ÂAK BǍMKPÓNGÉ ḾBÉ BANET-KYITWÓM-JISOS BA/CHI, ḾBÉ BADAKÓ ÂAK 19 - Bokyi Bible

Pôl o/pem Banet kyi-kim ne Jisos ké Éfyísus

¹ Ké nkéré mú Apólos mu ké Kórin, Pôl o/cen o-shwôm ké Galísha ne Fyíryígya o-ribi Éfyísus. Ányi nké o/kâm kyicê-banet ḿbé ba/bángê ké Jisos ne atyém ebe,

² ne o-bí kámbé o/fu, ben ba/koo busa ḿbú Busun-Osówo ké nkéré ben ba/bángê ké Jisos ne atyém enen dí. Mbé ba-faa ǎ ba/fu, be byi*da/jwo ne nang ojwo ójwo ba/fu, chwǒm nkyi kô ńkyí badakó Busun-Osówo*.

³ Pôl o-bí kámbé kâng o/fu, ebóng dyizong-osoo mú Osówo mú ben ba/koo. Mbé ba-faa ǎ ba/fu, osoo mú Osówo mú Jǒn o/raa kyi-kim ne mǔ.

⁴ Pôl o-sét kámbé o/fu, osoo mú Osówo mú Jǒn o/sét o/mû mú banet-Ézerel ḿbé ba/saa byiko ba-mîng byibî ebe, ne Jǒn o/sét banet-Ézerel ámbe o/fu, babángê ne atyém ebe ké onet mú mu o-bâ ǎ ké kyikû, ányi kyi/byí, babángê ké Jisos.

⁵ Ké nkéré banet ḿbé Pôl mu o-raa ng ne mbé éné ba/jwo ńkyín, ba/koo osoo mú Osówo ké dyizîn ńdyí Jisos, Otu Kyítá.

⁶ Pôl o-twôom kámbé abwô ké byiko, ne ba-koo busa ḿbú Busun-Osówo. Ba-kpet eraa ké ejá nyí banet ba*fí ba-nyît ng kyikû* ba-kpet epem bǎmpém ḿbé ba/fím ne Osówo.

⁷ Banet ámbe kángkáng ba/mû banyinchéng ashí diǐkpú ne afee.

⁸ Ké etukáku echât, Pôl o/mû mu o-câ ké kyise-ékwâbashi ńkyí banet-Jûs, o-sét ng banet byiraa-Osówo, nang achi-banet o*da/shî* o-kán n ké dyishí ne mbé o/fu, nyǐ o-chi i kámbé ba-nyît ba/fu, ńkyí nyǐ mu o-sét ng kámbé kyi-kim ne Butu ḿbú Osówo nkyi ntûntû.

⁹ Nké banet bakíri ba/mû ba-shwane e ashí, ba*da/tî atông ba-jwo ne atyém ebe* ne ba-raa byibî-byiraa ké bushú-bujê-banet ámbe kángkáng kyi-kim ne Bukwóp-Dyikpen ḿbú Otu Kyítá o/tông. Pôl o-dim kâng o-mîng kámbé, o-kpî banet ḿbé ba/bángê ké Jisos ne atyém ebe o-dim ne mbé. O-kpet etî ncibi ne mbé kángkáng dyicí ké ócâm-byiraa ejwo mú Taránus.

¹⁰ Pôl o/chi ńkyín ké aje afee. Ké bukwóp ámbu kâng, kángkáng banet-Jûs ne ḿbé ba*fí banet-Jûs* ḿbé mbe ba-kyú u ké Ésha ba-jwo kyi-kim ne bǎmpém ḿbén ḿbé ba/kim ne Otu Kyítá.

Bwǎn ḿbé Kyíba ba/kan ba/fu, Mbé ba-ró ng Byibî-Bací

¹¹ Osówo o/mû mu o-chi i biǐtí-akat ḿbyí banet ba/mû ba*da/ri ne* ké abwô nyí Pôl.

¹² Banet ba/mû ba-yip ng áfáré ne byídí-bǎmkpóngé ḿbyí Pôl ba-da ng eta banet-byirwóm ké byiko. Áfáré ányi ne byídí ámbyi byi/mû byi-chi i banet-byirwóm ámbe ba-nyange e, byi-ró ng to kámbé byibî-bací ké byiko.

¹³ Banet-Jûs bakíri ḿbé ba/mû ba-cen n ba-wáp ng, ba-ró ng banet byibî-bací ké byiko ba/kan to ba/fu, mbé ba-yip ng dyizîn ńdyí Jisos, mbé ba-kûró byibî-bací. Ba-raa ng ne byibî-bací ba/fu, me n/nyán ǒ ké busa ḿbú dyizîn ńdyí Jisos mú Pôl mu o-sét ng kyi-kim ne nyǐ.

¹⁴ Bwǎn-otu-nchi kyifen-Osówo mú odabángê Kyíba ashí káchâtkányi nké ba/mû ba-chi i ńkyín.

¹⁵ Nké kyibî-bucí kyi/raa ne mbé kyi/fu, me mu n-nyît ng Jisos, ne mu n-nyît ng to kyi-kim ne Pôl, nké ben, ben ebóng dyizong-banet.

¹⁶ Onyinchéng ámu mú o/mû ne kyibî-bucí o-kye kámbé bunwa ne busa ḿbú o/kpógê kámbé. O-némê kámbé, o-ját kámbé byídí ké byiko, bwǎn ámbe ba-chêe ké kyise emen.

¹⁷ Kángkáng banet-Jûs ne ḿbé ba*fí banet-Jûs* ḿbé ba/mû ba-kyú u ké Éfyísus ba/jwo kyi-kim ne chwǒm ńkyín. Bushî bu-róng kámbé, ne banet ba-kpet ekye dyizîn ńdyí Jisos, Otu Kyítá ofê ba-shwôm eringe nyí kyi/mû ké kashú.

¹⁸ Banet chwóó ké burwám ḿbú ba/bángê ké Jisos ne atyém ebe ba/bê ba-ba-bwom kyíjí wááng ba-bángê, ba-sét byibî ebe ḿbyí ba/chi.

¹⁹ Banet to chwóó ḿbé ba/mû ba-chi i bambirirím ba-wuri banwet ebe ba-zû kyikit kyibónge, ba-cók okwâ ba-fé ké mbé ba-shí ké bushú ḿbú kángkáng banet. Banet ámbe ba-cibi ocím-akpuga nyí ba/ré banwet ámbe o-byí égot-akpuga-syílyíba etánge etánge ké bajam-byikit bafee esim-byikit diǐkpú.

²⁰ Ké bubwô-biǐtí-byěm ḿbyí byi/chi něen, banet ba-kpet ebángê ké Jisos ne atyém ebe, ba-jê ng ba-câ kashú.

Banet ḿbé ké Éfyísus ba/kpet ne Bunwa

²¹ Ké nkéré mú byěm ḿbyín bii/chi, Pôl o/kabe ne dyityém emen o/fu, nyǐ o-cen n o-shwôm ké Masedónya ne Girîs o-dim Jerúsélem. O-raa o/fu, ké nkéré mú nn/ribi Jerúsélem, m-man n-ca to Rûm.

²² Ne o-twóm kâng Tyímótyi ne Erásátus, ḿbé ba/mû ké burwám-banet ḿbé ba/mû ba-chwáp ng ǎ, ba-dim Masedónya. Nyǐ oyén o/fu, nyǐ o-chî ng ekyú ké kyikim-nkéré ké Ésha.

²³ Kyi/mû ké nkéré mún nké kiǐtí-afaníkong kyi/róng ké Éfyísus ké bubwô-Bukwóp-Dyikpen ḿbú Otu Kyítá o/tông.

²⁴ Onyinchéng obónge mú odabángê Dyimétoros, mú odayip syílyíba o-chi byěm, o/yip syílyíba o-mee boose-kyifen echi ḿbú bu/mû wǎ kyise ńkyí badachi kyifen ba-kyâ orím-bukye-osówo-onyinyi mú badakó Atémyis. Ḿkpóngé emen mún o/chi banet ḿbé mbe ba-chi i bǎmkpóngé ámbe ba-já akpuga kanong kanong.

²⁵ Dyimétoros o-kó kâng kángkáng banet ḿbé mbe ba-chi i bubwô-bǎmkpóngé ámbe kyikit kyibónge ne banet bakíri ḿbé bǎmkpóngé ebe ba/mû wǎ ḿbé ebe, ne o-raa ne mbé o/fu, esang eten kángkáng nyi e-fím m ké bǎmkpóngé ḿbén ḿbé byimu byi-chi i.

²⁶ Ben bayén bamu ba-ri ng ba-jwo ng ńkyí enyam-onyinchéng mún mú bada ǎ ekó Pôl mu o-chi i. Mu o-sét ng o/fu, erím-bakye nyí banet ba/kúng abwô ebe ba-chi e*fí ne busa nang kaǎnyín*. Ne oo/chi banet chwóó ba-bángê ne nyǐ ba/fu, ńkyí nyǐ mu o-sét ng nkyi ntûntû, nyín ké Éfyísus ne ké bujê-byikit chwóó, ké Ésha.

²⁷ Be byi/firi kántîk kâng ké kyibî-bukwóp ńkyí bubwô-bǎmkpóngé eten ḿbún bu/chi bu-koo kyibî-dyizîn. *Chí nang ńkyín nké nke* kyibî to nkyi kyi-bâ ńkyí kyise-kyifen echi ńkyí kiǐtí-orím-bukye-osówo-onyinyi Atémyis kii*ba/chi kyi-chîbyí chwǒm* ké achi nyí banet*. Banet baa*ba/chi ba-chî ǎ ekúng wǎ kiǐtí-osówo*. Osówo-onyinyi mú kángkáng banet ḿbé ké Ésha ne ejíí emúmú mbe ba-fâ ǎ.

²⁸ Ké nkéré bujê-banet ámbe ba/jwo ńkyí Dyimétoros o/sét, efong e-bírî kámbé, ne ba-kpet ewonge ba/fu, Atémyis mú Éfyísus okpen ne banyá.

²⁹ Dyiwonge ńdyín dyi-káng oshê omúmú. Dyizu-banet ḿbé ba/firi ké busa-dyityém ba-kám Gáyus ne Aryisatákus ḿbé banyinchéng-Masedónya ashí afee, ḿbé ba/mû ba-cen n ne Pôl ké kyikû, ba-tut kámbé ochéé óchee ba-ca ne mbé ké kyikit ńkyí banet-oshê ba/kyú.

³⁰ Pôl oyén o/mû o/fu, nyǐ o-da ng ebwom ké bushú-bujê-banet ámbe, nké banet ḿbé ba/bángê ké Jisos ba*da ǎ ebángê*.

³¹ Kyicê-banet-ashí-byikim-eshê ánkyi ḿbé ba/mû bacín-Pôl ba/twóm ejá, ba-tîm ǎ arông ba/fu, o*dachi o-tông byiko emen ké kyikit ńkyí banet-oshê ba/kyú*.

³² Banet ḿbé ba/mû ké ncibi ámu ba/mû mbe ba-chi i kyicoge ńkyí kii*nwa eri*. Kyicê-banet ba/mû mbe ba-wonge e chwǒm kyibónge, bakíri ba-wonge e kyikíri, ké ebóng, bujê-banet chwóó ba*fí ba-nyît ng ńkyí kyi/chi ne mbé ba-ba-cibi kyikit kyibónge*.

³³ Banet bakíri ba/mû ba-kabe ng ba/fu, Alyikyizánda nké o/cen ne nkyí, ké ebóng, banet-Jûs ba/sét ǎ ba/fu, oda-bwom ké otyém. Alyikyizánda o-shwóm kâng akwâ o/fu, banet bacíbî pyêp, ne o-kan o/fu, nyǐ o-sét ng kámbé o/fu, *chí nyǐ ne bábe nké ba/cen ne ńkyí kii/chi*.

³⁴ Nké ké nkéré banet ámbe ba/nyît ba/fu, Alyikyizánda o-chi i onet-Jûs, mbé ashí kángkáng ba/wonge dyizong-ejá dyibónge ké égbáng efee ba/fu, Atémyis mú Éfyísus okpen ne banyá.

³⁵ Ké nkuli kyikû kâng, nsâng banwet-oshê o-nwa o-chi bujê-banet ámbe ba-cíbî pyêp. O-raa ne mbé o/fu, banet-oshê-Éfyísus, nang yeě nang yeě mu o-nyît ng o/fu, oshê mú Éfyísus nké mu o-tún n kyise-kyifen echi ńkyí Atémyis mú mu kiǐtí ne buká-ociring ḿbú bu/fím kyíbóng bu-ba-róng kyísí.

³⁶ Onet o*fí mú odaman ené byěm ḿbyín*. Ben ba-man ba-tî kâng atyém enen kyísí, ba*dachi ba-chi chwǒm* wǎ ba*fí ne okabe*.

³⁷ Ben baa/bê ne banyinchéng ḿbén nyín, nang ké ba*da/jii byěm-ociring ké kafâ-byise-kyifen echi* ba-bwa ba-raa to nang kyibî-chwǒm kyi-kim ne orím-bukye-osówo eten*.

³⁸ Â Dyimétoros ne banet-bǎmkpóngé emen mbe ne chwǒm ńkyí ba/fu, onet o/chi kámbé, esuk nyi kô nyí mbe ba-tî ng kángkáng nkéré ne banet-ashí to mbe kô. Ba-man n ece ké esuk ba-pan mpan ne barî.

³⁹ Nké â chwǒm kyikíri nkyi kô, ńkyí bamu ba-ryuu ng, ba/chi ba-tóbê kánkyí ké ncibi-oshê mú banet-ashí mbe ba-kó ng.

⁴⁰ Ké ebóng, kyibî nkyi kô ńkyí banet-Rûm ba/chi ba-fu ba/fu, be bii/cen ne bunwa ḿbú bu/koo oshê omúmú ké ńkyí kii/chi kurún. Be byi*fí ne bukwóp ḿbú byidachi dyizong-kyicoge ńkyín* ne bii*ba/chi byi-já chwǒm ńkyí byi/chi byi-sét kyi-nwa bě* ké kyicoge ńkyí bii/chi něen*.

⁴¹ Ké nkéré mú oo/raa ńkyín, o-sét kángkáng banet ḿbé ba/mû ányi o/fu, bajâ.