ÂAK BǍMKPÓNGÉ ḾBÉ BANET-KYITWÓM-JISOS BA/CHI, ḾBÉ BADAKÓ ÂAK 15 - Bokyi Bible

Banet-Kyitwóm-Jisos ne ḿbé Banet-Ashí ba/cibi ké Jerúsélem

¹ Banyinchéng bakíri ba/fím Judyâ ba-bâ Ántyok, ba-ba-kpet etángê barî-banet ḿbé ba/bángê ké Jisos ba/fu, Osówo oo*ba/chi o-nyii běn* tete ba-cên běn wǎ eringe nyí Byije-Músis byi/sét.

² Pôl ne Bánábas ba-kán okân ké dyishí kanong kanong ne mbé kyi-kim ne kyiraa ńkyín. Ne ba-cibi kâng ba/fu, Pôl ne Bánábas ne banet bakíri ḿbé ba/fím Ántyok baca Jerúsélem ba-da-ri banet-kyitwóm-Jisos ne ḿbé banet-ashí kyi-kim ne kyiraa ńkyín.

³ Banet-ékwâbashi nyí Karâs ámbe ba-twóm kámbé ba-dim, ne ké nkéré ba/cen ba-shwôm ké esí nyí Fonésha ne Samérya, ba-sét banet eringe nyí banet ḿbé ba*fí banet-Jûs* baa/bírî ba-kú ba-fâ Osówo. Bǎmpém ḿbén ba/kye kángkáng kyikû-banet ḿbé ba/bángê ké Jisos bunyîn-dyityém.

⁴ Ké nkéré mú ba/ribi Jerúsélem, banet-ékwâbashi nyí Karâs ne banet-kyitwóm-Jisos ne ḿbé banet-ashí, ḿbé mbé ba/sét kámbé kángkáng byěm ḿbyí Osówo oo/chi ké abwô ebe, ba/koo kámbé ne bunyîn-dyityém.

⁵ Nké kyicê-banet ḿbé ba/bángê ké Jisos, ḿbé ba/mû ké ncibi mú badakó Fárasyî ba/bûu nensang ba-raa ba/fu, ba-man ba-cên banet ḿbé ba*fí banet-Jûs* ba-sét kámbé ba-kûchi wǎ eringe nyí Byije-Músis byi/sét.

⁶ Banet-kyitwóm-Jisos ne ḿbé banet-ashí ba-kyú ké ncibi ba/fu, mbé ba-kabe ng kyi-kim ne kyiraa ńkyín.

⁷ Ké nkéré mú baa/kán barî ké dyishí chwóó, Pyíta o/bûu nensang o-raa o/fu, bwǎn-bané ejí, ben bamu ba-nyît ng ba/fu, ké nkéré mú oo/shwôm ké esim chwóó, Osówo o/fîm mě ké burwám enen o/fu, me nda-sét banet ḿbé ba*fí banet-Jûs* Bǎmpém ḿbé Banong kyi-kim ne Jisos, eringe nyí mbé ba/chi ba-jwo ba-bángê ne atyém ebe.

⁸ Ne Osówo mú mu o-nyît ng atyém nyí banet o/tông o/fu, banet ḿbé ba*fí banet-Jûs* ba-man n ebángê to ké Jisos ké busa ḿbú Busun-Osówo ḿbú o/kye kámbé, wǎ eringe nyí o/kye bě to.

⁹ Nyǐ o*da/tông o/fu, be ne mbé byi/yángê*. Nyǐ o/fîm byibî ké atyém ebe, ké ebóng, ba/bángê ne atyém ebe.

¹⁰ Ebóng kâng ńkyí ben bamu ba-ryuu ng ba/fu, ba-kan n Osówo kántîk ké atû eyip ba-tû banet ḿbé ba/bángê ne Jisos, nyí nang banchí eten ḿbé kpákpá nang be bayén byi*da/man etû*.

¹¹ Aa*wááng*. Be byimu byi-bángê e ne atyém eten, ne Osówo mu o-nyii ng bě ké bubwô-kanong ńké Jisos, Otu Kyítá, wǎ eringe nyí mbé mbe.

¹² Kángkáng banet ḿbé ba/mû ányi ba/cíbî pyêp ké nkéré mbe ba-fwôo ng atông ba-jwo ng ńkyí Pôl ne Bánábas mbe ba-sét ng kyi-kim ne kángkáng akat ne byěm ḿbyí byidakaa banet byiko, ḿbyí Osówo o/chi ké abwô ebe, ké burwám-banet ḿbé ba*fí banet-Jûs*.

¹³ Ké nkéré mú ba/man ńkyí mbe ba-sét ng, Jêmsyi o-raa o/fu, fwôo n̂g atông ba-jwo mě, ǎ bwǎn-bané ejí.

¹⁴ Sámon oo/pem nyín abe abe o-sét běn eringe nyí Osówo o/bwóp kpá kashú o-tông kyijé emen ne banet ḿbé ba*fí banet-Jûs* ké ofîm mú o/fîm banet ké burwám ebe ba-firi ḿbé emen.

¹⁵ Ejá nyí bamkpábé ḿbé badasét byiraa-Osówo e/tyeem kerededet ne ńkyín, wǎ eringe nyí ejá-Osówo nyí ba/sáng kyísí e/sét e/fu,

¹⁶ Otu Kyítá o/sét o/fu, ké nkéré mú ké kashú, me n/chi m-bwa esim, ne n/chi n-chîbi kyise ńkyí Otu Dívit ńkyí kii/myii. N/chi m-bwât byikit-byise ḿbyí bii/bên, ne n-chîbwât kánkyí m-bi.

¹⁷ Eringe nyí kángkáng banet ḿbé áku kâng ba/chi ba-kyé mě, kángkáng banet ḿbé ba*fí banet-Jûs* ḿbé me nn/kó kámbé n/fu, bafiri ḿbé ejí.

¹⁸ Éné kâng nké Otu Kyítá o/fu, mú o/chi banet ba-nyît ńkyín ké nkéré mú oo/shwôm ké esim chwóó.

¹⁹ Jêmsyi o-raa o-ca kashú o/fu, nkyi ké okabe mú ejí n/fu, be byi*dachi byi-kye banet ḿbé ba*fí banet-Jûs afaníkong* ḿbé ba-kú ba-bírî ng ba-kâm Osówo*.

²⁰ Nké byisáng léta byi-sét kámbé byi/fu, ba*dachi ba-ryí byiryíng-ociring* ḿbyí baa/sháng bakye ké mbyí*. Byi-sét kámbé to byi/fu, bamîng kyibî echi ńkyí badarí ne banet ḿbé ba*da/bé ne dyibé* ba*dachi ba-ryí enyam nang erá nyí ba/shwân kányí* nang baróng-enyam nang bará*.

²¹ Ké ebóng, baa/kó Nwet-Byije-Músis ké kyikim-nkéré chwóó ké byise-ékwâbashi ḿbyí banet-Jûs kángkáng ací-ékwâbashi, ne mbe ba-sét ng byiraa ḿbyí Músis ba-câ ké oshê nang orá nang orá.

Ba/sáng Léta ba-kye Banet ḿbé ba*fí Banet-Jûs* ḿbé ba/bángê ké Jisos

²² Ne banet-kyitwóm-Jisos kâng ne ḿbé banet-ashí cibicibi ne kángkáng banet-ékwâbashi nyí Karâs ba-cibi ba/fu, mbé ba-fîm m kyicê-banet ké burwám ebe, mbé ba-twóm kámbé Ántyok ba-cen ne Pôl ne Bánábas. Ba-fîm Júdas mú ba/mû ba-kó ng ǎ Basábas ne Sálas, banyinchéng ashí afee ḿbé ba/mû ne kiǐtí-ofê ké burwám-kyikû-barî-banet ḿbé ba/bángê ké Jisos.

²³ Ba-twóm kámbé ne léta mún ba/fu, Be banet-kyitwóm-Jisos ne ḿbé banet-ashí ḿbé bwǎn-bané enen byi/ta kángkáng bwǎn-bané eten ḿbé ba*fí banet-Jûs* ḿbé mbe ba-kyú u ké Ántyok ne Syírya ne Silyísha kyiraa.

²⁴ Be bii/jwo ba/fu, kyicê-banet eten ba/bê ba-kâm běn, ba-ba-kye běn afaníkong, ba-chi okabe enen o-yángê ké byiraa ebe ḿbyí ba/sét. Mbé kâng ba*da/koo bacê ne be ké ńkyí ba/chi éné*.

²⁵ Be kâng bii/kyú kyikit kyibónge, ne bii/bángê ashí kángkáng byi/fu, byi-fîm m kyicê-banet byi-twóm kámbé oshê enen. Mbé ba/chi ba-cen ne Bánábas ne Pôl ḿbé bacín-atyém eten.

²⁶ Mbé banet ba/mû ba/chi ba-ju kámbé ké bǎmkpóngé ḿbé ba/chi ba-kye Jisos, Otu Kyítá eten.

²⁷ Be byimu byi-twóm m běn kâng Júdas ne Sálas ḿbé ba/chi ba-sét běn to mbé bayén dyizong-byiraa dyibónge ḿbyí byimu byi-sáng ng běn něen.

²⁸ Be ne Busun-Osówo bii/bángê byi/fu, bii*kye běn to busông bukíri* kyi-cibi ne bachíchí-byije ḿbyín*.

²⁹ *Da n̂g echi ba-ryí byiryíng-ociring* ḿbyí baa/chi kyifen ba-kye erím-bakye*. *Da n̂g echi ba-ryí baróng-enyam nang ebónge*. *Da n̂g echi ba-ryí enyam nang ebónge nyí ba/shwân kányí*. Fîm m̂ byiko enen ké kyibî echi ńkyí badarí ne banet ḿbé ba*da/bé ne dyibé*. Kyi/chi kyi-kyú ne ben kanong, â ba/mîng byěm ḿbyín echi. Kyú n̂g kanong.

³⁰ Ba-twóm banet-kyitwóm ámbe ba-dim Ántyok, ne ba-kó kángkáng banet ḿbé ba/bángê ké Jisos kyikit kyibónge ba-kye kámbé léta ámu.

³¹ Ké nkéré banet ámbe ba/kó léta ámu, kyi/kye kámbé bunyîn-dyityém chwóó ké kyitwóm-busa efé ńkyí ba/twóm ba-kye kámbé.

³² Júdas ne Sálas ḿbé ba/mû bamkpábé ḿbé badasét byiraa-Osówo mbé bayén ba/kúng kyikim-nkéré chwóó ba-pem ne bábe ḿbé ba/bángê ké Jisos, ba-fé kámbé busa ne dyityém ecíp.

³³ Ké nkéré mú baa/rí enyin-ací ne mbé, bábe ḿbé ba/bángê ké Jisos ba-twóm kámbé ba-bwa esim ké bunyîn-dyityém ba-kâm banet ḿbé ba/mû ba/twóm kámbé. [

³⁴ Nké Sálas o/fu, nyǐ o-waa ng áku.]

³⁵ Pôl ne Bánábas ba/kyú ké Ántyok ké kyikim-nkéré. Mbé kángkáng cibicibi ne banet bakíri chwóó ba/tángê, ba-sét banet byiraa ḿbyí Otu Kyítá.

Pôl ne Bánábas ba/pap Barî

³⁶ Ké nkéré mú ací a/chîrí, Pôl o/sét Bánábas o/fu, mîng byi-bwa esim byi-da-ri bwǎn-bané eten ḿbé Karâs ḿbé mbe ké kángkáng eshê nyí byi/sét banet byiraa ḿbyí Otu Kyítá, byi-ri eringe nyí mbe ba-câ kashú.

³⁷ Bánábas o/mû mu o-ryuu ng o/fu, nyǐ o-kpî ng Jǒn mú ba/mû ba-kó ng ǎ Mâk, o-ca ne mbé ké kyikû.

³⁸ Nké Pôl o/mû o*da/kabe o/fu, nkyi kanong* ké ebóng, Jǒn-Mâk o*da/man ekyú ne mbé* tete ba-man bǎmkpóngé ebe* nké o/bwa esim dyijê, o-mîng kámbé ké Pamfyílya.

³⁹ Pôl ne Bánábas ba-kán barî ké dyishí kanong kanong, ne ba-pap barî. Bánábas o-kpî Mâk ba-nung ké ńsukyíkang ba-dim Sápurus.

⁴⁰ Pôl o-fîm Sálas ba-dim. Bábe ḿbé ba/bángê ké Jisos ba-kúng kámbé ba-fé ké abwô nyí Otu Kyítá, eringe nyí odatông kámbé kanong emen.

⁴¹ Pôl o/cen o-shwôm ké esí nyí Syírya ne Silyísha o-fâ banet-ékwâbashi nyí Karâs busa o-câ.