2 Tesalónyan 3 - Bokyi Bible

Fé n̂g Nshwam ba-kye Osówo ké Bubwô Eten

¹ Ké nkuli kyikû, ǎ bwǎn-bané eten, fé n̂g nshwam ba-kye Osówo ké bubwô eten, eringe nyí kyitwóm ńkyí Otu Kyítá kyidakûce kashú kyi-kán n kyi-câ ochéé óchee, kyi-koo akpee wǎ eringe nyí byi/koo ké burwám enen.

² Fé n̂g nshwam to ba/fu, Osówo o/chi o-chi bě byi-fem ké abwô nyí bambên atyém ne byibî-banet. Ké ebóng, *chí kángkáng banet nké mbe ba-bángê e ké kyitwóm ńkyí byi/sét kámbé*.

³ Nké Otu Kyítá mu o-tî ng ocím emen mú o/ryí. Nyǐ o/chi o-chi běn ba-shwane, o-bám běn ké abwô nyí Otu-Byibî-Barím.

⁴ Ne Otu Kyítá mu o-kyâ bě dyityém efé ne ben. Be byimu byi-nyît ng byi/fu, ben bamu ba-chi i ńkyí be byi/sét běn, ne ba/chi ba-chîchi kánkyí ba-câ kashú.

⁵ Kyi/bát Otu Kyítá ochi atyém enen a-kyú ké kyijé ne Osówo, ne a-kyú to ké dyityém ecíp ńdyí Karâs mu o-kyâ.

Kyú n̂g ne Busa ḿbú Bǎmkpóngé echi

⁶ Ké dyizîn ńdyí Jisos Karâs, Otu Kyítá, be byimu byi-sét ng běn ké busa, ǎ bwǎn-bané eten, byi/fu, *da n̂g ecibi ne barî-banet eten ḿbé ba/bángê ké Karâs* ḿbé mbe ba-kyú u akpen nyí dyidare echi* ḿbé ba*fí ba-chi i ńkyí be byi/sét běn*.

⁷ Ben bayén bamu ba-nyît ng kanong kanong ba/fu, ben ba-man ba-kûchi byěm wǎ eringe nyí be byi/chi. Be byi/mû byi*fí byi-dare ng* ké nkéré byi/mû ne ben*.

⁸ Be byi*da/koo byiryíng ḿbyí onet nang obónge* mú byi*da ǎ ekye akpuga*. Nké be byi/chi bǎmkpóngé byi-fé busa, buchú ne esû, eringe nyí bii*ba/chi byi-fé onet nang obónge ké busông*.

⁹ Be byi/chi ńkyín, *chí wǎ byi/mû byi*fí ne busa ḿbú byida běn efu, nen n̂ bě*. Nké be byi/chi ńkyín, eringe nyí ben badakúng kyiká-édúú ánkyi.

¹⁰ Ké nkéré mú be byi/mû ne ben, be byi/sét běn byi/fu, nang yeě nké o*fí o-ryuu ng o/fu, nyǐ o-chi i bǎmkpóngé* *da n̂g echi ba-kye onet ámu byiryíng*.

¹¹ Be byi/raa ńkyín, ké ebóng, byi/jwo ba/fu, banet bakíri mbe kô ké burwám enen ḿbé mbe ba-dare ng, ḿbé ba*fí ba-chi i kyikíri* kyi-cibi ne abwô ebe efé ké byěm ḿbyí ba*da/kó kámbé*.

¹² Ké bubwô ḿbú Jisos Karâs, Otu Kyítá, be byimu byi-sét ng banet ámbe, byi-kuri ng kámbé ekó. Mbé ba-man ba-kûkyú dyikpen ńdyí dyinong, ba-chi i to bǎmkpóngé, eringe nyí badakûkyú ké dyikpen, ké byiko ebe.

¹³ Nké ben, ǎ bwǎn-bané eten, baa*man ba-kyee ké byěm ḿbyí byinong echi*.

¹⁴ Onet o-man n ekyú ányi ké burwám enen mú oo*ba/chi o-chi ńkyí be byimu byi-sáng ng byi-kye běn ké léta mún*. Â nkyi éné, kpúrî n̂g dyizong-onet ándyi, ba*dachi ba-kyú ba-fárâng ǎ* eringe nyí éshwân eda ǎ ewuri.

¹⁵ Nké *da n̂g echi ba-tî ǎ wǎ onet-bushwôn*. Nké kuri n̂g ǎ ekó wǎ wǎn-boné enen.

Bankuli Kyikû-Byiraa

¹⁶ Kyi/bát Otu Kyítá oyén mú mu o-kyâ bě bunyîn-dyityém, okye běn bunyîn-dyityém emen kángkáng nkéré ké kángkáng akwóp. Otu Kyítá okyú ne ben ashí amúmú.

¹⁷ Me n/yip bubwô ejí me oyén n-sáng ńkyín n/fu, me Pôl n/ta běn kyiraa. Něen nké me mu n-sáng ng, n-fâ dyizîn ejí ké léta nang orá.

¹⁸ Kyi/bát ochwâp mú Jisos Karâs, Otu Kyítá eten okyú ne ben ashí amúmú.