî-byiraa o-bât ng Músis ne Osówo.

¹² Ké bukwóp ḿbún kâng, banet-Jûs ámbe ba/chi banet-oshê ne bakínkán-banet-Jûs ne bantánge Byije-Músis ba-kpet esa kafâ ne Sityífin, ne ḿbé banet-ashí ámbe ba-dim ba-kâm Sityífin, ba-kám ǎ ké busa, ba-dim ne nyǐ ké esuk nyí eryên nyí banet-Jûs.

¹³ Ne ba-bâ kâng ne banet ba-ba-sét kyisédéng ba-bât Sityífin ba/fu, kángkáng nkéré onyinchéng mún mu o-sét ng byibî-byiraa kyi-kim ne kiǐtí-kyise-kyifen-Osówo echi ńkyí byi/bi byi-kye Osówo, ne kyi-kim ne Byije-Músis.

¹⁴ Be byi/jwo ǎ ké mu o-raa ng o/fu, Jisos mún mú o/fím Názáret o/chi o-bú kiǐtí-kyise-kyifen-Osówo echi, o-yángê kángkáng édúú nyí Músis o/tángê bě.

¹⁵ Kángkáng banet-esuk ḿbé ba/mû ányi ba-bi Sityífin achi ké bushú, ba-ri ba/fu, bushú emen mbu wǎ ḿbú orím mú onong.