2 Tyímótyi 3 - Bokyi Bible

Bankuli Kyikû-Ací

¹ Kûzîim ńkyín a/fu, nkéré mú odasóng o/chi o-chi ké bankuli kyikû-ací.

² Ké ebóng, banet ba/chi ba-kûnim kanim, ba-shwam m byěm, ba-kpee ng byiko, ba-tông ng to byiko. Mbé ba/chi ba-kûshú banet, ne baa*chi ńkyí bané ne banchí ba/fu, bachi*. Baa*ba/chi ba-kó Osówo nang banet asǎma* ne baa*ba/chi ba-chîkye Osówo ofê*.

³ Mbé baa*ba/chi ba-cángê atyém* baa*ri banet bafip*. Mbé ba/chi ba-kyú bansêt byisédéng ba-bât ng banet, baa*man ekám byiko* ne ba/chi ba-kyú wǎ byibî-enyam. Kanong ka/chi ka-kûsa kámbé dyityém.

⁴ Ba/chi ba-kyú bannîm banet, ne baa*kyú ne okabe* ne byiko etông byi/chi byi-sú kámbé ké atyém. Bunyîn-dyityém ḿbú ké ejíí ńnyín bu/chi bu-kûjê kámbé bu-shwôm Osówo.

⁵ Mbé ba/chi ba-bwom kíngkíng ké byěm ḿbyí kyíjí kyi-kim ne ékwâbashi nyí Karâs, nké mbé ba-né ng ochíchí-busa emen. *Dakim banet ḿbén ké byiko*.

⁶ Kyicê-banet ḿbén mbe ba-câ ké byise ba-da ng ekâm banyinyi ḿbé mbe kyeekyee, ḿbé byibî ebe byi-kú byi-ró ng kámbé, ḿbé ba/firi ké busa ḿbú kángkáng ekabe nyí babép ebép,

⁷ ḿbé mbe ba-kan n byěm ekwâa, nké baa*ba/chi ba-nyît ntûntû ne banyá*.

⁸ Eringe nyí Jénes ne Jámberes ba/mû ba*da/bángê ne Músis* éné to nké banet ḿbén ḿbé atyém ebe aa/bên, ne baa/róng ké dyityém ebe ńdyí ba/fé ne Karâs ba*fí ba-bángê e ne ntûntû*.

⁹ Nké mbé baa*ba/chi ba-tíbî* ké nǎ, nang yeě o/chi o-ri eringe nyí mbé mbe enyam wǎ eringe nyí kyi/chi Jénes ne Jámberes.

Nkuli Kyikû-Byiraa

¹⁰ Nké wo aa/tî byěm ḿbyí me mu n-tángê e, ne édúú ejí ne okabe ejí ké dyikpen. Wo aa/ri dyityém ejí ńdyí n/fé ne Karâs, ne dyityém ejí ńdyí degere ńdyí mu ne ndyí ne kyijé ejí ne ofit ejí mú mu n-ryí i ne busông ḿbú mbe ba-kyâ mě ne afaníkong ejí.

¹¹ Wo amu a-nyît ng kángkáng byěm ḿbyí byi/chi mě ké Ántyok ne ké Ekónum ne ké Lyísata, ké kyibî-busông ńkyí n/ri. Nké Otu Kyítá o/nyii mě ké mbyí kángkáng.

¹² Kángkáng banet ḿbé mbe ba-ryuu ng ba/fu, mbé ba-kyú u dyikpen ńdyí Osówo efé ké ocibi ne Jisos Karâs ba/chi ba-kye kámbé busông.

¹³ Nké banchi byibî ne banryî banet bampún ba-câ kashú ké byibî ebe, ba-ribi ké ḿbyí byi/bên byi-shwôm, ba-nîm m banet ne byiko ebe.

¹⁴ Nké wo, bwom ké ntûntû mú ba/tángê ǒ, a-bángê shwaneshwane ne dyityém eyên. Wo amu a-nyît ng banet ḿbé ba/mû ba/tángê ǒ.

¹⁵ Ne wo amu a-zîim m a/fu, kyi-fím ké nkéré mú wo a/mû wǎsíng, wo aa/nyît ejá-Osówo nyí ba/sáng kyísí, nyí eda ǒ eman ekye byinyídíng ḿbyí byida ǒ eman etông kiǐfáng ńkyí onyii ké bubwô ḿbú dyityém efé ne Jisos Karâs.

¹⁶ Ejá-Osówo nyí ba/sáng kyísí emúmú, Osówo nké o/fé banet kányí ké atyém ne ba-sáng, ne nyi kiǐtí-chwǒm ké byěm ḿbyí ntûntû etángê ne ké banet ebîn ne ké bacê ekye ké byěm ḿbyí byi*fí ntûntû* ne ké bacê ekye to ké dyikpen ńdyí dyinong ekyú.

¹⁷ Eringe nyí onet mú mu o-fâ Osówo odaman ekwárê kanong kanong, o-kpá byiko to kanong, eringe nyí odachi bǎmkpóngé ḿbé banong nang bará.