ÂAK BǍMKPÓNGÉ ḾBÉ BANET-KYITWÓM-JISOS BA/CHI, ḾBÉ BADAKÓ ÂAK 23 - Bokyi Bible

¹ Pôl o/bwom o-bírî banet-esuk bushú dángdáng ne o-raa o/fu, bwǎn-bané ejí, dyityém ejí ndyi mě wááng kanong kanong tete dyicí ńdyí kurún kyi-kim ne kángkáng dyikpen ejí ké bushú ḿbú Osówo.

² Otu-nchi kyifen-Osówo mú odabángê Ananyâs o-kye banet ḿbé ba/bwom fáráng ne Pôl busa o/fu, badíp Pôl ké ocím.

³ Pôl o-raa ne otu-nchi kyifen-Osówo ámu o/fu, Osówo o-man o-díp ǒ. Wo a-chi i ekpe-kyise nyí baa/sabe kányí mpén. Wo a/kyú me ányi a/fu, wo a-pan n mě mpan ké bukwóp ḿbú Byije-Músis, nké wo aa/bwa a-waa ányi a-róng kyije ńkyí a/kye busa a/fu, badíp mě.

⁴ Banet ḿbé ba/bwom fáráng ne Pôl ba-raa ne Pôl ba/fu, amu a-kyâ otu-nchi kyifen mú Osówo edángé.

⁵ Pôl o-faa o/fu, me n*da/nyît* ǎ bwǎn-bané ejí n/fu, nyǐ o-chi i otu-nchi kyifen-Osówo*. Ké ebóng, ejá-Osówo nyí ba/sáng kyísí e/sét e/fu, wo aa*man a-raa kyibî ne onet-dyishí mú mu o-tún n oshê eyên*.

⁶ Ké nkéré mú Pôl o/ri o/fu, kyicê-banet-esuk ba/mû banet-ncibi mú Sádusyî, kyicê ké mú Fárasyî, o-raa kâng ne ejá kyíbóng kyíbóng o/fu, bwǎn-bané ejí, me n-chi i onet-Fárasyî, wǎn mú onet-Fárasyî. Me m/babwom nyín, mbe ba-pan n mě mpan, ké ebóng, me mu n-tî ng achi ké ntûntû n/fu, Osówo o/chi o-jwóbê banet ḿbé baa/kpú ba-bwa ké dyikpen.

⁷ Pôl o-raa ng ńkyín o-bâ, banet-Fárasyî ne ḿbé Sádusyî ba-kpet eshwôn ne barî, ne burwám-banet-esuk ḿbé ba/mû ányi ba-waa ányi ba-kyii ké byikim ké byikim, ḿbyí byi*fí byi-bángê e ne barî*.

⁸ Ké ebóng, banet-Sádusyî mbe ba-sét ng ba/fu, Osówo oo*ba/chi o-jwóbê banet ḿbé baa/kpú ba-bwa ké dyikpen*. Ba-sét ng to ba/fu, barím ne bakúsí ba*fí*. Nké banet-Fárasyî ba/bángê ké byěm ḿbyín byichât kángkáng.

⁹ Kyicoge ńkyí mbe ba-chi i kyi-kpet ejê kyi-câ kashú, ne kyicê-bantánge Byije-Músis ḿbé ba/mû ké ncibi mú banet-Fárasyî ba-bûu nensang ba-raa kyi-sa kámbé ba/fu, be byi*da/ri ne kyibî-chwǒm ńkyí onyinchéng mún o/chi*. Katô okúsí, katô orím mú onong o/pem ké ntûntû ne nyǐ.

¹⁰ Bushwôn bu-firi ḿbú bu/mû bu-kú bu-bâ ebírî bunwa, ḿbú bu/chi onet-dyishí-basúja mú kánkán o-kpet eshî o/fu, banet ámbe ba/chi ba-jâa Pôl ké byirî ké byirî. Ne o-kye basúja emen busa kâng o/fu, bada-kúng Pôl ké burwám-banet ámbe ba-da-fé ǎ ké kyise ńkyí onet oo*man enung*.

¹¹ Ké buchú ḿbú dyicí ándyi, Otu Kyítá o/byí o-kâm Pôl, ne o-raa ne nyǐ o/fu, bwom kíngkíng. Wo aa/sét ńkyí nkyi ntûntû kyi-kim ne me nyín ké Jerúsélem, ne a-man a-chi eringe ebónge to ké Rûm.

Banet-Jûs ba/nam ba/fu, Mbé ba-ju ng Pôl

¹² Ké orî-dyicí, ké dyicófóróng, banet-Jûs ba/kyú kyikit kyibónge ba-tóbê ne barî. Ba-ryí ocím ba-sem Osówo ba/fu, mbé baa*ryí byiryíng* ba-jwáp nang chwǒm* tete mbé ba-ju Pôl.

¹³ Banet ḿbé ba/mû ba/kyú kyikit kyibónge ba-ryí ocím mún ba/mû ba/shwôm bajam bafee.

¹⁴ Ne ba-dim kâng ba-kâm batu-banchi kyifen-Osówo ne ḿbé bakínkán-banet-Jûs ba-sét kámbé ba/fu, be bii/ryí ocím mú shwaneshwane ne barî byi/fu, bii*ryí nang chwǒm* tete byi-ju Pôl.

¹⁵ Kántîk kâng, ben ne banet-esuk nyí eryên, twóm m̂ ejá e-kâm onet-dyishí-basúja mú kánkán, ba-nîm ǎ ba/fu, obâ ne Pôl ké bushú enen, eringe nyí ben badakyé kyikû ba-nyît kanong kanong ńkyí mú mǔ o/chi. Nké be byi-kpá ng byiko, byi-bwom ké bukwóp, byi-ju ǎ ne o-ribi nyín.

¹⁶ Nké wǎn-onyinchéng mú wǎn-boné-Pôl mú onyinyi o/jwo kyi-kim ne ńkyí ba/cibi něen ba/fu, ba-ju ng Pôl, ne o-dim kâng o-da-nung ké kyise ńkyí ba/fé Pôl, o-sét Pôl kánkyí.

¹⁷ Pôl o-kó kâng onet-dyishí-basúja obónge ne o-sét ǎ o/fu, kúng wǎn-kyisat mún a-ca ne nyǐ ké kyikit-onet-dyishí mú kánkán. Mu ne chwǒm ńkyí o/chi o-sét ǎ.

¹⁸ Onet-dyishí-basúja ámu o-ca ne nyǐ ké kyikit ńkyí onet-dyishí mú kánkán, o-sét ǎ o/fu, onet-mgbokobá mú odabángê Pôl o/kó mě ne o-sét mě o/fu, me nkúng mú wǎn-kyisat mún m-bâ ne nyǐ kyikit eyên, ké ebóng, mu ne chwǒm ńkyí o/chi o-sét ǒ.

¹⁹ Onet-dyishí-basúja mú kánkán ámu o-níbî mú wǎn-kyisat ámu ké bubwô, o-kpî ǎ ba-jâ ké kafâ mbé ashí afee o-bí ǎ o/fu, wo amu ne ebóng ńkyí a/fu, a-sét ng mě.

²⁰ Mú wǎsíng ámu o-sét ǎ o/fu, banet-ashí-banet-Jûs baa/cibi ba/fu, mbé ba-nîm ǒ nencí, wo a-kúng Pôl a-ca ne nyǐ ké esuk nyí eryên, eringe mbé badakyé kyikû ba-nyît kanong kanong ńkyí mú mǔ o/chi.

²¹ Nké *dachi a-bángê ne mbé* ké ebóng, banet ba-shwôm m bajam bafee ḿbé ba/chi ba-rem ké bukwóp ba-kû ǎ ebám. Banet ámbe baa/ryí ocím ba-sem Osówo ba/fu, mbé baa*ryí byiryíng* ba-jwáp nang chwǒm* tete mbé ba-ju ǎ. Baa/kpá byiko kántîk ḿbyí ba/chi ba-chi kánkyí, ne mbe ba-bám m ba-jwo ńkyí wo a/chi a-sét.

²² Onet-dyishí-basúja ámu o-sét mú wǎn-kyisat ámu o/fu, *dachi a-sét onet nang obónge a/fu, wo aa/ba mě esét chwǒm ńkyín*. Ne o-sét wǎn ámu o/fu, oca dyijê.

Onet-Dyishí-Basúja o/twóm Pôl o-ca Kyikit-Félik

²³ Onet-dyishí-basúja mú kánkán ámu o-kó banet-ashí-basúja emen ashí afee ne o-sét kámbé o/fu, fîm m̂ égot-basúja ebónge ḿbé ba/chi ba-ca Sizaryâ, cibicibi ne bajam-basúja bachât esim diǐkpú ḿbé badaman eyú bubyî-orá, ne égot-basúja ebónge ḿbé badaman enwa byití ne byíbye. Ba-kpá byiko ḿbyí badadim ké égbáng kátángekányi, ké buchú ḿbú kurún.

²⁴ Tî n̂g kyicê-bubyî-orá ḿbú Pôl odayú ké mbú, ba-kúng ǎ kanong kanong ba-da-kye otu-dyishí mú odabángê Félik.

²⁵ Ne onet-dyishí-basúja mú kánkán ámu o-sáng kâng léta mú o/sáng byiraa ḿbyín o/fu,

²⁶ Me Kaládyus Lyisáyas nké mu n-sáng ng n-kye onet-dyishí mú o/kwárê mú bada ǎ ekye ofê, mú odabángê Félik. Me n/ta ǒ kyiraa.

²⁷ Banet-Jûs ba/kám onyinchéng mún ne ba/mû ba-kú ba-bâ ǎ eju. Me n/jwo ba/fu, nyǐ o-chi i onet-Rûm, ne n-dim kâng ne basúja ejí n-da-nyii ǎ.

²⁸ Me m/mû mu n-ryuu ng n/fu, n-jwo ng ńkyí mbe ba-sét ng ba-bât ng ǎ, ne n-kúng ǎ kâng n-ca ne nyǐ ké esuk ebe nyí eryên.

²⁹ Me n/kyé kyikû n-nyît n/fu, o*da/chi kaǎchwóm nang kabónge* ńké bada ǎ eju* nang ńké bada ǎ efé ké mgbokobá*. Byiraa ḿbyí mbe ba-sét ng ba-bât ng ǎ byi/kim ne byije ḿbyí ebe mbé bayén.

³⁰ Ne ké nkéré ba/sét mě ba/fu, kyicê-banet-Jûs mbe ba-cibi ng ba/fu, mbé ba-ju ng ǎ, n/kabe ké dyityém ejí n/fu, n-twóm m ǎ kyikit eyên. Me n/sét banet ḿbé mbe ba-sét ng byiraa ba-bât ng ǎ n/fu, babâ ké bushú eyên ba-ba-sét kyibî ńkyí ba/fu, o/chi.

³¹ Basúja ámbe ba-chi ńkyí ba/kye kámbé busa ba/fu, bachi. Ba-kúng Pôl ké buchú ámbu ba-cen ne nyǐ tete ba-ribi Ántyipátyis.

³² Ké orî-dyicí, basúja ḿbé ba/mû ba/cen ké byiká ba-bwa esim Jerúsélem, ba-mîng Pôl ne basúja ḿbé ba/yú ké bubyî-orá ba/fu, bakúng ǎ ba-ca ne nyǐ.

³³ Basúja ámbe ba-kúng Pôl ba-ribi ne nyǐ Sizaryâ, ba-kye onet-dyishí ámu léta, ba-bwa ne Pôl ba-fé ǎ ké abwô.

³⁴ Onet-dyishí ámu o-kó léta ámu, o-bí Pôl kyikim-oshê ńkyí o/fím. Ké nkéré mú Pôl o/sét ǎ o/fu, nyǐ o/fím Silyísha,

³⁵ o-sét Pôl o/fu, me n/chi n-jwo mpan eyên ké nkéré mú banet ḿbé ba/fu, wo a/chi kyibî ba/chi ba-ribi nyín. Ne o-kye busa kâng o/fu, bayip Pôl ba-fé ǎ ké kyibám ńkyí Otu Hérot o/bi, ba-kû ǎ ebám.