ÂAK BǍMKPÓNGÉ ḾBÉ BANET-KYITWÓM-JISOS BA/CHI, ḾBÉ BADAKÓ ÂAK 14 - Bokyi Bible

Pôl ne Bánábas ba/sét Banet Bǎmpém ḿbé Banong ké Oshê mú Ekónum

¹ Dyizong-chwǒm dyibónge ńdyí dyi/chi Pôl ne Bánábas ké Ántyok, ké esí nyi Pyisyídya nké dyi/chi to kámbé ké Ekónum. Pôl ne Bánábas ba/danung ké kyise-ékwâbashi ńkyí banet-Jûs ba-pem bǎmpém ké bukwóp ḿbú bu/chi banet-Jûs chwóó ne banet ḿbé ba*fí banet-Jûs* ba-firi banet ḿbé ba/bángê ké Jisos.

² Nké banet-Jûs ḿbé ba/né ebángê ké Jisos ba/chi okabe mú banet ḿbé ba*fí banet-Jûs* o-yángê, ne ba-chi kámbé ba-pín be Pôl esim.

³ Banet-kyitwóm-Jisos ámbe ba/rí ányi chwóó. Ba*da/shî achi-banet* ké nkéré ba/pem banet kyi-kim ne Otu Kyítá* mú o/tông wááng o/fu, kyitwóm ebe ńkyí mbe ba-sét ng kyi-kim ne kanong emen kyi/mû ntûntû ké busa ḿbú o/kye kámbé ḿbú badachi biǐtí-akat ne byěm ḿbyí byidakaa banet byiko.

⁴ Bujê-banet ḿbé ba/mû ké oshê ámu ba-kyii ké byikim byifee. Kyicê ba/mû ké kyicê ńkyí banet-Jûs, kyicê ne banet-kyitwóm-Jisos.

⁵ Ne banet-Jûs kâng ne banet ḿbé ba*fí banet-Jûs* cibicibi ne banet-ashí ebe ba-cibi ba/fu, mbé ba-kyâ banet-kyitwóm-Jisos busông, ba-tím kámbé aká ba-ju.

⁶ Ké nkéré banet-kyitwóm-Jisos ba/jwo kánkyí, ba-chêe ba-jâ Lyísata ne Dyíbyi, eshê nyí nyi ké esí nyí Lyikónya, ne ké eshê nyí e/fárâng kyikim-esí ánkyi.

⁷ Ányi nké ba/sét banet Bǎmpém ḿbé Banong kyi-kim ne Jisos, Otu Kyítá.

Pôl ne Bánábas ba/pem Bǎmpém ḿbé Banong ké Lyísata ne Dyíbyi

⁸ Onyinchéng obónge o/mû o-kyú u ké Lyísata mú byiká emen byi/mû byi/nyîim. Onyinchéng ámu o/mû o/waa nkwa kyi-fím ké nkéré mú ba/fwon ǎ, ne o*da/tigi ne o-man ecen*.

⁹ Onyinchéng ámu o/kyú ányi me, o-fwôo atông o-jwo byiraa ḿbyí Pôl o/mû o-sét ng. Pôl o/ri o/fu, onyinchéng ámu mu ne obánge mú nyǐ oda ǎ eman echi o-nyange. Ne Pôl o-bírî achi kâng o-tún onyinchéng ámu cápcáp,

¹⁰ ne o-raa ne ejá kyíbóng kyíbóng o/fu, bûu a-bwom cip ké byiká eyên. Onyinchéng ámu o-pyiryi kyíbóng, o-kpet ecen o-câ.

¹¹ Ké nkéré bujê-banet ḿbé ba/mû ányi ba/ri ńkyí Pôl o/chi, ba-kpet ewonge ké ejá-oshê ebe nyí Lyikónya ba/fu, esówo ee/bírî banet, e-shû kyísí e-kâm bě.

¹² Ba-fé Bánábas dyizîn ńdyí badakó Zûs, ne ba-fé Pôl ńdyí badakó Hémyis, ké ebóng, Pôl nké o/mû o-pem m bǎmpém.

¹³ Nchi kyifen mú osówo ebe mú badakó Zûs, mú kyise ńkyí ba/mû ba-chi i kyifen ba-kyâ kámú kyi/mû fáráng ányi ne oshê, o-bâ ne bampong ne ekong-byichí o-ba-bwom ké ocím-dyifyi. Nyǐ ne bujê-banet ámbe ba/mû ba-kú ba-bâ kyifen echi ba-kye banet-kyitwóm-Jisos.

¹⁴ Ké nkéré Bánábas ne Pôl ba/jwo ńkyí ḿbé mbé ba/mû ba-kú ba-bâ echi, ba-ját byídí ebe ké byiko, ba-tông ba/fu, kafâ nke ka-sa ng kámbé. Ba-byí ne ochéé ba-da-bwom ké otyém-bujê-banet ámbe, ba-wonge ba/fu,

¹⁵ ebóng ben bamu ba-chi i dyizong-chwǒm ńdyín. Be byi-chi i banet, banet ne enyam-byiko wǎ ben. Be byi/bê nyín byi/fu, byi-bâ ng běn esét Bǎmpém ḿbé Banong kyi-kim ne Jisos. Byi/fu, byi-bâ ng běn echi ba-mîng byěm ḿbyín ḿbyí byi*da/byí chwǒm* ba-bírî ba-kâm Osówo mú mu okpó, mú o/chi bubóng ne esí ne buce ne kángkáng byěm ḿbyí mbyi ké mbyí.

¹⁶ Ké nkéré mú o/shwôm ké esim, nyǐ o/mîng kángkáng banet o/fu, bacen kiǐfáng ńkyí kyi/nyîn kámbé.

¹⁷ Nké nyǐ kángkáng nkéré mu o-tông ng ekap kyi-kim ne byiko emen ké byěm ḿbyí byinong ḿbyí mu o-chi i. Nyǐ mu o-kyâ běn omu mú mu o-fím m kyíbóng, ne byíkwôn ké ochíchí-bankéré ebe. Nyǐ mu o-kyâ běn byiryíng, o-chi i atyém enen a-sú ne bunyîn-dyityém.

¹⁸ Nang ké ba/raa byiraa ḿbyín ne mbé, kyi/sóng ne banet-kyitwóm-Jisos ba-chi bujê-banet ámbe ba-mîng kyifen echi ba-kye kámbé.

¹⁹ Kyicê-banet-Jûs ba-fím Ántyok ké esí nyí Pyisyídya ne Ekónum ba-ba-chi bujê-banet ámbe ba-firi ké kyicê ńkyí ebe, ba-tím Pôl aká, ba-tut ǎ ké kafâ-oshê ba-byí ne nyǐ kyíjí ba/fu, mú mǔ oo/kpú.

²⁰ Nké ké nkéré banet ḿbé ba/bángê ké Jisos ba/babwom ba-wáp ǎ ba-fé ké otyém, nyǐ o/bûu nensang o-bwa esim ké kafâ-oshê. Ké orî-dyicí, nyǐ ne Bánábas ba-dim ba-wâa Dyíbyi.

Pôl ne Bánábas ba/bwa Esim Dyijê ké Ántyok

²¹ Pôl ne Bánábas ba/pem Bǎmpém ḿbé Banong ké Dyíbyi, ba-já bǎmgbán ḿbé Jisos chwóó. Mbé ba-bwa esim kâng ké Lyísata, ne ba-ribi Ekónum ne ba-chîribi kâng ké Ántyok, ké esí nyí Pyisyídya.

²² Mbé ba/chi banet ḿbé ba/bángê ké Jisos ba-shwane ké obánge ebe ne ba-fé kámbé busa ba/fu, bafé dyityém ebe ké obánge ebe ne Jisos. Ba-tángê kámbé ba/fu, be byi-man byi-ri afaníkong chwóó ne byi-nung ké Butu ḿbú Osówo.

²³ Ké kyise-ékwâbashi nyí Karâs nang kyirá mbé ba/fîm banet-ashí ba-tî kámbé, ne ké banshwam efé ne esong ecíp, ba-kúng kámbé ba-fé ké abwô nyí Otu Kyítá, mú mbé baa/fé atyém ebe ne nyǐ.

²⁴ Ké nkéré mú baa/cen ké esí nyí Pyisyídya, ba-ba-ribi ké esí nyí Pamfyílya.

²⁵ Mbé ba/sét banet Bǎmpém ḿbé Banong ké Péja, ne ba-shwôm kâng ba-ribi Atálya.

²⁶ Ne kyi-fím ké oshê ámu ba-nung ké ńsukyíkang ba-bwa dyijê Ántyok ké esí nyí Syírya, ké kyikit ńkyí ba/mû ba-kúng ng kámbé ba-fé Osówo ké abwô, eringe nyí Osówo odatông kámbé kanong emen, eringe nyí badachi bǎmkpóngé ḿbé mbé baa/man kántîk.

²⁷ Ké nkéré mú ba/ribi Ántyok, ba/kó kángkáng banet-ékwâbashi nyí Karâs kyikit kyibónge, ne ba-sét kámbé kángkáng byěm ḿbyí Osówo oo/chi ké abwô ebe, ne eringe nyí Osówo oo/bâa bukwóp ḿbú banet ḿbé ba*fí banet-Jûs* badabángê ké Jisos.

²⁸ Pôl ne Bánábas ba-rí ányi chwóó ne banet ḿbé ba/bángê ké Jisos.