2 Tyímótyi 4 - Bokyi Bible

¹ Me mu n-tírîng ng ǒ kanong kanong ké bushú ḿbú Osówo ne ḿbú Jisos Karâs mú o/chi o-pan kángkáng banet mpan ḿbé baa/kpú ne ḿbé ba/tôong bakpó ké obê emen mú o/chi o-bâ ne ké Butu emen to n/fu,

² sét kyitwóm eringe nyí adabwom ké nkyí esét, nang nkéré mu kanong, nang o*fí kanong*. Eringe nyí adachi banet ba-bángê ne wo, a-bîn bakíri, a-fé bakíri busa, a-tángê to bakíri ne dyityém ńdyí dyinong.

³ Ké ebóng, nkéré o/chi o-bâ mú banet baa*ba/chi ba-chîfwôo atông ké byěm ḿbyí ntûntû ḿbyí mbe ba-tángê e*. Nké mbé ba/chi ba-kûchi eringe nyí okabe ebe mu o-ryuu ng, ne ba/chi ba-já banet chwóó ḿbé ba/chi ba-tángê kámbé ńkyí mbé mbe ba-ryuu ng ejwo.

⁴ Mbé ba/chi ba-né atông efwôo ké ntûntû, ba-tî atông ké biǐshwô ḿbyí kpákpá.

⁵ Nké wo a-man a-kám byiko eyên ké akwóp amúmú. Ryí ofit ké afaníkong eri. Chi bǎmkpóngé ḿbé nsêt kyitwóm ńkyí Bǎmpém ḿbé Banong, ne chi kángkáng bǎmkpóngé eyên wǎ ḿgbán mú Osówo.

⁶ Kyi-kim ne me, nkéré oo/fyi mú bada mě ekúng ba-chi kyifen. Nkéré o/firi ńnyín mú me ndadim m-mîng ejíí ńnyín.

⁷ Me nn/kan byiko kanong kanong ké ochéé ezóngê, nn/zóngê n-ribi ké dyishí, nn/fé dyityém ejí ne Jisos.

⁸ Ne kántîk, eyáré e-kú e-bám m mě ké okpóge mú m/kpógê ké kanong echi, nyí Otu Kyítá mú mu mpan bampan mú onong o/chi o-kye mě ké nkuli kyikû-dyicí. Ne kyi*fí wǎ nyǐ o-kyâ mě me kǎnchí* nké o-kyâ to kángkáng banet ḿbé mbe ba-bám m ne kyijé ba/fu, nyǐ obyí o-bâ.

Byiraa ḿbyí byi/fím ne Me Oyén

⁹ Kan byiko ḿbyí adabê a-kâm mě abe abe.

¹⁰ Ké nǎ, Dyímas o/firi ne kyijé ne ejíí nyín něen, ne ké bubwô ámbu, nyǐ oo/dim o-mîng mě. Oo/dim o-wâa Tesalonáka. Kyíryísen oo/wâa Galísha, ne Tátus oo/wâa Damésha.

¹¹ Lûk kǎnchí nké mu nyín ne me. Kpî Mâk a-bâ ne nyǐ, ké nǎ, nyǐ o-man n mě echwáp ké bǎmkpóngé.

¹² Me n/twóm Tyíkyíkus o-wâa Éfyísus.

¹³ Ké nkéré mú a-kú a-bâ, yip nkyû ejí mú m/mîng ne Kápus ké Tórówas a-bâ mě ne mǔ. Bâ to ne banwet ámbe, aciringaciring ḿbé ba/chi kámbé ké ekwop-enyam.

¹⁴ Alyikyizánda mú nree bure o/chi mě kyibî kanong kanong. Otu Kyítá o/chi o-só ǎ eringe nyí nyǐ oo/chi.

¹⁵ Wo oyén, bám byiko eyên kyi-kim ne nyǐ, ké nǎ, nyǐ o/mû o/né kyitwóm eten ne busa-dyityém kanong kanong.

¹⁶ Onet o*fí nang obónge mú o/mû o/bwom ne me ké kyikû* ké mbwôp kashú-nkéré mú m/bwom ké esuk m-pan mpan ejí*. Mbé kángkáng ba/mîng mě kǎnchí. Kyi/bát Osówo o*dachi o-pan o/fu, mbé ba/chi kyibî*.

¹⁷ Nké Otu Kyítá o/kyú ne me o-kye mě busa eringe nyí m/man esét kyitwóm, nang onyin o*da/waa* eringe nyí banet ḿbé ba*fí banet-Jûs* badajwo. Ne Osówo o/fîm mě ké ocím mú ekpang.

¹⁸ Ne Otu Kyítá o/chi o-chi mě n-fem ké kángkáng afaníkong, o-kúng mě degere n-jâ ké Butu emen ḿbú kyíbóng. Akpee akyú ne nyǐ ne banyá ne banyá. Kyi/bát kyikyú éné.

Nkuli Kyikû-Kyiraa eta

¹⁹ Me n/ta Peresyíla ne Akwéla kyiraa ne kyikû-banet ńkyí Onésyifóros.

²⁰ Erásátus o/waa ké Kórin, ne me m/mîng Torófyímus ké Malyítus, ké nǎ, nyǐ o/mû o-rwôm m.

²¹ Kan byiko, eringe nyí adabê ne burwom bu-cé. Búbúlus ne Púden ne Lyínus ne Kaládya ba/ta ǒ kyiraa. Eringe ebónge to ne barî-banet eten ḿbé áku.

²² Otu Kyítá okyú ké dyityém eyên. Ochwâp mú Osówo okyú ne ben kángkáng.