ÂAK BǍMKPÓNGÉ ḾBÉ BANET-KYITWÓM-JISOS BA/CHI, ḾBÉ BADAKÓ ÂAK 10 - Bokyi Bible

Pyíta o/sét Konélus Bǎmpém ḿbé Banong

¹ Onyinchéng obónge o/mû ké Sizaryâ mú o/mû o-bángê e Konélus. Nyǐ o/mû onet-dyishí-basúja ḿbé Rûm mú o/mû o-tún n bajam-basúja batánge ké dyizu-basúja ńdyí dyi/fím Étalyi.

² Nyǐ ne kyikû-banet emen kángkáng ba/mû ba-fâ Osówo. Nyǐ o/mû o-chwáp ng banet-Jûs ḿbé ba/mû kyikpu, ne o/mû mu o-fâ nshwam kángkáng nkéré o-kyâ Osówo.

³ Kyi/mû kyi/byí chwǒm wǎ égbáng echât ké dyicí dyibónge ne esû nké nyǐ o/ri chwǒm-akat ńkyí o/ri orím mú onong mú Osówo ké o/bê o-kâm ǎ, o-kó ǎ ké dyizîn o/fu, Konélus.

⁴ Konélus o-bírî achi o-tún orím mú onong ámu ne bushî, ne o-bí ǎ o/fu, ebóng, ǎ bonchí. Orím mú onong ámu o-faa ǎ o/fu, Osówo oo/jwo banshwam eyên, o-ri bǎmkpóngé-dyityém ecángê ḿbé amu a-chi i, ne o-kú o-faa ng ǒ ojá ké mbyí.

⁵ Kántîk, twóm banet ba-ca Jópa, ba-da-kó onyinchéng obónge mú odabángê Sámon-Pyíta.

⁶ O/nung ocinónet kyikit-onyinchéng obónge mú odabángê to Sámon, mú mu o-chi i ekwop-enyam e-kûnwa bunong, mú mu o-kyú u ké bukô-baya ḿbé baryên.

⁷ Orím mú onong mú o/mû o-raa ng ne nyǐ éné o-dim kâng, ne Konélus o-kó bǎmgbán emen ashí afee ne onet-súja obónge. Mú súja ámu o/mû o-fâ Osówo, ne o/mû ké burwám-basúja ḿbé ba/mû ba-bám m Konélus.

⁸ Konélus o-sét kámbé ńkyí orím mú onong o/sét ǎ, ne o-twóm kámbé Jópa.

⁹ Ké orî-dyicí, ńdyí banet ḿbé Konélus o/twóm kámbé éné mbe ba-bâ ké bukwóp, ba-fárâng ng Jópa ba-bâ, Pyíta o/yú kyíbóng-kyise ké chwǒm wǎ nkéré mú busun mánmán, o/fu, nyǐ o-da ng efé nshwam.

¹⁰ Esong e-kpet ǎ enwa, ne o-kpet eryuu o/fu, nyǐ o-ryí i byiryíng. Ké nkéré mú ba/mû ba/tôong ba-rám m byiryíng, Pyíta o-ri chwǒm-akat.

¹¹ O/ri ké bubóng bu/firi bâabâa, ne chwǒm éné wǎ kiǐkpáré ńkyí kyiryên kyiryên kyi-byí kyi-shû ng kyi-bâ kyísí éné wǎ ba/níbî kánkyí ké byicê byimúmú byinyii.

¹² Kángkáng azong-enyam ne nyí edatut bukim kyísí ne bunurung ḿbú ké akán byi/mû ké kafâ-kiǐchwóm ánkyi.

¹³ Ejá e-raa ne nyǐ e/fu, Pyíta, bûu nensang a-ju a-ryí.

¹⁴ Nké Pyíta o/faa o/fu, aa*wááng* ǎ Otu Kyítá*. Me n*da/ryí ne chwǒm nang kyibónge* ńkyí banet eten badaciring*.

¹⁵ Ejá ányi e-chîraa ne nyǐ e/fu, *dachi a-kúng chwǒm ńkyí Osówo o/fu, nkyi kanong wǎ chwǒm-ociring*.

¹⁶ Ńkyín kyi/chi kampén jangjang kachât, ne ba-yip kiǐchwóm ánkyi kyi-bwa esim kyíbóng.

¹⁷ Kyi-firi Pyíta ké dyityém yógeyóge kyi-kim ne dyishí-kyikû-chwǒm ńkyí nyǐ o/ri něen. Ké kyikim-nkéré ánkyi, banet ḿbé Konélus o/twóm kámbé baa/kyé ba-ri kyise ńkyí Sámon ámu, ba-cen ba-ba-bwom ké ocím-dyifyi.

¹⁸ Ba-kó onet ba-bí ǎ ba/fu, ocinónet mu nyín mú odabángê Sámon-Pyíta?

¹⁹ Pyíta o/mû o/tôong o-kabe ng kyi-kim ne kyikû-akat nyí nyǐ o/ri ké nkéré Busun-Osówo bu/sét ǎ bu/fu, fwôo atông a-jwo, banyinchéng ashí achât mbe ba-kyé ng ǒ.

²⁰ Kpá byiko a-shû kyísí. *Dachi a-né ece ne mbé* ké ebóng, me nké n/twóm kámbé.

²¹ Ne Pyíta o-shû kâng kyísí o-da-sét banet ámbe o/fu, me nké mu onet mú bamu ba-kyé ng. Ben ba/bê ebóng.

²² Mbé ba-faa ǎ ba/fu, onet-dyishí-basúja mú odabángê Konélus nké o/twóm bě. Nyǐ o-chi i onet mú onong mú mu o-fâ Osówo. Kángkáng banet-Jûs mbe ba-kyâ ǎ ofê kanong kanong. Orím mú onong obónge mú Osówo o/sét ǎ o/fu, okó ǒ wo a-ca ké kyise emen, eringe nyǐ odajwo ńkyí wo amu ne nkyí ńkyí adasét.

²³ Pyíta o-kpî banyinchéng ámbe ba-nung ké kyise, ba-rí ányi ne nyǐ tete dyicófóróng dyi-cé. Ké orî-dyicí, Pyíta o-kpá byiko o-dim ne mbé. Kyicê-barî-banet ḿbé ba/bángê ké Jisos ba-dim ne Pyíta ké kyikû.

²⁴ Ké nnyinyěng-dyicí o-nung Sizaryâ ké oshê mú Konélus ne kyikû-banet emen ne bacín emen ḿbé o/kó kámbé, ba/kyú mbe ba-bám m ǎ.

²⁵ Ké nkéré mú Pyíta o-kú o-bâ enung ké kyise, Konélus o/byí o-kâm ǎ, o-myii ǎ ké byiká, o-fé bushú kyísí.

²⁶ Pyíta o-chi ǎ o-bûu nensang ké nkéré o/raa ne nyǐ o/fu, bûu nensang, ké ebóng, me to n-chi i onet wǎ wo.

²⁷ Pyíta o/wâa o-pem m ne Konélus o-câ, o-da-nung ké kafâ-kyise, o-ri banet chwóó ḿbé ba/bakyú kyikit kyibónge.

²⁸ Pyíta o-raa ne mbé o/fu, ben bayén bamu ba-nyît ng kanong kanong ba/fu, byije-ékwâbashi bii*bángê onet-Jûs o-da-ri* o-kyú nang okyû kyikit kyibónge ne onet mú o*fí onet-Jûs*. Nké Osówo oo/tông mě o/fu, me n*dachi n-kúng onet nang obónge wǎ onet mú oo*nwa* mú bada ǎ eciring*.

²⁹ Ne ké nkéré wo a/twóm a/fu, me mbâ, me n*da/kán ké dyishí*. Kántîk, ebóng ńkyí wo a/twóm a/fu, me mbâ.

³⁰ Konélus o-faa o/fu, kyi/mû kii/byí wǎ nkéré mún, ací a/firi achât, me mu n-fâ nshwam ké kyise ejí, ké égbáng echât nyí esû. Ké abe ányi, onyinchéng mú o/fé byídí ḿbyí byidasan ragerage o/byí o-bwom mě ké bushú.

³¹ Ne o-raa ne me o/fu, Konélus, Osówo oo/jwo nshwam eyên, ne oo/ri bǎmkpóngé-dyityém ecángê ḿbé amu a-chi i.

³² Twóm onet o-ca Jópa o-da-kó onyinchéng mú odabángê Sámon-Pyíta. O/nung ocinónet ké kyise ńkyí Sámon mú mu o-chi i ekwop-enyam e-kûnwa bunong, mú mu o-kyú u ké bukô-baya ḿbé baryên.

³³ Ne n-twóm kâng ochéé óchee n/fu, bâ, ne a/nwa dyityém to ńkyí wo a/bê. Kántîk, be kángkáng byimu nyín ké bushú ḿbú Osówo, byi-bám m byi/fu, byi-jwo ng nang ebóng chwǒm ńkyí Otu Kyítá oo/kye ǒ busa o/fu, wo asét.

Pyíta o/sét Konélus ne Kyikû-Banet Emen Bǎmpém ḿbé Banong

³⁴ Pyíta o-kpet esét o/fu, kántîk, me nn/nyît n/fu, nkyi ntûntû ńkyí Osówo oo*cá onet mú oda ǎ ejê o-shwôm*.

³⁵ Nang yeě nké mu o-shî ng ǎ, o-chi i ńkyí nkyi kanong, o-kwárê ng ké bushú emen, nang o-fím ebóng oshê, nang o-fím ebóng oshê.

³⁶ Ben bamu ba-nyît ng kyitwóm ńkyí Osówo o/twóm o-kye banet ḿbé Ézerel, o-sét kámbé Bǎmpém ḿbé Banong ḿbé bunyîn-dyityém ké ocím mú Jisos Karâs mú mu Otu mú kángkáng banet.

³⁷ Ben bamu ba-nyît ng kyi-kim ne kiǐtí-chwǒm ńkyí kyi/chi ké esí emúmú nyí Ézerel. Kyi/kpet ké Gályílyi, ké nkéré osoo mú Osówo mú Jǒn o/sét oo/shwôm.

³⁸ Ben bamu ba-nyît ng kyi-kim ne Jisos mú o/fím Názáret, eringe nyí Osówo o/kye ǎ busa ne busa ḿbú Busun-Osówo. Nyǐ o/cen kángkáng byikit, o-chi i kanong, o-chi to kángkáng banet ḿbé ba/mû ké busa ḿbú Otu-Byibî-Barím ba-nyange, ké ebóng, Osówo o/mû ne nyǐ.

³⁹ Be byi/ri kángkáng byěm ḿbyí o/chi ké oshê omúmú mú banet-Jûs ne ké Jerúsélem. Ba/mán ǎ ké kyikwap ńkyí badashwân onet, ba-ju ǎ.

⁴⁰ Nké ké ací achât, Osówo o/jwóbê ǎ ké bukyû, o-chi ǎ o-byí o-tông bě byiko.

⁴¹ *Chí banet kángkáng nké o/tông kámbé byiko* nké o/tông bě be nké nke, ḿbé byimu bantûesé ḿbé Osówo oo/wá o-fîm. Be byi/ryí byiryíng byi-jwáp bato ne nyǐ ké nkéré mú Osówo o/jwóbê ǎ ké bukyû.

⁴² Ne nyǐ o-kye bě busa o/fu, be byisét banet Bǎmpém ḿbé Banong, byi-sét to wááng byi/fu, nyǐ nké mu onet mú Osówo oo/fîm ǎ o/fu, okyú mpan bampan mú banet bakpó ne bakúsí.

⁴³ Kángkáng bamkpábé ḿbé badasét byiraa-Osówo ba/raa kyi-kim ne nyǐ ba/fu, nang yeě nké o/bángê ké nyǐ ne dyityém emen, Osówo o/chi o-pwoo ǎ byibî emen ké bubwô ḿbú busa ḿbú dyizîn emen.

Kyicê-Banet ḿbé ba*fí Banet-Jûs* ba/koo Busa ḿbú Busun-Osówo

⁴⁴ Ké nkéré mú Pyíta o/tôong o-sét ng o-câ, Busun-Osówo bu-shû bu-kâm kángkáng banet ḿbé mbe ba-jwo ng bǎmpém ámbe.

⁴⁵ Kyi/chi banet-Jûs ḿbé ba/bángê ké Jisos, ḿbé ba/fím Jópa ba-ca ne Pyíta ké kyikû wǎ chwǒm-akat ńkyí Osówo o/kúng eyáré emen nyí Busun-Osówo o-kye to banet ḿbé ba*fí banet-Jûs*.

⁴⁶ Ké ebóng, mbé ba/jwo kámbé ké mbe ba-raa ng ké ejá nyí mbé ba*fí ba-jwo ng* ba-kpee ng kiǐtí-busa ńkyí Osówo mu ne nkyí. Pyíta o-raa o/fu,

⁴⁷ banet ḿbén baa/koo Busun-Osówo, wǎ eringe nyí be to byi/koo. Onet mu kô mú o/chi o-fu o/fu, ba*dachi ba-yip omu ba-kye kámbé osoo mú Osówo dí*.

⁴⁸ Ne Pyíta o-kye busa o/fu, bakye kámbé osoo mú Osówo ké dyizîn ńdyí Jisos Karâs. Ne ba-tîm Pyíta arông ba/fu, orí boǒnyín-ací ne mbé.