ÂAK BǍMKPÓNGÉ ḾBÉ BANET-KYITWÓM-JISOS BA/CHI, ḾBÉ BADAKÓ ÂAK 18 - Bokyi Bible

Pôl o/pem Bǎmpém ḿbé Banong ké Kórin

¹ Ké nkéré mú Pôl oo/pem ké esuk nyí Eryǎpígus, o/dim ké Áten o-wâa Kórin.

² Ké Kórin nké Pôl o/kâm onet-Jûs obónge mú odabángê Akwéla, mú ba/fwon ǎ ké Póntus, mú ka*da/rí ne ké o/fím Étalyi ne onyi emen o-ribi ányi*. Ké ebóng, otu mú Rûm mú odabángê Kaládyus o/kye busa o/fu, kángkáng banet-Jûs ba*dachîkyú ké Rûm*. Pôl o/dim o/fu, nyǐ o-da ng eri kámbé.

³ O-kyú o-chi bǎmkpóngé ne mbé, ké ebóng, nyǐ o/mû mu o-já ng akpuga nyí mu o-ré ng byiryíng ké byídí echi ḿbyí badabi mpyep, wǎ eringe mbé to ba/mû ba-chi i.

⁴ Pôl o/kán ké dyishí kángkáng ékwâbashi ké kyise-ékwâbashi ńkyí banet-Jûs ne banet-Jûs ne ḿbé Girîs o/fu, nyǐ o-chi i kámbé ba-bángê ké ńkyí nyǐ mu o-sét ng.

⁵ Ké nkéré mú Sálas ne Tyímótyi ba/fím Masedónya ba-kâm Pôl, Pôl o*da/chîchi chwǒm kyikíri* kyi-cibi ne banet epem bǎmpém kyi-kim ne Jisos* o-tông ng kámbé wááng o/fu, Jisos nké mu onet mú Osówo o/kúng ǎ butu*.

⁶ Ké nkéré ba/né ńkyí nyǐ o/sét kámbé, ba-raa byibî-byiraa kyi-kim ne nyǐ, Pôl o-pâ ecing ké byídí emen o-pwó kámbé, o-faa kámbé ne ejá nyí shwaneshwane o/fu, â ben baa/két byiko enen ba-mîng Osówo, ben bayén nké ba/chi ba-koo ébîn. Me n*fí abwô ké kafâ*. Kyi-fím kántîk kyi-câ kashú, me n/chi m-mîng běn, m-bírî n-kâm banet ḿbé ba*fí banet-Jûs* n-kûpem kámbé byiraa-Osówo.

⁷ Ne Pôl o-dim kâng o-mîng banet-Jûs ámbe, o-da-kpet ekyú ké kyise-onyinchéng obónge mú o*fí onet-Jûs* mú odabángê Tátyus-Júsútus, mú o/mû o-fâ Osówo. Kyise-onyinchéng ámu kyi/mû fáráng ne kyise-ékwâbashi ńkyí banet-Jûs.

⁸ Onet-dyishí-kyise-ékwâbashi ánkyi mú odabángê Kyirísípus o-bángê ké Otu Kyítá ne dyityém emen, nyǐ ne kángkáng kyikû-banet emen. Banet bakíri to chwóó ké Kórin ba/jwo ńkyí Pôl o/sét, ba-bángê, ba-koo osoo mú Osówo.

⁹ Buchú bubónge, Pôl o-ri chwǒm-akat ńkyí Otu Kyítá o/raa ne nyǐ o/fu, *dachi a-shî* raa ng a-câ kashú, *dachi a-kyee*

¹⁰ ké ebóng, me mu ne wo ké kyikû. Onet o*fí mú o/chi o-man ǒ enémê* ké ebóng, banet chwóó ké oshê mún ba-chi i banet ejí.

¹¹ Ne Pôl o-rí kâng dyije ne kyicê ké oshê ámu, o-tángê e banet byiraa-Osówo.

¹² Ké nkéré banet-ashí ḿbé Rûm ba/chi Gályo onet-dyishí mú Girîs, banet-Jûs ba/cibi kyikit kyibónge, ba-kám Pôl ba-ca ne nyǐ ké esuk,

¹³ ba/fu, onyinchéng mún mu o-kan n o/fu, nyǐ o-chi i banet ba-kûfé Osówo ké bukwóp ḿbú kyije kyi*da/bángê*.

¹⁴ Pôl o/mû o-kú o-bâ efaa ojá, nké Gályo o/bwóp kashú o-kpet eraa ne banet-Jûs o/fu, â kyi/mû chwǒm ńkyí Pôl oo/róng ké chwǒm, nang oo/chi kyibî-chwǒm, m/mû n/chi n-fwôo atông n-jwo běn, ǎ banet-Jûs.

¹⁵ Nké ké nkyi okân ké dyishí kyi-kim ne byiraa ne azîn ne byije enen, ben bayén ba-man ba-tóbê kánkyí. Me mm*ba/chi m-pan mpan mú azong-byěm ányi*.

¹⁶ Ne o-kye busa ba-ró kámbé ké esuk.

¹⁷ Kángkáng banet-Jûs ámbe ba-kám Sóténes mú o/mû onet-dyishí mú kyise-ékwâbashi ebe, ba-mín ǎ ányi ké bushú-esuk. Nké ńkyí ánkyi kyi*da/chi Gályo wǎ chwǒm*.

Pôl o/bwa Esim ké Ántyok

¹⁸ Pôl o/rí ací chwóó ké Kórin ne barî-banet ḿbé ba/bángê ké Jisos ne atyém ebe, ne o-mîng kámbé kâng o-kpî Peresyíla ne Akwéla ba-nung ńsukyíkang mú mu o-wâa ng Syírya. Ne Pôl o-kûdim, o/ryí barî-banet ámbe ocím ké bushú ḿbú Osówo, ké Senchíryâ, ne o-tî dyishí emen o-pwát.

¹⁹ Ba-cen ba-ba-ribi ké Éfyísus, ké kyikit ńkyí o/mîng Peresyíla ne Akwéla ányi. Pôl o/danung o-kán ké dyishí ne banet-Jûs ké kyise-ékwâbashi ebe.

²⁰ Banet-Jûs ámbe ba-sét ǎ ba/fu, orí ne mbé chwóó, nké Pôl o*da/bángê*.

²¹ Nké o/bwa o-sét kámbé ké nkéré mú mu o-dim m o/fu, â Osówo o/bángê, n/chi m-bwa esim n-kâm běn. Ne o-nung kâng ké ńsukyíkang ányi ké Éfyísus o-dim.

²² Ké nkéré mú o/ribi Sizaryâ, o/shwôm Jerúsélem o-da-ta banet-ékwâbashi nyí Karâs kyiraa, ne o-dim Ántyok ké Syírya.

²³ Ké nkéré mú oo/rí ké Ántyok ké kaǎnyín-nkéré, o-dim. O-cen o-shwôm ké esí nyí Galísha ne Fyíryígya, o-chi banet ḿbé ba/bángê ké Jisos ne atyém ebe ba-firi shwaneshwane ké obánge ebe.

Apólos o/sét Banet Bǎmpém ḿbé Banong ké Éfyísus ne Kórin

²⁴ Onet-Jûs obónge mú odabángê Apólos, mú ba/fwon ǎ ké Alyikyizándara o/bê ké Éfyísus. Apólos o/mû o-nyît ng kyiraa ne o/mû oo/kwâa ejá-Osówo nyí ba/sáng kyísí o-nyît kanong kanong.

²⁵ Nyǐ o/mû oo/kwâa kanong kanong kyi-kim ne Bukwóp-Dyikpen ḿbú Otu Kyítá, ne ké dyityém ńdyí mu o-nyît ng o/fu, ńkyí mu o-sét ng nkyi kiǐtí, nyǐ o/raa o-tángê to byiraa ḿbyí ntûntû dángdáng kyi-kim ne Jisos. Nké nyǐ o/mû o-nyît ng kâng kyi-kim ne osoo mú Osówo mú Jǒn o/mû o-kyâ banet nké nke.

²⁶ Apólos o-kpet epem o-sét ng banet ké kyise-ékwâbashi ńkyí banet-Jûs, nang achi-banet o*da/shî*. Ké nkéré Peresyíla ne Akwéla ba/jwo ńkyí o/sét, ba-yip ǎ ba-jâ ne nyǐ ké kyise ebe, ba-chîbwât Bukwóp-Dyikpen ḿbú Osówo ba-sét ǎ ké bukwóp ḿbú bu/nwa bu-shwôm.

²⁷ Apólos o-sét kámbé o/fu, nyǐ o-kú o-dim m Girîs, ne barî-banet kâng ḿbé ba/bángê ké Jisos ne atyém ebe ké Éfyísus ba-nyángê ǎ ba-sáng léta ba-kye bábe ḿbé mbe ké Girîs, ba-tîm kámbé arông ba/fu, bakoo ǎ kanong kanong. Ké nkéré mú Apólos o/ribi Girîs, o/mû kiǐtí-ochwâp mú banet ḿbé ké bubwô ḿbú kanong ńké Osówo ba/firi banet ḿbé ba/bángê ké Jisos ne atyém ebe.

²⁸ Ké ebóng, ké oshunshwan-okân ké dyishí emen, o/kpógê banet-Jûs ké okân ké dyishí mú banet badakyú ba-jwo, o-tông wááng ké ejá-Osówo nyí ba/sáng kyísí o/fu, Jisos o-chi i onet mú Osówo o/kúng ǎ butu.