ÂAK BǍMKPÓNGÉ ḾBÉ BANET-KYITWÓM-JISOS BA/CHI, ḾBÉ BADAKÓ ÂAK 17 - Bokyi Bible

Ba/kye Be Pôl Busông ké Tesalonáka

¹ Ba/cen ba-shwôm ké Amfyípólyis ne Apolónya ne ba-ribi Tesalonáka, mú o/mû ne kyise-ékwâbashi ńkyí banet-Jûs.

² Ké édúú emen nyí mu o-fwam m echi, Pôl o/ce ké kyise-ékwâbashi ánkyi. Ké ací-ékwâbashi achât, Pôl o/kán ké dyishí ké kyise-ékwâbashi ánkyi ne banet ḿbé ba/mû ányi, o-kó ng ejá-Osówo nyí ba/sáng kyísí o-sét ng kámbé.

³ O-sét ng kámbé eringe nyí kyikû emen kyi/byí, o-tông ng banet ámbe o/fu, ejá-Osówo ányi nyí ba/sáng kyísí e/sét e/fu, onet mú Osówo o/kúng ǎ butu o/mû o-man o-ri busông, o-jwóbê ké bukyû. Pôl o-sét kámbé o/fu, Jisos mún mú me mu n-sét ng běn kyi-kim ne nyǐ o-chi i onet mú Osówo o/kúng ǎ butu.

⁴ Kyicê-banet ba/bángê ba/fu, ńkyí Pôl mu o-sét ng nkyi ntûntû, ne ba-nung ké burwám ḿbú Pôl ne Sálas. Bujê-banet to chwóó ḿbé banet-Girîs ḿbé ba/mû ba-fâ Osówo ne biǐtí-banyinyi to chwóó ba/bángê ne Pôl.

⁵ Nké kafâ ka/kpet esa kyicê-banet-Jûs ké bubwô ḿbú banet chwóó ba/bángê ne Pôl, ne ba-dim ba-da-kpî bankyê byiraa ba-ba-cibi kyikit kyibónge, ba-firi wǎ banet ḿbé kafâ nke ka-sa ng kámbé. Banet-Jûs ne bankyê byiraa ámbe ba-kpet echi kyibî-kyicoge ké oshê, ba-díp afyi-kyise ńkyí Jésin ba-sé ba/fu, mbé ba-kyé ng Pôl ne Sálas, mbé ba-bâ ne mbé ké bushú ḿbú banet-oshê.

⁶ Nké ké nkéré ba*da/ri kámbé* ba-tut Jésin ne barî-banet bakíri ḿbé ba/bángê ké Jisos ne atyém ebe, ba-bâ ne mbé ké bushú-banet-ashí-oshê, ba-wonge ba/fu, banet ḿbén baa/chi byiraa byi-róng ké kángkáng byikit. Kántîk baa/bê nyín ké oshê eten,

⁷ ne Jésin oo/koo kámbé o-tî ké kyise emen. Mbé kángkáng mbe ba-róng ng byije ḿbyí otu mú Rûm o/kye bě, ba/fu, otu okíri mu kô mú odabángê Jisos.

⁸ Ké byiraa ḿbyí ba/sét něen, ba/chi bujê-banet ḿbé ba/mû ányi ne ḿbé banet-ashí-oshê ba-firi ne atyém yógeyóge.

⁹ Ḿbé banet-ashí-oshê ba-chi Jésin ne bábe ḿbé áku ba-kye ocím-akpuga mú badazú kámbé abwô, ne ba-mîng kámbé kâng ba-dim.

Banet Chwóó ké Beryâ ba/bángê ké Byiraa ḿbyí Pôl o/sét

¹⁰ Buchú bu-jí i bu-bâ, barî-banet ḿbé ba/bángê ké Jisos ba-twóm Pôl ne Sálas ba-dim Beryâ. Ké nkéré ba/ribi ké oshê ámu, Pôl ne Sálas ba/ce ké kyise-ékwâbashi ńkyí banet-Jûs.

¹¹ Banet ḿbé ké oshê ámu ba/mû ne atyém wááng nyí badajwo byiraa-Osówo ba-shwôm banet ḿbé ké Tesalonáka. Mbé ba/mû ba-ryuu ng ba/fu, mbé ba-fwôo ng atông ba-jwo ńkyí Pôl o/sét, ne ba/kwâa ejá-Osówo nyí ba/sáng kyísí kángkáng dyicí ba/fu, mbé ba-ri ng â ńkyí Pôl o/sét nkyi ntûntû.

¹² Banet chwóó ké burwám ebe ba-bángê ké Jisos ne atyém ebe. Biǐtí-banyinyi-Girîs chwóó ne banyinchéng-Girîs to chwóó ba-bángê to ké Jisos ne atyém ebe.

¹³ Nké ké nkéré banet-Jûs ḿbé ké Tesalonáka ba/jwo ba/fu, Pôl oo/pem to banet byiraa ḿbyí Osówo ké Beryâ, mbé ba/bê ké Beryâ ba-ba-kpet echi banet ba-cibi ké azu nyí kafâ nke ka-sa ng kámbé.

¹⁴ Ké abe ányi, barî-banet ḿbé ba/bángê ké Jisos ne atyém ebe ba-twóm Pôl o-dim ké bukô-baya ḿbé baryên. Nké Sálas ne Tyímótyi ba/waa ké Beryâ.

¹⁵ Banet ḿbé ba/mû mbe ba-sí ng Pôl ba/cen ne nyǐ tete ba-ribi ké oshê mú badakó Áten. Ne ba-bwa esim kâng ké Beryâ ne kyitwóm ńkyí Pôl o/sét kámbé o/fu, Sálas ne Tyímótyi banwa ba-kâm ǎ babap.

Pôl o/pem Banet ḿbé Áten Bǎmpém

¹⁶ Ké nkéré Pôl mu ké Áten o-bám m Sálas ne Tyímótyi o/fu, bakâm ǎ, kafâ ka*da ǎ enyîn* ńdyí o/ri ké oshê omúmú oo/sú ne erím-bakye*.

¹⁷ Ne o-kpet ekán ké dyishí kángkáng dyicí ne banet-Jûs ne banet ḿbé ba*fí banet-Jûs* ḿbé mbe ba-fâ Osówo ké kyise-ékwâbashi ńkyí banet-Jûs, ne ké ntim-kasî ne banet-oshê ḿbé mbe ba-bâ ba-kâm ǎ.

¹⁸ Kyicê-bantánge byěm ḿbé badakó kámbé Epyikóryan ne ḿbé badakó kámbé Sotówik ba/kán to ké dyishí ne Pôl. Kyicê ba/fu, onet-kafâ-dyikán-onyinchéng mún mu o-kan n ebóng esét. Bakíri ba/fu, nkyi wǎ mu o-raa ng kyi-kim ne erím-bakye nyí banet ḿbé ba*da/fím nyín*. Mbé ba/raa ńkyín, ké ebóng, Pôl o/mû mu o-sét ng kyi-kim ne Jisos ne ojwóbe ké bukyû.

¹⁹ Ne ba-kpî Pôl kâng ba-bâ ne nyǐ ké bushú-esuk nyí nyi e-kyú u ké kaku ńké badakó Eryǎpígus, ba-sét ǎ ba/fu, be byimu byi-ryuu ng byi/fu, byi-jwo ng dyizong-otánge mún mú ofyîfî, mú wo amu a-raa ng kyi-kim ne mǔ.

²⁰ Byěm byikíri ḿbyí be byimu byi-jwo ng ǒ a-raa ng něen byi*da/jwo ne kámbyí nang kabónge* nké byimu byi-ryuu ng byi-jwo kyikû emen.

²¹ Ké ebóng, kángkáng banet-oshê-Áten ne bacinbánet ḿbé mbe ba-kyú u ányi kyi-nyîn n kámbé ba-kûkyú ba-sét ng, ba-jwo ng to chwǒm ńkyí kyifyîfî ńkyí nkyi kyi-chi i.

²² Pôl o-bûu o-bwom ké bushú-banet-esuk ányi nyí nyi e-kyú u ké Eryǎpígus, ne o-kpet epem o/fu, banet-oshê-Áten, me mu n-ri ng ké bukwóp nang burá nang burá n/fu, ben bamu ba-fâ esówo chwóó kanong kanong.

²³ Ké ebóng, ké nkéré mu n-cen n ké otyém-oshê enen, n-tún n achi ké biinchéng-bakye enen, me n/ri to kyikit ńkyí bamu ba-chi i kyifen ńkyí ba/sáng ányi ba/fu, kyi/já Osówo mú baa*nyît ǎ*. Ńkyí ben bamu ba-fâ kâng éné nang ba*fí ba-nyît ng kánkyí* nkyí nké me n-kûbâ běn esét kántîk.

²⁴ Osówo mú o/chi ejíí ne kángkáng byěm ḿbyí mbyi ké nyǐ o-chi i Otu mú bubóng ne esí, ne o*fí o-kyú u ké byise-byifen echi ḿbyí banet ba/bi*.

²⁵ Nang chwǒm nang kyibónge ńkyí banet badaman echi ba-kye ǎ o*fí o-ryuu ng* ké ebóng, nyǐ oyén nké mu o-kyâ kángkáng banet dyikpen ne kiǐnjáng ńkyí badashû ne kángkáng byěm byikíri.

²⁶ Osówo o/bwóp kpá kashú o-chi onet obónge, ne fím ké onet ámu obónge nké kángkáng banet ḿbé ké ejíí ba/firi, ne o-chi kámbé ba-kpet ekyú ké ejíí emúmú. Nyǐ oyén o/tî kpá kyikû ké esim ochíchí-bankéré ne byikit ḿbyí banet ba/chi ba-kyú ba-nyere.

²⁷ Nyǐ o/chi ńkyín, eringe nyí banet ba/chi ba-kyé ǎ, ne katô ba/chi ba-ri ǎ ké nkéré ba-kú ba-fwôo ng abwô ba-kyé ng ǎ. Nké ké bukwóp bukíri, nang yeě nang yeě ké ntûntû, Osówo o*da ǎ etíbî*

²⁸ wǎ eringe onet obónge o/sét o/fu, ké bubwô emen nké byimu byi-kpen n, byi-cen n, ne byimu okpó. Nkyi wǎ eringe nyí banet enen bakíri ba/sáng ké banwet ba/fu, be to byi-chi i bwǎn emen.

²⁹ Ké bubwô ḿbú be byimu bwǎn emen, be byi*dachi byi-kabe byi/fu, Osówo mu wǎ chwǒm ńkyí badamee ké gûl* nang ké syílyíba* nang ké buká* ńkyí onet odakúng mpwô o-chi*.

³⁰ Osówo o/fu, nyǐ oo*chi chwǒm kyi-kim ne nkéré mú banet ba/mû ba*fí ba-nyît ng ǎ* nké kántîk oo/kye busa o/fu, kángkáng banet ké kángkáng byikit basaa byiko ba-mîng byibî-akwóp ebe.

³¹ Ké ebóng, nyǐ oo/tî dyicí ńdyí nyǐ o/chi o-pan ejíí emúmú mpan ké bukwóp ḿbú ntûntû, ne onet mú nyǐ oo/fîm ǎ nké o/chi o-pan mpan ámu. Nyǐ oo/tông nang yeě nang yeě ekap ńnyín wááng ké ojwóbe mú nyǐ oo/jwóbê onet ámu ké bukyû.

³² Ké nkéré ba/jwo Pôl o/raa kyi-kim ne ojwóbe ké bukyû, kyicê-banet ba-kpet ǎ ejwó, nké bakíri ba/fu, be byimu byi-ryuu ng byi/fu, byi-jwo ng ǒ a-chîraa kyi-kim ne ńkyín dyicí dyikíri.

³³ Ne Pôl kâng o-byí o-mîng esuk ányi.

³⁴ Banet bakíri ba/nung Pôl ké burwám, ba-bángê ké Jisos. Ké burwám ebe, kyi/mû Danyísus mú o/mû ké burwám-banet-esuk ányi ne onyinyi mú odabángê Damáris ne banet bakíri.