ÂAK BǍMKPÓNGÉ ḾBÉ BANET-KYITWÓM-JISOS BA/CHI, ḾBÉ BADAKÓ ÂAK 5 - Bokyi Bible

Kiǐshwô ńkyí Ananyâs ne Safára

¹ Nké onyinchéng obónge o/mû to ké burwám ebe mú o/mû o-bángê e Ananyâs. Onyi emen o/mû o-bángê e Safára. Ananyâs o/shee kyifát ebe ńkyí ba/mû ne nkyí.

² Nké o/fîm kyicê-akpuga o-tî ké esim, ńkyí onyi emen to o/mû mu o-nyît ng, o-yip kyicê o-da-kye banet-kyitwóm-Jisos.

³ Pyíta o-raa ne Ananyâs o/fu, Ananyâs, ebóng a/mîng Sátan o-nung ǒ ké dyityém, o-chi ǒ a-sét kyisédéng a-bât Busun-Osówo ké kyicê-akpuga ńkyí a/shee kyifát, ńkyí a/yip a-tî ké esim.

⁴ Ne wo a-kûshee kyifát ánkyi, kyifát ánkyi kyi/mû kyi/já ǒ. Nang ké nkéré a/shee kánkyí, akpuga ányi a/já ǒ. Ebóng kâng ńkyí wo a/kabe ké dyityém eyên a/fu, wo a-chi i dyizong-chwǒm ándyi. Wo a*da/sét kyisédéng ńkyín a-bât banet* nké a/sét a-bât Osówo.

⁵ Ananyâs o-jwo ng byiraa ḿbyín o-bâ, o-myii kyísí o-kpú. Bushî bu-róng kángkáng banet ḿbé ba/jwo kánkyí.

⁶ Bwǎsíng-byisat ḿbé ba/mû ányi ba-bûu nensang, ba-bwá kyikwóm-enyam-byiko emen, ba-kúng kánkyí ba-da-ryii.

⁷ Ké nkéré mú kii/bwon chwǒm wǎ égbáng echât, onyi emen o-ba-nung ké kyikit ńkyí Pyíta o/mû. Nké o*da/nyît kyi-kim ne ńkyí kii/chi otyép emen*.

⁸ Pyíta o-bí ǎ o/fu, sét mě, nyín akpuga amúmú nyí wo ne otyép eyên ba/koo ké kyifát enen ńkyí ba/shee? Mú onyinyi ámu o-faa o/fu, âa, akpuga amúmú nyi éné.

⁹ Pyíta o-raa kâng ne nyǐ o/fu, ebóng wo ne otyép eyên ba/cibi ba/fu, ben ba-kan Busun ḿbú Otu Kyítá. Banet ḿbé ba/ryii otyép eyên baa/ribi kántîk nyín ké ocím-dyifyi. Ba/chi ba-yip ǒ to ba-byí ne wo.

¹⁰ Ké abe ányi, Safára o-myii kyísí ké byiká-Pyíta o-kpú. Ḿbé bwǎsíng-byisat ámbe ba/banung ba-ri ba/fu, mú onyinyi ámu oo/kpú. Ne ba-yip ǎ kâng ba-da-ryii ǎ fáráng ne otyép emen.

¹¹ Kángkáng banet ḿbé ba/bángê ké Jisos ne kángkáng banet bakíri ḿbé ba/jwo ńkyín, kiǐtí-bushî kyi-róng kámbé.

Biǐtí-Akat ne Byěm ḿbyí byidakaa Banet Byiko

¹² Banet-kyitwóm-Jisos ba/chi biǐtí-akat ne byěm ḿbyí byidakaa banet byiko chwóó ké enyam-byiko-banet. Kángkáng banet ḿbé ba/bángê ké Jisos ne atyém ebe ba/mû mbe ba-kâm m barî ké dyizu wǎ banet ḿbé ba/fím ne barî ké ákpamê nyí Otu Sólómon, nyí ké kiǐtí-kyise-kyifen-Osówo echi.

¹³ Onet mú o*fí ké burwám ebe* o*da/cíp dyityém o-nung ké burwám ebe* nang ké banet ba/mû ba-kpee ng burwám ebe*.

¹⁴ Nké bujê-banyinchéng ne banyinyi chwóó ḿbé ba/bángê ne Otu Kyítá ba/mû mbe ba-nung ng kámbé ké burwám.

¹⁵ Ké bubwô-biǐtí-akat ḿbyí banet-kyitwóm-Jisos ba/mû mbe ba-chi i, banet ba/mû ba-tû ng banet-byirwóm ba-bâ ng eren kámbé ké buríng ne ké byipe, ké otyém-étíbingé, eringe nyí â Pyíta o-kú o-shwôm m, nang kiǐríribí emen nké nke kyi/chi kyi-ta kyicê-banet.

¹⁶ Bujê-banet chwóó ḿbé ba/fím eshê nyí e/fárâng ne Jerúsélem ba-tû ng banet ebe ḿbé mbe ba-rwôm m ne ḿbé ba/mû ne byibî-bací ké byiko ba-bâ ne mbé, ne ba-chi kámbé to ashí amúmú ba-nyange.

Banet-Ashí-Banet-Jûs ba/kye Banet-Kyitwóm-Jisos Busông

¹⁷ Otu-nchi kyifen-Osówo kâng ne banet emen ḿbé ba/fím Jerúsélem, ḿbé ba/mû ké ncibi mú Sádusyî ba-kpet esa kafâ, ké ebóng, banet-kyitwóm-Jisos ba/mû ba-nyîn n kángkáng banet dyityém. Ne ba-cibi kâng ba/fu, mbé ba-chi i kámbé ba-ri busông.

¹⁸ Ba-kám banet-kyitwóm-Jisos ámbe ba-fé ké kyise-mgbokobá ńkyí banchi byibî.

¹⁹ Nké ké buchú ámbu, orím mú onong mú Otu Kyítá o/bâa afyi-kyibám-bamgbokobá o-fîm banet-kyitwóm-Jisos ba-byí, ne o-raa ne mbé o/fu,

²⁰ ca n̂g ba-da-bwom ké kafâ-kiǐtí-kyise-kyifen-Osówo echi, ba-sét banet kyi-kim ne kángkáng dyikpen ńdyín ńdyí dyifyîfî.

²¹ Banet-kyitwóm-Jisos ámbe ba-chi ńkyí orím mú onong o/sét kámbé, ne ké nkéré mú dyicófóróng dii/cé, ba-da-nung ké kafâ-kiǐtí-kyise-kyifen-Osówo echi ba-kpet etángê. Otu-nchi kyifen-Osówo ne banet emen ba-kó bakínkán-banet-Jûs kyikit kyibónge, ba-kyú ké ncibi mú esuk ebe nyí eryên. Ne ba-twóm kâng ejá e-ca ké kyibám-mgbokobá ba/fu, babâ ne banet-kyitwóm-Jisos ámbe ké bushú ebe.

²² Nké ké nkéré basúja ámbe ba/ribi ké kyibám-mgbokobá, ba*da/ri banet-kyitwóm-Jisos ké kafâ*. Ne ba-bwa esim kâng ké ócâm-esuk, ba-ba-sét ba/fu,

²³ ké nkéré be byi/ribi áku ké kyibám-mgbokobá, be byi/ri ké ba/fín afyi kanong kanong, ne kángkáng banet ḿbé mbe ba-bám m kánkyí ba/bwom ké afyi amúmú kerededet. Nké ké nkéré mú byi/kuu afyi ányi, byi*da/ri onet nang obónge ké kafâ*.

²⁴ Ké nkéré mú onet-dyishí-banet ḿbé mbe ba-bám m kiǐtí-kyise-kyifen-Osówo echi ne batu-banchi kyifen-Osówo ba/jwo ńkyín, kyi-firi kámbé yógeyóge ké dyityém eringe nyí chwǒm ńkyín kyi/byí.

²⁵ Ne onyinchéng obónge o-ba-nung kâng o-sét kámbé o/fu, banet ḿbé ben ba/kám ba-fé ké mgbokobá, mbe áku ké kafâ-kiǐtí-kyise-kyifen-Osówo echi ba-tángê e banet nang kántîk.

²⁶ Ne onet-dyishí mú banet ḿbé mbe ba-bám m kiǐtí-kyise-kyifen-Osówo echi ánkyi o-dim ne banet emen, o-da-kpî banet-kyitwóm-Jisos ba-bwa esim. Ba*da/kám kámbé ké busa* ké ebóng, ba/mû mbe ba-shî ng ba/fu, banet ba-tím m kámbé aká.

²⁷ Ba-bâ ne banet-kyitwóm-Jisos ámbe ké kafâ-esuk, ba-chi kámbé ba-bwom ké bushú ḿbú banet-esuk. Ne otu-nchi kyifen-Osówo o-raa ne mbé o/fu,

²⁸ be byi/kuri běn ekó, byi-nyibi běn atông byi/fu, *da n̂g echîtángê banet ké dyizîn ńdyí onyinchéng mún*. Nké tún n̂ kâng achi ba-ri ńkyí ben baa/chi. Ben baa/káng byěm enen ḿbyí bamu ba-tángê e ké Jerúsélem omúmú, ne bamu ba-ryuu ng ba/fu, banet bakûraa ba/fu, be nké byi/cen ne bukyû emen.

²⁹ Pyíta ne banet-kyitwóm-Jisos ḿbé áku ba-faa kámbé ba/fu, be byi-man byi-chi ńkyí Osówo o/sét bě, *chí ńkyí banet bada bě esét*.

³⁰ Osówo mú banchí eten o/jwóbê Jisos ké bukyû, ké nkéré ben baa/ju ǎ, ńdyí ba/mán ǎ ké kyikwap ńkyí badashwân onet.

³¹ Osówo o/jwóbê ǎ, o-jâ ne nyǐ ké kyicê-bubwô-etyebéng emen wǎ Onet-Dyishí ne Onet-Onyii, eringe nyí odakye banet-Ézerel bukwóp ḿbú byiko byidakpú kámbé ba-mîng byibî ebe, Osówo o-pwoo kámbé ké mbyí.

³² Be nké byimu byi-sét ng ńkyí Osówo oo/chi. Be ne Busun-Osówo ḿbú mbu eyáré nyí Osówo mu o-kyâ banet ḿbé mbe ba-chi i ńkyí nyǐ o/sét.

³³ Ké nkéré mú banet-esuk nyí eryên ányi nyí banet-Jûs ba/jwo byiraa ḿbyín, kafâ ka-bírî kámbé kanong kanong, ne ba-cibi ba/fu, mbé ba-ju ng banet-kyitwóm-Jisos ámbe.

³⁴ Nké onet obónge ké burwám ebe mú o/mû onet-ncibi mú Fárasyî, mú o/mû o-bángê e Gamályel, mú o/mû ntánge Byije-Músis, mú kángkáng banet ba/mû ba-kyâ ǎ ofê, o-bûu nensang ké ócâm-esuk ányi. O-kye busa o/fu, bakúng banet-kyitwóm-Jisos ámbe ba-byí kpá ne mbé kyíjí.

³⁵ Ne o-raa ne banet-esuk ámbe o/fu, banet-Ézerel, bám m̂ byiko enen ké ńkyí bamu ba-bâ echi ne banyinchéng ḿbén.

³⁶ Ké ebóng, ké nkéré obónge mú o/shwôm ké esim, onyinchéng obónge mú odabángê Túdas o/byí, o-kúng byiko emen o/fu, nyǐ o-chi i kiǐtí-onet. Égot-banet nang efee o, ba-kûcen ne nyǐ ké kyikû. Nké ba/ju ǎ, ne kángkáng banet ḿbé ba/mû ba-cen n ne nyǐ ké kyikû ba-pwôo byiryibyiryi. Ńkyí nyǐ o/mû o/kpet ne nkyí kyi-tánê.

³⁷ Ké nkéré mú ńkyín kii/shwôm, Júdas mú o/fím Gályílyi o-byí ké nkéré mú mbe ba-pan n banet. Nyǐ to o/tut bujê-banet chwóó ḿbé ba/mû ba-cen n ne nyǐ ké kyikû. Nké nyǐ to ba/ju ǎ, ne banet ḿbé ba/mû ba-cen n ne nyǐ ké kyikû ba-pwôo to byiryibyiryi.

³⁸ Me mu n-sét ng běn kántîk kyi-kim ne kyiraa ńkyín n/fu, *da n̂g echi ba-kúng bukwóp ḿbú badachi kámbé kyibî*. Mîng n̂g kámbé, ké ebóng, â okabe ne bǎmkpóngé ebe ḿbén mbyi chwǒm ńkyí kyi/fím ne onet, kii*byí dyishí*.

³⁹ Nké â kyi/fím ne Osówo, ben baa*ba/chi ba-man ekpógê kámbé*. Ba-man n eri ké nkuli kyikû ba/fu, ben bamu ba-nwa ng ne Osówo. Banet-esuk ámbe ba-koo bacê ḿbé Gamályel o/kye kámbé.

⁴⁰ Ba-kó banet-kyitwóm-Jisos ámbe ba-bâ ké kafâ-esuk, ba-mín kámbé, ba-kye kámbé kyije ba/fu, ne banyá ne banyá, ba*dachîpem banet ké dyizîn ńdyí Jisos*. Ne ba-zú kámbé kâng abwô.

⁴¹ Banet-kyitwóm-Jisos ámbe ba-byí ké ócâm-esuk ne bunyîn-dyityém chwóó, ba/fu, Osówo o/kúng kámbé wǎ banet ḿbé ba/kwárê ḿbé badakoo edángé ké dyishí ńdyí Jisos.

⁴² Ne kángkáng dyicí ké kafâ-kiǐtí-kyise-kyifen-Osówo echi ne ké byise-banet, banet-kyitwóm-Jisos ba*da/mîng banet etángê* ba-sét ng kámbé Bǎmpém ḿbé Banong kyi-kim ne Jisos mú Osówo o/kúng ǎ butu*.