ÂAK BǍMKPÓNGÉ ḾBÉ BANET-KYITWÓM-JISOS BA/CHI, ḾBÉ BADAKÓ ÂAK 22 - Bokyi Bible

¹ Banyinchéng, bwǎn-bané ejí, ne banchí ejí, fwôo n̂g atông ba-jwo mě eringe nyí mu m-pan n mpan mún ké bushú enen.

² Ké nkéré mbé ba/jwo ké mu o-raa ng ké ejá-Hyíburu, mbé ba/bwa ba-cíbî pyêp ba-shwôm eringe nyí ba/mû, ne Pôl o-raa o-ca kashú o/fu,

³ Me n-chi i onet-Jûs mú ba/fwon ǎ ké Tásus, ké Silyísha, nké n/kán nyín ké Jerúsélem wǎ wǎn-nwet mú Gamályel. Me n/kwâa kanong kanong eringe nyí badatî byije ḿbyí banchí eten ḿbé kpákpá, ne n/kúng byiko ejí n-kye Osówo eringe ebónge wǎ ben mú bamu nyín kurún.

⁴ Me n/kye banet ḿbé ba/bángê ké Bukwóp-Dyikpen ḿbú Jisos o/tángê busông, n-cen kámbé ne bukyû. Me n/kám banyinchéng ne banyinyi n-fé kámbé ké mgbokobá.

⁵ Otu-nchi kyifen-Osówo ne kángkáng banet-esuk eten nyí eryên ba-man n esét ba/fu, me mu n-sét ng ntûntû. Me n/koo baléta ne mbé, ḿbé mbé ba/sáng báten-banet-Jûs ḿbé mbe ba-kyú u ké Damásákus, ne n-dim kâng n/fu, n-da ng ekám banet ḿbén, n-fé kámbé bamgbokobá, m-bâ ne mbé ké Jerúsélem, eringe nyí badakye kámbé busông.

Pôl o/sét eringe nyí kyi/cen ne Nyǐ o-firi Ḿgbán mú Otu Kyítá

⁶ Ké nkéré mu n-cen n n-câ n-fárâng ng Damásákus n-câ, ké chwǒm wǎ busun mánmán, kasabang ka/waa ké abe ányi ka-fím kyíbóng, ka-kédê mě ké byiko.

⁷ M-myii kyísí, ne n-jwo ejá nyí e/raa ne me e/fu, Sôl, Sôl, ebóng amu a-kyâ mě busông.

⁸ Me m-bí n/fu, wo yeě, ǎ Otu Kyítá. Nyǐ o-raa ne me o/fu, me n-chi i Jisos mú o/fím Názáret, mú amu a-kyâ ǎ busông.

⁹ Banet ḿbé ba/mû ne me ké kyikû ba/ri kasabang ánke, nké ba*da/jwo ejá nyí onet mú o/mû o-raa ng ne me*.

¹⁰ Me m-bí n/fu, me nchi nǎ kántîk, ǎ Otu Kyítá. Ne Otu Kyítá o-raa ne me o/fu, bûu nensang a-dim Damásákus, áku nké ba/chi ba-sét ǒ ńkyí Osówo oo/tî ǒ o/fu, wo achi.

¹¹ Achi a-waa ányi a-sêe mě ké bubwô-kasabang ánke, ne banet ḿbé ba/mû ne me ké kyikû ba-níbî mě ké bubwô, ba-sí mě tete n-ribi Damásákus.

¹² Onyinchéng obónge mú odabángê Ananyâs o/mû ké oshê ámu. Nyǐ o/mû onet mú o/mû o-fâ Osówo, mú o/mû o-tî ng byije eten, ne banet-Jûs kángkáng ḿbé ba/mû ba-kyú u ké Damásákus ba/mû ba-kyâ ǎ kiǐtí-ofê.

¹³ Ananyâs o/bê o-kâm mě, o-bwom o-fárâng mě, ne o-raa ne me o/fu, Sôl mú wǎn-boné ejí, chîkpet erángê. Ké abe ányi, n-chîkpet erángê, m-bírî achi n-tún ǎ.

¹⁴ Ananyâs o-raa ne me o/fu, Osówo mú banchí eten ḿbé kpákpá oo/cá ǒ o/fu, wo anyît okabe emen, wo a-ri ḿgbán emen mú o/chi ńkyí nkyi kanong ké bushú emen, ne a-jwo to eringe nyí mu o-raa ng ké ejá emen.

¹⁵ Ké ebóng, wo a/chi a-bwom ǎ wǎ ntûesé a-sét kángkáng banet ńkyí wo aa/ri ké achi, a-jwo ké atông.

¹⁶ Kántîk, amu a-chî ng ebám ebóng. Bûu nensang a-koo osoo mú Osówo, a-kó dyizîn emen, Osówo o-soo byibî eyên o-pwó.

Otu Kyítá o/sét Pôl o/fu, osét Banet ḿbé ba*fí Banet-Jûs* Bǎmpém ḿbé Banong

¹⁷ Me m/bwa esim Jerúsélem, ne ké nkéré obónge ńdyí mu n-fâ nshwam ké kafâ-kiǐtí-kyise-kyifen-Osówo echi, n-ri chwǒm-akat,

¹⁸ ńkyí n/ri Otu Kyítá ké nkéré o/raa ne me o/fu, dim ké Jerúsélem ochéé óchee, *dachi a-bên nkéré* ké ebóng, banet ḿbé mbe ké oshê mún baa*ba/chi ba-bángê ńkyí wo amu a-sét ng kyi-kim ne me ne atyém ebe*.

¹⁹ Me n-faa n/fu, Otu Kyítá, banet ḿbén mbe ba-nyît ng kanong kanong ba/fu, me n/nung ké byise-ékwâbashi ḿbyí banet-Jûs, n-kám, m-mín banet ḿbé ba/bángê ké wo.

²⁰ Ne ké nkéré banet ba/ju Sityífin mú o/sét banet kyi-kim ne wo, me oyén m/mû ányi, kyi/nyîn mě eringe nyí ba/ju ǎ, n-níbî byídí ḿbyí banet ḿbé ba/mû ba-ju ng ǎ.

²¹ Otu Kyítá o-sét mě o/fu, dim, ké nǎ, me n/chi n-twóm ǒ tíbítíbí a-kâm banet ḿbé ba*fí banet-Jûs*.

²² Banet ḿbé ba/mû ányi ba/fwôo atông ba-jwo Pôl tete o-raa ńkyín. Nké ba/waa ányi ba-kpet ewonge kakânkakân ba/fu, ju n̂g ǎ, ju n̂g ǎ. O*da/kwárê mú odakpen*.

²³ Ba/mû mbe ba-wonge e, ba-tugi ng byídí ebe, ba-wuri ng édúkǎndú ba-pwó ng kyíbóng.

²⁴ Onet-dyishí-basúja mú Rûm ámu o-kye banet emen busa o/fu, bayip Pôl ba-jâ ne nyǐ ké kyise ánkyi, ne o-sét kámbé o/fu, bamín Pôl, eringe nyí odasét kámbé ńkyí kyi/chi ne banet-Jûs mbe ba-jang ng ewonge éné kyi-kim ne nyǐ.

²⁵ Nké ké nkéré mú baa/bwá ǎ erí nyí ba-kú ba-bâ ǎ emín. Pôl o-bí mú onet-dyishí-basúja mú o/mû ányi o/fu, kyije kyi/bángê kyi/fu, ben bamín onet mú mu wǎ onet mú o/fím Rûm? mú nang mpan ba*da ǎ epan ne ké kyibî ńkyí o/chi*?

²⁶ Ké nkéré mú onet-dyishí ámu o/jwo ńkyín, o/dim o-kâm onet-dyishí-basúja mú kánkán, o-bí ǎ o/fu, wo amu a-kyé ng ebóng echi. Onyinchéng ámu o-chi i onet-Rûm.

²⁷ Onet-dyishí-basúja mú kánkán ámu o-dim kâng o-kâm Pôl, o-bí ǎ o/fu, sét mě, wo a-chi i onet-Rûm? Pôl o-faa o/fu, âa.

²⁸ Onet-dyishí ámu o-sét ǎ o/fu, ne me n-firi onet mú wǎ onet mú o/fím Rûm, me n/kye akpuga nyí aa*nwa eri*. Pôl o-faa ǎ o/fu, me banet ḿbé ba/fwon mě ba/fím Rûm.

²⁹ Ké abe ányi, banet ḿbé ba/mû ba/chi ba-bí Pôl bǎmbím ba-bwa kyikû esim ésim ba-mîng ǎ. Ne onet-dyishí-basúja mú kánkán ámu o-kpet eshî ké nkéré mú o/nyît o/fu, Pôl o-chi i onet-Rûm, ne ké bubwô ḿbú oo/fé Pôl bamgbokobá.

Ba/bê ne Pôl ké Esuk nyí Eryên nyí Banet-Jûs

³⁰ Onet-dyishí-basúja mú kánkán ámu o/mû mu o-ryuu ng o/fu, nyǐ o-nyît ng ochíchí-chwǒm mú banet-Jûs ba/mû mbe ba-sét ng ba-bât ng Pôl. Ké orî-dyicí kâng, o-pii Pôl bamgbokobá, ne o-kye busa o/fu, batu-banchi kyifen-Osówo ne kángkáng banet-esuk nyí eryên nyí banet-Jûs baba-kyú ké ncibi. Ne o-kúng Pôl kâng o-da-bwom ké bushú ebe.