ÂAK BǍMKPÓNGÉ ḾBÉ BANET-KYITWÓM-JISOS BA/CHI, ḾBÉ BADAKÓ ÂAK 21 - Bokyi Bible

Pôl o/ce Jerúsélem

¹ Be byi/sét kámbé byi/fu, bakyú kanong ne byi-dim. Ké nkéré byi/nyáng dángdáng ké ńsukyíkang, byi/ribi ké Kôs. Ké orî-dyicí, byi-ribi Rôt, ne fím ké oshê ámu byi-cen byi-ribi Patára.

² Ké Patára nké byi/ri ńsukyíkang mú mu o-wâa ng Fonésha, ne byi-nung ké mǔ kâng byi-dim.

³ Byi-cen byi-ribi ké kyikit ńkyí adabwom a-ri Sápurus, ne byi-cen byi-mîng oshê ámu kyicê-bubwô-eku, byi-ribi Syírya. Byi/byí ké kafâ-ńsukyíkang ké Táya, ányi nké ńsukyíkang ámu o/chi o-fîm atû nyí o/mû o/tû.

⁴ Byi-ri kyicê-banet ḿbé ba/bángê ké Jisos ké oshê ámu, byi-rí kyipyán ne mbé. Ké busa ḿbú Busun-Osówo, banet ámbe ba-sét Pôl ba/fu, o*dachi o-ca Jerúsélem*.

⁵ Nké ké nkéré mú nkéré eten o/fyi mú byidadim byi-mîng kámbé, byi/dim kiǐfáng ńkyí eten. Mbé kángkáng ne banyi ebe ne bwǎn ebe ba/dim ne be tete byi-shwôm oshê. Be kángkáng byi-tím arông kyísí ké bukô-baya, byi-fé nshwam byi-kye Osówo.

⁶ Ké nkéré mú byi/sét barî byi/fu, nang yeě nang yeě okyú kanong, be byi/nung ké ńsukyíkang, mbé ba-bwa esim dyijê.

⁷ Byi/wâa ne bucen eten kashú káshu, fím ké Táya byi-ribi Tólómas, ké kyikit ńkyí byi/ta barî-banet eten ḿbé ba/bángê ké Jisos kyiraa, byi-rí dyicí dyibónge ne mbé.

⁸ Ké orî-dyicí, byi-dim byi-ribi Sizaryâ. Ányi nké byi/ce ké kyise ńkyí Fyílip mú mu o-sét ng banet Bǎmpém ḿbé Banong, byi-da-kyú ne nyǐ. Fyílip o/mû ké burwám-banyinchéng ashí káchâtkányi ḿbé ba/mû ba/fîm kámbé ba-tî ké Jerúsélem.

⁹ Fyílip o/mû ne bwǎn-banyinyi ashí anyii ḿbé ba/mû akpe, ḿbé ba/mû ba-sét ng banet byiraa-Osówo.

¹⁰ Be byi/mû bii/rí ací chwóó ké Sizaryâ, ké nkéré mú mkpábé obónge mú odasét byiraa-Osówo, mú odabángê Ágábus o/fím Judyâ o-ba-ribi.

¹¹ O-bâ o-kâm bě, o-kúng emâp nyí Pôl, o-yip kányí o-bwá byiká ne abwô ḿbyí emen nyǐ oyén, ne o-raa o/fu, Busun-Osówo bu/sét něen bu/fu, banet-Jûs ḿbé ké Jerúsélem ba/chi ba-bwá oyén-emâp ńnyín wǎ eringe m/bwá něen, ne ba/chi ba-yip ǎ ba-kye banet ḿbé ba*fí banet-Jûs*.

¹² Ké nkéré byi/jwo ńkyín, be ne banet bakíri ḿbé ba/mû ányi byi-tîm Pôl arông byi/fu, o*dachi o-ca Jerúsélem*.

¹³ Nké Pôl o/faa o/fu, ben bamu ba-chi i ebóng éné ńkyí bamu ba-tii ng něen, ba-chi i dyityém ejí dyi-firi bafip báfip. Me mm/kpá byiko, *chí ḿbyí bada mě ebwá erí ké Jerúsélem nké nke* nké ḿbyí nang bukyû to ndakpú áku ké dyishí ńdyí Jisos, Otu Kyítá.

¹⁴ Be byi*daman echi Pôl o-bángê ne be* ne byi-zú abwô kâng byi-raa byi/fu, kyi/bát kyichi wǎ eringe nyí Otu Kyítá o/kabe.

¹⁵ Ké nkéré mú byi/rí ányi ké kyikim-nkéré, byi-kpá byiko byi-yip byěm eten byi-dim Jerúsélem.

¹⁶ Kyicê-banet ḿbé ba/fím Sizaryâ ba/dim to ne be ké kyikû, ne ba-kúng bě ba-ca ne be ké kyise-onyinchéng obónge mú byi/fu, byi-da ng ekyú ne nyǐ, mú odabángê Mmásin, mú o/fím Sápurus, mú mu onet mú oo/bángê ké Jisos ké kyikim-nkéré ńkyí kii/shwôm ké esim chwóó.

Pôl o/dari Jêmsyi

¹⁷ Ké nkéré mú byi/ribi Jerúsélem, barî-banet eten ḿbé ba/bángê ké Jisos ba/koo bě ne bunyîn-dyityém.

¹⁸ Ké orî-dyicí, Pôl o-dim ne be o/fu, nyǐ o-da ng eri Jêmsyi. Kángkáng banet-ashí-ékwâbashi nyí Karâs ḿbé ké Jerúsélem ba/mû ké kyise-Jêmsyi ké nkéré ámu.

¹⁹ Pôl o-ta kámbé kyiraa, o-sét kámbé kerededet kángkáng byěm ḿbyí Osówo o/chi banet ḿbé ba*fí banet-Jûs* ké bubwô-bǎmkpóngé emen ḿbé o/chi.

²⁰ Ké nkéré ba/jwo ńkyí Pôl o/sét kámbé, mbé ashí kángkáng ba-kye Osówo akpee. Ne ba-raa ne Pôl ba/fu, wǎn-boné eten, wo a-man n eri eringe nyí nkyi nyín kántîk ké Jerúsélem. Égot-banet-Jûs ee*nwa epan* ḿbé ba/firi banet ḿbé ba/bángê ké Jisos* ne mbé kántîk ba/tôong ne kiǐtí-kyijé ńkyí badatî Byije ḿbyí Músis o/koo o-kye bě.

²¹ Banet baa/sét kámbé kyi-kim ne wo ba/fu, wo amu a-tángê e kángkáng banet-Jûs ḿbé mbe ké eshê nyí e*fí nyí banet-Jûs* a/fu, ba*dachîtî Byije ḿbyí Músis*. A-sét ng to kámbé a/fu, ba*dachi ba-cên bwǎn ebe* ba-chi nang édúú nyí banet-Jûs mbe ba-chi i*.

²² Ba/chi ba-jwo ba/fu, wo aa/ribi nyín. Kántîk kâng, byi-chi i nǎ.

²³ Mîng byi-sét ǒ ńkyí be byi/kabe byi/fu, wo a/chi a-chi. Banyinchéng mbe nyín ashí anyii ḿbé baa/ryí Osówo ocím mú shwanshwan.

²⁴ Ca ne banyinchéng ámbe, a-da-nung kámbé ké burwám, ba-chi kyifen ńkyí byiko esoo ḿbyí adafiri kanong ké bushú ḿbú Osówo, a-kye akpuga nyí kyifen ánkyi kyi/chi kyi-ryí kámbé. Ne mbé kâng ba/chi ba-man epwát ashí ebe, ké bukwóp ḿbún, nang yeě nang yeě o/chi o-nyît o/fu, ntûntû o*fí ké kafâ* ké chwǒm nang kyibónge* ńkyí banet ba/sét kámbé kyi-kim ne wo* nké wo oyén amu a-kyú u ké bukwóp ḿbú Byije-Músis byi/sét.

²⁵ Nké kyi-kim ne banet ḿbé ba*fí banet-Jûs* ḿbé ba/bángê ké Jisos, be bii/twóm kámbé léta byi-sét kámbé byi/fu, be bii/cibi byi-bángê byi/fu, baa*man ba-ryí byiryíng nang byirá* ḿbyí ba/chi kyifen ba-kye erím-bakye* nang baróng-enyam nang bará* nang enyam nang erá nyí ba/shwân kányí* ne ba-man ba-mîng kyibî echi ńkyí badarí ne banet ḿbé ba*da/bé ne dyibé*.

²⁶ Ne Pôl o-dim kâng ne banyinchéng ámbe, ne ké orî-dyicí o-chi kyifen-byiko esoo ne mbé ké kyikû. Ne Pôl o-dim o-ca kâng ké kafâ-kiǐtí-kyise-kyifen-Osówo echi, o-da-sét banet ací nyí kyi/chi kyi-rí tete kyikim-nkéré ńkyí byiko esoo ámbyi byi-man, ne nkéré o-fyi mú nang yeě nang yeě ké burwám-banyinchéng ámbe ba/chi ba-chi kyifen ba-kye Osówo ké bubwô ebe.

Banet-Jûs ba/kye Pôl Bunwa

²⁷ Ké nkéré ací ányi káchâtkányi nyí byiko esoo a/mû a-kú a-bâ eman, kyicê-banet-Jûs ḿbé ba/fím Ésha ba/ri Pôl ké kafâ-kiǐtí-kyise-kyifen-Osówo echi. Ba-chi kángkáng bujê-banet ḿbé ba/mû ányi ba-kpet esa kafâ ne Pôl, ne banet-Jûs ámbe ba-dim ba-da-níbî ǎ.

²⁸ Ba-wonge ba/fu, banet-Ézerel, bâ n̂g ba-chwáp bě. Onyinchéng mún nké mu o-cen n ké kángkáng byikit, o-tángê e banet byibî-byěm kyi-kim ne banet-Ézerel ne Byije-Músis ne kiǐtí-kyise-kyifen-Osówo echi ńkyín. Ne kántîk, oo/bwa o-chîkúng kyicê-banet ḿbé ba*fí banet-Jûs* o-ba-nung ne mbé ké kafâ-kiǐtí-kyise-kyifen-Osówo echi, o-bên kyikit-ociring ńkyín.

²⁹ Mbé ba/raa ńkyín, ké ebóng, ba/ri Torófyímus mú o/fím Éfyísus ké o/mû o-cen n ne Pôl ké oshê ámu, ne ba-kabe ba/fu, Pôl nké oo/kúng ǎ o-bâ ne nyǐ ké kafâ-kiǐtí-kyise-kyifen-Osówo echi.

³⁰ Oshê omúmú o-firi byiryibyiryi, ne kángkáng banet ba-zóngê ba-ba-cibi kyikit kyibónge, ba-níbî Pôl, ba-tut ǎ o-byí ké kafâ-kiǐtí-kyise-kyifen-Osówo echi. Banet ba-waa ké abe ányi ba-cít kángkáng afyi nyí kiǐtí-kyise-kyifen-Osówo echi.

³¹ Dyizu-banet ándyi dyi/mû dyi/firi ké busa-dyityém ḿbú ba/mû ba-kú ba-bâ eju Pôl ké nkéré mú ba/twóm ejá e-kâm otu-dyishí-basúja ḿbé Rûm ba/fu, bunwa boo/róng ké oshê mú Jerúsélem omúmú.

³² Ké abe ányi, otu-dyishí-basúja ámu o-kúng kyicê-banet-ashí-basúja ne kyicê-basúja bayén o-dim o-kâm bujê-banet ámbe. Ké nkéré banet ámbe ba/ri ǎ ne basúja ké kyikû, ba-mîng Pôl emín.

³³ Otu-dyishí-basúja ámu o-dim o-kâm Pôl, o-kám ǎ, o-kye busa o/fu, bakúng bamgbokobá bafee ba-bwá ǎ. Ne o-bí kâng o/fu, nyín ebóng onet. O/chi ebóng.

³⁴ Kyicê-banet ké bujê-banet ámbe ba-wonge ba-sét chwǒm kyibónge, bakíri ba-wonge ba-sét kyikíri. Ké ebóng, banet ámbe ba/mû mbe ba-sét ng byěm chwóó chwóó ḿbyí byi/yángê ne barî, otu-dyishí-basúja ámu o*da/man enyît ochíchí-chwǒm mú o/chi* ne o-kye banet emen busa o/fu, bayip Pôl ba-da-fé ǎ ké kyise ńkyí banet baa*man enung*.

³⁵ Ba/cen ne Pôl ba-ribi ké ocím-dyifyi, ne basúja ba-yip ǎ kyíbóng, ké ebóng, bujê-banet ámbe ba/mû ba/firi ké busa-dyityém ḿbú boo*nwa eri*.

³⁶ Mbé kángkáng ba/mû ba-bâ ne Pôl ké kyikû, ba-wonge e ba/fu, ju n̂g ǎ, ju n̂g ǎ.

Pôl o/kan o/fu, Nyǐ o-pan n Mpan Nyǐ o-fem

³⁷ Ńdyí ba/mû ba-kú ba-bâ efé Pôl ké kyise, Pôl o-bí otu-dyishí-basúja ámu o/fu, a-man n mě emîng n-sét ǒ chwǒm? Otu-dyishí ámu o-bí o/fu, wo a-man n eraa Girîk?

³⁸ Wo, *chí onyinchéng ámu mú o/fím Éjip*? mú ké nkéré mú oo/shwôm ké esim o/kpet bunwa ne banet-ashí-oshê*? o-kpî égot-banet bujam ḿbé mbe ba-jang ng etông kyijé ne oshê o-jâ ne mbé ké kyikim-dyikán*?

³⁹ Pôl o-faa o/fu, me n-chi i onet-Jûs mú ba/fwon ǎ ké Tásus, ké esí nyí Silyísha, wǎn-oshê mú kiǐtí-oshê. Kamgbe, kye mě busa m-pem ne banet ḿbén ḿbé mbe ba-kyâ mě afaníkong.

⁴⁰ Otu-dyishí-basúja ámu o-kye ǎ busa, ne Pôl o-bwom kâng ké ocím-dyifyi, o-nye banet ámbe bubwô o/fu, bacíbî pyêp. Ké nkéré mú ba/cíbî pyêp, Pôl o-raa ne mbé ké ejá-oshê ebe nyí Hyíburu o/fu,