ÂAK BǍMKPÓNGÉ ḾBÉ BANET-KYITWÓM-JISOS BA/CHI, ḾBÉ BADAKÓ ÂAK 2 - Bokyi Bible

Obê mú Busun-Osówo

¹ Ké nkéré mú dyicí ńdyí Busun-Osówo budabê dyi/fyi, ńdyí badakó Péntyíkos, kángkáng banet ḿbé ba/bángê ké Jisos ne atyém ebe ba/mû ba/cibi kyikit kyibónge ké kyise kyibónge.

² Ké abe ányi, kyirime kyi-fím kyíbóng éné wǎ bufú ḿbú buryên nké mbu bu-tugi ng, kyi-ba-sú ké kyise kyimúmú ńkyí mbé ba/mû ba/kyú.

³ Ne ba-ri kâng chwǒm éné wǎ bumang-okwâ ké nkyi kyi-pap ng ké boǒcê ké boǒcê. Nang yeě nang yeě mú o/mû ányi kaǎcê kabónge ka/ta ǎ.

⁴ Busa ḿbú Busun-Osówo bu-sú kámbé ké byiko, ne ba-kpet eraa ejá nyí byire byikíri chwóó wǎ eringe nyí Busun-Osówo bu/kye kámbé busa ḿbú badaraa.

⁵ Banet-Jûs ḿbé ba/fím ké kángkáng byikit, ḿbé ba/mû ba-fâ Osówo ba/mû mbe ba-kyú u ányi ké Jerúsélem.

⁶ Ké nkéré banet ḿbén ba/jwo kyicoge ńkyí mbe ba-chi i, bujê-banet chwóó ba/bacibi kyikit kyibónge. Mbé kángkáng kyi/chi kámbé wǎ chwǒm-akat, ké ebóng, nang yeě nang yeě o/jwo ńkyí banet ḿbé ba/bángê ké Jisos ne atyém ebe mbe ba-raa ng ké ejá-oshê emen.

⁷ Ba/waa ocím ké dyishí fúú ne atyém yógeyóge, ba-kpet eraa ba/fu, banet ḿbén ḿbé mbe ba-raa ng něen, ná mbé kángkáng ba/fím Gályílyi.

⁸ Aa kyi/cen nǎ kâng ne be kángkáng, nang yeě nang yeě mu o-jwo ng kámbé ké mbe ba-raa ng ké ejá-oshê emen.

⁹ Be byi/fím eshê cátcát. Bakíri ba/fím Pátya ne Médya ne Élam. Bakíri ba-fím Mesopotémya ne Judyâ ne Kapadósha. Bakíri ba-fím Póntus ne Ésha.

¹⁰ Bakíri ba-fím Fyíryígya ne Pamfyílya. Bakíri ba-fím Éjip be eshê nyí nyi ké Lyíbya nyí e/fárâng Saryínyi. Be banet bakíri byi/fím Rûm,

¹¹ banet-Jûs ne ḿbé ba*fí banet-Jûs* ḿbé bii/nung ké ékwâbashi nyí banet-Jûs. Ne be banet bakíri byi/fím Kyirît ne Arébya, nké be kángkáng byimu byi-jwo ng kámbé, nang yeě nang yeě ké ejá-oshê emen, kyi-kim ne biǐtí-byěm ḿbyí Osówo oo/chi.

¹² Ké byiko ḿbyí byi/kaa kámbé ne atyém nyí a/yógê kámbé, mbé kángkáng ba/mû ba-bí ng barî ba-nye ng ba-fâ ba/fu, ńkyín kyi/byí nǎ.

¹³ Nké banet bakíri ba/mû mbe ba-fát ng banet ḿbé ba/bángê ké Jisos ne atyém ebe kiikuku ba/fu, banyinchéng ḿbén baa/jwáp bato ba-kú ba-bwóm m kámbé.

Bǎmpém ḿbé Pyíta o/pem

¹⁴ Ne Pyíta o-byí kâng o-bwom ne burwám-banet-kyitwóm-Jisos ḿbé áku ashí diǐkpú ne din, o-faa, o-kpet eraa ne bujê-banet ámbe ne ejá kyíbóng kyíbóng o/fu, báten-banet-Jûs ne ben kángkáng ḿbé bamu ba-kyú u ké Jerúsélem, fwôo n̂g atông ba-jwo mě, ba-mîng mě n-sét běn kyikû ńkyí chwǒm ńkyín kyi/byí.

¹⁵ Banet ḿbén ba*fí ba-bwóm m bato* wǎ eringe nyí ben bamu ba-kabe ng*. Kyi/tôong égbáng kátángekányi nyí dyicófóróng.

¹⁶ Ben ba-man ba-kabe bukwóp bukíri. Nyín něen dyishí-byiraa ḿbyí mkpábé mú odasét byiraa-Osówo, mú odabángê Jówel o/raa.

¹⁷ O/fu, Osówo o/fu, nyín něen ńkyí me n/chi n-chi ké ací nyí nkuli kyikû. Me n/chi n-twóm Busun ejí bu-kâm kángkáng banet. Bwǎn enen ba/chi ba-sét banet kyitwóm ejí. Bwǎn-byisat enen ba/chi ba-ri byěm-akat wǎ mbe ba-ri ng burê. Ne bakâa-banyinchéng enen ba/chi ba-ri barê, ba-ri ntûntû mú Osówo.

¹⁸ Âa, nang básóng ejí me n/chi n-twóm Busun ejí bu-kâm kámbé ké ací ányi, ne mbé ba/chi ba-sét banet kyitwóm ejí.

¹⁹ Me n/chi n-chi biǐtí-akat ḿbyí banet ba/chi ba-ri kyíbóng, ne n-tông to ekap nyí banet ba/chi ba-ri kyísí ké ejíí. Ba/chi ba-ri baróng ne okwâ ne biimpyimpyam-arúkwâ.

²⁰ Óbyísû o/chi o-mîng esan, otukáku o-kûbwam shíshét wǎ baróng, ne Kiǐtí-Dyicí ńdyí Otu Kyítá ńdyí ndyi ne busan ḿbú ragerage dyi-fyi.

²¹ Nang yeě kâng mú o/chi o-kó Otu Kyítá, Otu Kyítá o/chi o-nyii ǎ.

²² Fwôo n̂g atông kâng ba-jwo byiraa ḿbyín, ǎ banet-Ézerel. Jisos mú o/fím Názáret o/mû onet mú Osówo o/tông běn wááng o/fu, nyǐ nké o/twóm ǎ ké biǐtí-akat ne byěm ḿbyí byidayógê banet ké dyityém ne ekap, ḿbyí Osówo o/chi ké abwô emen. Ben bayén bamu ba-nyît ng ńkyín, ké ebóng, kyi/chi nyín ké burwám enen.

²³ Osówo o/nyît ké dyityém emen ne o-tigi o-tî kánkyí o/fu, nyǐ o-yip ng Jisos o-fé běn ké abwô. Ben nké ba/ju ǎ ké bubwô ḿbú ba/mîng banet-byibî ba-mán ǎ ké kyikwap ńkyí badashwân onet.

²⁴ Nké Osówo o/jwóbê ǎ o-bwa ké dyikpen, o-chi ǎ o-fem ké afaníkong nyí bukyû. Ké ebóng, bukyû boo*ba/chi bu-man ǎ eníbî bu-fé ké mgbokobá*.

²⁵ Ké ebóng, Otu Dívit o/raa kyi-kim ne nyǐ, o/fu, me mu n-ri ng Otu Kyítá ké bushú ejí kángkáng nkéré. Nyǐ mu ké kyicê ńkyí bubwô-etyebéng ejí, eringe nyí ofong oo*ba/chi o-kédê mě*.

²⁶ Ké bubwô ḿbún, dyityém ejí ndyi dyi-jêe ng, ne bunyîn-dyityém boo/sú ké byiraa ejí. Nang ké me mu onet mú odakpú něen, me mu n-tî ng achi ké ńkyí wo Osówo a/chi a-chi a-kye mě.

²⁷ Ké ebóng, wo aa*ba/chi a-mîng busun ejí bu-waa ké oshê-bakúsí*. Wo aa*ba/chi a-mîng kyikwóm-enyam-byiko ńkyí ḿgbán eyên mú mu o-kyâ ǒ ofê kyi-fwoo*.

²⁸ Wo aa/tông mě biǐfáng ḿbyí onet odacen o-ribi ké dyikpen. Ké bubwô ḿbú wo amu ne me, aa/chi mě n-firi ké bunyîn-dyityém kanong kanong.

²⁹ Bwǎn-bané ejí, me m-man n-raa ne ben wááng kyi-kim ne bonchí eten mú kpákpá, mú odabángê Otu Dívit. Otu Dívit o/kpú, ba-ryii ǎ, ne dyikun emen dyi/tôong nyín ne be tete ací nyí kurún.

³⁰ Nyǐ o/mû mkpábé mú odasét byiraa-Osówo, ne nyǐ o/nyît ocím mú Osówo o/ryí ǎ. Osówo o/sem o/fu, nyǐ o-chi i onet-kyikû ńkyí Otu Dívit obónge o-kyú otu, wǎ eringe nyí Otu Dívit o/mû.

³¹ Otu Dívit o/ri ńkyí Osówo o/mû mu o-bâ echi, ne o-raa kâng kyi-kim ne ojwóbe ké bukyû mú onet mú Osówo o/kúng ǎ butu, ké nkéré nyǐ o/raa o/fu, Osówo o*da ǎ emîng o-waa ké oshê-bakúsí* kyikwóm-enyam-byiko emen kyi*da/fwoo*.

³² Osówo oo/jwóbê ochíchí-Jisos mún o-bwa ké dyikpen, ne be kángkáng byi/kúng achi eten byi-ri ǎ.

³³ Osówo oo/yip ǎ o-jâ kyíbóng ké kyicê-bubwô-etyebéng emen. Ne nyǐ oo/koo Busun-Osówo ké abwô emen, wǎ eringe nyí Osówo mú Bonchí emen o/mû o/ryí ocím. Ńkyí ben bamu ba-ri ng něen, ba-jwo ng to ké atông, ányi eyáré emen nyí Osówo oo/kôo bě ké byiko.

³⁴ Ké ebóng, Otu Dívit oyén o*da/yú o-jâ kyíbóng* nké o/raa o/fu, Osówo Óburúkpâbí o/sét Otu Kyítá ejí o/fu, kyú me nyín ké kyicê-bubwô-etyebéng ejí,

³⁵ tete n-ren banet-ociring eyên kyísí ké byiká eyên wǎ kyichí ńkyí badacím byiká.

³⁶ Kángkáng banet-Ézerel ba-man ba-nyît kâng ké ntûntû ba/fu, ochíchí-Jisos mún mú ben ba/mán ǎ ké kyikwap ńkyí badashwân onet nké Osówo oo/chi ǎ o-firi Otu Kyítá ne onet mú nyǐ o/kúng ǎ butu.

³⁷ Ké nkéré banet ámbe ba/jwo ńkyí Pyíta o/raa, ba*fí to ba-nyît ng ńkyí badachi*. Ne ba-bí Pyíta ne banet-kyitwóm-Jisos ḿbé áku ba/fu, be byi-chi i nǎ kâng, ǎ bwǎn-bané eten.

³⁸ Pyíta o-sét kámbé o/fu, byiko byikpú běn ba-mîng byibî echi, nang yeě nang yeě ké burwám enen ba-koo osoo mú Osówo ké dyizîn ńdyí Jisos Karâs. Eringe nyí Osówo oda běn epwoo byibî enen, ba-koo eyáré emen, ányi Busun-Osówo.

³⁹ Ké ebóng, ocím mú Osówo o/ryí, o/ryí běn ben ne bwǎn enen, ne kángkáng banet ḿbé mbe tíbítíbí, kángkáng banet ḿbé Osówo Óburúkpâbí mu o-kó ng o/fu, babâ ba-kâm ǎ.

⁴⁰ Pyíta o/kye kámbé bacê ne byiraa byikíri chwóó ḿbyí o/raa ne mbé o-fé kámbé busa o/fu, nyii n̂g byiko enen ba-fem ké busông ḿbú mbu bu-bâ bu-kâm byibî-banet ḿbyí ké oshê mún.

⁴¹ Banet chwóó ké burwám ámbu ba/bángê ké bǎmpém emen ḿbé o/pem, ba-koo osoo mú Osówo. Égot-banet e-byí i nang onyiryiká nyí e/nung ké burwám ḿbú ba/bángê ké Jisos ne atyém ebe, ké dyicí ándyi.

⁴² Banet ámbe ba/kúng nkéré ebe ké byěm ekwâa ne banet-kyitwóm-Jisos. Ba-chi i byěm kyikit kyibónge ne barî, ba-ryí i byiryíng, ba-fâ banshwam kyikit kyibónge.

Dyikpen ńdyí Banet ḿbé ba/bángê ké Jisos ba/mû ba-kyú u ne Barî

⁴³ Osówo o/chi biǐtí-akat ne byěm ḿbyí byidakaa banet byiko chwóó ké abwô nyí banet-kyitwóm-Jisos. Ńkyín kyi/chi kángkáng banet ba-waa ocím ké dyishí fúú.

⁴⁴ Kángkáng banet ḿbé ba/bángê ké byiraa ḿbyí Jisos ne atyém ebe ba-kpet ekyú kyikit kyibónge ne barî ba-câ kashú ba-kyii ng byěm ebe ne barî.

⁴⁵ Ba-shee ng byěm ebe, ba-yip ng akpuga ba-kyii ng barî kángkáng, onet ne onet o-koo ng eringe nyí mu o-ryuu ng.

⁴⁶ Kángkáng dyicí mbé ba/mû ba-kâm m barî ké dyizu, ké kafâ-kiǐtí-kyise-kyifen-Osówo echi, ba-ryí i byiryíng ebe ne barî ké byise ebe, ké bunyîn-dyityém ne atyém wááng.

⁴⁷ Ba-kyâ Osówo akpee, banet-oshê ba-kyâ kámbé ofê wǎ banet ḿbé banong. Kángkáng dyicí, Otu Kyítá o/mû mu o-chi i burwám ebe bu-jê ng bu-câ kashú káshu ké ofê mú mu o-fâ banet ḿbé nyǐ mu o-nyii ng kámbé.