ÂAK BǍMKPÓNGÉ ḾBÉ BANET-KYITWÓM-JISOS BA/CHI, ḾBÉ BADAKÓ ÂAK 20 - Bokyi Bible

Be Pôl ba/ce Masedónya ne Girîs

¹ Ké nkéré mú afaníkong ńnyín aa/shwôm, Pôl o/kó banet ḿbé ba/bángê ké Jisos kyikit kyibónge, o-fé kámbé busa, o-sét kámbé o/fu, bakyú kanong. Ne o-dim kâng o-wâa Masedónya.

² O-cen ké eshê nyí nyi ké esí ányi, o-fâ banet ḿbé ba/bángê ké Jisos busa, o-sét ng kámbé byěm chwóó. Ne o-ribi kâng ké Girîs,

³ kyikit ńkyí o/rí etukáku echât. O/mû o-kú o-kpá ng byiko ḿbyí odadim Syírya, ne o-ba-nyît o/fu, banet-Jûs mbe ba-nam m ǎ dyiju. Ne o-yángê kâng okabe o/fu, nyǐ o-bwa ng esim nyǐ o-cen ḿbú Masedónya.

⁴ Sopáta mú wǎn-Párus, mú o/fím Beryâ o/dim ne nyǐ ké kyikû, cibicibi ne Aryisatákus ne Sekúndus ḿbé ba/fím Tesalonáka, ne Gáyus mú o/fím Dyíbyi, ne Tyímótyi ne Tyíkyíkus ne Torófyímus ḿbé ba/fím Ésha.

⁵ Mbé ba/bwóp bě kashú ba-da-bwom bě ké Tórówas.

⁶ Be byi-nung ké ńsukyíkang ké Fyilyípa, ányi dyijî-kyifen ńkyí Berêt kii/shwôm, byi-rí ací atánge ké bukwóp, ne byi-kâm kámbé ké Tórówas, ké kyikit ńkyí byi/rí kyipyán kyibónge.

Pôl o/ri Tórówas ké Nkuli Kyikû

⁷ Ké dyikurúku, ké dyicí-kyitwom-ékwâbashi, be byi/cibi kyikit kyibónge byi/fu, byi-ryí i byiryíng ḿbyí byimu byi-fwam m eryí ne barî. Pôl o/pem banet ḿbé ba/mû ányi Bǎmpém ḿbé Banong tete kyirê kyi-kán, ké nǎ, nyǐ o/mû mu o-bâ ebadim ké orî-dyicí.

⁸ Etyuryíkáng e/mû chwóó ké kyikit ńkyí byi/mû byi/cibi, ké nfût mú kyíbóng-enyóng.

⁹ Wǎn-kyisat obónge mú odabángê Bútyíkus o/mû o/kyú ké wíndu. Ké nkéré mú Pôl mu o-pem m bǎmpém o-câ kashú, burê bu-kpet enwa Bútyíkus bu-nye ng bu-fâ tete o-róng ké ochíchí-burê buyén, o-zûu kyíbóng-byikim-enyóng byichât o-ba-róng kyísí. Banet ba-da-bêem ǎ ba-ri ba/fu, oo/kpú.

¹⁰ Nké Pôl o/shû kyísí o-da-rí o-nye Bútyíkus, o-sît ǎ kíngkíng, o-raa o/fu, *da n̂g ekérê*. Mu okpó.

¹¹ Ne Pôl o-bwa kâng esim, o-yú kyíbóng-enyóng, o-da-ját berêt o-ryí ne banet ḿbé ba/bángê ké Jisos. Ké nkéré mú oo/pem ne mbé ké kyikim-nkéré chwóó tete esû e-byí, Pôl o-dim.

¹² Banet ámbe ba-kpî mú wǎn-kyisat ámu ba-jâ ne nyǐ okpó, bunyîn-dyityém bu-bwa bu-chîfiri kámbé ké dyityém.

Pôl o/dim ké Tórówas o-cen o-ribi ké Malyítus

¹³ Be byi/bwóp kashú byi-da-nung ké ńsukyíkang, byi-cen byi-ribi Ásos. Ányi nké byi/chi byi-kâm Pôl ne o-nung ké ńsukyíkang. Pôl o/mû o/sét bě o/fu, be byicen éné, ké ebóng, nyǐ oyén o/chi o-cen ké byiká o-ribi Ásos.

¹⁴ Ké nkéré mú o/kâm bě ké Ásos, o-nung ké ńsukyíkang ne be, ne byi-cen byi-ribi Myitalyínyi.

¹⁵ Byi-dim ányi byi-ribi Kyíyos ké orî-dyicí. Byi/chîrí dyicí dyibónge ké bukwóp, byi-ribi Sámos, ne ké nnyinyěng-dyicí, byi-ribi Malyítus.

¹⁶ Pôl o/mû o/fu, nyǐ o-shwôm m oshwǒm Éfyísus, eringe nyí nyǐ oo*ba/chi o-bên nkéré ké Ésha*. O/mû mu o-dûu ng o/fu, nyǐ o-kan n, nyǐ o-ribi Jerúsélem ké dyicí-dyijî-kyifen ńkyí Péntyíkos, ké ozîim mú dyicí ńdyí Busun-Osówo bu/bê bu-kâm bǎmgbán-Jisos.

Bǎmpém ḿbé Pôl o/sét Banet-Ashí-Ékwâbashi nyí Karâs ḿbé ké Éfyísus

¹⁷ Pôl o/waa ké Malyítus o-twóm ejá e-ca Éfyísus o/fu, ḿbé banet-ashí-ékwâbashi nyí Karâs bakâm ǎ ké Malyítus.

¹⁸ Ké nkéré mú ba/ribi ba-kâm ǎ, o-pem ne mbé o/fu, ben bamu ba-nyît ng eringe nyí me n/kyú n-chi bǎmkpóngé ké kángkáng kyikim-nkéré ńkyí me m/mû ne ben, kyi-fím ké mbwôp kashú-dyicí ńdyí me n/ribi ké Ésha.

¹⁹ Ké byiko ejí ḿbyí n/kúng n-tî kyísí ne bafip ḿbé n/ri chwóó, me n/chi bǎmkpóngé ejí wǎ ḿgbán mú Otu Kyítá ké okan mú banet-Jûs ba/kan mě chwóó, ké onam mú ba/nam mě dyiju.

²⁰ Ben bamu ba-nyît ng ba/fu, me n*da běn erôo chwǒm nang kyibónge* ńkyí kyi/chi kyi-chwáp běn* ké nkéré mu n-sét ng n-tángê e běn byěm kyíjí wááng ne ké kafâ-byise enen*.

²¹ N/kuri banet-Jûs ne ḿbé ba*fí banet-Jûs* ekó nyí shwaneshwane n/fu, byiko byikpú kámbé ba-mîng byibî ebe, ba-bírî ba-kâm Osówo ba-bángê to ké Jisos, Otu Kyítá eten ne atyém ebe.

²² Kántîk, ké bubwô ḿbú mu n-chi i ńkyí Busun-Osówo mbu bu-sét ng mě, me n-kú n-dim m Jerúsélem, ńkyí kyi/chi kyi-chi mě áku n*fí n-nyît ng*.

²³ Ńkyí me mu n-nyît ng kyi*da/shwôm ńkyí Busun-Osówo boo/kuri mě ekó ké kángkáng eshê nyí nn/ce bu/fu, banet ba/chi ba-fé mě ké mgbokobá* ba-chi mě n-ri busông chwóó*.

²⁴ Nké dyikpen ejí dyi*da mě ebyí wǎ chwǒm* nké nkyi kiǐtí-chwǒm ńkyí me ndaman kyitwóm ejí ne bǎmkpóngé ejí ḿbé Jisos, Otu Kyítá o/kye mě o/fu, me nchi, ḿbé o/fu, me nsét banet Bǎmpém ḿbé Banong ḿbé ochwâp mú Osówo.

²⁵ Me nn/cen byikit ké burwám enen kángkáng, n-sét ng běn kyi-kim ne Butu ḿbú Osówo. Ne kántîk me mu n-nyît ng n/fu, onet o*fí ké burwám enen* mú o/chi o-chî mě eri*.

²⁶ Me mu n-sét ng běn kâng wááng ké dyicí ńdyí kurún n/fu, nang yeě ké burwám enen nké o/két byiko emen o-mîng Osówo, me n*fí abwô ké kafâ*.

²⁷ Ké ebóng, me n*da běn erôo chwǒm nang kyibónge* ké osêt mú mu n-sét ng běn kyi-kim ne kángkáng okabe mú Osówo*.

²⁸ Bám m̂ byiko enen, ba-bám to dyibóng-banet ḿbé Busun-Osówo boo/yip bu-fé běn ké abwô. Tún n̂ banet-ncibi mú Osówo kanong ḿbé nyǐ oo/chi ba-firi ḿbé emen ké bubwô-bukyû ḿbú Wǎn emen, wǎ eringe nyí bambâm ebû mbe ba-tún n ebû.

²⁹ Me mu n-nyît ng n/fu, ké nkéré mú me nn/dim, banet ba/chi ba-nung běn ké burwám wǎ ekpang ḿbé baa*ba/chi ba-mîng enémê banet ḿbé ba/bángê ké Jisos*.

³⁰ Nkéré mu o-bâ mú banet bakíri ké burwám enen ba/chi ba-sét byisédéng, ba-chi kyicê-banet ḿbé ba/bángê ké Jisos ba-nung ké burwám ebe.

³¹ Bám m̂ byiko enen ba-zîim ba/fu, ké afaníkong eri chwóó, buchú ne esû, me nn/kuri nang yeě nang yeě ké burwám enen ekó, n-tángê běn ké aje achât.

³² Kántîk, me nn/yip běn n-fé ké abwô nyí Osówo ne ké kyitwóm kyi-kim ne kanong emen. Nyǐ nké o/chi o-man běn echi ba-shwane ké basun enen, o-kye běn banjware ḿbé nyǐ o/tî kángkáng banet emen.

³³ Me n*da/tî achi ejí ké akpuga nang ké kyídí ńkyí onet*.

³⁴ Ben bayén bamu ba-nyît ng ba/fu, me n/kúng abwô ejí ńnyín n-chi bǎmkpóngé, n-já kángkáng byěm ḿbyí me ne banet ḿbé mbe ne me ké kyikû byimu byi-ryuu ng.

³⁵ Me nn/tông běn ké kángkáng byěm n/fu, ké bǎmkpóngé echi ne busa ké bukwóp ḿbún, be byi-man byi-chwáp banet ḿbé mbe kyeekyee, byi-zîim byiraa ḿbyí Jisos, Otu Kyítá oyén o/raa o/fu, â onet o/yárê onet chwǒm, o-kyú u ké bunyîn-dyityém o-shwôm nkéré onet oda ǎ eyárê nyǐ.

³⁶ Ké nkéré mú Pôl o/mîng epem, o/tím arông kyísí ne banet ámbe kángkáng, o-fé nshwam o-kye Osówo.

³⁷ Mbé ashí kángkáng ba/mû ba/firi bafip báfip ké nkéré mú mbe ba-rwâm m ǎ, ba-sét ng ǎ ba/fu, oca kanong.

³⁸ Bafip ba/chi kámbé, aciringaciring ké byiraa ḿbyí o/raa ne mbé o/fu, mbé baa*ba/chi ba-chî ǎ eri*. Ne ba-dim kâng ne nyǐ ba-ribi ké ńsukyíkang.