ÂAK BǍMKPÓNGÉ ḾBÉ BANET-KYITWÓM-JISOS BA/CHI, ḾBÉ BADAKÓ ÂAK 13 - Bokyi Bible

Banet-Ékwâbashi nyí Karâs ba/fîm Bánábas ne Sôl ba-twóm

¹ Ké burwám-banet-ékwâbashi nyí Karâs ḿbé ba/mû ké Ántyok, ké Syírya, bamkpábé ḿbé badasét byiraa-Osówo ne bantánge byiraa-Osówo ba/mû ányi. Banet ḿbé ba/mû ké burwám ebe ba/mû Bánábas ne Syímyon mú ba/mû ba-kó ng ǎ mú Bujîi, ne Lúsus mú o/fím Saryínyi, ne Menyân mú ba/nen kámbé nkéré obónge ne Otu Hérot mú mu otu mú Gályílyi ne Sôl.

² Ké nkéré mú mbé mbe ba-chi i bǎmkpóngé ḿbé Otu Kyítá, ba-cíp ng esong, Busun-Osówo bu/raa ne mbé bu/fu, fîm m̂ Bánábas ne Sôl ba-kye mě, eringe nyí ba/chi ba-chi bǎmkpóngé ḿbé me nn/kó kámbé n/fu, bachi.

³ Mbé kâng ashí kángkáng ba-cíp esong, ba-fé nshwam ba-kye Osówo, ba-twôom Bánábas ne Sôl abwô ké byiko, ne ba-twóm kámbé ba-dim.

Bánábas ne Sôl ba/sét Bǎmpém ḿbé Banong ké Sápurus

⁴ Ńdyí Busun-Osówo bu/twóm kâng Bánábas ne Sôl, mbé ba/dim ba-ribi Selúsa, ne ba-nung ké ńsukyíkang ba-da-ribi ké oshê mú baya ḿbé baryên ba/wáp kámú ba-fé ké kafâ, mú badakó Sápurus.

⁵ Ké nkéré ba/ribi ké Salámis, mbé ba/sét byiraa-Osówo ké byise-ékwâbashi ḿbyí banet-Jûs. Jǒn-Mâk o/mû ne mbé ké kyikû mú o/mû o-chwáp ng kámbé ké bǎmkpóngé ámbe.

⁶ Ba-cen ké oshê ámu omúmú ba-ribi ké Páfos, ké kyikit ńkyí ba/kâm nchi bambirirím obónge mú odabángê Bájísos, onet-Jûs mú o/mû o-nîm m banet o/fu, nyǐ o-chi i mkpábé mú odasét byiraa-Osówo.

⁷ Onyinchéng ámu o/mû ocín-otu-dyishí mú oshê ámu mú baya ba/wáp kámú ba-fé ké kafâ, mú o/mû o-bángê e Ségus-Pólus. Otu-dyishí ámu o/mû onet-bubong. Otu-dyishí ámu o-kó Bánábas ne Sôl ba-ca ké bushú emen, ké ebóng, nyǐ o/mû mu o-ryuu ng o/fu, nyǐ o-jwo ng byiraa-Osówo.

⁸ Nké â be Sôl ba/sét, nchi bambirirím ámu mú odabángê Elyímas, éné nké dyizîn emen dyi/byí ké ejá-Girîk, o-sét o/fu, ńkyí ḿbé mbé ba/sét kyi*fí ké kafâ*. Onyinchéng ámu o/kan o/fu, nyǐ o-chi i otu-dyishí ámu o-né ebángê ké byiraa-Osówo ne dyityém emen.

⁹ Ne busa ḿbú Busun-Osówo bu-sú Sôl mú ba/mû ba-kó ng ǎ to Pôl ké byiko. O-tún nchi bambirirím ámu ké bushú cápcáp

¹⁰ ne o-raa ne nyǐ o/fu, wo wǎn-Otu-Byibî-Barím. Wo a-chi i onet-bushwôn mú kángkáng byěm ḿbyí byinong. Wo amu ne kángkáng boǒbî-byinyídíng, ne kángkáng nkéré wo amu a-kan n a/fu, wo a-pín n ntûntû mú Otu Kyítá o-bírî kyisédéng.

¹¹ Otu Kyítá o/chi o-tan bubwô emen o-díp ǒ kántîk. Achi a/chi a-sêe ǒ, ne aa*ba/chi a-chîman eri kiinwángé ńkyí dyicí* ké kyikim-nkéré. Ké abe ányi, Elyímas o/ri ófíbí mú pyampyam o-dim o-cít ǎ ké achi ne o-kpet ecen o-wa ng abwô, o-kyé ng onet mú oda ǎ eníbî o-tông ǎ bukwóp.

¹² Otu-dyishí ámu o-bángê ne dyityém emen ké nkéré o/ri ńkyí kyi/chi. Byiko byi/kaa ǎ ké nkéré o/jwo ńkyí ba/tángê kyi-kim ne Otu Kyítá.

Bánábas ne Pôl ba/sét Bǎmpém ḿbé Banong ké Ántyok

¹³ Pôl ne banet ḿbé ba/mû ne nyǐ ké kyikû ba/cen ké ńsukyíkang ba-fím ké Páfos ba-ribi Péja, ké esí nyí Pamfyílya. Nké Jǒn-Mâk o/mîng kámbé ányi o-bwa esim Jerúsélem.

¹⁴ Be Pôl ba-dim ké Péja ba-ca kashú káshu ba-da-ribi ké Ántyok, ké esí nyí Pyisyídya. Ne ké dyicí-ékwâbashi, ba-da-nung ké kyise-ékwâbashi ńkyí banet-Jûs ba-kyú me.

¹⁵ Ké nkéré mú onet obónge oo/kó Nwet-Byije-Músis ne byiraa byikíri ḿbyí bamkpábé ḿbé badasét byiraa-Osówo ba/sáng, banet-ashí-kyise-ékwâbashi ánkyi ba-twóm be Pôl ejá ńnyín ba/fu, bwǎn-bané eten, be byimu byi-ryuu ng byi/fu, â ben bamu ne bǎmpém ḿbé ba/chi ba-chi obánge mú banet ḿbén o-shwane o-shwôm, pem m̂ kámbé.

¹⁶ Pôl o-bûu nensang, o-nye kámbé bubwô o/fu, bacíbî pyêp, ne o-kpet eraa o/fu, Báten-banet-Ézerel ne kángkáng banet ḿbé ba*fí banet-Jûs* ḿbé mbe nyín, ḿbé mbe ba-fâ Osówo, fwôo n̂g atông ba-jwo mě.

¹⁷ Osówo mú banet-Ézerel ḿbén o/cá banchí eten ḿbé kpákpá ne o-chi banet eten ámbe ba-firi kiǐtí-oshê ké nkéré mú ba/kyú wǎ bacinbánet ké esí nyí Éjip. Osówo o/fîm kámbé ba-byí ké Éjip, ké ebóng, nyǐ mu ne busa o-shwôm.

¹⁸ Ne o-chwáp kámbé ké bajam-aje bafee ké kyikim-dyikán, nang ké ba/mû ba*fí ba-kúng ng ǎ wǎ Osówo ebe*.

¹⁹ Nyǐ o/bên byikim-eshê káchâtkányi ké esí nyí Kínan, ne o-chi banet emen ba-firi bayén-esí ányi

²⁰ ké chwǒm wǎ égot-aje efee ne bajam-aje bafee esim diǐkpú. Ńdyí nkéré ámu o/shwôm, nyǐ o/kye kámbé banet-ashí-oshê ḿbé ba/mû ba-tún n kámbé tete kyi-ribi ké nkéré mú mkpábé mú odasét byiraa-Osówo mú odabángê Sámwel.

²¹ Ne ké nkéré mbé ba/bí ba/fu, okye kámbé otu, Osówo o/kye kámbé Otu Sôl mú o/mû wǎn-Kyíshi, mú o/fím ké kyikû ńkyí Běnjámin, o/fu, okyú kámbé otu ké bajam-aje bafee.

²² Ké nkéré Osówo o/fîm Otu Sôl ké butu, o/kúng Otu Dívit o-firi otu ebe. Něen nké Osówo o/raa kyi-kim ne Otu Dívit o/fu, me nn/ri n/fu, Otu Dívit, mú wǎn-Jésyi mu dyizong-onet ńdyí mu n-ryuu ng, mú mu o-chi i kángkáng byěm ḿbyí mu n-ryuu ng n/fu, ochi.

²³ Kyi/mû Jisos mú o/fím ké kyikû-banet ńkyí Otu Dívit nké Osówo o/chi ǎ Onet-Onyii mú banet-Ézerel, wǎ eringe nyí o/mû o/ryí ocím.

²⁴ Ne Jisos o-kpet bǎmkpóngé emen echi, Jǒn o/sét kángkáng banet-Ézerel o/fu, byiko byikpú kámbé ba-mîng byibî ebe echi, ba-koo osoo mú Osówo.

²⁵ Ké nkéré mú Jǒn o/mû o-kú o-bâ eman bǎmkpóngé emen, o/bí banet-Ézerel o/fu, ben ba/kabe ba/fu, me n-chi i ebóng dyizong-onet. Me nn*chi onet mú bamu ba-bám m*. Nké kû n̂g eri, nyǐ mu o-bâ mě ké kyikû. Me n*da/kwárê mú nda ǎ epii abe emen ké byiká*.

²⁶ Bwǎn-bané ejí, banet ḿbé ba/fím ké kyikû ńkyí Ébarahâm ne kángkáng banet ḿbé ba*fí banet-Jûs* ḿbé mbe ba-fâ Osówo, be nké ba/twóm bě kyitwóm ńkyín ńkyí kyida bě enyii.

²⁷ Ké ebóng, banet ḿbé mbe ba-kyú u ké Jerúsélem ne banet-ashí ebe ba*da/nyît ba/fu, Jisos nké mu Onet-Onyii* nang kyikû to kyi-kim ne byiraa ḿbyí bamkpábé ḿbé badasét byiraa-Osówo ḿbyí mbe ba-kó ng kángkáng dyicí-ékwâbashi ba*da/nyît*. Nké mbé ba/bwa ba-chi byiraa ḿbyí bamkpábé ḿbé badasét byiraa-Osówo byi-kyú ntûntû ké mpan mú ba/pan ba/fu, baju Jisos.

²⁸ Nang ké mbé ba/mû ba*da/já bukwóp ḿbú bunong* ḿbú badakét mpan ba/fu, baju ǎ* mbé ba/bí Pálet ba/fu, okye busa ba-ju ǎ.

²⁹ Ne ké nkéré mú mbé baa/chi kángkáng byěm ḿbyí ejá-Osówo nyí ba/sáng kyísí e/sét kyi-kim ne nyǐ, ba-shû ǎ ké kyikwap ńkyí badashwân onet, ba-yip ǎ ba-ryii.

³⁰ Nké Osówo o/jwóbê ǎ ké bukyû.

³¹ Ne ké bujê-ací chwóó nyǐ o/byí o-kâm banet ḿbé ba/mû ba-cen n ne nyǐ fím ké Gályílyi a-ribi ké Jerúsélem. Mbé kántîk nké ba/bwom ǎ bantûesé ké bushú ḿbú banet-Ézerel.

^32-33 Ne be bii/bê nyín kántîk ne Bǎmpém ḿbén ḿbé Banong byi/fu, byi-sét ng běn. Ńkyí Osówo o/ryí banchí eten ḿbé kpákpá ocím o/fu, nyǐ o/chi o-chi, oo/chi kántîk o-kye bě be mú byimu bwǎn ebe ké ojwóbe mú o/jwóbê Jisos o-bwa ké dyikpen. Wǎ eringe nyí ba/sáng ké nnyinyěng-Nwet-Ekwan-Osówo mú badakó Sâm ba/fu, wo a-chi i Wǎn ejí, kurún, me n/firi Bonchí eyên.

³⁴ Nyín ńkyí Osówo o/fu, kyi-kim ne ojwóbe mú nyǐ o/chi o-jwóbê ǎ ké bukyû, eringe nyí oo*ba/chi o-chîkpú ne banyá* o/fu, me n/chi n-kye ǒ ojware mú onong mú ntûntû, mú me n/ryí Otu Dívit ocím.

³⁵ Wǎ eringe ba/sáng ké kyikit kyikíri ńkyí Nwet-Ekwan-Osówo mú badakó Sâm, ba/sét Osówo ba/fu, wo aa*ba/chi a-mîng kyikwóm-enyam-byiko ńkyí ḿgbán eyên mú mu o-kyâ ǒ ofê kyi-fwoo*.

³⁶ Otu Dívit o/chi kâng ńkyí Osówo mu o-ryuu ng ké nkéré mú emen. Ne o-kpú kâng, ba-ryii ǎ fáráng ne kyikit ńkyí ba/ryii banchí emen ḿbé kpákpá, ne o/fwoo.

³⁷ Nké onet mú Osówo o/jwóbê ǎ ké bukyû o*da/fwoo*.

^38-39 Ben ashí amúmú, ǎ bwǎn-bané ejí, ba-man ba-nyît ké ntûntû ba/fu, ké bubwô ḿbú Jisos nké byimu byi-sét ng běn bǎmpém kyi-kim ne opwoo-byibî. Ben ba-man ba-nyît ba/fu, nang yeě nké o/bángê ne nyǐ ne dyityém emen, Osówo o-pwoo ng ǎ kángkáng byibî emen, ḿbyí Byije ḿbyí Músis byi*fí byi-man n ǎ echi o-fem ké mbyí*.

⁴⁰ Bám m̂ byiko enen kâng, eringe nyí ńkyí bamkpábé ḿbé badasét byiraa-Osówo ba/sét kii*ba/chi kyi-chi běn*. Ba/sét ba/fu,

⁴¹ fwôo n̂g atông ba-jwo, ben mú bamu ba-raa ng byibî-byěm kyi-kim ne ńkyí Osówo oo/sét. Waa n̂g ne atyém yógeyóge ba-kpú. Ké ebóng, bǎmkpóngé ḿbé me mu n-chi i ké nkéré mú ben ba/tôong bakpó mbe chwǒm ńkyí ben baa*ba/chi ba-bángê* nang onet o-bwa o-sét běn kyi-kim ne kyikû emen*.

⁴² Ké nkéré mú Pôl ne Bánábas ba-kú ba-byí i ké ócâm-ékwâbashi, banet ḿbé ba/mû ányi ba/sét kámbé ba/fu, ḿbé mbé bachîbwa esim ké nnyinyěng-ékwâbashi ba-chîbasét kámbé kyi-kim ne byiraa ámbyi.

⁴³ Ké nkéré banet ámbe ba/mîng ncibi ámu, banet-Jûs chwóó ne banet ḿbé ba*fí banet-Jûs* to chwóó ḿbé ba/mû baa/nung ké ékwâbashi nyí banet-Jûs ba/mû ba-cen n ne Pôl ne Bánábas ké kyikû. Banet-kyitwóm-Jisos ámbe ba-pem ne mbé ba-fé kámbé busa ba/fu, bakyú u ba-câ kashú ké kanong ńké Osówo.

⁴⁴ Ké nnyinyěng-dyicí-ékwâbashi, banet ba/nángê ba-man ké oshê omúmú ḿbé ba/bê ba/fu, mbé ba-bâ ng ejwo byiraa ḿbyí Otu Kyítá.

⁴⁵ Ké nkéré banet-Jûs ba/ri bujê-banet ámbu, kafâ ka-kpet esa kámbé. Ba-shú Pôl, ba-raa ba/fu, mú mǔ mu o-sét ng kyisédéng.

⁴⁶ Nké Pôl ne Bánábas ba/bwa ba-raa oráng, nang achi-banet ba*da/shî* ba/fu, kyi/mû nkyi kanong ńkyí ben ba/mû ba/chi ba-bwóp kpá kashú ba-jwo byiraa ḿbyí Osówo. Nké ké ben baa/né kámbyí, ne ba*da/kúng byiko enen ba/fu, ben ba/kwárê mú badakyú ké dyikpen ńdyí ne banyá* be byi/chi byi-mîng běn byi-kâm banet ḿbé ba*fí banet-Jûs*.

⁴⁷ Ké ebóng, nyín kyije ńkyí Otu Kyítá oo/kye bě, o/fu, me nn/tî ǒ n/fu, kyú kiinwángé ńkyí banet ḿbé ba*fí banet-Jûs*. Ké bubwô eyên nké me n/chi n-nyii ejíí emúmú.

⁴⁸ Ké nkéré banet ḿbé ba*fí banet-Jûs* ba/jwo ńkyín ba/kpet ejêe, ba-kpet eraa ba/fu, kyitwóm ńkyí Otu Kyítá nkyi chwǒm-bunyîn-dyityém. Ne banet ḿbé Osówo oo/cá kámbé o/fu, ba/chi ba-kyú ké dyikpen ńdyí ne banyá, ba-firi banet ḿbé ba/bángê ké Jisos ne atyém ebe.

⁴⁹ Ne byiraa ḿbyí Otu Kyítá byi-káng kángkáng byikit ké esí ányi.

⁵⁰ Nké banet-Jûs ba/chi banet-ashí-oshê ne biǐtí-banyinyi ḿbyí byi*fí banet-Jûs* ḿbé mbe ba-fâ Osówo ba-bírî be Pôl esim. Ba-chi banet ba-kpet enwa ne Pôl ne Bánábas, ba-ró kámbé ké esí ebe.

⁵¹ Banet-kyitwóm-Jisos ámbe ba-pâ ecing ké abe ebe, ba-pwó kámbé wǎ ekó ekuri ba-dim Ekónum.

⁵² Banet ḿbé ba/bángê ké Jisos ḿbé ké Ántyok, ké esí nyí Pyisyídya ba-sú ké bunyîn-dyityém ne busa ḿbú Busun-Osówo.