ÂAK BǍMKPÓNGÉ ḾBÉ BANET-KYITWÓM-JISOS BA/CHI, ḾBÉ BADAKÓ ÂAK 4 - Bokyi Bible

Pyíta ne Jǒn ba/bwom ké Bushú-Esuk nyí Eryên nyí Banet-Jûs

¹ Pyíta ne Jǒn ba/mû ba/tôong ba-pem m ba-sét ng banet ḿbé ba/mû ányi, ké nkéré mú banchi kyifen-Osówo ne onet-dyishí mú banet ḿbé mbe ba-bám m kiǐtí-kyise-kyifen-Osówo echi ne banet-ncibi mú badakó Sádusyî ba/bê ba-kâm kámbé.

² Kafâ ka/mû nke ka-sa ng kámbé, ké ebóng, banet-kyitwóm-Jisos ámbe ashí afee ba/mû mbe ba-tángê e banet ámbe ba/fu, Jisos oo/jwóbê ké bukyû, ńkyí kyi/tông kyi/fu, banet ḿbé baa/kpú ba/chi ba-jwóbê ba-bwa ké dyikpen.

³ Ne ba-kám kámbé kâng ba-fé ké mgbokobá tete orî-dyicí, ké ebóng, dyikurúku dyi/mû dii/wá dyi-fyi.

⁴ Nké bujê-banet chwóó ḿbé ba/jwo bǎmpém ámbe ba/bángê ké mbé ne atyém ebe. Ne kángkáng banet ḿbé ba/bángê ké Jisos ne atyém ebe ba-jê, ba-byí i ocím wǎ égot-banet bujam ne etánge.

⁵ Ké orî-dyicí, banet-ashí-banet-Jûs ne bakínkán-banet ne bantánge Byije-Músis ba/bacibi kyikit kyibónge ké Jerúsélem.

⁶ Ba-kâm otu-nchi kyifen-Osówo mú odabángê Ánas ne Káfas ne Jǒn ne Alyikyizánda ne banet bakíri ḿbé ba/fím ké kyikû-banet ńkyí otu-nchi kyifen-Osówo ámu.

⁷ Ba-bâ ne banet-kyitwóm-Jisos ámbe ba-ba-bwom ké bushú ebe, ba-bí kámbé ba/fu, ben ba/cen nǎ ne ba-chi ńkyín. Ebóng busa ḿbú ben bamu ne mbú. Â *chí ké busa ḿbú enen* dyizîn ńdyí yeě ben ba/kúng ké nkéré ba/chi onyinchéng ámu o-nyange.

⁸ Busa ḿbú Busun-Osówo bu-sú Pyíta ké byiko, ne o-faa kámbé o/fu, banet-ashí-oshê ne ḿbé bakínkán,

⁹ â ben bamu ba-bí ng bě bǎmbím kurún kyi-kim ne kanong ńké byi/chi byi-kye nkwa-onet mún ne eringe nyí nyǐ o/cen ne o-firi kanong,

¹⁰ ben ashí kángkáng ne kángkáng banet-Ézerel ba-man ba-nyît ba/fu, onyinchéng mún mú o/bwom ké bushú enen něen, mú oo/nyange kanong kanong, o/nyange ké busa ḿbú dyizîn ńdyí Jisos Karâs mú o/fím Názáret. Mú ben ba/mán ǎ ké kyikwap ńkyí badashwân onet, mú Osówo o/jwóbê ǎ ké bukyû.

¹¹ Jisos nké mu onet mú ejá-Osówo nyí ba/sáng kyísí e/sét kyi-kim ne nyǐ e/fu, ochíchí-buká ḿbú ben bambi kyise ba/né ba/fu, boo*nwa* bu/bwa bu/firi kiǐtí bu-shwôm aká nyí áku kángkáng.

¹² Banet enyii ba-fím m ké bubwô-Jisos kǎnchí. Ké ebóng, onet okíri o*fí to ké ejíí* mú Osówo oo/yip dyizîn emen o-kye banet* mú be byi/chi byi-cen ké bubwô emen ne Osówo o-nyii bě*.

¹³ Banet-esuk ḿbé ba/mû ké esuk nyí eryên nyí banet-Jûs ányi ba/waa ocím ké dyishí fúú ńdyí mbé ba/ri Pyíta ne Jǒn ḿbé ba*da/byí banet* nang nwet to ba*da/nyît* ké mbe ba-raa ng ne mbé nang achi ebe ba*fí ba-shî ng*. Ne ba-nyît kâng ba/fu, ḿbé mbé ba/mû ba-cen n ne Jisos ké kyikû.

¹⁴ Nké chwǒm kyi/mû kyi*fí kámbé ńkyí badasét* ké ebóng, mbé ba/ri mú onyinchéng ámu mú ba/chi ǎ o-nyange ké o/bwom ányi ne be Pyíta.

¹⁵ Ne ba-sét be Pyíta ba/fu, babyí kpá ké ócâm-esuk, ne mbé ba-kpet etóbê ne barî.

¹⁶ Ba-bí barî ba/fu, byi-chi i banyinchéng ḿbén ebóng. Nang yeě nang yeě mú mu o-kyú u ké Jerúsélem mu o-nyît ng o/fu, mbé baa/chi kiǐtí-akat ńkyín ńkyí onet oo*man echi* ne be bii*man ené kánkyí*.

¹⁷ Nké â byi/fu, banet ba*dachîjwo chwǒm ńkyín ba-câ kashú* byikuri n̂g banyinchéng ḿbén ekó byi/fu, ba*dachi ba-chîpem onet nang obónge ké dyizîn ńdyí Jisos*.

¹⁸ Ne ba-kó Pyíta ne Jǒn ba-ba-nung ké kafâ-esuk, ne ba-sét kámbé ba/fu, chwǒm kyi*fí to nang kyibónge* ńkyí kyi/chi kyi-chîchi kámbé ne ba-chîpem bǎmpém* ba-tángê* ké dyizîn ńdyí Jisos*.

¹⁹ Nké Pyíta ne Jǒn ba/faa kámbé ba/fu, ben bayén ba/chi ba-pan mpan ké dyityém enen ba-nyît ńkyí nkyi kanong ké bushú ḿbú Osówo. Nang nkyi ńkyí be byidachi ńkyí ben ba/sét o, nang ńkyí byidachi ńkyí Osówo o/sét o.

²⁰ Ké ebóng, be bii*ba/chi byi-mîng esét ńkyí be bayén bii/ri ké achi byi-jwo to ké atông*.

²¹ Banet-esuk ámbe ba-chîkuri kámbé ekó bánbán e-shwôm nyí kashú, ne ba-zú kámbé abwô. Ba*da/ri dyishí-chwǒm ńdyí badakye kámbé busông* ké ebóng, kángkáng banet ba/mû mbe ba-kyâ Osówo akpee ké chwǒm ńkyí kyi/chi.

²² Mú onyinchéng mú ba/chi ǎ kiǐtí-akat ńkyín ńkyí o/nyange, o/mû oo/shwôm bajam-aje bafee.

Banet ḿbé ba/bángê ké Jisos ba/fé Nshwam

²³ Ba-zú ng kámbé abwô ba-bâ, Pyíta ne Jǒn ba-bwa esim ba-kâm burwám-banet ebe ḿbú áku, ne ba-sét kámbé ńkyí batu-banchi kyifen-Osówo ne ḿbé bakínkán-banet-Jûs ba/sét kámbé.

²⁴ Ké nkéré ḿbé áku ba/jwo kánkyí, mbé ashí amúmú ba/kyú kyikit kyibónge ba-fé nshwam ba-kye Osówo ba/fu, Otu Kyítá mú o/chi bubóng ne esí ne buce ne kángkáng byěm ḿbyí mbyi ké mbyí.

²⁵ Ké bubwô ḿbú Busun-Osówo, wo a/raa ké ocím mú Otu Dívit mú bonchí eten mú kpákpá, mú ḿgbán eyên ké nkéré nyǐ o/raa o/fu, ebóng banet ḿbé ba*fí banet-Jûs* ba/jang etông byiko. Ebóng mbé ba/pem byibî-byěm kyi-kim ne Otu Kyítá ḿbyí byi/waa kámbé kyísí.

²⁶ Batu ḿbé ké ejíí ba/kpá byiko, ne banet-ashí-eshê ba-cibi kyikit kyibónge, ba-bwom bunwa ne Otu Kyítá ne onet emen mú nyǐ o/kúng ǎ butu.

²⁷ Ké ebóng, ké ntûntû, Otu Hérot ne Póntyos-Pálet ba/cibi kyikit kyibónge ké oshê mún ne banet ḿbé ba*fí banet-Jûs* ne banet-Ézerel, ba-bwom bunwa ne Jisos mú ḿgbán eyên, mú mu kanong ké bushú eyên, mú wo a/kúng ǎ butu.

²⁸ Mbé ba/cibi kyikit kyibónge ba-chi kángkáng byěm ḿbyí wo ké busa ne okabe mú eyên a/mû aa/bwóp kpá kashú a-bángê a/fu, byi/chi byi-chi.

²⁹ Kántîk kâng, ǎ Otu Kyítá, kabe kyi-kim ne bushî ḿbú mbe ba-fâ bě, a-kye bě be bǎmgbán eyên busa ḿbú byidasét kyitwóm eyên ne dyityém ńdyí bii*ba/chi byi-shî achi-onet nang obónge*.

³⁰ Tan bubwô eyên a-chi banet ba-nyange, ne a-kye bě busa ḿbú byidayip dyizîn ńdyí Jisos mú ḿgbán eyên, mú mu kanong ké bushú eyên byi-chi biǐtí-akat ne byěm ḿbyí byidakaa banet byiko.

³¹ Ké nkéré mú ba/man nshwam efé, kyikit ńkyí mbé ba/mû ba/kyú kyi-náng. Busa ḿbú Busun-Osówo bu-nung kámbé ashí kángkáng ké byiko, ne ba-kpet esét banet kyitwóm-Osówo ba*da/shî achi-onet*.

Banet ḿbé ba/bángê ké Jisos ba/kyii Kángkáng Byěm Ebe ne Barî

³² Burwám-banet ḿbé ba/bángê ké Jisos ne atyém ebe ba/mû ne okabe obónge ne dyityém dyibónge ne barî. Onet o*fí nang obónge mú o/fu, nang ebóng chwǒm ńkyí nyǐ mu ne nkyí kyi/já ǎ nyǐ kǎnchí*. Nké mbé ba/kyii barî nang ebóng chwǒm ńkyí ba/mû ne nkyí.

³³ Banet-kyitwóm-Jisos ba/bwom ne kángkáng busa ba-sét banet ba/fu, Jisos, Otu Kyítá oo/jwóbê ké bukyû, ne Osówo o-tông to o/fu, nyǐ mu ne mbé ké kyikû.

³⁴ Onet o/mû o*fí nang obónge ké burwám ebe* mú chwǒm kyi/kaa ǎ*. Banet ḿbé ba/mû ne byifát nang byise ba/shee kámbyí, ba-yip akpuga nyí ba/shee kámbyí

³⁵ ba-kye banet-kyitwóm-Jisos, ne ba-yip akpuga ányi ba-kyii, nang yeě nang yeě o-koo eringe nyí mu o-ryuu ng.

³⁶ Kyi/mû ké nkéré mún nké Josêf mú ba/fwon ǎ ké Sápurus, mú o/mû ḿgbán-nchi kyifen-Osówo, mú banet-kyitwóm-Jisos ba/mû ba-kó ng ǎ Bánábas, ányi kyi/byí, onet mú mu o-fâ banet busa,

³⁷ o/shee kyifát ńkyí o/mû ne nkyí, o-yip akpuga ányi o-ba-kye banet-kyitwóm-Jisos.