2 Tyímótyi 2 - Bokyi Bible

Súja-Jisos Karâs mú mu o-kyâ ǎ Ofê

¹ Kyi-kim ne wo, ǎ wǎn ejí ké bubwô ḿbú Karâs, kyú shwaneshwane ké bubwô-kanong ńké Osówo, ńké nke ńké eten ké ocibi ne Jisos Karâs.

² Kúng byiraa ḿbyí a/jwo ńkyí me mu n-sét ng ké bushú-bantûesé chwóó, a-kye kámbyí ké abwô-banet ḿbé wo a/tî dyityém ne mbé, ne ba/chi ba-man etángê to banet bakíri.

³ Nung ké kafâ-afaníkong eri wǎ súja-Jisos Karâs mú mu o-kyâ ǎ ofê.

⁴ Súja mú mu o-chi i bǎmkpóngé o-ryuu ng o/fu, nyǐ o-chi i ńkyí kyidanyîn onet-dyishí emen, ne ké bubwô ámbu, oo*kúng byiko emen o-fé ké bǎmkpóngé ḿbé banet ḿbé ba*fí basúja*.

⁵ Nzónge ochéé mú mu o-kan n ochéé ne banet o-man n ekpógê, o-koo eyáré, â o/chi eringe nyí byije ḿbyí ochéé byi/sét.

⁶ Mkpang kyifát mú oo/chi bǎmkpóngé o-fé busa, o-man o-koo mbwôp kashú-byíkwôn ḿbyí badafuu ké kyifát ánkyi.

⁷ Kûkabe kyi-kim ne ńkyí me mu n-raa ng, ké nǎ, Otu Kyítá o/chi o-chi ǒ a-nyît kyikû-byěm kángkáng.

⁸ Zîim Jisos Karâs mú Osówo o/jwóbê ǎ ké bukyû, mú o/fím ké kyikû-banet ńkyí Otu Dívit wǎ eringe ba/sét ké Bǎmpém ḿbé Banong ḿbé me mu n-sét ng.

⁹ Me mu n-ri ng busông, ké ebóng, mu n-sét ng Bǎmpém ḿbé Banong, ne baa/fé mě bamgbokobá wǎ onet mú o/chi kyibî. Nké ejá nyí Osówo ba*da/fé kányí bamgbokobá*.

¹⁰ Ne ké bubwô ámbu, me mu n-ryí i ofit ké kángkáng byěm, ké bubwô ḿbú banet ḿbé Osówo o/cá kámbé, eringe nyí mbé to badakoo onyii mú mu ké Jisos Karâs, cibicibi ne busan ḿbú ragerage ḿbú ne banyá.

¹¹ Ńkyín kyi/sét ntûntû ńkyí kyi/fu, â be bii/kpú ne nyǐ, be byi/chi byi-kpen to ne nyǐ.

¹² Â be byimu byi-ryí i ofit byi-ca kashú, be byi/chi byi-ryí butu to ne nyǐ. Â be byi/né ǎ, nyǐ to o/chi o-né bě.

¹³ Â be byi*fí byi-fâ atyém eten ne nyǐ* nyǐ mu o-tî ng dyityém emen ne be, ké ebóng, nyǐ oo*man enîm byiko emen*.

Nchi Bǎmkpóngé mú Onong

¹⁴ Zîim banet eyên kyi-kim ne ńkyín, a-kuri kámbé ekó kanong kanong ké bushú ḿbú Osówo a/fu, ba*dachîshwôn ashwôn kyi-kim ne byiraa-Osówo*. Kanong ka*fí ányi* nké kyi-bên n banet ḿbé mbe ba-fwôo ng atông ba-jwo ng.

¹⁵ Kan byiko eyên kanong kanong, eringe adakoo akpee ké bushú ḿbú Osówo wǎ nchi bǎmkpóngé mú bǎmkpóngé emen ba*fí ba-chi i ǎ éshwân* ne wǎ onet mú mu o-tángê e kyitwóm ńkyí ntûntû mú Osówo kanong kanong.

¹⁶ Tî byiko eyên cát ké byibî-byiraa ne ké enyam-bǎmpém ḿbyí byidachi banet baa*fárâng to Osówo*.

¹⁷ Ńkyí mbé mbe ba-tángê e kyi/chi kyi-kyú wǎ kyibáp ńkyí nkyi kyi-ryí i enyam-byiko. Himényos ne Falyítus mbe ké burwám-banet ḿbé mbe ba-tángê e byěm ámbyi.

¹⁸ Mbé baa/mîng bukwóp ḿbú ntûntû, ne ké osêt mú mbé mbe ba-sét ng ba/fu, ojwóbe eten ké bukyû oo/chi nyáá, mbé ba-kú ba-yángê e dyityém efé ne Karâs ńdyí banet bakíri.

¹⁹ Nké kyikû-ekpe ńkyí Osówo oo/fé kyísí kii*nwa enáng* ne Osówo o/sáng byiraa ḿbyín ké nkyí o/fu, Otu Kyítá mu o-nyît ng banet ḿbé mbe ḿbé emen. Ne o/sáng to o/fu, nang yeě nké mu o-sét ng o/fu, nyǐ o/já Otu Kyítá, onet ámu o-man o-mîng byibî-byěm echi.

²⁰ Ké kiǐtí-kyise, acáng-byiryíng a-kyú u ké azong ké azong. Akíri ba/chi kányí ké syílyíba ne gûl, akíri ké byichí ne ecing. Akíri ba/tî dyizong-nkéré mú badachi dyijî ké nyǐ. Akíri ba/tî kányí ké nkéré nang orá nang orá.

²¹ Nang yeě nké o/tî byiko emen kpárám ké kángkáng byibî-byěm ḿbyín, Osówo o-tî ng dyizong-nkéré ńdyí odayip onet ámu ké ochíchí-biǐtí-byěm. Ké nǎ, Osówo oo/cá ǎ, ne mu kiǐtí ké bushú ḿbú Bonchí emen, ne oo/kwárê mú bada ǎ ekúng ké bǎmkpóngé ḿbé banong nang bará.

²² Mîng byibî-okabe mú bubwásíng, a-kûnwa eringe nyí adakoo kanong ńké Osówo ne dyityém efé ne Karâs, ne kyijé ne bunyîn-dyityém ḿbú Osówo, cibicibi ne banet ḿbé atyém nyí kpárádádát, ḿbé mbe ba-kó ng Otu Kyítá ba/fu, ochwáp kámbé.

²³ Nké tî byiko eyên cát ké enyam-okân ké dyishí mú ba*fí ba-nyît ng kyikû*. Wo amu a-nyît ng a/fu, mǔ o-cen ne ashwôn eshwôn.

²⁴ Ḿgbán mú Otu Kyítá oo*man o-shwôn bushwôn*. O-man o-cángê dyityém ne kángkáng banet. O-kyú ntánge byiraa-Osówo mú odaman etángê ne mú odaryí ofit,

²⁵ mú mu degere ké nkéré mú o-kú o-bwât ng byěm o-sét ng banet ḿbé ba*da/bángê ne nyǐ*. Kakíri Osówo o/chi o-kye kámbé mpât mú byiko byi/chi byi-kpú kámbé ba-mîng byibî ebe, ne ba-kpet enyît ntûntû.

²⁶ Ne babong ebe kâng ba/chi ba-wángê kámbé, ba-chêe ké kaǎtám ńké Otu-Byibî-Barím mú oo/kám kámbé o-chi kámbé ba-kpet echi ńkyí nyǐ mu o-ryuu ng.